༄༅། །བོད་ཀྱི་སྙན་རྩོམ་རིག་པ་ལ་དཔྱད་པ།

སྐུ་ཕྱོགས་ཨོའུ་རྒྱ་བློ་བཟང་འཇམ་དཔལ་རྒྱ་མཚོས་བརྩམས། 

 དང་པོ། སྙན་རྩོམ་རིག་པའི་ཆེ་བ།

    སྤྱིར་གང་བསླབ་པར་བྱ་བའི་ཤེས་བྱའི་གནས་ནི་མཐའ་ཡས་མོད། ཚད་མའི་སྐྱེས་བུ་དངོས་སམ་མཐར་ཐུག་པ་སྟེ་སངས་རྒྱས་བཅོམ་ལྡན་འདས་ཀྱིས་རིས་སུ་མ་ཆད་པའི་འགྲོ་བ་མཐའ་དག་ལ། གནས་སྐབས་དང་མཐར་ཐུག་གི་དགོས་པ་སྒྲུབ་པ་དང་། རང་གཞན་གྱི་དོན་སྒྲུབ་པའི་སླད་དུ། དོན་གཉིས་འབྱུང་བའི་གཞི། ལེགས་པ་ཐམས་ཅད་ཐོབ་པའི་རྒྱུ་གཙོ་བོ་ནི། ཆོས་རབ་ཏུ་རྣམ་འབྱེད་ཀྱི་ཤེས་རབ་སྟེ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བའི་ཡེ་ཤེས་འདི་ཡིན་པ་གཟིགས་ཤིང་། དེ་ཉིད་ཐོབ་པའི་ཐབས་སུ་དྲིན་ལན་བསབ་པའི་མདོ་སོགས་ལས་རིག་པའི་དངོས་པོ་ལྔ་བསླབ་དགོས་པར་གསུངས་ལ། རྒྱལ་ཚབ་མི་ཕམ་མགོན་པོས་ཀྱང་། རིག་པའི་གནས་ལྔ་དག་ལ་བརྩོན་པར་མ་བྱས་ན།།འཕགས་མཆོག་གིས་ཀྱང་ཐམས་ཅད་མཁྱེན་པར་མི་འགྱུར་ཏེ།།དེ་ལྟ་བས་ན་གཞན་དག་ཚར་བཅད་རྗེས་བཟུང་དང་།།རང་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ།། ཞེས་རང་ཉིད་ཀུན་ཤེས་པར་བྱ་བ་དང་གཞན་དག་རྗེས་སུ་བཟུང་བའི་ཕྱིར་དུ་རིག་པའི་གནས་ལྔ་དག་ལ་བརྩོན་དགོས་པར་གསུངས་ཡོད། དེ་ལྟ་ན། རང་གཞན་གྱི་དོན་གཉིས་འགྲུབ་པ་ལ་རང་ཉིད་ཀྱིས་ནང་རིག་གི་ཤེས་བྱ་ཀུན་ཤེས་ཏེ་གཞན་གྱི་ལོག་རྟོག་དང་མ་རྟོགས་པ། ཐེ་ཚོམ་བཅས་ཚར་གཅོད་པའི་སྒྲ་ཚད་མ་རིག་པ།གདུལ་བྱ་རྗེས་སུ་འཛིན་པའི་བཟོ་གསོ་རིག་པ་སྟེ་རིག་པའི་གནས་ལྔའམ་ཆེ་ཆུང་བཅུར་གྲངས་ངེས་པ་ཡིན་ནོ།། དེ་ལས་སྤྱི་ཚོགས་ཀྱི་འཚོ་བའི་བརྒྱུད་རིམ་དང་། བདེ་སྡུག་གི་ལས་སྐལ། རང་བྱུང་གི་ཁོར་ཡུག ཡུལ་སྲོལ་གོམས་གཤིས་སོགས་ཀྱི་རང་བཞིན་གསལ་བོར་སྟོན་པའི་སྣང་བརྙན་འབྲི་བཞེངས་བྱས་ཏེ་རི་མོ་མཆོག་ཏུ་དོད་པའི་སྒོ་ནས་བཟོ་རིག་པའི་ཁོངས་གཏོགས་སྙན་རྩོམ་གྱི་རིག་པ་འདི་ནི།གཞུང་ཆེན་མོ་རྣམས་གང་ལ་སྦྱངས་ཀྱང་ཚིག་གི་གནད་འབྱིན་པ། གོ་བའི་གཏིང་ཕུག་པ། རྗོད་བྱེད་ཚིག་གིས་ཟིན་ཚོད། བརྗོད་བྱ་དོན་གྱིས་ཐོབ་ཚད། རྩོམ་པ ་པོའི་དགོངས་པ་གཏད་སོ་སོགས་རྗོད་བྱེད་ཚིག་གི་ཆ་ལས་བརྗོད་བྱ་དོན་གྱི་གནད་འབུགས་པར་བྱེད་པ་ལ་ཆེས་ཡ་མཚན་པའི་རིགས་པ། བློ་གྲོས་ཀྱི་འཕེལ་ཁ་ཤིན་ཏུ་མྱུར་བ་ཞིག་ཡིན་པས། རྗེ་བཙུན་ཤེས་རབ་རྒྱ་མཚོ་མཆོག་གིས་ཀྱང་། ཚིག་གི་དག་ཆས་དོན་གྱི་གནད་འབྱིན་ཅིང་། །དོན་གྱི་གོ་བས་ཚིག་གི་དག་ཐོན་པ། །སྐྱེས་སྦྱངས་རིག་རྩལ་ལྷ་ཡི་ལུང་འདྲ་བས། །རྩོམ་སྒྱུར་པདྨའི་དགའ་ཚལ་འཕེལ་གྱུར་ཅིག ། ཅེས་རྩོམ་རིག་གི་ཚིག་སྦྱོར་སྒྱུ་རྩལ་ལ་བསྔགས་བརྗོད་གནང་ཡོད། སྙན་ངག་ནི་ཡིད་ཀྱི་གསོས་སྨན་དང་རྣ་བའི་བཅུད་ལེན་དུ་གྲུབ་ཅིང་མཁས་རྒུའི་ཡིད་འཕྲོག་པར་བྱེད་པའི་སྒྱུ་རྩལ་གྱི་མཛེས་སྡུག་དང་སྙན་ཞིང་འཇེབས་པའི་ཁྱད་ཆོས་བླ་མེད་དུ་རྫོགས་ཡོད་པས། འཇིག་རྟེན་འདིར་རིན་ཐང་བྲལ་བའི་ལེགས་སྐྱེས་ཤིག་ཡིན་ཏེ།སློབ་དཔོན་དཔའ་བོས། ཡ་རབས་རྣམས་དང་འཕྲད་ན་སྐྱེས་ཀྱི་མཆོག །ཚོགས་ཀྱི་ནང་ན་མཁས་པ་མགུ་བར་འགྱུར། ། ཞེས་དང་། མཁས་པའི་བྱ་བ་འཆད་རྩོད་རྩོམ་གསུམ་གྱི་གཙོ་བོ་རྩོམ་པ་ལ་མཁས་མི་མཁས་ཀྱི་བཟང་ངན་ཡང་སྙན་ངག་ཤེས་མི་ཤེས་ཀྱི་རྗེས་སུ་འགྲོ་ལྡོག་བྱེད་དོ། །དེར་མ་ཟད། ཡུལ་དུས་གནས་སྐབས་དང་མཐུན་པར་སྣོད་བཅུད་ཀྱི་མཛེས་སྡུག ཡིད་ཀྱི་འཆར་སྣང་སོགས་བརྗོད་བྱ་མཆོག་དམན་དུ་མ་ལ་ཚིག་རྒྱན་མཛེས་ཤིང་སྦྱོར་བ་ཡིད་དུ་འོང་བས་སྤྲས་ནས་སྙན་ཚིག་གི་ལམ་དུ་དྲངས་པའི་སྙན་ངག་ནི། ཕྱི་ནང་ཐུན་མོང་གི་རིག་གནས་དང་། ནང་བསྟན་གྱི་གཞུང་ལུགས། རྒྱ་བོད་སོག་གསུམ་གྱི་སྔོན་བྱོན་མཁས་པའི་གསུང་རབ་རྣམས་སུ་འབྱམས་ཀླས་སུ་ཁྱབ་འདུག

  དེང་གི་དུས་འདིར་ཡང་དགོན་སྡེ་དང་སློབ་གྲྭ། དམངས་ཁྲོད་རྣམས་སུ་བཅུད་ཀྱི་རོ་མ་ཉམས་པར་སྤེལ་བའི་སྙན་རྩོམ་གྱི་རིག་པ་འདི་ཤིན་ཏུ་དར་ཁྱབ་ཆེ། བོད་ཀྱི་རིག་གནས་བང་མཛོད་ཀྱི་གཅེས་ནོར་ཐུན་མོང་མ་ཡིན་པའི་ཚིག་སྦྱོར་རིན་པོ་ཆེ་ལྟ་བུ་འདི་ལ། རྗེ་རིན་པོ་ཆེས་ཀྱང་། ཚིག་སྦྱོར་ཚུལ་ལ་མཁས་པའི་ངག་གི་དཔལ། ། ཞེས་ས་སྟེང་གི་རིན་པོ་ཆེ་གསུམ་གྱི་ཡ་གྱལ་དུ་བསྔགས་སོ།།

ཤེས་རབ་གསང་གསུམ་མྱུལ་བའི་རྒྱུད་མངས་མ། ། སྙན་འགྱུར་ངག་གི་རོལ་མཚོ་འཕྱུར་བ་ལས། ། རིག་བྱེད་ཝུ་བའི་མེ་ཏོག་ཕྲེང་མཛེས་པའི། ། དགེ་མཚན་གངས་ཅན་འཛིན་མའི་ངོས་ལ་བཞད། །    ཅེས་པ་ནི་བར་སྐབས་ཀྱི་ཚིགས་སུ་བཅད་པའོ།།

གཉིས་པ། སྙན་ངག་གི་ངོ་བོ་དང་ངེས་ཚིག 

