ལྟ་བའི་མགུར་མ་དེ་ཉིད་ལྟ་བའི་མིག་འབྱེད་ཅེས་བྱ་བ་བཞུགས་སོ། ། 

དཔལ་བདེ་ཆེན་ཐུགས་རྗེའི་བདག་ཉིད་དེ། ། 

དབྱིངས་སྤྲོས་བྲལ་ངང་དུ་རོལ་བ་ཡིས། ། 

མ་ཉམ་ཐག་འགྲོ་བའི་དབུགས་འབྱིན་པ། ། 

རྗེ་བླ་མའི་ཞབས་རྡུལ་གཙུག་གིས་མཆོད། ། 

གནས་འཁོར་བའི་སྡུག་བསྔལ་ཡོད་དོ་ཅོག ། 

དགྲ་བདག་འཛིན་གདོན་གྱིས་བསྐྱེད་པས་ན། ། 

དེ་དྲུངས་ནས་འབྱིན་པའི་ཐབས་ཚུལ་ལ། ། 

བུ་ཐར་འདོད་རིགས་ཀྱིས་འབད་པར་རིགས། ། 

ད་འོན་ཀྱང་ཕྲ་ལ་ཆེས་ཟབ་པ། ། 

དོན་དེ་ཉིད་རིག་པའི་སྔ་རོལ་ན། ། 

ཆེས་རགས་པའི་མི་རྟག་སྡུག་བསྔལ་དང་། ། 

སྟོང་བདག་མེད་རྟོགས་དགོས་རིམ་པ་མང་། ། 

ན་རྒན་གཞོན་མེད་པར་གློ་བུར་གྱི། ། 

རྐྱེན་དུ་མས་འཆི་བ་མཐོང་བཞིན་དུ། ། 

རང་འཆི་སྙམ་བློ་ཡང་མི་སྐྱེ་ན། ། 

ལམ་ཟབ་མོའི་རྟོགས་པ་ག་ལ་སྐྱེ། ། 

རྟེན་གཅིག་ལ་ལོ་ཟླ་རེ་རེར་ཡང་། ། 

སྐྱིད་སྡུག་དང་འབྱོར་རྒུད་ངེས་མེད་ཚུལ། ། 

ཤེས་བཞིན་དུ་ཞེན་པ་ཨ་འཐས་ལ། ། 

བློ་ངེས་འབྱུང་རྣལ་མའི་རེ་བ་དཀའ། ། 

ཁོང་བྱེ་མདོ་སེམས་ཙམ་རང་རྒྱུད་པའི། ། 

ཆོས་ལྟ་བའི་སྐས་ལ་མས་རིམ་བཞིན། ། 

ཡར་མ་འཛེག་དང་བོ་ཁོ་ན་ནས། ། 

ཆེས་མཐོན་པོའི་སྤར་འཛིན་སྟོང་འུད་ཡིན། ། 

ལར་བདག་ཅག་རང་རང་སྣང་བ་འདིར། ། 

ཐོ་མ་རེག་བདེན་པ་སོར་བཞག་གི ། 

བློས་བཅོས་པའི་དགག་བྱ་འགོག་པ་འདིས། ། 

ཁོ་ལྷན་སྐྱེས་སྐུ་མཁར་བརྟན་དུ་གཏོང་། ། 

མིང་དབུ་མར་བཏགས་ཀྱང་རང་ཅག་རྣམས། ། 

བློའི་ངོ་ན་བདེན་སྟོང་མཐར་ཐུག་གི ། 

འཚམས་འདི་ལས་ཕྲ་ཞིང་ཟབ་པ་ཞིག ། 

ཁོང་དོན་སྨྲ་རྣམས་ཀྱང་དགོངས་ཏེ་མཆི། ། 

གཅིག་དུ་བྲལ་ལ་སོགས་གཏན་ཚིགས་ཀྱིས། ། 

ཆོས་བདེན་མེད་ཁ་ཡིས་སྒྲུབ་ན་ཡང་། ། 

སེམས་གཏད་སོ་རྟག་གཅིག་རང་དབང་བའི། ། 

