ནང་ཆེན་རྫོང་སྐབས་དང་པོའི་སྐྱེ་ཁམས་ཁོར་སྲུང་བགྲོ་གླེང་།
ནང་ཆེན་རྫོང་ཐེངས་དང་པོའི་སྐྱེ་ཁམས་ཁོར་སྲུང་བགྲོ་གླེང་ནི་ནང་ཆེན་རྫོང་ན་གཞོན་ཞབས་ཞུ་མཐུན་ཚོགས་ཀྱིས་བཀོད་སྒྲིག་འོག་སྤྱི་ལོ་༢༠༡༥ལོའི་ཟླ་༡༠པའི་ཚེས་༢༠དང་༢༡ཉིན་གཉིས་ཀྱི་རིང་དུ་ནང་ཆེན་རྫོང་ཐོག་དུ་འཚོགས་པ་ཡིན། བགྲོ་གླེང་ཐོག་ཏུ་གཉན་པོ་གཡུ་རྩེའི་འདབས་ཀྱི་སྐྱེ་ཁམས་སོ་སྲུང་བའམ་འདབ་ཆགས་ཞིབ་འཇུག་པ་གྲགས་ཅན་མཁས་དབང་འཇུ་བཀྲ་ཤིས་བཟང་པོའམ་བྱ་རྫི་བླ་མ་མཆོག་དང་། སྤྲུལ་སྐུ་བདུད་འདུལ་མཆོག པེ་ཅིང་རི་ཆུ་སྲུང་སྐྱོབས་ཚོགས་པའི་ཚོགས་མི་Ma Hai Yuanདང་། ནང་ཆེན་ན་གཞོན་ལས་སྤེལ་ཞབས་ཞུ་མཐུན་ཚོགས་ཀྱི་འགན་འཛིན་པ་དང་། ཐེངས་འདིའི་བགྲོ་གླེང་བཀོད་སྒྲིག་པ་ནང་ཆེན་དགའ་སྤྲོ། པེ་ཅིང་རི་ཆུ་སྲུང་སྐྱོབ་ཚོགས་པའི་མི་སྣ་དང་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་བཅུ་བཞི་བའི་མཐར་ཕྱིན་སློབ་མ་རྒྱལ་རོང་ཀུན་དགའ་དབྱིག་གཉེན། ཡུལ་ཤུལ་ཁུལ་བྱམས་བརྩེ་ཚོགས་པའི་ཚོགས་མི་ཡེ་ཤེས་རྒྱ་མཚོ་སོགས་ཀྱིས་ཁོར་ཡུག་གི་ཉམས་རྒུད་དང་འབྲེལ་ཁོར་སྲུང་འདུ་ཤེས་དང་། ཁོར་ཡུག་གཙང་སྦྲ་སོགས་མ་འོངས་པ་ལ་ཡར་རྒྱས་ཇི་ལྟར་གཏོང་དགོས་ཚུལ་དང་། གད་སྙིགས་ཇི་ལྟར་གཙང་སྦྲ་བྱེད་དགོས་ཚུལ། ང་ཚོས་ང་ཚོའི་ཁོར་ཡུག་ངོ་ཤེས་པའི་ཐོག་ནས་ང་ཚོ་ང་ཚོའི་ཁོར་ཡུག་ལ་དགའ་དགོས། དགའ་བ་ཙམ་གྱིས་མི་ཆོག་པར་ང་ཚོའི་ཁོར་ཡུག་དེ་ང་ཚོས་སྲུང་དགོས་པ་སོགས་ཀྱི་བགྲོ་གླེང་ལྷུག་པོ་གནང་། ད་རུང་ནང་ཆེན་ཡུལ་གྱི་ཁོར་སྲུང་གི་ཚོགས་པ་བཞི་བཅུ་གཡས་གཡོན་ཙམ་གྱིས་འཐུས་ཚབ་མི་སྣས་ཚོགས་པ་སོ་སོའི་འདས་མ་འོངས་ངོ་སྤྲོད་དང་ལས་རིམ་གྱི་ཉམས་མྱོང་ཧ་ལས་པའི་སྒོ་ནས་གསལ་བཤད་དང་ཕན་ཚུན་གོ་བསྡུར་བྱས།
འཕྲིན་གཏོང་བ། སྐབས་བཅོ་བརྒྱད་པའི་མཐར་ཕྱིན་སློབ་མ་ཨོ་རྒྱན་རབ་གསལ་ཡིན།
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།
| 
青公网安备 63262102000011号