བོད་ཀྱི་སློབ་གཙོ་ཞིག་གི་གཏམ་བཤད།

   གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་གཙོ་འཇིགས་མེད་རྒྱལ་མཚན་མཆོག་གིས།

  ༡ ཐོག་མར་ཁྱོད་རང་སློབ་གྲྭ་འདིར་ཞུགས་པ་ལ་དགའ་བསུ་བྱེད། ཁྱོད་ཀྱིས་ཀྱང་རང་ཉིད་སློབ་གྲྭ་འདིར་ཅི་བྱེད་དུ་ཡོང་བ་དེ་རྒྱུན་དུ་དྲན་པར་གྱིས། ང་ཚོའི་སློབ་གྲྭ་འདིར་མི་ཚད་ལྡན་ཞིག་དང་། བོད་མི་རིགས་ཀྱི་མ་འོངས་པའི་བདག་པོ་སྟེ། རང་གི་རིག་གནས་ལ་དགའ་ཞིང་རང་གི་མི་རིགས་ལ་དུང་བའི་མི་ཞིག་སྐྱེད་སྲིང་བྱེད་པ་ལས། རྒྱལ་ཁབ་ཀྱི་གཞུང་ལྟ་བུ་སོགས་གཞན་ལ་ཚེ་གཡོག་བྱས་ཏེ་རང་ཁ་ཙམ་གསོ་བའི་མི་དེའི་རིགས་སྐྱེད་སྲིང་བྱེད་རྒྱུ་མིན་པས། གལ་ཏེ་ཁྱོད་ལ་དེ་ཙམ་གྱི་དམིགས་ཡུལ་མ་གཏོགས་མེད་ན་དེ་རིང་ནས་སློབ་གྲྭ་འདིར་མ་ཞུགས་པར་སྔ་མོ་ནས་ཕྱིར་ཕེབས་པར་རེ་བ་ཞུ།

  ༢ སློབ་མ་སུ་ཡིན་ཡང་ང་ཚོའི་སློབ་གྲྭ་འདིར་ཞུགས་པ་ན་ཐོག་མར་རང་རང་གིས་དམ་བཅའི་ཡི་གེ་རེ་འབྲི་དགོས། དེ་ནས་མ་འོངས་པ་ན་མཐར་ཕྱིན་ཁར་སླར་ཡང་དམ་བཅའི་ཡི་གེ་རེ་འབྲི་དགོས་ལ། ང་ཚོས་དེ་ལ་ཆེ་ལོང་ཞིག་བརྟག་སྟེ་ཁྱོད་ཀྱི་མི་ཚེའི་འགྱུར་ལྡོག་དང་རང་གི་སློབ་གསོའི་གྲུབ་འབྲས་འཚོལ་དགོས། རྗེས་སུ་ཁྱོད་ཀྱིས་ཀྱང་རང་གི་དང་མའི་དམ་བཅའ་དེ་ལ་བལྟས་ཏེ་རང་གིས་རང་ལ་རྒྱུགས་ཤིག་བླང་ཆོག

 ༣ ཁྱོད་ཚོ་ཚང་མ་བོད་མི་རིགས་ཀྱི་མ་འོངས་པའི་བདག་པོ་ཡིན། མི་ལོ་དུ་མའི་རྗེས་སུ་མི་རིགས་འདིའི་དར་རྒུད་ཀྱི་འགན་ཁྱོད་ཚོས་མི་ལེན་པར་གཞན་སུས་ལེན། ང་ཚོ་རིམ་གྱིས་རྒས་ནས་འགྲོ་དགོས་ལ་ཁྱོད་ཚོ་རིམ་གྱིས་སྐྱེས་ནས་ཡོང་དགོས་པ་ཆོས་ཉིད་རེད། དེའི་རྐྱེན་གྱིས་ཁྱོད་ཚོས་ད་ལྟ་ནས་དེའི་ཕྱོགས་ལ་བསམ་བློ་བཏང་སྟེ། གྲ་སྒྲིག་ཡོད་པའི་སྒོ་ནས་སློབ་སྦྱོང་བྱེད་དགོས། མ་འོངས་པ་ན་གཞན་ལ་ལེ་བདའ་མེད་པའི་སྒོ་ནས་རང་གི་མི་རིགས་ལ་ཞབས་ཞུ་བསྒྲུབ་དགོས།

 ༤ གངས་ལྗོངས་ཤེས་རིག་ནོར་བུའི་སློབ་གླིང་འདི་ཐོག་མར་འཛུགས་མཁན་ང་ཡིན་ཡང་འདི་ནི་ང་མི་སྒེར་གྱི་མིན། འུ་ཅག་ཚང་མའི་ཡིན་པས། མ་འོངས་པ་ན་སློབ་གྲྭ་འདིའི་དར་རྒུད་སྐྱིད་སྡུག་ཐམས་ཅད་ཁྱོད་ཚོ་དང་འབྲེལ་ནས་ཡོད། ང་བླ་རྒན་ཞིག་གིས་འདི་འཁྱེར་ནས་འགྲོ་ས་མེད། འདི་ནི་ང་ཚོས་བོད་མི་རིགས་ལ་བཞག་པ་ཡིན་པས། འདིའི་བདག་པོ་བོད་མི་ཡོངས་རྫོགས་ཡིན་ལ། དེའི་ནང་ནས་ཀྱང་ཁྱོད་ཚོས་འདི་དར་རྒྱས་སུ་གཏོང་དགོས།

 ༥ ད་ལྟ་ང་ཚོའི་མི་རིགས་ལ་མཁོ་བ་ནི་འཕེལ་རྒྱས་དང་མཐུན་སྒྲིལ་ཡིན་གྱི་ནང་འཁྲུག་དང་རྩོད་གླེང་མིན། དེ་བས་ཐམས་ཅད་ཀྱིས་འབད་བརྩོན་བྱེད་སའི་དམིགས་ཡུལ་ནོར་མི་རུང་། རང་གི་མི་རིགས་དང་རིག་གནས་འདི་ལ་ཞབས་ཞུ་སྒྲུབ་མ་ཐུབ་ཀྱང་ཞབས་འདྲེན་མི་བྱེད་པའི་རེ་བ་ཞུ།

 ༦ ཁྱིམ་དུ་སོང་ནས་རང་གི་ཕ་མ་དང་རྒན་རྒོན་ལ་བརྩི་བཀུར་བྱེད་པའི་སྤྱོད་བཟང་རྒྱུན་འཁྱོངས་བྱོས། དུས་རྒྱུན་དུ་གཞན་ལ་རོགས་བྱས་ཏེ་ཡིག་རྨོངས་སེལ་བའི་བྱ་བ་ལྟ་བུ་རེ་ཡིན་ཡང་སྒྲུབ་ཐུབ་ན་རབ་རེད། བྱ་བ་ཆུང་ཆུང་གི་སྟེང་ནས་འགོ་བརྩམས་ཏེ་མི་རིགས་ཀྱི་ལས་དོན་དེ་རང་གི་ཕྲག་ཏུ་ལེན་རྒྱུ་འདི་ལ་གོམས་སུ་འཇུག་དགོས།

༧ མདོར་ན་ཐམས་ཅད་ཀྱི་བསམ་པ་འགྲུབ་པའི་བཀྲ་ཤིས་སྨོན་འདུན་ཞུ། གྱི་ལིང་འཇིགས་མེད་ཀྱིས་ཁོང་གི་གསུང་བཤད་ཚན་པ་འགའ་ཡི་གེར་སྤེལ་བ་ཡིན།