བདག་ཕྱོགས་ཙམ་ཁེགས་ཀྱང་མཚར་དུ་ཆེ། ། 

ཁོང་དོན་སྨྲ་དོན་གྱི་ས་ལེ་སྦྲམ། ། 

བདག་རགས་པའི་གཡའ་དང་བྲལ་ཤུལ་ན། ། 

དོན་བདེན་གྲུབ་དངོས་པོའི་རང་མདངས་ཤིག ། 

ཚུར་རྣམ་པ་གཏོད་བྱེད་ཡོད་དོ་ཟེར། ། 

དེ་བཀག་སྟེ་རྣམ་རིག་སྨྲ་བ་རྣམས། ། 

ནང་འཛིན་པའི་པིར་གྱི་ངོས་འདི་ན། ། 

ཡུལ་སྣ་ཚོགས་མདངས་བཀྲ་བག་ཆགས་ཀྱི། ། 

ཚོན་བདེན་པའི་ཤས་ཅིག་ཡོད་པར་སྨྲ། ། 

ཁོང་རང་རྒྱུད་པ་རྣམས་བདེན་པའི་དངོས། ། 

ཡུལ་ཡུལ་ཅན་གང་ལ་མི་དམིགས་ཀྱང་། ། 

ལྕགས་རྡོ་དང་ཕྲད་པའི་རྟེན་འབྱུང་ལས། ། 

མེ་འབྱུང་བ་སྲེག་བྱེད་རང་མཚན་ཟེར། ། 

དཔལ་ཀླུ་སྒྲུབ་དགོངས་པ་མཐར་ཐུག་ནི། ། 

བྱད་མེ་ལུང་ངོས་ལ་ཤར་བ་བཞིན། ། 

སྣང་ཙམ་པོ་མ་གཏོགས་ཕྱི་ནང་ན། ། 

དོན་ངོ་བོས་གྲུབ་པ་འགར་ཡང་མེད། ། 

སའི་དུམ་བུར་དབུ་དང་ཕྱག་གོ་ཞེས། ། 

མིང་བཏགས་ཀྱིན་བཅོས་པ་ཚོགས་ཙམ་ན། ། 

ཕར་བཏགས་ཉམས་མེད་པར་རང་ངོས་ནས། ། 

ཚུར་གྲུབ་གྲུབ་འདྲ་ཡང་ག་ལ་བདེན། ། 

དེ་ཡིན་ཀྱང་ཚོགས་པའི་རྟེན་འབྱུང་གིས། ། 

ལས་བསོད་ནམས་གསོག་པའི་གཞིར་འགྱུར་ཏེ། ། 

རྐྱེན་ཚོགས་པས་ཁང་ཁྱིམ་ཆ་བྱད་སོགས། ། 

ཀུན་དགོས་པ་སྒྲུབ་ལ་བསྙོན་དུ་མེད། ། 

མགོན་སངས་རྒྱས་ནས་བཟུང་རང་ཅག་པར།  ། 

ཀུན་བདེན་མེད་བརྗོད་པའི་ཚིག་འདྲ་ཡང་། ། 

བློའི་འཆར་ཚུལ་ཤར་ནུབ་བཞིན་གྱུར་པས། ། 

ལམ་སོ་སོ་རང་རིག་སྤྱོད་ཡུལ་གསུངས། ། 

གང་རྐྱེན་ལས་སྐྱེས་པ་དེ་མ་སྐྱེས།  

དེ་སྐྱེ་བའི་རང་བཞིན་ཡོད་མ་ཡིན། ། 

རྐྱེན་གཞན་ལ་ལྟོས་ཕྱིར་སྟོང་བ་ཞེས། ། 

གསུང་དེ་ལས་ལྷག་པའི་སྟོན་ཚུལ་མེད། ། 

རྒྱུ་ཚོགས་བསགས་སྒྲིབ་སྦྱོང་གནད་སྨིན་ལ། ། 

དེ་ཙམ་གྱིས་ལྟ་བ་རྟོགས་ནུས་ཏེ། ། 

མི་ཕལ་ཆེར་སྐྱེས་ཕྱིར་མི་སྐྱེས་ཞེས། ། 

