༄༅།།གསེར་ལག་ཆོས་རིག་སློབ་གླིང་མཚམས་སྦྱོར་དང་སློབ་གཙོ་གཞོན་པར་བཅར་འདྲི་གནང་བ། 

བཅར་འདྲི་བྱེད་མཁན།  རང་དྲ་བའི་འཕྲིན་གཏོང་བ་གསེར་ལག་འཇམས་དབྱངས་ཚུལ་ཁྲིམས། 

དྲི་བར་ལན་འདེབས་མཁན། སློབ་གཙོ་གཞོན་པ་འབའ་ཆོས་རྒྱ་མཚོ། 

     གསེར་ལག་དགོན་ཆོས་རིག་འཕེལ་རྒྱས་ཕྱོགས་ལས་རྣམ་རྒྱལ་བཀྲ་ཤིས་ཀུན་ཁྱབ་གླིང་ནི་གསེར་ལག་དགོན་པའི་དགོན་བདག་རྒྱ་བཟའི་ཁྲི་རིན་པོ་ཆེ་༧རྗེ་བཙུན་འཇམ་དབྱངས་བློ་གསལ་སྨྲ་བའི་ཉི་མ་མཆོག་གི་ཐུགས་རྗེའི་འོད་སྣང་ལས་འཁྲུངས་པའི་ཤེས་རིག་གི་གླིང་མཆོག་ཅིག་ཡིན་ལ།དེ་ཡང་ཐོག་མར་ས་གནས་འདིའི་དབུལ་ཕོངས་དང་དྭ་ཕྲུག་ཡང་ན་སློབ་གྲྭར་འགྲོ་རྒྱུའི་སྐལ་བ་མ་བྱུང་བའི་སེར་སྐྱ་ཕོ་མོ་རིས་མེད་ཀྱིས་གྲུབ་པའི་སློབ་མ་རྣམས་ལ་ཆེད་དུ་དམིགས་ནས་སྤྱི་ལོ་༢༠༠༤ལོའི་སྤྱི་ཟླ་༩་བའི་ཚེས་༡་ནས་བཟུང་དངོས་སུ་སློབ་འགོ་བརྩམས་པ་ཞིག་ཡིན།  སྔ་གཞུག་ཏུ་སློབ་གླིང་འདི་ནས་ཤེས་ཡོན་གྱིས་ཕྱུག་ཅིང་ཀུན་སྤྱོད་གཙང་བའི་སློབ་བུ་བརྒྱ་ཕྲག་དུ་མ་འཚར་ལོངས་བྱུང་དང་འབྱུང་བཞིན་ཡོད་ལ། རྗེས་སུ་སྤྱི་ལོ་༢༠༡༠་ལོའི་ཟླ་༩་བའི་ཚེས་༢༢་ཉིན་ནས་བཟུང་གྲྭ་བཙུན་རྐྱང་རྐྱང་གིས་གྲུབ་པའི་སློབ་གླིང་ཞིག་ཏུ་བསྒྱུར་ཡོད།

