རྗེས་དྲན་དད་པའི་རླབས་ཕྲེང་།
བཛྲ་ཚུལ་ཁྲིམས་རྒྱ་མཚོ།
བགྲང་ཡས་རྒྱལ་པའི་མཁྱེན་བརྩེའི་གུར་ཀུམ་རྡུལ།།
མཚན་བཟང་འོད་ཞགས་རྩེ་དགས་དམ་འཁྱུད་པ།།
ཡེ་ཤེས་ལྷ་མཆོག་བརྟན་པའི་འཁོར་ལོ་དང་།།
དབྱེར་མེད་བླ་མ་སྤྱི་གཙུག་རྒྱན་དུ་རོལ།།
འཇིགས་མེད་རྣམ་བཞིའི་བང་རིམ་བརྩེགས་པའི་སྤོར།།
བསྟན་པའི་གཞི་མ་བསླབ་གསུམ་ཁང་བཟང་དུ།།
གཞན་ཕན་ནོར་བུའི་ཁྲི་ལ་མངའ་བསྒྱུར་མཁན།།
ཟླ་བྲལ་སྨྲ་བའི་དབང་ཕྱུག་སྙིང་ནས་དྲན།།
མ་ལུས་ཤེས་བྱའི་རང་བཞིན་ཆུ་ཟླའི་འོད།།
ཡེ་ཤེས་མེ་ལོང་གསལ་བར་མངོན་བཀོད་པས།།
བསྐལ་མང་སྔོན་ནས་སྐྱེ་འཆི་ས་བོན་བཅས།།
རྩད་ནས་སྤངས་པའི་གོ་འཕང་རྩེར་སོན་ཀྱང་།།
འཇིགས་རུང་དུ༠ཁ་སྟོང་གིས་རྟག་གཙེ་ཞིང་།།
མཐའ་བྲལ་སྲིད་མཚོར་བྱིང་བའི་འགྲོ་རྣམས་ལ།།
བརྩེ་ཆེན་འོད་ཞགས་རྣོན་པོས་རབ་སྦྲེལ་བས།།
ཞིང་འདིར་སྤྲུལ་བའི་རོལ་གར་ཅི་ཡང་སྟོན།།
འཇལ་དཔལ་གཞོན་ནུ་མཚན་དཔེའི་གཟི་བྱིན་གྱིས།།
རྣམ་པར་མཛེས་པའི་རང་བཞིན་མ་དོར་བར།།
ཡེ་ཤེས་སྣང་བ་ལས་གྲུབ་ལྷུམས་ཀྱི་གཞིར།།
ཞུགས་པའི་ངོ་མཚར་ཡུམ་གྱིས་དངོས་སུ་མྱོང་།།
དེ་ནས་གཟུགས་སྐུའི་སྐྱེ་མཆེད་རྫོགས་པའི་མཐར།།
བསམ་གྱིས་མི་ཁྱབ་མཁྱེན་བརྩེ་ནུས་པའི་མཛོད།།
ངོ་མཚར་དགེ་མཚན་འབུམ་གྱི་འོད་ཕུང་དབུས།།
མཐའ་ཀླས་འགྲོ་བའི་གཉེན་གཅིག་བདེ་བར་བལྟམས།།
ཐ་མལ་སྐྱོན་གྱིས་མ་གོས་གཞོན་ནུ་ནས།།
རླབས་ཆེན་སྤྱོད་པས་ཆེར་རློམ་ཁེངས་པ་བསྙིལ།།
དེ་ཕྱིར་བསྟན་འགྲོའི་དཔུང་གཉེན་མཆོག་གོ་ཞེས།།
སྙན་པའི་རྔ་ཆེན་ཕྱོགས་ཀྱི་མཛེས་མས་བརྡུངས།།
མི་རིང་ཀུན་མཁྱེན་བླ་མའི་བཀའ་ལུང་མཆོག །
གསེར་གྱི་ཅོད་པན་དབུ་ལ་ལེགས་བསྩལ་བས།།
