ཁ་ནས་གཞན་ཕན་ཆོས་སྐད་མི་སྨྲ་ཡང་།།

བོང་བུས་ཁུར་ཆེན་འདེགས་པ་མ་བཟོད་པར།།

ཨ་རབ་ཚོང་བའི་རྗེས་སུ་འབྲངས་ནས་སོང་།།
གཉའ་བར་རི་དེའུ་ཙམ་ཞིག་བཀལ་ན་ཡང་།།
མི་འདོད་འཁུན་སྒྲ་ཙམ་ཡང་ཁྱོད་ལ་མེད།།

ཅང་ཤེས་རྟ་བོ་གསེར་སྒ་ཐོབ་པའི་ཕྱིར།།
སྟོང་ཁུན་རྒྱལ་པོའི་འཕོངས་ཀྱི་ཆིབས་རྟ་བྱས།།
ཁྱོད་ཀྱིས་རྔ་རྩིད་མཛེས་སྡུག་ལན་བུ་ཡང་།།
གཞན་དག་འཚོ་བའི་རྟེན་དུ་ཕངས་མེད་སྦྱིན།།

ནོར་སྐྱོང་རྣམས་ནི་རུས་པ་འཆའ་བའི་ཕྱིར།།
ཧོར་སེར་དམག་གི་ཤ་ཁྱི་གཏུམ་པོ་བྱས།།
ཁྱོད་ནི་རི་རྩྭ་ཁམ་གང་མ་རྙེད་པར།།
མུག་ཤིར་གྱུར་ཀྱང་བདག་པོར་འབྲལ་མི་བྱེད།།

སེང་གེ་གངས་ཀྱི་གྲང་བར་མ་བཟོད་པར།།
ཧྥེ་གླིང་ནགས་ཚལ་སྟུག་པོའི་གསེབ་ཏུ་བྲོས།།
ཁྱོད་ནི་ཐོག་མ་མེད་ནས་ད་ལྟའི་བར།།
སྐྱེས་ཡུལ་མཐོ་སྒང་བློ་ཡིས་བཏང་བ་མེད།།

བྱུ་རུའི་སྡོང་བོ་འཁུར་བའི་ཤ་བོ་དང་།།
གསེར་གྱི་རྐྱལ་བ་ཐོགས་པའི་གླ་བ་དང་།།
ཤེས་རབ་རལ་གྲི་སྒྲེང་བའི་རི་བོང་རྣམས།།
རང་བདེ་མཁོ་ནར་འབད་པས་ཁྱོད་བས་དམན།།

ཤ་ཚིལ་མཐོང་ཚེ་འོང་བའི་ཐང་དཀར་རྒོད།།
མེ་ཏོག་ལྡན་དུས་གླུ་ལེན་གཞན་གསོས་བུ།།
མཚན་མོའི་སྨག་ལ་དགའ་བའི་འུག་པ་རྣམས།།
གཤོག་ཟུང་ལྡན་ཡང་ཁྱོད་ཀྱི་དོ་ཟླ་མིན།།

དྲེལ་ལྟར་རང་མིར་ཕྲ་ཁ་ཚད་པ་མེད།།
ལུག་ལྟར་དགྲ་ལ་གཉོམ་འཁུར་གླེན་རྟགས་མེད།།
ཕག་ལྟར་ཁྱིམ་གྱི་གྱང་རྟིང་སློག་པ་མེད།།
ལོའུ་ལྟར་ནང་རྐུན་བྱེད་པའི་སྤྱོད་ངན་མེད།།

གཞན་ལ་ཕན་བཏགས་ཕན་ལན་རེ་བ་མེད།།
རྩྭ་ཆུ་ཁྱུ་དང་མཉམ་སྤྱོད་སྒེར་སེམས་མེད།།
རླུང་དང་ཁ་བ་ཆར་ཆུར་སྐྲག་པ་མེད།།
ལྟོགས་གྲང་བཀོལ་སྤྱོད་སྡུག་བསྔལ་མི་ཁྱག་མེད།།

མིག་རྩ་དམར་ཡང་གཞན་འབྱོར་འཕྲོག་འདོད་མིན།།
ཁྲོ་གཉེར་བསྡུས་ཀྱང་གཉེན་ལ་སྡང་བ་མིན།།
རྭ་ཁ་རྣོ་ཡང་ནང་ལ་གཟས་པ་མིན།།
ངུར་སྒྲ་སྒྲོགས་ཀྱང་ལྟས་ངན་གཏོང་འདོད་མིན།།

དར་ཟབ་གོས་དང་གསེར་དངུལ་རིན་ཆེན་རྒྱན།།
མ་བགོས་ལུས་ཀུན་སྤུ་ཡིས་ཁེབས་ན་ཡང་།།
བསྔགས་འོས་ཡོན་ཏན་སྤྱོད་བཟང་རིན་ཆེན་རྒྱན།།
མི་ཡི་བསླབ་བྱར་གྲུབ་འདི་མི་མཛེས་སམ།། 

རྩོམ་ཡིག་ཕབ་བཤུ་བ། སྐབས་བཅུ་དྲུག་པའི་མཐར་ཕྱིན་སློབ་མ་རྒྱ་འདུ་སངས་རྒྱས།