      དེ་ཡང་སློབ་གླིང་འདི་ནི་གྲྭ་བཙུན་ན་ཆུང་སློབ་བུ་རྣམས་ལ་ཐོག་མར་ཀློག་དག་པ་དང་ཡིག་གཟུགས་འབྲི་སྦྱོང་།དེ་ནས་རིམ་བཞིན་སུམ་རྟགས་དག་གསུམ་དང་།སྒྲ། སྙན་ངག ནག་རྩིས། ལོ་རྒྱུས། དབུ་ཅན་དང་དབུ་མེད་ཀྱི་ཡིག་གཟུགས།བསྡུས་གྲྭ  ཆོ་ག་དང་ཆོས་སྤྱོད་སྣ་ཚོགས། འདོན་རྟ་དབྱངས་གསུམ་སོགས་སློབ་ཁྲིད་བྱེད་བཞིན་ཡོད་པར་མ་ཟད་གཞན་རྒྱ་ཡིག་དང་རྩིས་འཕྲུལ་སོགས་ཀྱང་སློབ་ཁྲིད་བྱས་ཏེ་གནའ་དེང་ཟུང་འབྲེལ་གྱི་སྒོ་ནས་སློབ་གསོ་སྒྲུབ་བཞིན་པའི་དགོན་སྡེའི་སློབ་གླིང་ཞིག་ཡིན། ད་སྐབས་སློབ་གླིང་འདིར་འཛིན་གྲྭ་དྲུག་དང་། སློབ་མ་240ལྷག་ཡོད་ལ་དགེ་བཟོ་བ་20ཡོད།སློབ་གླིང་གི་རྨང་གཞིའི་འཛུགས་སྐྲུན་ཐད་ལ་དམངས་སྒོར་ཁྲི་170ལྷག་གི་འགྲོ་གྲོན་བཏང་ནས་སློབ་ཁང་དང་།རྩིས་འཕྲུལ་ཁང་།སློབ་མའི་གཟིམ་ཤག་དང་།དགེ་རྒན་རྣམས་ཀྱི་གཞུང་ལས་ཁང་།རུང་ཁང་།བདེ་ཡངས་འདུ་ཁང་སོགས་བསྐྲུན་ཡོད་པ་དང་།  སློབ་གླིང་འདིའི་སློབ་གསོའི་ཁ་ཕྱོགས་གཙོ་བོ་ནི་ཆུང་དུས་ནས་སློབ་བུ་རྣམས་ལ་གཞུང་ཚིག་བློ་འཛིན་དང་།ད་ལྟའི་སློབ་གླིང་འདིའི་བསླབ་གཞི་དག་ལ་ནན་ཏན་སྒོས་སློབ་སྦྱོང་བྱས་ཏེ་མ་འོངས་པར་ཤེས་ཡོན་གྱི་རྨང་གཞི་བརྟན་ཅིང་བསམ་བློ་དང་ཀུན་སྤྱོད་གཙང་བའི་བོད་ཀྱི་སྲོལ་རྒྱུན་རིག་གནས་ཀྱི་རྐང་འཛིན་མི་སྣའི་དཔུང་སྡེ་རབས་དང་རིམ་པ་འཚར་ལོངས་འབྱུང་སའི་གླིང་ཀ་ཞིག་ཏུ་འགྱུར་ཐུབ་པར་རེ་སྙེག་བྱེད་བཞིན་མཆིས་སོ།།

གསར་འགོད་པ།  སློབ་གཙོ་འབའ་ཆོས་རྒྱ་མཚོ་ལགས།    སློབ་གྲྭ་འདི་དབུ་བརྙེས་དུས་ཁྱེད་རང་སྐབས་དེ་དུས་ཀྱི་སློབ་མ་རེད།  སློབ་བུ་ཞིག་གི་ངོས་ནས་ཁྱེད་ཀྱིས་སློབ་གླིང་གསར་བ་འདི་ལ་ལྟ་སྟངས་ག་འདྲ་ཞིག་བཟུང་ཡོད།

སློབ་གཙོ་འབའ་ཆོས།  མ་འོངས་པའི་གྲ་སྒྲིག་ནི་སློབ་གླིང་རང་ཉིད་དང་འཚམ་པའི་བསླབ་དེབ་སྒྲིག་རྩོམ་དང་སྒྲིག་གཞི་འཐུས་ཚང་དུ་གཏོང་བ་དེ་ཡིན་ལ། དགེ་སློབ་ཚང་མས་འདུན་མ་གཅིག་ལ་གཏད་དེ་སློབ་གླིང་འདི་ཉིད་དགོན་སྡེ་འདིའི་མ་འོངས་པའི་རྒྱུན་འཛིན་གྱི་ལྟེ་གནས་ཤིག་ཏུ་འགྱུར་བར་བྱེད་རྒྱུ་ནི་རེ་བ་ཡིན།

གསར་འགོད་པ།  སློབ་གཙོ་གཞོན་པས་ངའི་བཅར་འདྲི་དང་ལེན་བྱས་པ་ལ་བཀའ་དྲིན་ཆེ། བཀྲ་ཤིས་བདེ་ལེགས།