    སྙན་ངག་ཅེས་པ་ནི་བརྗོད་པར་འདོད་པའི་དོན་དེ་ཡིད་ཀྱི་འགྱུར་བ་འདྲེན་བྱེད་ཕྱིའི་རྐྱེན་གྱིས། རྩོམ་པ་པོའི་ནང་རྟོག་བཏགས་ཀྱི་འཆར་སྣང་འབྲི་བཞེངས་བྱེད་པའི་ཚེ། བརྗོད་བྱའི་གནད་བསྡུས་ནས་ལེགས་པར་བསྡེབས་པ་ཉིད་ལ། སྒྲ་དོན་གབ་གསུམ་གྱི་རྒྱན་སོགས་ཀྱིས་མཛེས་པར་སྤྲས་ཏེ་སྙན་ཞིང་གཟུང་བར་འོས་པའི་ངག་གི་ཕྲེང་བར་སྤེལ་བ་ནི་དེའི་གོ་དོན་ནམ་མཚན་ཉིད་ཡིན། དེ་ཡང་གཙོ་བོ་རྗོད་བྱེད་ཚིག་གི་ཆ་ལས་སྙན་མི་སྙན་དང་མཛེས་མི་མཛེས་སོགས་ཀྱིས་སྙན་ངག་གི་གྲལ་དུ་ཚུད་མིན་གྱི་ཁྱད་པར་ངེས་པར་འབྱེད་དགོས་ཀྱི། བརྗོད་བྱའི་དོན་དང་རྩོམ་པ་པོ་མིང་ཆེ་བའི་རྒྱུ་མཚན་གྱིས་ཁྱབ་པར་དབྱེ་མི་རུང་ངོ་།། དཔེར་ན། སེམས་པ་དམར་བོ་ཞེས་པའི་སྙན་དེབ་ནང་དུ་ཕལ་སྐད་མང་བ་དང་བྲག་རིའི་སྲས་མོ་ལྟ་བུའི་སྙན་དེབ་ནང་འགལ་བ་ལྟག་སྤྲོད་ཀྱི་བརྗོད་བྱ་མང་དུ་ཞུགས་ཡོད་པས་རྐང་ཆག་མའི་རང་མོས་རྩོམ་ལ་སྙན་རྩོམ་དུ་རློམ་པ་ནི་ཡི་མུག་པའོ།།

དེ་ལྟར་ན། རྩོམ་པ་པོ་ཅི་ཙམ་མཁས་ཀྱང་གང་བྲིས་ཐམས་ཅད་སྙན་ངག་དང་གང་བཤད་ཐམས་ཅད་ངེས་དོན་ཡིན་པའི་ཁྱབ་པ་མེད་དེ། འཕགས་པ་མི་ཟད་པས་ཞུས་པའི་མདོ་ལས་རྟོན་བཞིའི་སྒོ་ནས་གསུང་རབ་ལ་དྲང་ངེས་འབྱེད་པའི་རིགས་པ་ནི། འདིར་རྗོད་བྱེད་ཚིག་གི་ཆ་ནས་སྙན་ངག་ལ་ཤིན་ཏུ་སྦྱར་གཏུབ་པ་ཞིག་སྟེ། གང་ཟག་ལ་མི་རྟོན་ཆོས་ལ་རྟོན་པ་ནི། རྩོམ་པ་པོ་མཁས་མི་མཁས་ཀྱི་རྗེས་སུ་འགྲོ་ལྡོག་མི་བྱེད་པར་དེས་གསུངས་པའི་ཚིག་ལ་ཡིད་རྟོན་དགོས་པ་དང་། དེས་གང་གསུང་ཐམས་ཅད་སྙན་ངག་ཏུ་ཁས་མི་ལེན་པར་ཚིག་ལེགས་པར་སྡེབས་པའི་སྦྱོར་བ་དང་སྙན་པའི་ཚད་ལ་བརྟག་སྟེ་ཁས་ལེན་པ་ནི་ཚིག་ལ་མི་རྟོན་དོན་ལ་རྟོན་པ་དང་། དེ་ཡང་རྗོད་བྱེད་ཀྱི་ཚིག་འཛིངས་པ་དང་རྐང་པ་ཉམས་པ་དང་། ཚིག་སྔ་ཕྱི་འབྲེལ་མ་ཆགས་པ་སོགས་སྐྱོན་དང་ལྡན་པའི་རྗེས་སུ་མི་འབྲང་བར་ཚིག་གི་རྒྱན་མཛེས་པར་སྤྲས་ཤིང་དོན་གྱི་གནད་ལ་འབེབས་པའི་སྙན་འཇེབས་ཀྱི་ལུགས་སུ་ཞུགས་པ་ནི་དྲང་དོན་ལ་མི་སྟོན་ངེས་དོན་ལ་སྟོན་པ་དང་། རྗོད་བྱེད་ཀྱི་ཚིག་ལས་ཇི་ལྟར་འབྱེད་པའི་དོན་ནམ་འཛིན་སྟངས་ལ་ངེས་པ་རྙེད་ཀྱང་སྣང་ཡུལ་ལ་འཁྲུལ་བའི་རྣམ་ཤེས་ལ་མི་སྟོན་པར་དེ་ལྟར་མངོན་སུམ་དུ་ངེས་པ་རྙེད་པའི་ཡེ་ཤེས་ལ་ཡིད་རྟོན་པ་ནི་བཞི་བ་ཡིན། དེས་ན་གཉའ་བློ་གྲོས་རྒྱལ་མཚན་གྱིས། སྔོན་གྱི་ཚིགས་བཅད་སྙན་ངག་དང་། དེང་གི་རང་མོས་སྙན་ངག་སོགས་རྣམ་པ་གང་ལ་བརྟེན་ཀྱང་རུང་གཙོ་བོ་བརྗོད་བྱ་དང་རྗོད་བྱེད་སྙན་ངག་གི་ཚད་ལ་སླེབས་དགོས། ཚད་དེར་མ་ལོངས་ན་ཚིག་སྦྱོར་ཐ་མལ་བ་ཞིག་ཐེམ་དབྱིབས་སུ་བསྒྲིགས་ཀྱང་སྙན་ངག་ཡིན་པ་ཅི་ཡིས་རྟོགས། དེ་བས་དེང་སང་ལས་དང་བོ་བ་རྣམས་ཀྱིས་ཚིག་བཅད་ལྷུག་འདོད་རྒུར་རྩོམ་པ་རྣམས་སྙན་ངག་གི་ཚིག་སྦྱོར་འདྲ་ཨེ་འབྱུང་གི་རེ་བས་སྦྱོང་བ་བྱེད་པ་ཡིན་ན། དེས་དམིགས་ཡུལ་དང་བྱེད་ཚུལ་གཉིས་ཀ་ལེགས་པས་རྗེས་སུ་ཡི་རང་བྱ་བའི་གནས་སུ་འགྱུར་ལ། དེ་ལས་ལྡོག་སྟེ་སྙན་ངག་གི་ཚིག་སྦྱོར་ཕུན་སུམ་ཚོགས་པ་དག་བརྩམས་པར་རློམ་པ་ནི། རྒྱུ་འབྲས་གོ་བཟློག་པས་འཁྲུལ་བའོ།། ༩༢ལོའིཀྲུང་གོའི