བཤེས་གཉེན་སྦ་བ་ལ་གདམས་པ་བྱ་དཀའ་བ་ཨའི་དབྱངས་ལ་ངེས་པ།

རྗེ་ཙོང་ཁ་བ་བློ་བཟང་གྲགས་པ།

ཡང་དག་ལམ་ལ་རབ་གནས་པ།།

ལས་ངན་བག་ཆགས་ཐམས་ཅད་སྤངས།།

གཞན་ཕན་ཐབས་མང་རབ་མངའ་བ།།

དག་པ་སར་གནས་འཇམ་དཔལ་དང་།།

གཞན་ཡང་འཕགས་པ་ཐམས་ཅད་ལ།།

ལྷག་བསམ་དག་པས་རབ་དད་ནས།།

ཟམ་ལམ་མན་ངག་དམ་པ་འཆད།།

ལྷག་པར་དགའ་བས་མཉན་པར་འཚལ།།

ལས་ངན་བག་ཆགས་བསགས་པ་ལས།།

མངལ་དང་གཞན་ཡང་གནས་ངན་འགར།།

རང་དབང་སྤངས་ནས་བཙལ་བ་དང་།།

རྣམ་མང་ན་ཚས་ཡང་ཡང་མནར།།

རྒས་པས་ཡན་ལག་ཉམས་དང་འདར།།

རྐང་ལག་ཞ་དང་མདངས་ངན་པ།།

ཐམས་ཅད་ལས་ངན་དབང་ལས་ལགས།།

ལས་ངན་ཆགས་སྡང་མ་སྤངས་ན།།

རང་གཞན་ཐམས་ཅད་ལས་ངན་ལས།།

ནམ་ཡང་ཐར་བར་དཀའ་བས་ན།།

ཆགས་སྡང་སྤང་ལ་འབད་པར་འཚལ།།

རྣམ་དཀར་ལས་ལས་ཐར་བ་དང་།།

ལས་ངན་བསགས་པས་ལས་ངན་འགར།།

ཡང་ཡང་མནར་བ་རབ་བསམས་ནས།།

དཀར་ནག་ལས་ལ་གདམ་ག་འཚལ།།

རབ་གནག་ལས་ལ་གང་དགའ་བ།།

ལས་ངན་དབང་ལས་བསད་པ་དང་།།

བཅད་དང་བཏགས་པས་རྣམ་པར་མནར།།

ནགས་ཚལ་གཡང་ས་མཐའ་ཡས་པར།།

བཤང་ལམ་བརྡར་བས་བཅད་པ་དང་།།

རབ་ཚ་ཟངས་ནང་ཉམ་ང་བར།།

ཤ་དང་པགས་པ་ཞག་རྣམས་ཟད།།

མཁའ་ལ་འདབ་མ་འབར་བ་དང་།།

རྣམ་མང་མདའ་ཆར་ཡང་ཡང་འབབ།།

རབ་འབར་ཚ་བ་དང་ལྡན་པར།།

དཔག་ཡས་བསྐལ་པར་གནས་ཀྱང་འཚལ།།

གཞན་ཡང་པདྨ་ལྟར་གས་ནས།།

ཉམ་ཐག་པར་ཡང་གནས་པ་དག།

ཐམས་ཅད་ལས་ངན་དབང་ལགས་པས།།

ལས་ངན་སྤང་ལ་འབད་པར་འཚལ།།

གཞན་ཡང་ལས་ངན་བསགས་པ་ལས།།

རྟ་འམ་བ་གླང་མངལ་བཙས་ནས།།

རང་དབང་རབ་སྤངས་ཐག་པས་བཏགས།།

བསད་དང་བཅད་པས་ཉམ་ཐག་འབར།།

ལ་ལ་ཁལ་མང་བཀལ་བས་མནར།།

ཕན་དང་དགའ་བ་སྤངས་པ་དག།།

ཐམས་ཅད་ལས་ངན་དབང་ལགས་པས།།

ལས་ངན་སྤང་ལ་འབད་པར་འཚལ།།