ཁྲི་ཆེན་གུང་ཐང་ཁྲི་ལ་མངའ་གསོལ་ཚེ།།
བཀུར་འོས་གང་ཁྱོད་ཀུན་གྱིས་གཙུག་གིས་བཀུར།།
དོན་དམ་དུ་ནི་རྒྱལ་ཀུན་མཁྱེན་པ་དང་།།
འགྲོ་ལ་གཅིག་ཏུ་བརྩེ་བ་ཐུགས་རྗེའི་གཏེར།།
མི་བཟད་འཇིགས་ལས་སྐྱོབ་པའི་ནུས་པ་ཀུན།།
གཅིག་ཏུ་བསྡུས་པ་བླ་མར་ཤར་བ་ཉིད།།
ཐུན་མོང་དུ་ཡང་ལང་ཚོ་གཞོན་ནུའི་དུས།།
ཟླ་བྲལ་མཁྱེན་དཔྱོད་འོད་སྟོང་སྤྲས་པའི་མཐུས།།
མཁས་རློམ་འབུམ་སྡེའི་ཁེངས་པ་བསྙིལ་བ་ན།།
གཟུར་གནས་ཀུན་གྱི་དད་པའི་པད་ཚལ་རྒྱས།།
ཁྱོད་ནི་མཐའ་ཀླས་འགྲོ་བའི་མིག་གཅིག་སྟེ།།
རྒྱལ་བསྟན་ཆུ་སྐྱེས་བཞད་པའི་འོད་ཀྱི་གཏེར།།
སྐལ་ལྡན་གདུང་བ་སེལ་བའི་བསིལ་ཟེར་ཅན།།
ཀུན་གྱི་རེ་སྐོང་དཔག་བསམ་ལྗོན་པའང་ཡིན།།
འོན་ཀྱང་རིང་ནས་ཉོན་མོངས་ཀྱིས་བསླད་པའི།།
སྐལ་ངན་ཡིད་ལ་གཟན་པ་མཚར་དུ་ཅི།།
འབྱུང་བྱའི་མིག་ལ་མུན་པ་རབ་སྟེར་བའི།།
ཉིན་བྱེད་ནོར་བུའི་འོད་ལ་སུ་ཞིག་སྨོད།།
མངོན་གྱུར་བསྟན་ཀྱང་མི་ཤེས་མི་མཐོང་ཞིང་།།
ཤིན་ལྐོག་ཐོགས་མེད་མཁྱེན་པའི་གྲུབ་རྟགས་ཏེ།།
འགལ་འདུའི་ཕུང་བོར་སྟོན་ཕྱིར་ཡོན་ཏན་གཞི།།
བཤེས་གཉེན་ཚུལ་བཞིན་བསྟེན་པའི་རྣམ་ཐར་བཞེས།།
གནས་ལྔ་མ་བསླབས་ཀུན་མཁྱེན་མི་འཐོབ་ཅེས།།
རྒྱལ་བའི་བཀའ་དེ་ཚད་མར་བྱེད་བཞིན་དུ།།
བཀའ་པོཏ་ལྔ་ལས་གནས་གཞན་སྤང་བྱ་རུ།།
འུད་ཀྱིས་སྒྲོག་པའང་བླུན་པར་སྟོན་སླད་དུ།།
མདོ་སྔགས་རིག་གནས་མ་ལུས་སྦྱོང་བའི་ཚུལ།།
མཛད་ཅིང་འཆད་རྩོད་རྩོམ་པའི་ང་རོ་ཡིས།།
ཕྱོགས་རིས་ཙམ་གྱིས་ཁེངས་པའི་གཉིས་འཐུང་ཚོགས།།
སྙིང་རྩ་ལྐོག་མར་འབྱིན་པའི་འཇིགས་པ་བྱིན།།
གང་ཚེ་གཞུང་གི་ཟབ་གནད་འགྲོལ་བ་ལ།།
གཞན་ལས་ལྷག་པའི་ངོ་མཚར་མཁྱེན་དཔྱོད་འཕྲུལ། །