བོད་ཀྱི་ཤེས་རིག་དེབ་གཉིས་པ་ལས་བཤུས། ཞེས་བྲིས་པ་ནི་བློ་གཟུ་བོར་གནས་པའི་གཏམ་དུ་སྣང་བས་མེ་ཏོག་གི་ཕྲེང་བ་འབུལ་འོས་པ་ཞིག་རེད་དེ། དེང་སང་སྙན་ངག་གི་དྲི་ཙམ་ཡང་མི་བྲོ་བར་སྙན་ངག་ཏུ་མིང་བཏགས་པའི་བརྩམས་ཆོས་ཁོར་ཡུག་བཀང་ནས་ཡོང་འདུག གོང་གི་གཉའ་བློ་གྲོས་རྒྱལ་མཚན་གྱི་བརྗོད་བྱ་རྗོད་བྱེད་གཉིས་ཀྱི་ཆ་ནས་སྙན་ངག་ཏུ་འཇོག་པར་བཤད་མོད། བརྗོད་བྱའི་ཆ་ནས་སྙན་ངག་ཏུ་བཞག་མི་རུང་སྟེ། བརྗོད་བྱ་མི་སྡུག་པ། མི་མཛེས་པ། སྐྱི་གཡའ་བ། སྐལ་བ་ཞན་པ་སོགས་ཅི་ལྟར་མི་སྙན་ཀྱང་ཚིག་སྦྱོར་མཁས་པའི་ཚད་ལ་འདང་ན་ནི། སྙན་ངག་ཕུན་སུམ་ཚོགས་པ་རུ་གྲུབ་སྟེ། ར་མ་ཎའི་རྟོགས་བརྗོད་ལས། འཛིན་མ་རུས་པའི་གོས་དཀར་ཅན། །བར་བར་ཁྲག་གི་ལྟེང་ཀ་འཁྱིལ། །ལ་ལ་ཁྲག་རྒྱུན་དྲོད་མོ་འབབ། །རྒྱུ་མའི་དོ་ཤལ་ཅན་དེ་དག །མཆེ་བ་རིང་བོས་ནུ་མ་གཉིས། །འདྲལ་དོགས་མགྲིན་པ་འདེགས་ཤིང་རྒོད། །དྲག་ཤུལ་སྤྱོད་པའི་ས་དེ་ཡིས། །གཤིན་རྗེའི་གྲོང་ལ་བག་ཡོད་སྦྱིན། ། ཞེས་སྲིན ་པོའི་གྲོང་གི་འཇིགས་ཤིང་སྐྱི་གཡའ་བའི་ངང་ཚུལ་བརྗོད་པ་ལྟ་བུ་ཡིན་པས། རྗོད་བྱེད་ཚིག་གི་ཆ་ནས་ཚིག་སྦྱོར་ཕུན་སུམ་ཚོགས་པ་སྡེབས་པའི་ངག་གི་སྦྱོར་བ་ནི་སྙན་ངག་གི་ངོ་བོའམ་རང་བཞིན་དུ་གྲུབ་ལ། ངེས་ཚིག་ནི། བརྗོད་བྱའི་དོན་དེ་གྲོང་ཚིག་དང་ཕལ་སྐད་སོགས་ཀྱིས་མ་བསླད་ཅིང་སྙན་པ་དང་མཛེས་པའི་ངག་གི་སྦྱོར་བའོ།། གུར་ཀུམ་ཚོན་གྱིས་སྤྲས་པའི་མཚན་དཔེའི་རིས། ། མཐོང་ཐོས་སྙིང་གི་བདུད་རྩི་ཉིད་གྱུར་ཏེ། ། སྙན་རྩོམ་ཆོས་ཀྱི་རོལ་མོ་སྦྲེང་བའི་དབྱངས། ། ཕན་བདེ་ལེགས་བྱས་བཞད་པས་སྤྲོ་བ་སྟེར། །ཟབ་དོན་བརྗོད་བྱ་རིན་ཆེན་བྱེ་བའི་མཛོད། ། བཅད་ལྷུག་སྤེལ་མའི་རླབས་ཕྲེང་སྟོང་ལྡན་ཞིང་། ། རྒྱན་གསུམ་སྙན་འགྱུར་སྦྲེངས་པའི་བདུད་རྩིའི་མཚོ། ། བློ་ལྡན་སྐལ་བར་ལྷག་འདི་སྙིང་གི་ནོར། །ཞེས་བྱ་བ་འདི་ནི་དྲང་བོའིཡིད་ཀྱིས་ཚིགས་སུ་བཅད་པའི་སྦྱོར་བའོ།།

གསུམ་པ། སྙན་ངག་གི་ཚིག་རྒྱན། 

    འདིར་སྙན་ངག་གི་ཚིག་རྒྱན་ཞེས་པ་སྙན་ངག་གི་ལུས་ཀྱི་རང་བཞིན་བརྗོད་པའི་ངོ་བོ་སྟོན་པ་མ་ཡིན་པར། སྒྲ་དོན་གབ་ཚིག་གི་རྒྱན་དང་ལུས་ཀྱི་མཛེས་པའམ་སྙན་པའི་རོ་མངར་ཕུན་སུམ་ཚོགས་པའི་ཚིག་སྦྱོར་དང་། མིང་ཚིག མངོན་བརྗོད། རྣམ་གྲངས། དབྱེ་བསྡུ་བཅས་ཀྱིས་གྲུབ་ཅིང་ངག་གི་སྒྱུ་རྩལ་མཐོར་འདེགས་བྱེད་པའི་ཚིག་ཕྲེང་ཞིག་ལ་ངོས་འཛིན་དགོས་ཏེ། ཚིག་བཏོན་པ་ཙམ་གྱིས་ཡིད་ཀྱི་གསོས་སྨན་དང་རྣ་བའི་བཅུད་ལེན་དུ་གྲུབ་པའི་ནུས་པ་མངོན་གྱུར་དུ་ཐོན་པའི་དབང་གིས་གཞན་ཡིད་འགུག་པར་བྱེད་ཅིང་དྭངས་པ་འདྲེན་པའི་ཁྱད་ཆོས་བླ་མེད་ཅིག་འཛོམ་པའི་ཕྱིར། དཔེར་ན། བུད་མེད་ཀྱི་རྒྱན་ཆ་ཞེས་པ་དེའི་ལུས་ཀྱི་སྐྱེ་མཆེད་དང་རང་མདངས་སོགས་ལ་ངོས་འཛིན་རྒྱུ་མ་ཡིན་པར་གསེར་དངུལ་མུ་ཏིག་གཡུ་བྱུར་སོགས་ཀྱིས་གྲུབ་པའི་སྐྲ་འཛིན་དང་རྣ་རྒྱན། གདུ་བུ་དང་། སོར་གདུབ་སོགས་དེའི་སྟེང་གི་ངོ་མཚར་ཞིང་ཡིད་འཕྲོག་པར་བྱེད་པའི་མཛེས་ཆོས་དག་ལ་ཟེར་བ་བཞིན། གོང་དུ་བཤད་པའི་ཚིག་རྒྱན་དེ་དག་ལའང་གསེར་དངུལ་གྱི་རིན་ཐང་ལྡན་ཞིང་སྙན་རྩོམ་གྱི་ལུས་མཛེས་པར་བྱེད་པའི་ངོ་མཚར་གཟུགས་རིས་ཀྱི་རང་མདངས་བསམ་མི་ཁྱབ་པ་ཞིག་ཡོད་པའི་རྒྱུ་མཚན་གྱིས་མཁས་པའི་རྣམ་དཔྱོད་ཀྱི་རྩལ་ལས་ཐོན་པའི་ཚིག་རྒྱན་སྦྱོར་ཚུལ་མཐའ་མེད་པའི་སྙན་རྩོམ་རིག་གཞུང་དབྱིག་གི་མཛོད་ལྟ་བུར་བྱིན་ཆགས་པ་ཞིག་སྔོན་ནས་ད་བར་དུ་གནས་པ་རེད།

    དེས་ན་དེ་དག་ལས་སྐྱ་ཐིག་རགས་ཙམ་མཚོན་ན། གཟུགས་མཛེས་ཤིང་བཞིན་དཀར་བ། མིག་གི་འདབ་དཀྱུས་རིང་བ། མཛེས་སྡུག་ལྡན་པའི་བུད་མེད་ཅིག་སྙན་རྩོམ་གྱི་བརྗོད་བྱར་ཞུགས་པའི་དབང་དུ་བཏང་སྟེ། མཛེས་མ་ཁྱོད་ལུས་པད་སྡོང་དྲང་མོའིརྩེར། །བཞིན་མདངས་ཟླ་བ་དཀར་ལ་ཟུར་མིག་གཡོ། ། ཞེས་བྲིས་ན་གཟུགས་རྒྱན་དང་བསྲེས་པའི་སྒོ་ནས་རང་བཞིན་དྲང་བོར་བརྗོད་འདུག་ཀྱང་། ཚིག་རྒྱན་དང་རྩོམ་སྟངས་ཀྱི་ཆ་ནས་དབུལ་བ་རེད། དེས་ན། པདྨའི་འཁྲི་ཤིང་དར་ལ་བབས་པའི་གཟུགས། །ཟླ་བ་རྒྱས་པའི་འཛུམ་དཀར་གཡོ་བ་ཅན། །དཀྱུས་རིང་འདྲེན་བྱེད་ཟུར་དུ་ཕྱོགས་པའི་མདས། །བདག་སྙིང་འབུགས་པའི་བྱེད་པོ་ཁྱོད་གཅིག་ཉིད། ། གཞོན་ནུ་ཟླ་མེད་ཀྱི་གཏམ་རྒྱུད་ལས་བཤུས། བརྗོད་བྱ་གོང་གི་དེ་དང་གཅིག་ཡིན་ཡང་། རྗོད་བྱེད་ཚིག་གི་ཆ་ནས་སྔ་མ་ལས་ཁྱད་དུ་འཕགས་པའི་རིན་ཐང་ལྡན་ཞིང་།རྩོམ་རིག་གི་སྒྱུ་རྩལ་འབུར་དུ་ཐོན་པའི་དགེ་མཚན་གྱིས་ཕྱུག