གཉིས་པ།  མཚོ་ཆེན་ཁྲི་ཤོག་རྒྱལ་མོ།

          མདོ་སྨད་བྱང་ཕྱོགས་ཀྱི་མཚོ་ཆེན་མཚོ་སྔོན་པོའི་མིང་ལ་ཁྲི་ཤོག་རྒྱལ་མོ་དང་ཁྲི་ཤོར་དང་ཁྲི་གཤོག་བཅས་མིང་མི་འདྲ་བ་དུ་མ་འབོད་སྲོལ་ཡོད་ནའང་། དེ་དག་ཁྲི་ཤོག་ཅེས་པའི་བརྡ་ཟུར་ཆགས་ལས་ཐོན་པ་ཙམ་ལས་སྒྲ་བཤད་སོ་སོར་མེད་ལ་དོན་གཅིག་པ་ཡིན། སྔོན་ཆད་ཁྲི་སྡེས་ཙོང་ཁ་ཡུལ་ཁག་བཅོ་བརྒྱད་བཅས་ད་ལྟའི་མཚོ་སྔོན་འདི་མངའ་མཛད་སྐབས། དེའི་མངའ་འབངས་ལ་ཁྲི་འབངས་དང་དབང་དུ་བྱས་བའི་སྡེ་བའམ་ཤོག་ཁ་ལ་ཁྲི་སྡེའམ་ཁྲི་ཤོག དེའི་ཡུལ་དུ་འཁྱིལ་བའི་མཚོ་སྔོན་པོ་ལ་ཁྲི་ཤོག་རྒྱལ་མོ་བཅས་ཐ་སྙད་ཐོགས་པར་སྙམ་སྟེ། ཁྲི་ཤོག་ཅེས་པའི་མིང་འདི་ཁྲི་སྡེས་དབང་བསྒྱུར་བའི་མངའ་སྡེ་ལ་བྱས་ན་ལོ་རྒྱུས་དང་ཆོས་འབྱུང་ཁག་དང་མཐུན་པར་ཡོད་དེ། 《མདོ་སྨད་ཆོས་འབྱུང》ལས། མཚོ་སྔོན་དཔོན་ཁག་གི་ལོ་རྒྱུས་གསུངས་སྐབས། འོད་ལྡེ་ལ་སྲས་བཞི་བྱུང་བའི་གཉིས་པ་ཁྲི་ལྡེ་མདོ་ཁམས་སུ་བྱོན། མཚོ་སྔོན་འདིར་གཞི་བཟུང་སྟེ་ཁྲི་དཔོན་མཛད།   ཙོང་ཁ་ཡུལ་ཆེན་བཅོ་བརྒྱད་སོགས་མདོ་སྨད་ཕལ་ཆེར་ལ་མངའ་མཛད་པའི་རྒྱུད་དུ་སྤྱན་སྔ་དོན་ཆེན་པ་སོགས་བྱུང་བར་བཤད་ལ།   ཡང《 ཐུའུ་བཀྭན་རྣམ་ཐར་པད་དཀར་ཆུན་པོ》ལས། འོད་ལྡེ་ལ་སྲས་བཞི་བྱུང་བའི་གཉིས་པ་ཁྲི་ལྡེ་འབངས་མི་མང་པོ་དང་བཅས་མདོ་སྨད་དུ་ཐོན་ཅིང་།  མཚོ་ཁྲི་ཤོག་རྒྱལ་མོའི་འགྲམ་བོད་ཀྱིས་བཟུང་སྟེ།   ཆོས་རྒྱུད་གདུང་རྒྱུད་དེས་ཁྲི་དཔོན་མཛད་ཅིང་།  