ཡང་ཡང་ངོམ་པས་ཆེར་རློམ་མང་བོའི་ལྗགས།།
སྨྲ་མེད་ཐུང་ངུར་བཀོད་པའི་མཛད་བཟང་མང་།།
མགོན་ཁྱོད་ཕྱིན་དྲུག་སྟོབས་བཅུ་མི་འཇིགས་བཞིས།།
རྒྱ་ཆེར་བསྟོད་པའི་སྦྱོར་བ་སྤྲོ་འོས་ཀྱང་།།
མི་ཤེས་མ་བསླབ་རྨོངས་པའི་འགྲོ་འདི་དག །
དེ་ལྟའི་ཡོན་ཏན་མཐོང་བས་ཕོངས་པ་སྐྱོ།།
གཡོན་ཕྱོགས་འཐོར་རླུང་དྲག་པོའི་དཔུང་ཚོགས་ཀྱིས།།
ས་ཆེན་ཡོམ་ཡོམ་འདར་བའི་གཡུལ་འཁྲུགས་ལ།།
གཡོལ་བར་ནུས་ཀྱང་བདག་ལས་གཞན་གཅེས་པའི།།
སེམས་དེས་མུན་ནག་བཙོན་དུ་དགྱེས་བཞུགས་ཞུགས།།
མི་བཟད་འཇིགས་རུང་མུན་ནག་བཙོན་ཁང་དུ།།
ཧྲུག་ཧྲུག་མིག་གིས་སྐྱབས་འཚོལ་འོ་དོད་འབོད།།
གཉེན་དང་བྲལ་ཞིང་རེ་ཐག་རྨང་ནས་ཆད།།
བརྟོལ་བྲལ་རྣམས་ལ་མགོན་ཁྱོད་ཉིད་བྱེད་དབང་།།
སྙིང་ལ་འཇིགས་སྟེར་ཡ་ངའི་གནས་དེ་ཡང་།།
མགོན་ཁྱོད་ཡིད་འོང་སློབ་གྲྭ་ལྟར་གཟིགས་ནས།།
ཙི་ནའི་རིག་གཞུང་མཁྱེན་དཔྱོད་ཧུབ་གཅིག་གིས།།
དྲངས་པའི་གྲགས་སྙན་དགུ་ཚིགས་རྒྱ་ལས་འགོངས།།
མི་བཟད་གདོན་གྱིས་ཟིན་པའི་སྙིང་རླུང་གིས།།
ནང་དམེ་ཁྲག་ཀླུང་བཞུར་བའི་ལས་དབང་དེ།།
ཐུགས་ཀྱིས་མ་བཟོད་གང་གི་ཞབས་སྐྱེས་རྡུལ།།
རེག་པས་མ་ཁྱབ་བསིལ་ལྗོངས་གནས་དེ་གང་།།
ཚུལ་མིན་ཡིད་བྱེད་བདུད་མོའི་འཛུམ་བག་གིས།།
བསླུས་པའི་སྤྱི་བརྟོལ་ཅན་ཡང་སྲོག་ཆད་ཀྱིས།།
གང་ལ་འོ་དོད་བོས་པའང་བརྩེ་ཆེན་གྱི།།
སྤྲིན་པས་བསིལ་བར་མ་བྱས་སུ་ཞིག་མཆིས།།
བསིལ་ལྡན་གངས་རིའི་ལྗོངས་ལ་གནས་འཆའ་བའི།།
གདོང་དམར་བོད་རིགས་ཕན་དང་བདེ་བའི་གཞི།།
དམ་ཆོས་གདུགས་དཀར་ཡུ་བ་འདེགས་ནུས་པའི།།
ལུང་རྟོགས་དཔུང་ཤུགས་རྫོགས་པ་ཁྱེད་ཉིད་ཙམ།།
ཆེར་སྙིགས་དུས་མཐའི་འགྲོ་ལ་སྙིང་བརྩེ་བས།།
ཟབ་རྒྱས་ཆོས་ཀྱི་འཁོར་ལོ་ཕངས་མེད་དུ།།
