ཧྲན་ཞི་ནས་བརྒྱུད་ཚོང་བ་མི་སུམ་བརྒྱ་ལྷག་ཉེན་རྟོག་ཕྱོགས་ཀྱིས་སྡེབ་འཛིན་བྱས་པ།

  2015-10-25ཉིན་ཀྲུང་ཧྭ་ཚོང་ལས་ཚགས་པར་སྟེང་འདྲ་པར་དང་བཅས་གནས་ཚུལ་སྤེལ་བ་ལྟར་ན། ཟླ10བའི་ཚེས་24ཉིན་གྱི་སྔ་དྲོའི་དུས་ཚོད་8ཙམ་ཞིག་ལ། ཧྲན་ཞི་ཞིང་ཆེན་གྱི་ཧྲང་ལོ་གྲོང་ཁྱེར་ཉེན་རྟོག་པར་ས་གནས་མང་ཚོགས་ཀྱིས་ཞུ་གཏུག་བྱས་ཏེ། བརྒྱུད་ཚོང་བ་མི་འབོར་ཆེན་ཞིག་གིས་ཧྲང་ཀྲུག་གྲོང་ཁུལ་གྱི་མགྲོན་ཁང་ཆེན་མོ་མིང་གྲགས་ཅན་ཐན་ཏིས་རིན་ཧུ་ཟེར་བ་དེའི་ནང་ནས་ཚོགས་ཆེན་ཞིག་འཚོག་གྲབས་ཡོད་པའི་གནས་ཚུལ་བཤད་པ་ན། གྲོང་ཁྱེར་ཉེན་རྟོག་ཅུའུ་ཡི་ཧྲང་ཀྲུག་ཡན་ལག་ཅུའུ་ཡིས་ཉེན་རྟོག་པ་བརྒྱ་ལྷག་རྩ་འཛུགས་བྱས་ཏེ། མགྱོགས་ཤིང་མྱུར་བའི་སྒོ་ནས་ཚོགས་ཆེན་ཚོགས་བཞིན་པའི་བརྒྱུད་ཚོང་བ་300ལྷག་གི་མཐའ་སྐོར་ནས་ཡོངས་སུ་ཚོད་འཛིན་བྱས་པ་རེད་ལ།“ང་ཚོ་མགྲོན་ཁང་དུ་སླེབས་དུས་ཚོགས་ཁང་ནང་ནག་འཐུབ་བེར་ཡོད་པའི་ནང་ན་བརྒྱུད་ཚོང་བ་རྣམས་འཚོགས་འདུག་པ་མཐོང་བྱུང་།”ཞེས་ཧྲང་ཀྲུག་སྤྱི་བདེ་ཡན་ལག་ཅུའུ་ཡི་ཁྲིན་ཀོན་མངགས་གཏོང་ཁང་གི་མགོ་གཙོ་གཞོན་པ་ཝང་ཞན་ཧྤུན་གྱིས་བཤད།

     དེ་རྗེས་ཁོ་ཚོས་གནས་ཚུལ་ཡར་ཞུ་བྱས་མ་ཐག་མྱུར་བ་ཉིད་དུ་ཧྲང་ཀྲུག་སྤྱི་བདེ་ཡན་ལག་ཅུའུ་ཡིས་ཁྱད་ལྡན་ཉེན་རྟོག་པ་དང་། ཉེས་དོན་མྱུལ་ཞིབ་ཉེན་རྟོག་པ་ལ་སོགས་པའི་རིགས་མི་འདྲ་བའི་ཉེན་རྟོག་མི་སྣ་བརྒྱ་ལྷག་རྗེས་བསྣོན་དུ་བཀོད་སྒྲིག་བྱས་ཏེ་བརྒྱུད་ཚོང་བ་མི་300ལྷག་མངགས་གཏོང་ཁང་ལ་ཁྲིད་ནས་རྩད་ཞིབ་བྱས་པ་རེད།