ལས་ངན་དབང་ལས་གང་ཟག་འགས།།

ཡང་དག་ཁ་ཟས་མ་འཚལ་བར།།

ཐལ་དང་བཤང་བ་ཟ་བ་འམ།།

ཁ་ཟས་གཏན་ནས་མ་འཚལ་བས།།

ཉམ་ཐག་པར་ཡང་རྣམ་པར་གནས།།

ལ་ལ་རྐང་ལག་མཐའ་དག་ཞ།།།

སྣ་དང་ཡན་ལག་མ་ཚང་བས།།

གཞན་འགས་སྨད་དང་བརྙས་པར་མཛད།།

ལ་ལ་གཅན་གཟན་མངལ་བཙས་ནས།།

གཞན་ལ་སྡང་བས་རྣམ་པར་གནས།།

ལ་ལ་ཉ་དང་ཕག་པར་གནས།།

འདམ་བཅས་གནས་ན་ཉལ་བ་དག།།

ཐམས་ཅད་ལས་ངན་དབང་ལགས་པས།།

ལས་ངན་སྤང་ལ་འབད་པར་འཚལ།།

ལས་ངན་དབང་ལས་ཉ་བ་དང་།།

བཤན་པ་དག་ལ་རབ་དགའ་བས།།

རབ་གནག་ལས་ལམ་མང་བསགས་ནས།།

ལས་ངན་ཉམ་ངར་རྟག་པར་གནས།།

མཐར་ཡང་ཐར་བར་དཀའ་བས་ན།།

ལས་ངན་སྤང་ལ་འབད་པར་འཚལ།།

དར་མར་གནས་པ་རྒས་པས་ཉམས།།

རྣམ་མང་ན་ཚས་མདངས་བཟང་ཡལ།།

བསགས་པ་ཐམས་ཅད་མཐར་འགག་པས།།

བསམ་པ་ཐར་བ་ལ་གཏད་ནས།།

རྣམ་དཀར་ལས་ལ་འབད་པ་དང་།།

ཆགས་སྡང་མཐའ་དག་སྤངས་ན་འཐད།།

པད་མ་རཱ་ག་འབར་བ་དང་།།

མརྒད་ཁང་པ་བ་དན་ཅན།།

ཆང་དང་ཁ་ཟས་རབ་མང་བར།།

དགའ་མ་མདངས་བཟང་དང་བཅས་པ།།

དར་ཟབ་སྟན་ལ་ཉལ་བ་དང་།།

ས་བདག་དཔལ་ལས་མཐར་ཉམས་ནས།།

འདམ་བཅས་ཁང་པ་དག་ན་ཉལ།།

ཁ་ཟས་ཡང་དག་མ་འཚལ་བས།།

རང་དབང་དགའ་བ་རབ་སྤངས་ནས།།

ཉམ་ཐག་ཐར་ཡང་གནས་འཚལ་ལགས།།

དལ་འབབ་པད་མ་གསར་གནས་པ།།

ཡལ་འདབ་དང་ལྡན་དཔག་བསམ་ཅན།།

དགའ་ཚལ་དག་དང་ལྷ་རྣམས་དང་།།

དབང་མཛད་དཔལ་ལྡན་ལྷ་དབང་ཡང་།།

ལྷ་དབང་དཔལ་ལས་མཐར་ཉམས་ནས།།

ཕག་གམ་བ་ལང་མངལ་ནས་བཙས།།

ཁ་ཟས་རྩྭ་དང་བཤང་བ་ཟ།།

ས་དང་གནས་མལ་ངན་པ་འགར།།

ཉམ་ང་བར་ཡང་གནས་འཚལ་ལགས།།

སྔར་བཤད་ལས་ངན་རབ་སྤངས་ནས།།

རྣམ་དཀར་གཞན་ཕན་བསམ་པ་དང་།།

ཡང་དག་ལམ་ལ་རབ་གནས་པས།།

ལས་དང་བག་ཆགས་སྤངས་པ་དང་།།

ཐར་ལམ་དག་ལ་འབད་ན་འཐད།།

རབ་དཀར་ལས་ལ་གང་དགའ་བ།།

ཡང་དག་ཁ་ཟས་རྣམ་མང་ལྡན།།

ཁང་བཟང་བ་དན་ཅན་ལ་དབང་།།

ཐམས་ཅད་བཀའ་ལ་རབ་མཉན་པ།།

ས་ལ་དཔལ་འབར་ས་བདག་དང་།།

བསམ་གཏན་རབ་མངའ་ཚངས་དབང་ཡང་།།

ཡང་དག་སར་གནས་འཕགས་པ་དང་།།

གཞལ་ཡས་ཁང་གནས་ལྷ་དབང་ཡང་།།

རྣམ་དཀར་ལས་ལ་རག་ལས་པས།།

ཡང་དག་ལམ་ལ་འབད་ན་འཐད།།

ཡལ་འདབ་རབ་བཟང་དཔག་བསམ་དང་།།

མདངས་གསལ་དལ་འབབ་པད་གསར་ཅན།།

དགའ་ཚལ་མ་ལ་ཡས་ཁང་པ།།

དཔག་ཡས་ངད་ལྡན་གནས་གཙང་ན།།

ཁང་བཟང་རྣམ་དཀར་བ་དན་ཅན།།

ལྟ་ན་རབ་དགའ་ཡངས་པ་དང་།།

དར་དཀར་ན་བཟའ་མལ་ཆ་སྟན།།

རྣམ་མང་དར་ཟབ་རཏྣ་དང་།།

ཡང་དག་ཁ་ཟས་དཔལ་ལ་དབང་།།

ས་དང་བར་སྣང་མཐའ་དག་ན།།

དཔག་ཡས་བསྔགས་པ་དང་ལྡན་པའང་།།

རྣམ་དཀར་ལས་ལ་རག་ལས་པས།།

ཡང་དག་ལམ་ལ་འབད་ན་འཐད།།

ཟབ་ཡངས་གང་ག་པད་གསར་ཅན།།

པད་དཀར་མདངས་བཟང་འདབ་མ་འདབ།།

ཙན་དན་མ་ལ་ཡ་ངད་ལྡན།།

སྣང་བ་རབ་འབར་རྣམ་མང་གསལ།།

རབ་བཟང་ངད་ལྡན་ཙན་དན་བདར།།

ཞལ་ཟས་བཟའ་བ་ལྷ་རྫས་མང་།།

རྫ་རྔ་ཆ་ལང་སྐད་སྙན་དང་།།

དགའ་ཆ་མདངས་གསལ་གར་ཉམས་ཅན།།

ལྷ་རྫས་ཞན་ཡང་མང་ལྡན་པ།།

རབ་དཀར་ལས་ལ་རག་ལས་པས།།

ཡང་དག་ལམ་ལ་འབད་ན་འཐད།།

རྣམ་དཀར་ལས་ལ་འབད་ན་ཡང་།།

མཚན་མ་དང་ལྡན་བསམ་གཏན་ལས།།

ཟག་བཅས་གནས་ནས་ཐར་བར་དཀའ།།

ཡང་དག་ལམ་ལ་གནས་པ་ལ།།

ཟག་པ་ཐམས་ཅད་འགགས་པ་ན།།

མཚན་མར་ལྟ་བ་རབ་སྤངས་ནས།།

བཀའ་དང་མན་ངག་མཉན་པར་འཚལ།།

ཡང་དག་ལམ་ལ་མཁས་པ་དང་།།

གཞན་ཕན་བསམ་པ་རབ་མངའ་བ།།

ས་དང་ལམ་ལ་གནས་པ་ཡང་།།

གང་ཟག་དམ་པ་གཞན་བཙལ་ནས།།

ཟབ་ལམ་ཡང་ཡང་ཉན་ན་བཟང་།།

རྣམ་དག་བཀའ་དང་འགལ་བ་རྣམས།།

གཞན་འགས་འཐད་པར་བསྟན་ན་ཡང་།།

ཚད་མས་རྣམ་པར་བཀག་པས་ན།།