ཡང་ཡང་བསྐོར་བས་མཐའ་ཡས་གདུལ་བྱའི་ཚོགས།།
སྨིན་མཛད་ཁྱེད་ནི་ཐུབ་པའི་གདུང་འཚོབ་ལགས།།
ས་སྒང་ཟླུམ་པོའི་དགའ་ཚལ་མཛེས་བྱེད་པའི།།
ཤེས་རིག་མེ་ཏོག་བཀྲ་བའི་མི་རིགས་ཁྲོད།།
མིག་གིས་རྐང་སྣེ་ཕུག་པར་མི་འདོད་ན།།
རིག་གནས་སློབ་གསོ་སྤེལ་བ་གནད་ཀྱི་དོན།།
དེ་ཕྱིར་རང་རིགས་ཡར་རྒྱས་འབྱུང་བའི་གཞི།།
ཡང་དག་སློབ་གསོའི་བྱ་གཞག་སྤེལ་བའི་སླད།།
བརྩེ་བའི་བཀའ་སློབ་མང་བོའི་རྒྱུ་ནོར་བཅས།།
ཕངས་མེད་ཡང་ཡང་བསྩལ་བའི་བཀའ་དྲིན་དྲན།།
མཁས་རྒུར་ཟབ་གནད་གསལ་བའི་སྟོན་པ་མཆོག །
རྨོངས་བའི་བློ་མུན་སེལ་བའི་ཉི་མ་དང་།།
ཉམ་ཐག་གཡང་ལས་སྐྱོབ་པའི་ཕ་མ་སྟེ།།
ཀུན་གྱི་སྤྱི་གཙུག་མཛེས་པའི་བླ་མ་ལགས།།
དེ་ལྟའི་བོད་མིའི་སྙིང་གི་ནོར་བུ་སྟེ།།
ཐུབ་བསྟན་པད་ཚལ་ཡོངས་ཀྱི་གཉེན་གཅིག་པུ།།
འགྲོ་བའི་ཉིན་བྱེད་གློ་བུར་ནུབ་རིར་གཤེགས།།
ཀྱེ་མ་ས་གསུམ་གཅིག་ཅར་མུན་པས་བསྒྲིབས།།
རིང་ནས་ཁྱེར་ལ་རེ་བའི་གདུལ་བྱའི་ཚོགས།།
ཡིད་ལ་མྱ་ངན་སྲེག་ཟ་འབར་བ་དང་།།
གདོང་ལ་མཆི་མའི་ཆར་ཆེན་འཁྲིགས་པ་ལས།།
མི་བཟད་སྡུག་བསྔལ་ན་ཀྲའི་ཀློང་དུ་བྱིང་།།
ཐུབ་བསྟན་གདུཊ་དཀར་འདེགས་པའི་བྱེད་པོ་སུ།།
ཐར་འདོད་ཡིད་ཀྱི་གདུང་བ་སུ་ཡིས་སེལ།།
ནང་དམེའི་ཁྲག་མཚོ་འོ་མར་སུ་ཡིས་བསྒྱུར།།
ཉམ་ཐག་འགྲོ་བའི་རེ་ལྟོས་སུ་ལ་འཆའ།།
དེ་ལྟར་གང་གི་མཛད་མཆོག་རེ་རེ་བཞིན།།
ཡིད་ཀྱི་ཆུ་མཚོར་གསལ་བར་ཤར་བ་ན།།
མངོན་དགའ་དད་པའི་པད་མོ་བཞད་དང་ལྷན།།
འདས་ཚུལ་དྲན་པས་ཟུག་རྔུས་ལྷག་པར་གདུང་།།
འདོད་སྲེད་ཞགས་པས་དམ་དུ་བཅིངས་པ་ཡི།།
བདག་ལྟའི་ཡིད་ཀྱི་རྟག་འཛིན་གཞིག་སླད་དུ།།
གཟུགས་སྐུའི་བཀོད་པ་བསྡུས་པའི་ཚུལ་ཙམ་ལས།།