བྲ་ཉང་བཙན་བྱ་བས་རྒྱལ་བོའི་བློན་གྱི་གཙོ་བོ་བྱས་ཚུལ་རུས་མཛོད་ཟ་འོག་རས་མ་ལས་འབྱུང་། ཞེས་སོགས་གསུངས་པ་བཞིན། བོད་བཙན་པོའི་གདུང་རྒྱུད་ལས་མཆེད་པའི་ཁྲི་ལྡེས་མདོ་སྨད་ཡུལ་གྱི་ཙོང་ཁ་དེང་གི་མཚོ་སྔོན་དུ་གཞི་བཟུང་སྟེ་རྒྱལ་བོ་བྱས་པ་དང་ཞེས་སོགས་གསུངས་པར་གཞིགས་ན། ཁྲི་ཤོག་རྒྱལ་མོ་ཞེས་པ་བོད་རང་གི་ལོ་རྒྱུས་ཀྱི་རྫོང་ཐུག་ས་ཞིག་དང་འགྲེལ་ཆགས་པར་མ་ཟད་དོན་དངོས་སུའང་དེ་ལྟར་ཡིན་བསམ་བྱུང་། དེས་ན་རྡོ་ལེབ་བླངས་ཏེ་མཚོ་འཕྱུར་བ་དང་སྡེ་བའམ་དུད་ཁྱིམ་ཁྲི་མཚོ་འོག་ཏུ་ཤོར་བ། སློབ་དཔོན་པདྨས་རྒྱ་གར་གྱི་རི་བོ་ཞིིག་གི་མགོ་བཅད་དེ་འཕངས་པས་མཚོ་འཕྱུར་བ་བཀག་པ། མཚོ་ནང་དུ་ཆུ་བོ་ཁྲི་བབས་པས་ཁྲི་གཤོག་ཟེར་བ་སོགས་དཔྱད་བཟོད་མི་ཐུབ་པའི་བཤད་ཡམ་ཏུ་སྣང་། དེང་རབས་ཚན་རིག་པས་ཀྱང་མཚོ་སྔོན་པོ་ལོ་ཁྲི་ལྷག་གི་སྔོན་ནས་ཡོད་ཚུལ་བཤད།

     རྒྱལ་བ་གཉིས་པ་ཤར་ཙོང་ཁ་པ་ཆེན་པོ་ལྷ་ལྡན་དབུས་སུ་ཕེབས་དུས་མཚོ་སྔོན་པོའི་ལྷོ་འགྲམ་གྱི་གནའ་ལམ་དེ་བརྒྱུད་ནས་ཕེབས་ཁར་མཚོ་འདི་བྱིན་གྱིས་རླབས་པར་གྲུབ།

བླ་བྲང་བཀྲ་ཤིས་འཁྱིལ་གྱི་དགེ་བའི་བཤེས་གཉེན་ཆེན་མོ། བདག་གི་དགེ་རྒན་ཐུགས་རྗེ་ཅན་རྗེ་བློ་བཟང་རྒྱ་མཚོ་མཆོག་གིས་༼ལ་མོའི་ཡོངས་འཛིན་རིན་པོ་ཆེའི་རྣམ་ཐར།༽དུ། དེ་ཡང་རྒྱལ་བས་ལུང་གིས་ཟིན་པའི་མཚོ་སྨན་གྲགས་པ་ཅན་ཞེས་བྱ་བ་བྱང་ཆུབ་སེམས་དཔའི་སྐྱེས་རབས་ཀྱི་རྒྱུད་ལས། ཇི་སྐད་དུ། དེ་ནས་ཨནྡྲ་རྙིལ་གྱི་མདངས་ལྟར་སྔོ།།ཉི་མའི་འོད་ཀྱིས་གནམ་སྔོན་བཞུས་པ་བཞིན།།ཁོ་ར་ཁོར་ཡུག་ཆུ་འགྲམ་ལྟར་མི་སྣང་།།གཏིང་དཔག་དཀའ་བའི་མཚོ་འཇིངས་ནང་དུ་ཞུགས།།ཞེས་སྟོན་པ་ཐུགས་རྗེ་ཅན་ཉིད་ཀྱིས་བསྔགས་བརྗོད་གནང་བ་དང་། རྒྱལ་བུ་དཀོན་མཆོག་འབངས་ཀྱི་སྐྱེས་རབས་ལས། མཚོ་དམའ་མོ་གཡུ་ཡུ་མཎྜལ་ཡོད།།ཅེས་དང་། ཆོས་རྒྱལ་སྲོང་བཙན་སྒམ་པོས། ཁྲི་ཤོར་རྒྱ་མཚོའི་ཀླུ་བློན་བྱང་ཆུབ་སེམས།།ཆུ་བོ་ཆེན་པོ་ཀུན་ལ་ཕན་པར་མཛད།།ཅེས་སོགས་ལྟར། ཞེས་མཚོ་སྔོན་ཁྲི་གཤོག་རྒྱལ་མོ་འདི་ཉིད་རྒྱལ་བ་སངས་རྒྱས་ཀྱིས་ལུང་བསྟན་ཅིང་ཀླུ་བློན་བྱང་ཆུབ་སེམས་དཔའ་གནས་ཡོད་པར་གསུངས།

     གཞན་ཡང་། རྒྱལ་བ་ཡོན་ཏན་རྒྱ་མཚོ་མཆོག་གིས་ཀྱང་བཀའ་གདམས་གླེགས་བམ་གྱི། མཚོ་དམའ་མོ་གཡུ་ཡི་མཎྜལ་ཡོད།།ཅེས་པ་དེ་མཚོ་འདི་ལ་ངོས་འཛིན་གནང་ཡོད།

ལ་མོའི་ཡོངས་འཛིན་རིན་པོ་ཆེའི་ཞལ་ནས། ཕྱོགས་བཅུའི་དགེ་མཚན་གཡང་དུ་འཁྱིལ་བ། བཻཌཱུར་སྔོན་པོ་ཞུན་མའི་དཔལ་འཛིན། ཀླུ་རྒྱལ་བྱང་ཆུབ་སེམས་དཔའི་རོལ་གནས། གཏེར་མཛོད་གཡུ་མཚོ་ཁྲི་ཤོར་རྒྱལ་མོ། མ་དང་མཁའ་འགྲོ་འདུ་བའི་གནས་ཆེན། ཞེས་གསུངས་པ་ལྟར་རོ།། མཚོ་ནང་དུ་ཆུ་ཁྲི་འདུས་ཟེར་བ་དང་ཆུ་བོ་བརྒྱ་དང་བརྒྱད་འདུས་ཟེར་བ་སོགས་ཡོད་ཀྱང་། ད་ལྟ་མཚོ་སྔོན་པོའི་ཕྱོགས་ཕྱོགས་ནས་ཆུ་ཆེ་ཆུང་མི་འདྲ་བ་ལྔ་བཅུ་༼༥༠༽ཙམ་མཚོ་ནང་དུ་འབབ་བཞིན་ཡོད་པས་མཚོ་སྔོན་པོ་སྐམ་མི་སྐམ་ཆུ་དེ་དག་སྐམ་མི་སྐམ་ལ་རག་ལས་ཡོད།

   ལོ་རྒྱུས་སུ་མཚོ་སྙིང་ན་ཆུ་རྟའམ་ཀླུ་རྟ་ཡོད་པས་ཆེས་སྔ་མོའི་དུས་སུ་འ་ཞའི་རྒྱལ་ཁབ་ཀྱིས་དགུན་དུས་དར་ཐོག་ནས་རྒོད་མ་མང་བོ་མཚོ་སྙིང་དུ་དེད་ཅིང་འཚོ་སྐྱོང་བྱས་ན་སོས་ཀར་དེ་དག་མཚོ་རྟ་དང་བསྡེབས་ཤིང་། དེའི་རྒྱུད་པ་རྣམས་ནི་ཉིན་རེར་ལེ་དབར་སྟོང་ལ་བསྐྱོད་པའི་རྟ་མཆོག་ཅང་ཤེས་འབའ་ཞིག་ཡིན་ཟེར། རྗེས་སུ་རྒྱ་ནག་སེའུ་གུར་གྱི་གོང་མ་སེའུ་དབྱང་ཏི་ཡིས་ཀྱང་མཚོ་སྙིང་ནས་རྟ་འཚོས་པའི་ལོ་རྒྱུས་ཡོད་ལ། མཚོ་སྙིང་གི་ཀླུ་རྟའི་རྒྱུད་པ་དེ་བོད་ཀྱི་མཚོ་སྔོན་སོགས་མདོ་སྨད་སྤྱི་དང་བྱེ་བྲག་རྟ་ཐང་དང་ཙོང་ཆུའི་འབབ་རྒྱུད་སོགས་སུ་ད་ལྟའི་བར་མ་ཉམས་པར་ཡོད་པའི་བཤད་སྒྲོས་ཡོད་ཀྱང་ཡོད། རྒྱའི་ཡི་གེ་འགའ་རེར་ཀྲུང་གོའི་སྙན་གྲགས་ཅན་གྱི་རྟ་མཆོག་གི་ཕ་ཡུལ་ཞེས་པའི་མིང་ཡང་བཏགས་ཡོད། སྔོན་ཆད་རྒྱའི་ཐང་དང་སུང་གི་དུས་སུ། མཚོ་སྔོན་པོ་འདི་ཡི་བདག་དབང་ཐད་རྩོད་པ་དང་དམག་འཐབ་ལན་མང་བོར་ཤོར་མྱོང་ལ། རྒྱ་རྣམས་ཀྱིས་མཚོ་འདི་ལ་མཆོད་པ་བྱེད་པའི་སྲོལ་ཡང་བྱུང་འདུག རྗེས་སུ་ཆིན་རྒྱལ་རབས་ཀྱི་གོང་མ་ཡུང་ཀྲིན་གྱི་དུས་༼སྤྱི་ལོ༡༧༢༦༽ནས་མཚོ་མཆོད་ཀྱི་སྲོལ་ཚུགས་ཤིང་། ཆན་ལུང་གི་ཁྲི་ལོ་སོ་བརྒྱད་པ༼སྤྱི་ལོ་༡༧༧༣༽ནས་ལོ་རེའི་སྟོན་ཟླ་བདུན་པའི་བཅོ་ལྔའི་ཉིན་མཚོ་མཆོད་ཀྱི་ཉིན་མོར་གཏན་འཁེལ་བྱས། རྗེས་སུ་སྲོལ་དེ་ཡོངས་སུ་ཉམས་ཟིན་མོད། ད་ལྟ་སླར་ཡང་སླར་གསོ་བྱེད་བཞིན་པའི་སྒང་ཡིན་འདུག་ཟེར།

    དེང་རབས་ཚན་རིག་པས་བརྟག་དཔྱད་བསྡོམས་ཚིག་ཏུ།མཚོ་སྔོན་པོ་ཐོག་མར་ཚྭ་མེད་པའི་མཚེའུ་ཞིག་ཡིན་ཀྱང་ཧ་ལམ་ལོ་ཁྲི་གཅིག་གི་སྔོན་དུ།མཚོ་ཁུལ་གྱི་དྲོད་ཚད་རིམ་བཞིན་ཇེ་མཐོར་སོང་།མཚོ་ཆུ་རླངས་པར་གྱུར་བའི་ཚད་དེ་ཆུའི་འབབ་ཚད་ལས་བརྒལ་བར་བརྟེན།རིམ་བཞིན་ཇེ་ཆུང་དུ་སོང་བར་བཤད་པ་ལྟར།མཚོ་སྔོན་པོ་རྨིད་བརྒྱ་མར་ལ་བྲི་སྟེ་རིམ་བཞིན་མཚོ་སྙིང་དང་མཚེར་བ་རི།བྲག་དཀར་སྤུན་གསུམ།གླང་ཆེན་མཆེ་བ།བྱེ་མ་ལ་བདུན་རྣམས་ཐོན་པར་མ་ཟད།མཚོ་ཆུང་དང་མཚོའི་རྣ་ལུང་སོགས་སོ་སོར་གྱེས་པ་ཡིན་ཞེས་བཤད།འདིས་མཚོ་འཕྱུར་ཏེ་དུད་ཁྱིམ་ཁྲི་བསྣུབས་པ་དང་སློབ་དཔོན་པདྨས་རྒྱ་གར་གྱི་རི་བོ་མ་ཧ་དེ་བའི་མགོ་བཅད་དེ་ཞེས་སོགས་ཆོས་ཉིད་ཀྱི་རིགས་པ་དང་གཏན་ཚིགས་རིགས་པ།ལྷག་པར་ལོ་ཚིགས་བརྟག་དཔྱད་རིག་པ་དང་མི་མཐུན་པའི་བཤད་ཡམས་ཤ་གཟུག་དེ་དག་རིག་སྨྲ་རྣམས་ཀྱིས་ཟ་རྐྱང་མིན་པར་བྱས་ཡོད།། མཚོ་འདིའི་ཤར་ན་ཨ་མ་ཟོར་དགུ།ལྷོ་ན་བློན་པོ་གསེར་ཆེན།ནུབ་ན་བྲག་དཀར་ཐེམ་ཆེན།བྱང་ན་རྫ་དམར་མཐོན་པོ་བཅས་མཚོ་མོའི་ནང་རྫ་བཅུ་གསུམ་གྱིས་མཐའ་བསྐོར་ནས་ཡོད་ལ།མཚོ་སྙིང་མ་ཧཱ་དེ་ཝ།མཚེར་བ་རིའམ་བྱ་གླིང་།བྱེ་མ་ལ་བདུན།ཀླུའི་གནས་སྒོ།ཏཱ་ལེའི་ཆུ་མིག ཆུ་མིག་བརྒྱ་རྩའི་གནས་སྒོ།གླང་ཆེན་མཆེ་བའི་གནས་སྒོ།པཎ་ཆེན་ལབ་ཙེ།མགོན་པོའི་གདོང་།ལྷ་མོའི་དྲེའུ་གནས་སྒོ།ཁྲུང་ཁྲུང་དཀར་མོའི་གླིང་སོགས་ལ་དད་མོས་དང་འབྲེལ་བ་ཆེས་ངོ་མཚར་ལྡན་པའི་གཏམ་མང་བོ་ཡོད་ཀྱང་མ་བྲིས།

    མདོ་ཁམས་ཀྱི་གཡེར་མོ་ཐང་ཞེས་པའི་མིང་འདི་ཁྲི་སྲོང་ལྡེ་བཙན་དུས་ནས་ཡོད་དེ།ཉང་ཉི་མ་འོད་ཟེར་གྱི་ཆོས་འབྱུང་ལས།མཁན་སློབ་ཆོས་གསུམ་གྱིས་བསམ་ཡས་གཙུག་ལག་ཁང་བཞེངས་དུས་སུ།སློབ་དཔོན་གྱིས་བསྟན་མ་བཅུ་གཉིས་དང་ཡར་ལྷ་ཤམ་པོ།གཉན་ཆེན་ཐང་ལྷ་སོགས་དམ་ལ་བཀོད་ཀྱང་རྨ་རྒྱལ་སྦོམ་རས་བཀའ་མ་ཉན་པས།ཁོའི་རྐང་བ་གཡས་པ་ཁམས་ཀྱི་གཡེར་མོ་ཐང་ལ་བཞགགཡོན་པ་བསམ་ཡས་ཧས་པོ་རི་ལ་བཞག་སྟེ།ཞེས་སོགས་རྫུ་འཕྲུལ་གྱིས་དབང་དུ་བྱས་པར་གསུངས་པའི་དུས་ནས་གཡེར་མོ་ཐང་ཞེས་མིང་བརྡ་འདི་ཡོད།སྔོན་གྱི་ཆོས་འབྱུང་རྙིང་བ་ལ་ལར་དབྱར་མོ་ཐང་ཞེས་བྲིས་ཡོད་པའང་མཐོང་མྱོང་། དགུང་མོར་ང་ཚོའི་ཚན་ཆུང་གིས་སྐྱེ་ཁམས་ཁོར་ཡུག་སྲུང་སྐྱོབ་ཐད་ཀྱི་བགྲོ་གླེང་ཞིག་བསྡུས།དེའི་སྟེང་ཨ་ཁུ་བློ་བཟང་ལྷུན་གྲུབ་རྡོ་རྗེ་མཆོག་གིས་འདི་ལྟར་གསུངས།མཚོ་སྔོན་པོ་ནི་མདོ་དབུས་མཐོ་སྒང་གི་ཆེས་མཛེས་པའི་རྒྱན་ཆ་ལྟ་བུ་དེ་ཡིན་པ་མ་ཟད། མཚོ་སྔོན་ཞིང་ཆེན་གྱི་མིང་ནི་མཚོ་སྔོན་པོ་ལས་བྱུང་བ་དང་། མཚོ་སྔོན་པོ་ནི་མཚོ་སྔོན་གྱི་མིག་དང་མིང་བྱང་ལྟ་བུའང་ཡིན། ཆོས་ལུགས་དང་མདོ་སྨད་ལོ་རྒྱུས་ཀྱི་ཆེས་གད་འགངས་ཆེ་བའི་གནས་ཆེན་ཤིག་ཀྱང་རེད།དེས་ན་ང་ཚོས་ཀྱང་མཚོ་སྔོན་པོ་རང་གི་མིག་བཞིན་དུ་སྲུང་སྐྱོབ་བྱེད་རྒྱུ་འདི་མི་རེ་རེས་འགན་འཁྲི་གཙོ་བོ་ཡིན་ཞིང་ཕ་མེས་ཡང་མེས་ཀྱིས་འདི་ལ་དད་མོས་དང་བརྩི་སྲུང་བྱས་པ་བཞིན་ང་ཚོས་ཀྱང་འདི་ལ་རྩི་བཀུར་དང་སྲུང་སྐྱོང་བྱ་དགོས ཚན་རིག་པས་ཚོད་དཔག་ལྟར་ན་མཚོ་སྔོན་པོ་འདི་རྨིད་བརྒྱ་ཙམ་མར་ལ་བྲི་སོང་བས་ད་ལྟའི་མཚོ་ལྟ་བུ་གཉིས་ཆེ་ཆུང་ལ་སོང་།དེ་དག་གཙོ་བོ་མཁའ་དབུགས་དྲོད་ཚད་མཐོ་རུ་སོང་བ་དང་གནམ་འབབ་ཚད་མ་འདང་བས་ཆར་ཆུ་ཇེ་ཉུང་ལ་སོང་བ།དེ་བས་ཆུ་ཕྲན་མང་བོ་སྐམ་པ་སོགས་རང་བྱུང་གི་གནོད་འཚེ།ཕྱུག་ཟོག་མང་ཆེ་སྟེ་རྩྭ་ས་མ་འདང་བའི་རྐྱེན་གྱིས་སའི་བཅུད་ཉམས་པ། གཞན་ཡང་།ཤ་ཁྲག་ཆུ་ལ་འདྲེས་པ་དང་གསུར་རྡུར་སོགས་ཀླུ་དང་མཚོ་ལ་གནོད་པའི་བྱ་བྱེད་ཀྱིས་ཁོར་ཡུག་ཉམས་ཤིང་མཚོ་སྐམ་པའི་གནས་ཚུལ་མཐོང་། དེས་ན་ང་ཚོས་ཀྲུང་དབྱང་གིས་བཏོན་པའི་མཚོ་བོད་མཐོ་སྒང་རི་ཆུའི་རིག་གནས་