རྩོད་པ་བྱེད་ཚུལ་གྱི་བསླབ་བྱ་བཞུགས་སོ།།
ཀིརྟི་བློ་བཟང་འཕྲིན་ལས་ཀྱིས་མཛད།
ངག་གི་དབང་ཕྱུག་བླ་མ་ལྷག་པའི་ལྷར།།
གུས་པས་བཏུད་ནས་རྩོད་པར་མཁས་པའི་རྒྱུ།།
མཛེས་པའི་རྒྱན་དང་རྩོད་པའི་བསམ་པ་དང་།།
རྩོད་པའི་དཔེ་སོགས་ཚད་མའི་གཞུང་བཞིན་བྲི།།
སྐྱེས་པའི་ཐོབ་པའི་ཤེས་རབ་ཆེ་བ་དང་།།
སྒྲ་དང་ཚད་མ་དག་ལ་སྦྱངས་པ་དང་།།
རང་གཞན་གཞུང་ལ་ལེགས་པར་སྦྱངས་པ་རྣམས།།
རྩོད་ལ་མཁས་པའི་རྒྱུ་གསུམ་ཡིན་པར་བཤད།།
བཞིན་གྱི་དཀྱིལ་འཁོར་འཛུམ་པའི་མདངས་དང་ལྡན།།
དོན་ལྡན་གསལ་ལ་འཇམ་པའི་ངག་དང་ལྡན།།
སྒྱིད་ལུག་པ་དང་ངལ་བ་མེད་པ་རྣམས།།
རྩོད་པ་མཛེས་པའི་རྒྱན་གསུམ་ཡིན་པར་གསུངས།།
ཕ་རོལ་དམའ་བར་འདོད་པའི་ཞེ་སྡང་དང་།།
རང་ཉིད་མཐོ་བར་འདོད་པའི་འདོད་ཆགས་དང་།།
རིགས་ལམ་འདོར་བར་འདོད་པའི་གཡོ་སྒྱུ་རྣམས།།
རྩོད་པའི་བསམ་པ་ཐ་ཤལ་ཡིན་པར་བཤད།།
རང་གིས་དོན་དེ་རྟོགས་འདོད་གུས་པ་དང་།།
གཞན་གྱི་ལོག་རྟོག་སེལ་འདོད་སྙིང་རྗེ་དང་།།
ཕ་རོལ་པོ་ལ་ཟབ་དོན་བསྟན་འདོད་པའི།།
བྱམས་པ་རྣམས་ནི་བསམ་པ་ཕུལ་བྱུང་ཡིན།།
དགྲ་བོས་གཏུགས་པ་ལྟ་བུའི་བརྟབ་པའི་ཚིག།
མཚོན་ཆ་གདེངས་པ་ལྟ་བུར་བཞིན་འགྱུར་ཞིང་།།
ཤ་ཟས་ཐེབས་ལྟར་ང་རོ་མི་སྙན་སྒྲོག།
འདི་རྣམས་རྩོད་པ་ངན་པའི་དཔེ་རུ་བཤད།།
རང་གཞན་གཏི་མུག་གཅོད་པའི་འཁོར་ལོ་བཞིན།།
སུན་འབྱིན་རླུང་གིས་མི་གཡོ་ལྷུན་པོ་བཞིན།།
ཚིག་དང་དོན་ལ་མ་རྨོངས་ཐུབ་པའི་སྲས།།
འདི་རྣམས་རྣམ་དག་རྩོད་པའི་དཔེ་རུ་གསུངས།།
རང་རྒྱུད་ཉོན་མོངས་པ་ཡིས་དཀྲུགས་པ་དང་།།
སྐྱེ་བོ་མང་བོས་སྨོད་པར་བྱེད་པ་དང་།།
ཚེ་རབས་གཞན་དུ་རྣམ་སྨིན་ཡིད་མི་འོང་།།
མྱོང་རྣམས་མ་དག་རྩོད་པའི་འབྲས་བུ་ཡིན།།
རྟོགས་པ་འཕེལ་ནས་རང་རྒྱུད་ཚིམ་པ་དང་།།
སྙན་པའི་གྲགས་པ་ཕྱོགས་ཀུན་ཁྱབ་པ་དང་།།
བསྟན་པ་བསྲུང་བས་ཆོས་ཀྱི་རྒྱལ་བོ་རུ།།
འགྱུར་རྣམས་རྣམ་པར་དག་པའི་རྩོད་པའི་འབྲས།།
དེ་ལྟར་མ་དག་བསམ་པས་དགག་སྒྲུབ་ཀྱིས།།
འཁོར་བར་འཆིང་ཞིང་རྣམ་དག་བསམ་པ་ཡིས།།
གསུང་རབ་དགོངས་དོན་གཏན་ལ་འབེབས་པ་ནི།།
ཐུབ་བསྟན་འཛིན་མའི་ཚུལ་དུ་ཤེས་བྱས་ཏེ།།
གོང་དུ་བཤད་པའི་སྐྱོན་རྣམས་འདོར་བ་དང་།།
རྣམ་དཀར་བསམ་པས་ལུང་དང་རིགས་པ་ཡིས།།
ཐུབ་བསྟན་བྱི་དོར་བགྱིད་ལ་རྩེ་གཅིག་ཏུ།།
འབད་པས་རང་གཞན་དོན་ཆེན་སྒྲུབ་པར་བྱ།།
དེ་སྐད་སྨྲས་པ་འང་མང་ཐོས་བློ་མིག་ལྡན།།
རིགས་པའི་ལམ་ལ་བྱང་བའི་མཁས་མང་གིས།།
ནོར་འཛིན་ཁྱབ་ཅིང་སྨྲ་བ་ངན་པའི་ཚོགས།།
ཚར་བཅད་ཐུབ་བསྟན་རྒྱས་པའི་རྒྱུ་རུ་བསྔོ།།
ཞེས་པ་འདི་ནི་རོང་ཆེན་བསྟན་པའི་སྒྲོན་མེ་སྐྱབས་མཆོག་ཀིརྟི་སྐུ་འཕྲེང་བརྒྱད་པ་བློ་བཟང་འཕྲིན་ལས་ཀྱི་གསུང་འབུམ་(ཅ)ལས་བཏུས་པའོ།།
ཡི་གེ་ཕབ་བཤུ་བ་ཤ་བྲང་འབྲུག་ལྷ་རྒྱལ།
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།
| 
青公网安备 63262102000011号