ཨ་ཧྥོ་ཧན་ལ་ས་འགུལ་དྲག་པོ་བྱུང་ནས་པ་ཅི་སི་ཐན་གྱི་མི་73ཚེ་ལས་འདས་པ།

སྤྱི་ལོ2015ལོའི་ཟླ་10བའི་ཚེད26ཉིན།ཨ་རིའི་ས་གཤིས་ཚད་ཞིབ་ཅུའུ་ཡི་དྲ་ཚིགས་སྟེང་བསྒྲགས་པའི་གནས་ཚུལ་ལྟར་ན། པེ་ཅིན་གྱི་དུས་ཚོད་ཚེས་26ཉིན་གྱི་ཕྱི་དྲོའི་ཆུ་ཚོད་17དང་སྐར་མ9ཡི་ཐོག ཨ་ཧྥོ་ཧན་ལ་ཚད་རིམ་7.7ཅན་གྱི་ས་འགུལ་དྲག་པོ་ཞིག་བྱུང་ཡོད་པ་དང་། འགུལ་ལྟེའི་ཟབ་ཚད་ལ་སྤྱི་ལེ་213ཡོད་པ་རེད།
བོའུ་ཙི་པེ་ཁི་སི་ཐན་དང་། པ་ཅི་སི་ཐན། རྒྱ་གར། བལ་བོ་སོགས་ཀྱི་རྒྱལ་ཁབ་ཚང་མར་ས་འགུལ་གྱི་ཚོར་སྣང་ཤུགས་དྲག་ཡོད་པ་རེད་ལ། BBCགསར་འགྱུར་འཕྲིན་ལམ་ནས་བསྒྲགས་པ་ལྟར་ན། དེ་རིང་གི་ས་འགུལ་དྲག་པོ་དེས་ཉུང་མཐར་ཡང་པ་ཅི་སི་ཐན་གྱི་མི་40ལྷག་དང་། ཨ་ཧྥོ་ཧན་གྱི་མི 20ལྷག་བཅས་རྐྱེན་ལམ་དུ་བཏང་ཡོད་པ་མ་ཟད། མི་བརྒྱ་ཕྲག་མང་བོར་རྨས་སྐྱོན་བཟོས་ཡོད་པ་དང་། སྡོད་ཁང་དང་འཛུགས་སྐྲུན་དངོས་རྫས་ཧ་ཅང་མང་བོར་གཏོར་བརླག་ཚབས་ཆེན་ཐེབས་ཡོད་པས་མིའི་ཤི་གྲངས་ད་རུང་ཇེ་མང་དུ་འགྲོ་ངེས་རེད་ཟེར། བསྒྲགས་པའི་གནས་ཚུལ་ལྟར་ན། ས་འགུལ་དེ་བྱུང་ནས་སྐར་མ་བཅུ་ཙམ་གྱི་རྗེས་སུ་ཡང་བསྐྱར་ཚད་རིམ་4.8ཅན་གྱི་ས་འགུལ་ཐེངས་ཤིག་བྱུང་སོང་ཟེར།
　　གཞན་ཡང་ཀྲུང་གོའི་ས་འགུལ་བརྟག་དཔྱད་སྟེགས་བུའི་དྲ་བ་ནས་དངོས་སུ་ཚོད་ཞིབ་བྱས་པར་གཞིགས་ན། ཟླ་10བའི་ཚེས་26ཉིན་གྱི་ཆུ་ཚོད་17དང་སྐར་མ་09ཡི་སྟེང་དུ། རྒྱ་སྐད་ཀྱིས་ཞིན་ཏོའུ་ཁོའུ་ཧྲིན་兴都库什ཟེར་བའི་ས་ཁུལ་ཏེ།（སའི་གོ་ལའི་བྱང་ཐིག་ཏོའུ36.5དང་། ཤར་ཐིག་ཏོའུ70.8 གཉིས་ཀྱི་བསྣོལ་མཚམས་སུ）ཚད་རིམ་7.8ཅན་གྱི་ས་འགུལ་ཅིག་རྒྱབ་པའི་འགུལ་ལྟེའི་ཟབ་ཚད་ལ་སྟོང་རྨིད་210ཡོད་ཟེར། ཆེས་གསར་བའི་གསར་འཕྲིན། ཀྲུང་དབྱང་བརྙན་འཕྲིན་ཁང་གི་པ་ཅི་སི་ཐན་དུ་སྡོད་པའི་གསར་འགོད་པས་པ་ཅི་སི་ཐན་གྱི་གསར་ལམ་གྱི་གནས་ཚུལ་གཞིར་བཟུང་ནས་བཤད་པའི་སྐད་ཆ་ལ་གཞིགས་ན། ཐེངས་འདིའི་ས་འགུལ་ཁྲོད་པ་ཅི་སི་ཐན་གྱི་མི73འདས་བཀྲོངས་སུ་ཕྱིན་ཡོད་པ་ལས་གཞན། ས་འགུལ་བྱུང་ས་མང་ཆེས་ཤས་རི་ཁུལ་ཡིན་པས་མིའི་ཤི་གྲངས་ད་རུང་གཏན་ཁེལ་བྱ་ཐབས་ཁྱོན་ནས་མི་འདུག་ཟེར།

གསར་འགྱུར་མཁོ་སྤྲོད་པ། སྐབས་བཅུ་གཉིས་པའི་མཐར་ཕྱིན་སློབ་མ་གཉན་བུ་ཡིན།

རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།

སྤྱིའི་ལྟ་སྐུལ་བ། སློབ་གྲྭའི་དབུ་བཞུགས་ལྷན་ཚོགས།
གཙོ་སྐྱོང་སྡེ་ཁག ཐོན་མིའི་སློབ་ཚོགས།
དོ་དམ་པ། ཁཱ་ཤེས་རབ་རྒྱ་མཚོ།
ཞིབ་དཔྱད་པ། ཁཱ་ཤེས་རབ་རྒྱ་མཚོ།
རྩོམ་སྒྲིག་པ། འབའ་སྣང་གྲོལ།
རྩོམ་སྒྲིག་ཨུ་ཡོན། འོད་ཟེར་བཟང་བོ། བསོད་ནམས་རབ་སྣང་། འཕྲིན་ལས་ཉི་མ། བན་ཤུལ་འཇམ་དབྱངས་ཡེ་ཤེས། དམ་ཆོས་ཕུན་ཚོགས། སྦྲ་ནག་འཇིགས་མེད་རྡོ་རྗེ།