སྲུང་སྐྱོངབ་དགོངས་དོན་ལག་བསྟར་དང་།བོད་མི་རིགས་ཀྱི་སྲོལ་རྒྱུན་དར་སྤེལ། ནང་ཆོས་ཀྱི་རི་ཆུ་དང་སྲོག་ལྡན་ལ་སྲུང་སྐྱོང་དགོས་པའི་བསམ་བློར་མཐོང་ཆེན་བྱས་ནས་ཚེ་སྲོག་གི་འདྲ་མཉམ་རིན་ཐང་དང་སྐྱེ་ཁམས་ཀྱི་ལྟ་བར་ལྟ་བར་སློབ་སྦྱོང་དང་ལག་ལེན་བྱས་ཏེ། རྒྱལ་ཁབ་ཀྱི་འཛུགས་སྐྲུན་ལས་དོན་ཐད་བྱ་བ་ཕྲན་བུ་རེ་སྒྲུབ་དགོས། སླད་ཕྱིན་ཁོར་ཡུག་སྲུང་སྐྱོབ་དང་འབྲེལ་བ་ཡོད་པའི་རྒྱལ་ཁབ་ཀྱི་ལས་ཁུངས། བརྙན་འཕྲིན། ཚགས་པར། དུས་དེབ། སྤྱི་ཚོགས་སྟེང་གི་ལས་རིགས་སོ་སོ། དགོན་སྡེ། སློབ་གྲྭ། སྡེ་བ། ཐ་ན་ཁྱིམ་ཚང་རེ་རེ་དང་མི་སྒེར་བཅས་ལ་མཚོ་སྔོན་པོ་སྲུང་སྐྱོབ་བྱེད་དགོས་པ་ཁྱབ་བསྒྲགས་བྱས།སློབ་གསོ་བཏང་།ཤེས་ཡོན་སྤེལ་ཏེ་ཁོར་ཡུག་སྲུང་སྐྱོབ།རྩ་ས་བཀོལ་སྤྱོད་བྱེད་ཚད།ཆུ་དང་ཆུ་མགོ་ལ་གཅེས་སྤྲས་བྱེད་པ།གཏེར་དང་དར་ལྕོག རླུང་རྟ་སྦུར་བ།བསངས་གསུར་གཏོང་བ་སོགས་ལ་ཚད་དང་རན་པ་བྱ་རྒྱུ་བཅས་བྱས་ནས་དྭངས་གཙང་།མཛེས་སྡུག་གི་ཡུལ་ལྗོངས་ཤིག་ཏུ་བསྒྱུར་རྒྱུ་དེ་ཡིན།ཞེས་གསུངས་བྱུང་།

 ཞེས་སྤྱི་ལོ་ཉིས་སྟོང་བཅོ་ལྔ་ལོར་ཟླ་བརྒྱད་པའི་ཚེས་བཅུ་གསུམ་ཉིན།སྐུ་ཕྱོགས་ཨོའུ་རྒྱའི་སྤྲུལ་མིང་བ་བློ་བཟང་འཇམ་དཔལ་དགྱེས་པའི་རྒྱ་མཚོ། མིང་གཞན་གསེར་ལག་ཏུ་འབོད་པས་བོད་གསང་སྔགས་རིག་གནས་བྱང་ཆུབ་གླིང་དུ་བྲིས་པ་དགེའོ།། །།

རྩོམ་ཡིག་མཁོ་སྤྲོད་པ།  སྐབས་བཞི་བའི་མཐར་ཕྱིན་སློབ་མ་ནག་ཙན་དན། 

---

རྩོམ་སྒྲིག་འགན་འཁུར་བ།  ཁཱ་ཤེས་རབ་རྒྱ་མཚོ།  མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།