ཚིག་དངོས་ཟིན་འགལ་བ་ལྟ་བུར་གོ ། 

བློས་སྟོང་ཕྱོགས་བསམ་པས་སྟོང་ཚུལ་རེ། ། 

འཆར་སླ་ཡང་ཉེན་དང་གོལ་ས་ཆེ། ། 

ལུགས་འོག་མ་ཀུན་ཀྱང་རྟག་པ་ཡི། ། 

མཐའ་སྟོང་བས་སེལ་བར་མགྲིན་གཅིག་སྨྲ། །  

སྣང་ཙམ་གྱི་རྟེན་འབྱུང་འདི་བསམ་པས། ། 

དོན་སྟོང་བ་ཤར་ན་ཡ་མཚན་ཏེ། ། 

ཀུན་བདེན་པར་ཞེན་པའི་རྐྱེན་དེ་ཡིས། ། 

ཕྱིར་བདེན་འཛིན་གཞོམ་ནུས་སྐལ་བ་བཟང་། ། 

འབྲས་རྒྱུ་ལ་ལྟོས་པའི་རྟེན་འབྱུང་ཙམ། ། 

ཡོངས་དངོས་པོར་སྨྲ་བ་ཀུན་འདོད་ཀྱང་། ། 

རྒྱུ་འབྲས་བུར་ལྟོས་ཤིང་དགྲ་གཉེན་སོགས། ། 

ཀུན་ཕན་ཚུན་ལྟོས་པའི་བཏགས་ཡོད་འདི། ། 

ཡུལ་དུས་གསུམ་བྱ་བྱེད་ཐམས་ཅད་ལ། ། 

སྒོ་ཀུན་ནས་སྦྱར་ཏེ་དཔྱད་པ་ཡིས། ། 

དུས་དེང་སང་སྣང་ཚད་བདེན་ཞེན་འདི། ། 

གོ་བཟློག་པས་གང་སྣོན་སྟོང་བར་འཆར། ། 

དུས་དེ་ཚེ་ལྟ་བའི་དཔྱད་པ་རྫོགས། ། 

དཔལ་ཀླུ་སྒྲུབ་ཡབ་སྲས་དགོངས་པ་རྙེད། ། 

གཡང་རྟག་ཆད་མཐའ་ལས་གྲོལ་བ་ཡི། ། 

མགོན་རྒྱལ་བ་དགྱེས་པའི་ལམ་དུ་ཞུགས། ། 

དོན་དེ་ལྟར་སྒྲུབ་པའི་རྒྱུ་ཡི་གཙོ། ། 

གཞི་དད་དང་ཚུལ་ཁྲིམས་ཞིང་ས་ལ། ། 

ལྷ་བླ་མའི་བྱིན་རླབས་དྲོད་ཕེབས་ཤིང་། ། 

རྒྱུ་ངེས་དོན་དཔྱད་པའི་ས་བོན་བཏབ། ། 

རྐྱེན་ཚོགས་བསགས་སྒྲིབ་སྦྱོང་ཆུ་ལུད་བཀྱེ། ། 

ལམ་གོལ་བའི་རྩྭ་དང་ལྡུམ་བསལ་ན། ། 

གནད་མཐར་ཐུག་ལྟ་བའི་ལོ་ཏོག་འཁྲུངས། ། 

རང་ཉམས་མྱོང་མེད་པའི་ཁ་བཤད་གླུས། ། 

གཞན་ཆོས་ལ་འཁུལ་བ་དཀའ་མོད་ཀྱང་། ། 

ཕ་མཚན་ལྡན་བླ་མའི་གསུང་ཟློས་པའི། ། 

དགེ་འདི་ཡིས་འགྲོ་ཀུན་རྒྱལ་གྱུར་ཅིག ། 

ཅེས་པ་འདི་ནི་བསྟན་པའི་གསལ་བྱེད་རྒྱལ་མཁན་པོ་གྲགས་པ་རྒྱལ་མཚན་པའི་གསུང་གིས་བསྐུལ་བ་ལྟར་༧བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །