ནང་བསྟན་རྒྱུན་ཤེས། ༩
མཛད་པ་བོ། དགེ་རྒན་ཤེས་རབ་བསྟན་དར།
༡༠༡ ཆང་གི་ཉེས་པ་ཡོད་དམ།
ལན། ཡོད་དེ་ཕུང་ཀྲོལ་དང་ཉོན་མོངས་ཀུན་བསྐྱེད་ཅིང་དམྱལ་བར་སྐྱེས་ཏེ་སྡུག་བསྔལ་དཔག་ཏུ་མེད་པ་མྱོང་ངོ་། །
༡༠༢ འོ་ན་ཆང་ལྡུད་མཁན་ལ་ཉེས་པ་ཡོད་དམ།
ལན། འདུལ་བ་ལུང་ལས། ཆང་འཐུང་དམྱལ་བ་ངུ་འབོད་སྐྱེ། ། ལྡུད་མཁན་དེ་ཡི་འཁོར་དུ་སྐྱེ། །ཞེས་གསུངས་པ་ལྟར་རོ། །
༡༠༣ མདོར་བསྡུས་ནས་བཤད་ན་དགེ་མི་དགེའི་ཚད་གང་ཡིན།
ལན། འདོད་ཆགས། ཞེ་སྡང་། གཏི་མུག་གི་དབང་དུ་སོང་སྟེ་ལས་གང་བྱས་ཀྱང་མི་དགེ་བ་ཡིན་ལ་དེ་ལས་ལྡོག་པའི་དགེ་སེམས་ཀྱིས་ལས་གང་བྱས་དགེ་བར་འགྱུར་རོ། །
༡༠༤ སྡུག་པ་འདག་པ་ལ་ཇི་ལྟར་བྱེད།
ལན། སྤྱིར་ན་རང་གིས་མི་དགེ་བའི་ལས་བྱས་པ་ལ་འགྱོད་པ་བྱས་ན་དེའི་སྟོབས་ཇེ་ཆུང་དུ་འགྲོ་ལ། གཞན་སེམས་འགྱོད་གདུང་གི་སྒོ་ནས་ལྟུང་བཤགས་དང་ཡིག་བརྒྱ་འདོན་པ་དང་ཕྱག་སྐོར་དང་མཆོད་པ་བྱས་ན་བཟང་ངོ་། །
༡༠༥ ང་ཚོ་ལ་ཉམས་རྟོགས་ཆེན་པོ་ཞིག་མི་འབྱུང་བ་ནི་ཆོས་བཟང་བོ་ཞིག་དང་མ་འཕྲད་པས་ཡིན་ནམ།
ལན། མིན་ཏེ་དེ་ནི་རང་ཉིད་མ་བཟང་བ་སྟེ། རང་སེམས་རྒྱ་བསྐྱེད་མ་ཐུབ་པ་དང་རང་སེམས་རྣམ་པར་དག་ཅིང་རྩེ་གཅིག་བྱེད་མ་ཐུབ་པའི་རྐྱེན་གྱིས་ཡིན།
༡༠༦ ལས་རྒྱུ་འབྲས་ཞེས་པ་ཅི་ཡིན།
ལན། དཔེར་ན། ས་བོན་ལ་རྒྱུ་དང་དེ་ལ་བརྟེན་ནས་སྐྱེས་བའི་འབྲས་བུ་ལ་འབྲས་བུ་ཟེར། དེ་ནི་ཕྱིའི་རྒྱུ་འབྲས་ཏེ་ནང་གི་རྒྱུ་འབྲས་ནི་ལས་ཏེ་སེམས་པ་ནི་རྒྱུ་ཡིན་ལ་དེ་ལ་བརྟེན་ནས་བྱུང་བའི་རྣམ་སྨིན་ནི་འབྲས་བུ་སྟེ། དཔེར་ན་མི་གསོད་འདོད་ཀྱི་སེམས་པ་ནི་ལས་དང་མི་བསད་པ་ན་ལས་དེ་བསགས་པ་ཡིན། དེ་ལས་བཙོན་ཁང་དུ་འགྲིམ་པ་ནི་ལས་དེའི་འབྲས་བུ་སྨིན་པ་ཡིན་ནོ། །
༡༠༧ བསོད་ནམས་ཇི་ལྟར་གསག་དགོས།
ལན། སེམས་ཅན་གཞན་གྱི་དོན་དུ་ཕྱག་སྐོར་དང་ཁ་འདོན། སྦྱིན་པ། མཆོད་རྟེན་དང་ཚ་ཚ་བཞེངས་པ། སྐུ་གསུང་ཐུགས་གསུམ་ལ་མཆོད་པ་འབུལ་བ་བཅས་བྱ་དགོས་སོ། །
༡༠༨ མི་ལ་ལས་འབད་བརྩོན་ག་འདྲ་བྱས་ནའང་ལག་ཏུ་རྒྱུ་ནོར་མི་འོང་བའི་རྒྱུ་མཚན་གང་།
ལན། དེ་ནི་བསོད་ནམས་མ་བསགས་པའི་ལན་པ་སྟེ། དཔེར་ན་སྤྱན་སྔ་བ་ཟེར་བ་མི་སྐྱའི་དུས་སུ་གསེར་འཚོལ་བར་ལན་གཉིས་ཕྱིན་ཡང་སྔ་མར་ལག་ཏུ་ཅི་ཡང་མ་ཡོང་། ཕྱི་མར་ཅུང་ཞིག་རྙེད། ཕྱིས་སུ་ར་སྒྲེང་དུ་ལམ་རིམ་བསྒོམས་པས་བསོད་ནམས་རྒྱས་ཏེ་གསེར་སྲང་སྟོང་ཕྲག་བདུན་སྦྱིན་པར་གཏང་རྒྱུ་བྱུང་སོང་།
༡༠༩ རང་གི་སློབ་མ་དང་བྱིས་པར་ཕན་སེམས་ཀྱིས་གཅར་རྡུང་བྱེད་པ་དེ་དགེ་མི་དགེ་གཉིས་ཀྱི་གང་ཡིན།
ལན། དེའི་སྦྱོར་བའི་བྱ་སྤྱོད་དེ་ནག་པོའི་ཆར་གཏོགས་ནའང་སེམས་པ་དཀར་བས་དངོས་གཞི་དཀར་བ་སྟེ་སྦྱོར་བ་ནག་ལ་དངོས་གཞི་དཀར་བའི་ལས་ཞེས་པ་སྟེ་དགེ་བའི་ལས་ཡིན་ནོ། །
༡༡༠ གཞན་ལ་ངན་བྱེད་པའི་ཆེད་དུ་རྒྱུ་ནོར་སོགས་སྟེར་བ་དེ་དགེ་མི་དགེ་གང་ཡིན།
ལན། གཞན་ལ་གནོད་སེམས་ཡོད་པའི་ཕྱིར་མི་དགེ་བ་ཡིན་མོད་རྒྱ་ནོར་སྟེར་བ་སོགས་སྦྱོར་བ་དཀར་བོ་ཡིན་པས་སྦྱོར་བ་དཀར་ལ་དངོས་གཞི་ནག་པོའི་ལས་ཞེས་ཟེར་རོ། །
༡༡༡ ཚེ་སྔོན་མའི་ལས་ལ་ཟློག་ཐབས་ཨེ་ཡོད།
ལན། ལས་དེ་མ་སྨིན་གོང་འགྱོད་བཤགས་དང་དགེ་བ་སྟོབས་ཆེན་པོ་བསྒྲུབས་ན་ཟློག་ཐུབ་ལ་འབྲས་བུ་སྨིན་ཟིན་པ་དེ་ཟློག་མི་ཐུབ་ཀྱང་ཡུན་རིང་བོར་མྱོང་བ་དེ་བཟློག་ཐུབ་བོ། །
༡༡༢ ལ་ལས་ཡོད་ཚད་ལས་དབང་ཡིན་ཟེར་བ་དེ་འགྲིག་གམ།
ལན། མི་འགྲིག་སྟེ་ལས་ལ་བསྟེན་ནས་འབྲས་བུ་འབྱུང་བ་ཡིན་པས་ཁྱོད་ཀྱིས་ལས་བཟང་བོ་ཞིག་མ་བསྒྲུབས་ན་འབྲས་བུ་བཟང་བོ་ཞིག་གཏན་ནས་མི་འབྱུང་ངོ་། །
༡༡༣ མགོ་ནག་སྐྱིད་སྡུག་གནམ་གྱི་ལག་ཟེར་བ་འགྲིག་གམ།
ལན། མི་འགྲིག་སྟེ་རང་རང་གི་སྐྱིད་སྡུག་དེ་མི་རང་རང་གི་ལས་དང་འབྲེལ་ཡོད་ལ་ལས་བཟང་ངན་སྒྲུབ་མཁན་རང་ཉིད་ཀྱིས་བསྒྲུབ་པ་ལས་གནམ་གྱིས་བསྒྲུབ་པ་མིན་པས་མགོ་ནག་སྐྱིད་སྡུག་རང་གི་ལག་ཡིན་ནོ། །
|