ཉན་ཡང་རང་གཞན་ངལ་བར་ཟད།།

བསམ་གཏན་དག་ལ་མ་འབད་ན།།

ཉན་པ་ཙམ་ལས་ཐར་དཀའ་བས།།

རང་རང་ཁང་པ་བས་མཐའ་དང་།།

གང་བསམ་གནས་ཚལ་ཉམས་དགའ་བ།།

འདབ་ཆགས་སྐད་སྙན་དང་ལྡན་པར།།

བསམ་པ་གཞན་དག་རབ་བཏང་ནས།།

མཉམ་གཞག་ལམ་ལ་འབད་ན་འཐད།།

བདག་ལྟ་མཐའ་དག་རྣམ་སྤངས་ནས།།

ཐབས་ལམ་ཡང་དག་ལྟ་བ་ལ།།

རྣམ་དག་བསམ་པས་འབད་པ་ན།།

ཐར་བ་དམ་པ་རང་ལ་གནས།།

ཡང་དག་ལམ་ལ་འབད་ན་ཡང་།།

རང་ལ་ཕན་བསམ་མ་སྤངས་ན།།

ཉན་རང་དག་ལས་མ་འདས་པས།།

གཞན་ཕན་ལས་ལ་འབད་ན་འཐད།།

གང་ཟག་གཞན་དག་ཐམས་ཅད་ལ།།

ཕ་དང་མར་ཡང་རབ་བསམས་ནས།།

རང་ལས་གཞན་ལ་ལྷག་པར་ཡང་།།

རྣམ་དཀར་བསམ་པ་ལྡན་པར་འཚལ།།

གཞན་ཕན་བསམ་པས་རབ་འཕངས་ནས།།

ཁ་ཟས་མལ་ཆ་གནས་ཁང་དང་།།

ཡན་ལག་དག་དང་དགའ་མ་ཡང་།།

མ་ཕངས་གཞན་ལ་གཏང་བར་འཚལ།།

ལ་ལས་འདབ་མ་འབར་བ་དང་།།

རྣམ་མང་མདའ་ཆར་ཕབ་ན་ཡང་།།

བདག་དང་ལས་ལ་རབ་བསམ་ནས།།

རྣམ་དཀར་བསམ་པས་གནས་པར་འཚལ།།

ཐམས་ཅད་རང་ལ་རག་ལས་པས།།

རང་བསམ་སྟག་ལྟར་ཡན་པ་དག།།

ཟབ་ལམ་ཀ་བ་དམ་པ་ལ།།

བསམ་གཏན་ཐག་པས་བཏགས་ན་བཟང་།།

ལྟ་ངན་རྣམ་པར་མ་གསལ་ན།།

ཐར་ལམ་དག་ལས་ཉམས་ལགས་པས།།

རྟག་ཆད་ལྟ་བ་རབ་སྤངས་ནས།།

ཡང་དག་མཐའ་ལ་མཉམ་གཞག་འཚལ།།

བརྟགས་ནས་ཚད་མས་བསལ་བ་དང་།།

ཐ་སྙད་སྣང་ཙམ་མ་འགགས་པས།།

རྟག་ཆད་མཐའ་ལས་རབ་འདས་པར།།

ཡང་དག་ལམ་ལ་མཁས་པས་བཤད།།

ཡང་དག་ལམ་ལ་མ་འབད་ན།།

ལས་ངན་བག་ཆགས་སྤང་དཀའ་བས།།

མཚན་མ་ཐམས་ཅད་རབ་སྤངས་ནས།།

ས་ལམ་དག་ལ་འབད་པར་འཚལ།།

བཀའ་རྣམས་གདམས་པར་རབ་ཤར་ནས།།

ཟབ་ལམ་བསམ་གཏན་དག་ལ་འབད།།

མཉམ་གཞག་ལམ་ལས་ལངས་པ་དང་།།

བཀའ་དང་མན་ངག་འཆད་པར་འཚལ།།

གཞན་ཕན་མཛད་པ་བསམ་ལས་འདས།།

ལས་ངན་བག་ཆགས་མཐའ་དག་སྤངས།།

ཟབ་ལམ་ཐམས་ཅད་ཚང་བར་མངའ།།

མཚན་དང་ལྡན་པ་གཞན་ལས་ལྷག།།

རབ་དང་བར་དང་ཐ་མ་ལ།།

རང་རང་ཁམས་དང་བསམ་པ་དང་།།

འཚམ་པར་ལམ་རྣམས་ཐམས་ཅད་འཆད།།

ཚངས་དང་ལྷ་དབང་བཀའ་ལ་ཉན།།

མདའ་ལྔ་བ་རྣམས་རང་དབང་སྤངས།།

འཕགས་པ་གཞན་ལས་མཁས་པ་དག།

ཡང་དག་ལམ་ལ་རག་ལས་པས།།

ལས་ངན་ཐམས་ཅད་རབ་སྤངས་ནས།།

ཡང་དག་ལམ་ལ་འབད་པར་འཚལ།།

གཞན་ཕན་བསམ་པས་རབ་འཕངས་ནས།།

ཟབ་ལམ་བག་ཙམ་བསྟན་པ་ལ།།

བདག་ལ་ཕན་བསམ་ལྡན་པ་རྣམས།།

དགའ་དང་དད་པས་ཉན་ན་འཐད།།

ཐ་མལ་ནད་དང་བཅས་པ་ཡང་།།

སྨན་པ་དག་ལ་རབ་ཉན་ན།།

ཆགས་དང་སྡང་བས་ན་བ་དག།།

བཀའ་ལས་འདས་པ་ག་ལ་འཐད།།

ཡན་ལག་ཞགས་པས་བསྡམས་པ་ཡང་།།

བཅད་ཐབས་དག་ལ་རབ་འབད་ན།།

ལས་ངན་ཞགས་པས་བཏབ་པ་དག།།

དལ་བར་གནས་པ་ག་ལ་འཐད།།

དད་ལྡན་སྦ་བས་ཡང་དང་ཡང་།།

ནན་མཛད་ངག་ལས་རབ་ཉན་ནས།།

སྙན་ངག་གནས་རྣམས་མཐའ་དག་ལ།།

མཁས་པས་ལྷག་བསམ་དག་པས་བརྩམས།།

ཟབ་ལམ་མན་ངག་བཤད་པ་ལ།།

འགལ་བ་སྣང་ན་མཁས་ལ་བཤགས།།

རྣམ་དཀར་ལས་དང་གང་ལྡན་པས།།

རང་གཞན་བག་ཆགས་སྤང་བར་འཚལ།།

གཞན་འགས་བསྐལ་པར་འབད་ན་ཡང་།།

བརྩམ་པར་རབ་དཀའ་སྙན་ངག་དག།།

ལྷག་བསམ་རྣམ་པར་དག་པས་བརྩམས།།

མཁས་པ་རྣམས་ལ་ཡ་མཚན་གནས།།

ཆགས་དང་སྡང་བས་སྨད་ན་ཡང་།།

རང་རྟགས་གཞན་ལ་བསྟན་པར་ཟད།།

བདག་ལ་འདར་དང་ཉམ་ང་བ།།

ནམ་ཡང་མངའ་བ་ག་ལ་འཚལ།།

ཞེས་པ་འདི་ནི་བཤེས་གཉེན་སྦ་བས་བསྐུལ་བའི་ངོར། བདེ་བར་གཤེགས་པའི་གསུང་རབ་ཕལ་མོ་ཆེ་ལ་བློ་གྲོས་ཀྱི་པད་མོ་རྒྱས་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་སྦྱར་བའོ།།

རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ། བན་ཤུལ་འཇམ་དབྱངས།