དོན་དམ་མི་འགྱུར་རྡོ་རྗེའི་སྐུ་བརྙེས་པས།།
ཞིབ་ཏུ་བསམ་ན་སྐྱོ་དགོས་མ་མཆིས་ཤིང་།།
དད་པས་ཟིན་ན་འབྲལ་མེད་རྟག་བཞུགས་ཀྱང་།།
ཐུཊ་རྗེའི་འཛུམ་ཟེར་སྤྲོ་བའི་གསེར་ཞལ་མདངས།།
རེ་ཞིག་ཡལ་བས་གདུང་བ་འགོག་མ་ནུས།།
བསྐལ་བར་ཞི་བདེའི་དབྱིངས་ལས་མི་ལྡང་བའི།།
ཏིང་འཛིན་མཆོག་གི་མཐུ་ལ་དབང་འབྱོར་ཡང་།།
མཁའ་མཉམ་འགྲོ་བ་སྒྲོལ་བར་དམ་བཅས་པའི།།
རྡོ་རྗེའི་ཚིག་དང་འགལ་བ་མེད་པར་མཛོད།།
རྒྱལ་དང་རྒྱལ་སྲས་རྣམས་ཀྱིས་ཡོངས་བཏང་བའི།།
སྙིགས་མའི་འགྲོ་འདི་དམུས་ལོང་ཇི་བཞིན་གྱུར།།
ཐུབ་པའི་བསྟན་པའང་རླུང་ནང་མར་མེ་ལྟར།།
གྱུར་བའི་ངང་ཚུལ་ལེགས་པར་གཟིགས་མཛོད་ལ།།
ལུང་རྟོགས་ཡོན་ཏན་སྣང་བ་འབུམ་སྤྲོ་ཞིང་།།
ཐུགས་རྗེ་དཀྱིལ་འཁོར་རྫོགས་པའི་ཉི་གཞོན་ཏེ།།
མཆོག་སྤྲུལ་འཁྲུལ་མེད་ཐུན་མོང་སྣང་ངོར་ཡང་།།
ཁྱེད་ཉིད་ཇི་བཞིན་འབྱོན་པའི་ཐུཊ་རྗེས་གཟིགས།།
ཁྱད་པར་ལྔ་བདོའི་མུན་པ་སྟུག་པོའི་ཁྲོད།།
སྡུག་བསྔལ་འབུམ་གྱིས་མནར་བའི་མ་རྣམས་ཀུན།།
བྱིན་རླབས་འོད་དཀར་བདུད་རྩིས་མི་བསྐྱང་ན།།
འཇམ་དཔལ་གཞོན་ནུའི་གར་དུ་ཅི་ཡིས་བསྒྲུབ།།
བཞད་པའི་རྡོ་རྗེའི་བཀའ་ལུང་གསེར་གྱི་རི།།
ཁྲིམས་ལྡན་འདུས་སྡེའི་བསླབ་ཁྲིམས་གཙང་བ་དང་།།
ཆོས་ཀྱི་མངའ་འབངས་དད་པའི་གདུང་དབྱངས་ཀྱིས།།
གསོལ་བའི་འབྲས་བུ་མྱུར་དུ་འགྲུབ་གྱུར་ཅིག།
འདི་ནི་དངོས་དོན་ཡིན་གྱི་བཅོས་མ་མིན།།
དད་གདུང་གསོལ་འདེབས་ཡིན་གྱི་གཅམ་བུ་མིན།།
ཇི་བཞིན་བརྗོད་པ་ཡིན་གྱི་ཕྱོགས་ཞེན་མིན།།
དེ་ཕྱིར་སྨོན་པ་ཇི་བཞིན་འགྲུབ་པར་ཤོག།
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ།
ཨ་བུ་འབྲོང་།
|