    ཐེངས་འདིར་རུ་ཁག་གི་སྣེ་ཁྲིད་པའི་ཧྲང་ཀྲུག་སྤྱི་བདེ་ཡན་ལག་ཅུའུ་ཡི་ཅུའུ་ཀྲང་གཞོན་པ་རིན་ཡུང་ཆེན་གྱིས་ངོ་སྤྲོད་བྱས་པ་ལྟར་ན།  ཐེངས་འདིའི་འགུལ་སྐྱོད་ནི་ལོ་འདིའི་ནང་གི་ཧྲང་ཀྲུག་ཉེན་རྟོག་ཕྱོགས་ཀྱི་གཏོར་རྒོལ་མི་གྲངས་ཆེས་མང་ལ་ཁྱོན་ཡོངས་རང་བཞིན་ལྡན་པ། མང་ཚོགས་ཀྱི་མངོན་འདོད་ཤུགས་དྲག་མཚོན་པའི་བྱ་འགུལ་ཅིག་བཅས་ཡིན་པས། མི་འགྱང་བར་མུ་མཐུད་དུ། ཁོ་ཚོས་བཟོ་ཚོང་སྡེ་ཁག་དང་གཞོགས་འདེགས་དམ་ཟབ་སྒོས།  མི་དམངས་ཀྱི་འཚོ་བའི་བདེ་སྐྱིད་དང་སྤྱི་ཚོགས་ཀྱི་འཆམ་མཐུན་གཏན་འཇགས་ལ་འགན་བསྲུང་བྱ་རྒྱུ་ཡིན་ཟེར།

སྒྱུར་བ་བོའི་ཟུར་དཔྱད་ཕྲན་བུ།

    ཡང་གཅིག་བཤད་ན་འདི་ནི་རྒྱུན་ལྡན་གྱི་མི་ཚང་མས་ངེས་པར་དུ་ཤེས་དགོས་ལ་གཟབ་ནན་ཡང་བྱ་དགོས་པའི་གནད་དོན་ཞིག་ཡིན་པས། དེ་ལས་ལྡོག་ན་ད་རུང་མི་མང་བོ་ཞིག་མུ་མཐུད་དུ་ལམ་ལོག་དེར་མི་ཞུགས་པའི་ངེས་པ་མེད་པས་སོ། །  ངས་འདི་ལྟར་བཤད་དོན་ནི་ང་རང་ཉིད་སྔོན་ཆད་བརྒྱུད་ཚོང་བའི་གཡོ་འོག་ཏུ་དངོས་སུ་ཚུད་མྱོང་བ་དང་། ཁོ་ཚོའི་ནང་ནས་ང་གཟའ་འཁོར་གཅིག་ལ་དངོས་སུ་བསྡད་མྱོང་བ།  ཁོ་ཚོའི་ནང་ན་སྐབས་དེར་ང་རང་གི་ཕ་ཡུལ་ཕྱོགས་ཀྱི་མི་ཁ་ཤས་ཡོད་པ་ཡང་ངས་དངོས་སུ་མཐོང་བ། ཁོ་ཚོའི་བྱ་བ་སྤྱོད་པ་མང་བོ་ཞིག་ངས་དངོས་སུ་མཐོང་ཐོས་མྱོང་གསུམ་ཡོད་པ་མ་ཟད། ང་རང་ཉིད་གཡོ་བཙོང་བྱ་མཁན་ཡང་ང་རང་གི་སྐབས་དེར་ཆེས་དགའ་བའི་བོད་མདོ་སྨད་ཨ་མཆོག་གི་གསར་བུ་ཞིག་བཅས་ཡིན་པས།  ངས་ཉིན་བདུན་གྱི་རྗེས་སུ་ཁོ་ཚོའི་ངོ་མདངས་ལ་གཏན་ནས་མ་བལྟས་པར་སྒོར་མོ་ཅི་ཡང་མ་སྤྲད་ལ་ཨུ་ཚུགས་མཐར་སྐྱེད་ཀྱིས་ཁོ་ཚོའི་ཚོགས་གྲལ་ནས་ཕྱིར་བུད་དེ་སོང་བ་ཡིན།

དེ་དག་ཚང་མ་ནི་དེ་རིང་ངས་གསར་འགྱུར་འདིའི་ནང་གི་བརྒྱུད་ཚོང་བ་ཞེས་པ་དེར་གསལ་བཤད་ཀྱི་ཆེད་དུ་བྲིས་པ་ཡིན་པས་ནང་དོན་གོ་རྒྱུ་ཡོད་མེད་ཁྱེད་ཚོ་རང་རང་གིས་ཐུགས་བསམ་བཞེས་རོགས་ཞུའོ། ། སྤྱི་ལོ༢༠༡༥ལོའི་ཟླ༡༠བའི་ཚེས༢༥ཉིན་པེ་ཅིན་ནས་བྲིས།

གསར་འགྱུར་མཁོ་སྤྲོད་པ། སྐབས་བཅུ་གཉིས་པའི་་མཐར་ཕྱིན་སློོབ་མ་གཉན་བུ་ཡིན།