རང་སེམས་ཆོས་ལ་སྐུལ་བའི་བཀའ་སློབ་བཞུགས་སོ།།
རྗེ་ལམ་རིམ་པ།
ན་མོ་གུ་རུ།
གང་མཚན་ལན་གཅིག་རྣ་བར་ལྷུང་བས་ཀྱང་།།
སྲིད་ཞིའི་དབུལ་བ་སེལ་དང་ཆབས་གཅིག་པར།།
ཅི་འདོད་རེ་བ་སྐོང་བའི་ཡིད་བཞིན་ནོར།།
བླ་མ་མཆོག་གསུམ་གཙུག་གི་རྒྱན་དུ་རོལ།།
གྲོགས་དག་འདི་ཕྱིའི་གཏན་དུ་བདེ་འདོད་ཅིང་།།
སྡིག་མི་འདོད་ན་ཆོས་བཞིན་བྱ་དགོས་པས།།
ཇི་ལྟར་བྱ་ཚུལ་མདོར་བསྡུས་གོ་བདེ་བར།།
ཚིག་འགའ་གསོལ་ལ་ཅུང་ཟད་སྙན་གཏོད་ཅིག།
ནད་པ་དག་གིས་སྨན་པ་འཚོལ་བ་བཞིན།།
ཐོག་མར་ཚད་ལྡན་བཤེས་གཉེན་དམ་པ་ཞིག།།
བཙལ་ནས་བསམ་སྦྱོར་གཉིས་ཀྱིས་ཚུལ་བཞིན་དུ།།
བསྟེན་ནས་གདམས་པ་ལོངས་ཤིག་སྙིངགཏམཡིན།།
ཐོག་མེད་དུས་ནས་དམྱལ་བ་ཡི་དྭགས་སོགས།།
མི་ཁོམ་གནས་སུ་སྡོད་དགོས་བྱུང་མོད་ཀྱི།།
ད་རེས་དེ་ནས་ཡུད་ཙམ་ཐར་བ་འདི།།
རྨི་ལམ་ལྟ་བུ་ཡིན་ནོ་སྙིང་གཏམ་ཡིན།།
རྙེད་དཀའི་མི་ལུས་ལན་ཅིག་རྙེད་དུས་འདིར།།
སྙིང་ནས་བསྒྲིམས་ཏེ་སྙིང་བོ་མ་བླངས་ན།།
སླར་ཡང་ངན་སོང་གནས་འདིར་ལྷུངས་པའི་ཚེ།།
འགྱོད་ཀྱང་འཕྱིས་པར་ཟད་དེ་སྙིང་གཏམ་ཡིན།།
ཤིན་ཏུ་དབུལ་བའི་མི་ཞིག་གསེར་གླིང་དུ།།
ཡུད་ཙམ་ཚུད་ན་ནོར་བུ་ཅིས་མི་ལེན།།
དེ་བཞིན་བདག་འདྲས་དལ་འབྱོར་ཐོབ་དུས་འདིར།།
དེ་བས་སྙིང་བོ་བླང་དགོས་སྙིང་གཏམ་ཡིན།།
དལ་འབྱོར་ཐོབ་ཀྱང་དོན་མེད་རྣམ་གཡེང་ངང་།།
མི་ཚེ་འདས་ན་དབུལ་བོས་གསེར་གླིང་ནས།།
ལག་སྟོང་ལྡོག་པ་ལས་ཀྱང་ཆེས་ཕངས་པས།།
རང་ལྕག་རང་ལ་བྲོབས་ཤིག་སྙིང་གཏམ་ཡིན།།
དོན་ཆེན་གཏན་བདེ་སྒྲུབ་ནུས་རྟེན་བཟང་འདི།།
དོན་མེད་འདི་སྣང་ལས་ལ་ཆུད་གསན་ན།།
མི་རུ་རློམ་ཡང་དོན་དུ་བྱོལ་སོང་དང་།།
ཁྱད་པར་ཅི་ཡང་མེད་དོ་སྙིང་གཏམ་ཡིན།།
སྐྱེས་པའི་ནམ་གཞུག་འཆི་ལས་མ་འདས་ཤིང་། །
འཆི་ཚེ་ཆོས་ལས་གཞན་གྱིས་མི་ཕན་པས།།
ཕན་ངེས་ཆོས་ཤིག་ཉི་མ་དེ་རིང་ནས།།
གང་ནུས་ཅི་ཡོང་སྒྲུབས་དང་སྙིང་གཏམ་ཡིན།།
ཐ་ན་དེ་རིང་ཙམ་ཡང་མི་འཆི་བའི།།
གདེང་ཚོད་ཅུང་ཟད་ཙམ་ཡང་མེད་བཞིན་དུ།།
ད་དུང་སྡོད་གཤོམ་ཁོ་ནས་དུས་འདའ་བ།།
མི་ཁྱོད་སྨྱོ་བ་མིན་ནམ་སྙིང་གཏམ་ཡིན།།
ཚེ་འདིའི་གཅེས་ནོར་ཕ་མ་སྤུན་མཆེད་སོགས།།
ཡིད་ལ་གཅགས་ཀྱང་རིང་མིན་དབང་མེད་དུ།།
བཞག་ནས་རང་ཉིད་གཅིག་བུ་འགྲོ་དགོས་པས།།
འགྲོ་ཆས་ལ་འུར་སྡོགས་དང་སྙིང་གཏམ་ཡིན།།
རང་རེས་མཐོང་བའི་སྐྱེ་བོ་ཇི་སྙེད་ཅིག།
ཤི་ནས་ད་ལྟ་གར་སོང་ཆ་མེད་ཐལ།།
རང་ཡང་རིང་མིན་དེ་ལྟར་ཐལ་བས་ན།།
ཚེ་འདིར་ཆགས་ནས་ཅི་བྱེད་སྙིང་གཏམ་ཡིན།།
ཉེས་ཅན་གསོད་སར་བཀྲི་བའི་བར་སྐབས་དེར།།
ནོར་བུ་རྙེད་ཀྱང་དགོས་རྒྱུ་མ་མཆིས་ལྟར།།
མི་ཚེ་ཡུད་ཀྱིས་སོང་བའི་བར་སྐབས་འདིར།།
ཅིས་ཀྱང་དགོས་པ་མེད་དེ་སྙིང་གཏམ་ཡིན།།
ཕྱི་ནས་འོང་རྒྱུ་མི་རྟག་འཆི་བའི་ཚུལ།།
སྔོན་ནས་བསམས་ཏེ་འཆི་གྲབས་མ་བྱས་ན།།
དུས་ལ་གཏུགས་ཚེ་ཅི་བགྱིར་མ་མཆིས་པས།།
རྗེས་ཡོང་སྔོན་ལ་སོམས་དང་སྙིང་གཏམ་ཡིན།།
སྙིང་བོ་མེད་པའི་འདི་སྣང་བྱ་བ་ལ།།
སྙིང་བོར་རློམས་ཏེ་མགོ་བོ་འཁོར་འཁོར་ནས།།
སྙིང་བོའི་ལྷ་ཆོས་སྣེ་གཅིག་མ་བྱེད་ན།།
སྙིང་རྩ་རུལ་བར་ངེས་སོ་སྙིང་གཏམ་ཡིན།།
ཚེ་འདི་ཇི་ལྟར་རིང་ཡང་ལོ་འགའ་ཙམ།།
ཕྱི་མ་ཕན་གྱི་མཐའ་ལ་གཏུགས་དུས་མེད།།
དེ་ཕྱིར་འདི་ལས་ཕྱི་མ་གལ་ཆེ་བས།།
ཕྱི་མའི་དོན་ལ་འབུངས་ཤིག་སྙིང་གཏམ་ཡིན།།
མི་ཚེ་གང་བོ་སྐྱིད་ན་ཉིན་གཅིག་ཙམ།།
དཀའ་བ་སྤྱད་དགོས་བྱུང་ཡང་ཅིས་མི་བཟོད།།
དེ་བཞིན་གཏན་དུ་སྐྱིད་ན་ཚེ་ཐུང་འདིར།།
ཆོས་ཕྱིར་སྡུག་ཀྱང་ལོས་བཟོད་སྙིང་གཏམ་ཡིན།།
ཉིན་གཅིག་བདེ་ལ་ཆགས་ནས་མི་ཚེའི་རིང་།།
སྡུག་ལ་སྦྱོར་ན་ཤིན་ཏུ་བླུན་པ་སྟེ།།
ཚེ་འདིར་ཆགས་ནས་གཏན་ཏུ་སྡུག་བསྔལ་ལ།།
སྦྱོར་ན་དེ་བས་བླུན་ནོ་སྙིང་གཏམ་ཡིན།།
ད་ལྟ་མཐོ་ཡིས་སླེབ་དུས་མ་འབད་ན།།
ནམ་ཞིག་འདོམས་ཀྱིས་མི་འཁྱུད་དུས་བྱུང་ཚེ།།
འགྱོད་ཀྱང་ཕན་པ་མེད་པས་བྱ་དགོས་རྣམས།།
ད་ལྟ་ཉིད་ནས་བྱོས་དང་སྙིང་གཏམ་ཡིན།།
ཕྱི་མར་ཕན་པའི་ཆོས་ཤིག་བྱེད་འདོད་ཀྱང་།།
ཕར་ཙམ་མི་འཆི་སྙམ་པའི་རྟག་འཛིན་འདིས།།
བསླུས་ནས་ལག་སྟོང་ལྡོག་པ་ཆེས་མང་བས།།
བྱེད་ན་འཕྲད་ལ་བྱོས་དང་སྙིང་གཏམ་ཡིན།།
འདི་ནས་ངན་འགྲོར་ལན་ཅིག་ལྷུངས་གྱུར་ན།།
སླན་ཆད་ཐར་བའི་གོ་སྐབས་མ་མཆིས་པས།།
ད་ལྟ་རང་ལག་ཡོད་དུས་ངན་སོང་གི།
སྐྱེ་སྒོ་ཅི་ཆོད་ལྟོས་དང་སྙིང་གཏམ་ཡིན།།
བརྒྱ་ལ་ངན་སོང་སྡུག་བསྔལ་མི་བཟོད་ན།།
དེ་རྒྱུ་སྔར་བསགས་གང་ཡིན་འདག་ངེས་སུ།།
སྦྱོངས་ལ་ཕྱིན་ཆད་མི་བྱེད་སྡོམ་སེམས་ངོས།།
སྤང་བླང་འཛོལ་མེད་གྱིས་དང་སྙིང་གཏམ་ཡིན།།
རྒྱུས་མེད་ཡུལ་དུ་གྲོགས་མེད་འཁྱམས་པའི་ཚེ།།
ཚེ་འདིའི་གཉེན་བཤེས་ལོངས་སྤྱོད་ཀུན་གྱིས་བསུ།།
བསླུ་བ་མེད་པ་དཀོན་མཆོག་རིན་ཆེན་གསུམ།།
གསུམ་ལ་སྐྱབས་སུ་འཆོས་དང་སྙིང་གཏམ་ཡིན།།
ཕར་ལ་བསྐྱབས་ན་ཚུར་ལ་མི་བསླུ་བ།།
དཀོན་མཆོག་གསུམ་འདྲ་གཞན་དུ་ཡོད་མིན་པས།།
དོན་མེད་མི་ལ་རེ་བ་མ་མཆིས་པར།།
ལྷ་ལ་སྐྱབས་སུ་སོང་དང་སྙིང་གཏམ་ཡིན།།
སྐྱོན་ཟད་ཡོན་ཏན་ཀུན་རྫོགས་ཐུགས་རྗེའི་སྤྱན།།
གཟིགས་པ་དུས་ལས་མི་ཡོལ་སངས་རྒྱས་ལ།།
ཡིད་ཆེས་དད་པ་དྲག་པོའི་ངང་ཉིད་ནས།།
བློ་ཕུག་ལིངས་ཀྱིས་འགེལ་དང་སྙིང་གཏམ་ཡིན།།
སྐྱབས་སུ་གསོལ་ན་མི་མཁྱེན་མི་སྲིད་ཅིང་།།
མཁྱེན་ནས་མི་སྐྱོབ་པ་ཡང་མི་སྲིད་ལ།།
བསྐྱབས་ན་མི་ནུས་པའང་མི་སྲིད་པས།།
རྩེ་གཅིག་སྐྱབས་སུ་གསོལ་དང་སྙིང་གཏམ་ཡིན།།
ཆོས་ཞེས་བྱ་བ་རྣམ་གྲངས་མང་མོད་ཀྱང་།།
སྐྱབས་འགྲོར་མ་འདུས་གང་ཡང་ཡོད་མིན་པས།།
བརྒྱ་གོ་གཅིག་ཆོད་སྐྱབས་འགྲོའི་ཉམས་ལེན་ལ།།
ནན་ཏན་སྙིང་པོར་མཛོད་དང་སྙིང་གཏམ་ཡིན།།
གང་དང་གང་གི་ས་བོན་བཏབ་པ་ལས།།
དེ་དང་དེ་ཡི་འབྲས་བུ་འབྱུང་བ་བཞིན།།
དཀར་ནག་ལས་འབྲས་ནམ་ཡང་མི་བསླུ་པས།།
སྡིག་སྤོང་དགེ་བ་སྒྲུབས་དང་སྙིང་གཏམ་ཡིན།།
བདེ་བ་འདོད་ན་དགེ་ལ་ནན་ཏན་སྐྱེད།།
སྡུག་མི་འདོད་ན་དེ་རྒྱུ་སྡིག་པ་སྤོངས།།
སངས་རྒྱས་དངོས་ལ་ཞུས་ཀྱང་འདི་ལས་ལྷག།
གདམས་པ་གསུང་རྒྱུ་མེད་དོ་སྙིང་གཏམ་ཡིན།།
ལས་འབྲས་བསླུ་མེད་ཚུལ་ལ་ཡིད་ཆེས་ནས།།
སྡིག་སྤོང་དགེ་བ་བསྒྲུབ་ལ་འབད་ནུས་ན།།
འདི་ཕྱི་གཏན་ཏུ་བདེ་བ་འབའ་ཞིག་ལས།།
སྡུག་བསྔལ་མིང་ཡང་མེད་དོ་སྙིང་གཏམ་ཡིན།།
མི་རྣམས་དམྱལ་བའི་རྒྱུ་ལའང་དེ་ཙམ་དུ།།
འབད་པར་རིགས་ན་རང་རེ་གཏན་བདེའི་རྒྱུར།།
དམ་པའི་ཆོས་ལ་ཅི་སྟེ་འབད་མི་རིགས།།
ཡོད་རྒུའི་རྩལ་གྱིས་འབུངས་ཤིག་སྙིང་གཏམ་ཡིན།།
མདོར་ན་མ་འོངས་གཏན་གྱི་བདེ་སྡུག་ནི།།
ད་ལྟའི་སྤྱོད་ཚུལ་ཉིད་ལ་རག་ལས་པས།།
བག་མེད་ལེ་ལོའི་དབང་དུ་མི་གཏོང་བར།།
ཚེ་ལྷག་དོན་ལྡན་མཛོད་ཅིག་སྙིང་གཏམ་ཡིན།།
ཕྱི་མར་བསམས་ནས་ཚེ་འདི་བློས་བཏང་སྟེ།།
ཆོས་ཤིག་བྱེད་ན་ཕྱི་མར་ལྟ་ཞོག་གི།
ཚེ་ཐུང་འདིར་ཡང་གཞན་དང་མི་འདྲ་ཙམ།།
འོང་བར་མཐོང་ཐོས་ལགས་སོ་སྙིང་གཏམ་ཡིན།།
དེ་ལྟར་ཕན་པའི་སེམས་ཀྱིས་རང་གིས་རང་།།
ཆོས་ལ་བསྐུལ་བའི་ཀྱོ་བ་རྣོམ་པོ་འདིས།།
མ་དུལ་སེམས་ཀྱི་གླང་བོ་མྱུར་ཐུལ་ནས།།
ཀུན་ཀྱང་གཏན་བདེའི་ལམ་དུ་ཚུགས་པར་ཤོག།
གང་འདི་བསྟན་པའི་ངང་ཚུལ་ཕྱོགས་ཙམ་ཞིག།
ཤེས་ནས་སྟོན་ལ་དད་པའི་སྤོང་བ་ལ།།
དགེ་སྦྱོང་ངག་དབང་ཕུན་ཚོགས་ཞེས་བགྱི་བས།།
རང་གི་བསམ་གཏན་ཁང་བུར་སྤེལ་བ་དགེ།
རྩོམ་ཡིག་ཕབ་བཤུ་བ། སྐབས་བཞི་བའི་མཐར་ཕྱིན་སློབ་མ་ནག་བཟའ་བློ་བཟང་ཆོས་གྲགས་ཡིན།
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།
|