དེ་ཡང་ཚིག་རྒྱན་གཙོ་བོ། འཁྲི་ཤིང་། དར་ལ་བབས། ཟླ་རྒྱས། འཛུམ་དཀར། གཡོ་བ་ཅན། ཟུར་དུ་ཕྱོགས་པ། དཀྱུས་རིང་། འདྲེན་བྱེད། བྱེད་པོ། ཁྱོད་གཅིག་ཉིད་བཅས་གསེར་དངུལ་གྱི་རིན་ཐང་ལྡན་པའི་ཚིག་རྒྱན་བཅུ་ཕྲག་གཅིག་ཤོ་ལོ་ཀ་གཅིག་གི་སྟེང་དུ་སྤྲས་པ་འདི། རྩོམ་པ ་པོའི་ཤེས་རབ་ཀྱི་རྩལ་ལས་འཁྲུངས་པའི་གསོན་ཉམས་ལྡན་པའི་སྙན་རྩོམ་གྱི་རིན་ཐང་ཞིག་དང་། མཁས་རྒུའི་ཡིད་དབང་འགུགས་པར་བྱེད་པའི་གཏམ་གྱི་སྦྱོར་བ་ནི་རྩོམ་རིག་གཞན་ལ་མེད་ཅིང་སྙན་ངག་གི་ཐུན་མོང་མ་ཡིན་པའི་ཁྱད་ཆོས་སུ་ཡོད། དེ་ཡང་གཙོ་བོ་ཚིག་རྒྱན་གྱི་དབང་གིས་འབྱུང་བས། ཚིག་རྒྱན་ནི་སྙན་ངག་གི་རིན་ཐང་མཐོར་འདེགས་བྱེད་པའི་གྲུབ་ཆའི་གཙོ་བོ་ཡིན་ཞེས་བཤད་པ་ཡིན། གཞན་ཡང་། ཚིགས་སུ་བཅད་པའི་སྙན་རྩོམ་ལ་རྐང་བ་དོ་མཉམ་དགོས་པ་ནི། སྙན་ངག་གི་ལུས་ཀྱི་ཐུན་མོང་མ་ཡིན་པའི་སྒེར་ཆོས་སུ་སྣང་བས། གལ་ཏེ་དོ་མ་མཉམ་ན་ཚིག་རྒྱན་དང་། མངོན་བརྗོད། རྣམ་གྲངས་སོགས་ཀྱིས་ཅི་ཙམ་སྤྲོས་ཀྱང་ཡ་མ་བརླ་ཞིག་ལས་མི་འོང་སྟེ། རིན་ཆེན་རྒྱན་ཆ་དུ་མས་མཛེས་པ་ཆེར་སྤྲས་པའི་བུད་མེད་མཐེང་བོ་ཞིག་དང་མཚུངས་པས། དུས་རྣམ་ཀུན་ཏུ་དེ་ལ་དོ་སྣང་བྱེད་དགོས། གཞན་ཡང་།སྙན་ངག་གི་བསྟན་བཅོས་རྩོམ་པའི་ཚེ་མངོན་བརྗོད་དང་རྣམ་གྲངས་གཉིས་ཚིག་རྒྱན་ཏུ་ཆེས་མཁོ་བར་མ་ཟད། མེད་དུ་མི་རུང་བའི་རྒྱུ་ཆའི་གཙོ་བོའང་ཡིན་ཏེ། དཔེར་ན། ཉི་མ་གཅིག་བུ་ལ་མངོན་བརྗོད་ཀྱི་མིང་བརྒྱ་ལྷག་ཡོད་པ་ལས་གང་བརྗོད་དོན་དང་འབྲེལ་ཞིང་ཚིག་གི་རྣམ་པ་མཛེས་པའི་མངོན་བརྗོད་ཀྱི་མིང་དེ་བཀོལ་ན་སྙན་ངག་གི་རོ་མངར་ཆེས་ཕུན་སུམ་ཚོགས་པར་བྱེད། དཔེར་ན། སྙན་ངག་སྨྲ་བ་ལ་མགྲིན་པ་གཟེངས་སུ་མཐོ་བ་འཇིགས་མེད་དམ་ཆོས་རྒྱ་མཚོའི་དན་ཏིག་རི་བོའི་བསྟོད་པ་ལས། གངས་ཅན་ལོ་པཎ་ཁྱུང་སྔོན་སྐྱེས། །ཕྲག་པར་བརྟེན་པ་ཐུབ་པའི་སྲོལ། །ཨཱ་དིའི་གཞོན་ནུ་གངས་ཅན་གྱི། །མཁའ་ལ་སྒྲིབ་པ་མེད་པར་རྒྱུ། ། ཞེས་པ་འདི་ལྟ་བུས་མཚོན་ནས་མངོན་བརྗོད་ཚིག་རྒྱན་གྱི་མཛེས་ཉམས་ཁྱད་དུ་མཚར་བའི་སྙན་རྩོམ་ལ་བློ་ལྡན་རིགས་པ་སྨྲ་བ་རྣམས་ཀྱིས་གཅེས་ཤིང་དོ་སྣང་བྱེད་པར་རིགས་སོ། །  རྣམ་གྲངས་ནི་ཡི་གེ་བསྣན་པའི་ངེས་ཚིག་གིས་དོན་གཅིག་ལ་མིང་དུ་མར་ཡོད་པའི་ཚིག་རྒྱན་ཞིག་སྟེ། དཔེར་ན། ཡོད་དོ་ཅོག་ལ་དངོས་མིང་དུ་འཇུག་པའི་ཐ་སྙད་ཤེས་བྱ། ཡོད་པ། གཞལ་བྱ། གཞི་གྲུབ། ཆོས། རྟེན་འབྱུང་། སྟོང་བ། སོགས་རྣམ་གྲངས་དུ་མ་ཡོད་པ་མངོན་བརྗོད་ལྟར་བཀོད་ན་མཛེས་ཤིང་སྙན་པའི་ཚིག་རྒྱན་གྱི་མཆོག་ཏུ་གྲུབ་ལ། དབྱེ་བསྡུ་ཡང་སུམ་ཅུ་བར་འབྱུང་བ་བཞིན་ཚིགས་སུ་བཅད་པའི་སྐབས་ཕྲད་དང་རྣམ་དབྱེ་ཚིག་ལྷག་རྣམས་བསྡུས་ནས་རྩོམ་པ་ལ་ཞུགས་ན་སྙན་ངག་གི་རོ་བཅུད་སྨིན་པའི་ནུས་པ་ཆེ་སྟབས་དེ་ཡང་རྒྱན་དུ་བརྩིས་ཆོག་པར་སེམས་སོ།། རྣམ་དཔྱོད་ཀུ་ཤུའི་རྩེ་མོར་བྱིན་ཆགས་པའི། ། དམར་འོད་མེ་ལྕེ་དྲག་ཏུ་འབར་བ་ནི། ། རང་བྱུང་མཁའ་ལ་མཆེད་པས་རྨོངས་པའི་ནགས། ། ལྷག་མེད་ཟོས་པའི་རང་མདངས་དྭངས་ཤིང་གསལ། ། 

བཞི་བ། སྙན་ངག་མཛེས་པ་དང་སྙན་པའི་ཁྱད་པར།

    སྙན་ངག་གི་རྣམ་པའམ་ལུས་བཅད་ལྷུག་སྤེལ་མ་གང་ཡིན་ཡང་ཚིག་རྒྱན་སྦྱོར་ཚུལ་སྟེང་སྙན་པ་དང་མཛེས་པའི་ཁྱད་པར་མི་འདྲ་བ་འབྱུང་བ་ནི། རྒྱ་གར་ཤར་ལྷོ་གཉིས་ཀྱི་སྙན་པའི་རྒྱན་དང་མཛེས་པའི་རྒྱན་ངོས་འཛིན་མི་འདྲ་བ་ལྟ་བུའི་ཡུལ་སྲོལ་ཆེ་གེ་མོ་ཞིག་གི་རྗེས་སུ་འབྲངས་པ་མ་ཡིན་པར། བོད་རང་གི་འཚོ་བ་དང་རྩོམ་རིག་སྒྱུ་རྩལ་ལས་ཐོན་པ་ཞིག་སྟེ། དཔེར་ན། མིག་གི་ཡུལ་དུ་གཟུགས་སྡུག་པ། སྐྱེ་མཆེད་རྫོགས་པ། ལང་ཚོ་དར་བ། མདངས་མཛེས་པ། ཡིད་དུ་འོང་བ་སོགས་བསྟན་ཡོད་ཀྱི་གཟུགས་དང་། རྣ་བའི་ཡུལ་དུ་སྒྲ་སྙན་པ། འཇམ་པ། དག་པ། དྲི་མ་མེད་པ། མཉན་པར་འོས་པ། ལུས་སེམས་ཚིམ་པར་བྱེད་པ་སོགས་ཕྱིའི་སྐྱེ་མཆེད་གཟུགས་སྒྲ་གཉིས་ཀྱིས་རྐྱེན་བྱས་པའི་སྟེང་ནས་བཤད་འོས་མོད། དེ་ལྟར་ན། དྲི་དང་རོ་། རེག་བྱ་སོགས་སྐྱེ་མཆེད་གཞན་གྱིས་བསྡུས་པ་དང་། གཞན་ཡང་། མི་སྡུག་པ་དང་། མི་སྙན་པ། སྡུག་བསྔལ་བ། བསུངས་པ། འཛེར་བོ་ལ་སོགས་པའི་སྟེང་དུ། མཛེས་པ་དང་སྙན་པའི་ཉམས་མཚར་བའི་ཚིག་རྒྱན་གྱི་གོ་སྐབས་ཁེགས་པར་འགྱུར་བས་མི་འཐད་དོ། །

  འོ་ན་གང་ཞེ་ན། འདིར་བཤད་པའི་མཛེས་པའི་ཉམས་དང་སྙན་པའི་ཉམས་ཀྱི་འགྱུར་བ་ནི། བོད་རང་གི་ཐུན་མོང་མ་ཡིན་པའི་ཁོར་ཡུག་དང་འཚོ་བ། སྤྱི་ཚོགས་ཀྱི་བརྒྱུད་རིམ་སོགས་མཚོན་པའི་ཕྱིའི་རྐྱེན་གྱིས་རྩོམ་པ ་པོའི་ནང་ཀུན་རྟོག་གི་འཆར་སྣང་བཟོ་བསྐྲུན་བྱེད་པའི་རྩོམ་སྟངས་སྒྱུ་རྩལ་གྱི་ཆ་ནས། ཉམས་ཀྱི་འགྱུར་བ་མཚོན་པའི་ཡིད་ཀྱི་འཇིག་རྟེན་དེ་འབྲི་བཞེངས་བྱེད་པའི་ཚེ། རྩོམ་པ ་པོའི་བློའིནུས་པ་བཞིན་གང་ལ་སྦྱར་ཀྱང་མཐུན་འོས་པ་ཞིག་ཡིན། དེའི་རྒྱུ་མཚན་གྱིས་མི་སྣ་གཅིག་གི་ཁྱད་ཆོས་བརྗོད་པའི་སྣང་བརྙན་བཟོ་བསྐྲུན་བྱེད་པ་ལ། མཁས་པ་དུ་མས་རིག་པའི་རྩལ་བཏོན་ཏེ་བྲིས་པ་ཀུན་ཀྱང་། མཛེས་པ་དང་སྙན་པ། ཚིག་རྒྱན། ལེགས་པར་སྡེབས་པའི་ཁྱད་ཆོས་རྣམས་མི་འདྲ་བ་ཁོ་ནར་འབྱུང་བ་ནི་མངོན་སུམ་དུ་གྲུབ་ཡོད། འདི་ཡང་མཐར་གཏུགས་ན་སེམས་ཙམ་པས། སྔོན་པོ་དངོས་ནི། ཕར་ངོས་ནའང་མེད། ཚུར་ངོས་ཀྱི་སེམས་ཀྱང་མིན།ཡེ་མེད་ཀྱང་མ་ཡིན་པ་རྨི་ལམ་གྱི་གླང་བོ་དང་འདྲ་བའི་ཕྱིར་བརྗོད་དུ་མེད་པའི་དངོས་པོ་ཡིན་ནོ།། ཞེས་རྟོག་མེད་དབང་ཤེས་ལ་ལྟོས་པའི་རྣམ་རིག་ཙམ་ལ་འཇུག་ཚུལ་གསུངས་པའི་ཚེ། ཕྱི་དོན་མེད་ཀྱང་འཁོར་འདས་ཐམས་ཅད་བག་ཆགས་ལས་འཕོས་པར་གསུངས་པ་བཞིན། རྩོམ་པ་པོ་སོ་སོའིནང་འགྱུར་བའི་བག་ཆགས་ཀྱི་སྣང་ཚུལ་གཞིར་བཟུང་ནས་བྲིས་ཡོད་པའི་རྒྱུ་མཚན་གྱིས། ཁ་ནང་དུ་ཕྱོགས་ཏེ་ཞིབ་ཏུ་བསམ་ན་རྩོམ་རིག་སྒྱུ་རྩལ་གྱི་ལྟ་བའི་རང་མདངས་སེམས་ཀྱི་གནད་ལ་ཐུག་འདུག དེས་ན་མཛེས་པ་དང་སྙན་པ་གཉིས་ཀ་སེམས་ཀྱི་འཆར་སྣང་གི་ལྟ་བ་འབྲི་བཞེངས་བྱེད་པའི་ཆ་ནས་སོ་སོར་དགར་མི་ནུས་ཀྱང་ཚིག་གི་ཉམས་བཏོད་ཚུལ་སྟེང་ཁྱད་པར་ཡོད་དེ། དཔེར་ན། ཟངས་ཞུན་རྒྱ་སྐྱེགས་ཁུ་བ་བསྲེས་པའི་ཚོན། བྱུག་རིས་ལང་ཚོས་སྒེག་ལྡན་རི་བོའིཕྲེང་། །ཉི་ཟེར་ཁུ་བས་རབ་མྱོས་ངོ་ཚའི་གོས། །བྲལ་བ་ཡིད་ལ་མཚོན་གྱི་གདེངས་ཀ་ཉིད། །སྒེའུ་སྟིང་གི་ཕོ་ཉ་གཞོན་ནུ་དོན་གྲུབ་ལས་བཤུས། ལྟ་བུ་ལ་མཚོན་ན། རྩི་ཤིང་ལོ་མ་ཙམ་ཡང་ངོས་ན་མེད་པའི་རི་དམར་པོ། ངོས་གཟར་ཞིང་གྱེན་དུ་མཐོ་བ། རྩེ་མོ་མཚོན་ཆ་ལྟར་རྣོ་བའི་རི་བོ་བསྟར་ཕྲེང་བསྒྲིགས་ཏེ་ཡོད་པ་འདིས་ཕྱིའི་རྐྱེན་བྱས་མོད། རྩོམ་པ་པོས་དེ་ཇི་བཞིན་མ་བརྗོད་པར་འཁྱོག ་པོའི་ཚིག་གིས་རྩོམ་སྟངས་སྒྱུ་རྩལ་ཁྱད་དུ་འཕགས་པའི་ནུས་པ་བཀོད་དེ། དམར་སེར་གྱི་ཚོན་བྱུག་པའི་ཁ་དོག་དང་ལྡན་པ། རི་བོ་རྣམས་གཅིག་ལས་གཅིག་ལྷག་པ་ལྟ་བུའི་ཉམས་འགྱུར་སྒེག་པའི་ལང་ཚོ་དང་ལྡན་པ། ཉི་ཟེར་གྱི་ཁུ་བ་འཐུང་ཆེ་བས་རབ་ཏུ་མྱོས་པ། དེའི་རྒྱུ་མཚན་གྱིས་ལུས་ལ་ངོ་ཚའི་གོས་བྲལ་བ་སྟེ་སྐྱེ་དངོས་ཐམས་ཅད་བྱི་བའི་རང་བཞིན་བརྗོད་འདུག འདི་ནི་རྩོམ་པ ་པོའི་་འི་ཀུན་རྟོག་འཆར་སྣང་གི་འཇིག་རྟེན་གསར་བ་ཞིག་འབྲི་བཞེངས་བྱས་པའི་སྙན་ངག་གི་རང་མདངས་ངོ་མཚར་བ་ཞིག་དང་། རྩོམ་སྟངས་སྒྱུ་རྩལ་གྱི་ཆ་ནས་གཙོ་བོར་མཛེས་པའི་ཉམས་འདོན་ཚུལ་གྱི་ཁྱད་ཆོས་བླ་ན་མེད་པ་ཞིག་རེད། སྙན་པའི་ཉམས་གཙོ་བོར་བཏོན་པ་ནི། དཔའ་རིས་རབ་གསལ་ཚང་གིས། རྣམ་དག་ཁྲིམས་ཀྱི་རྩ་བ་རབ་བརྟན་ཞིང་། །ཏིང་འཛིན་ཟབ་མོའིཤེས་རབ་ཡལ་འདབ་རྒྱས། །རྨད་བྱུང་ཉམས་རྟོགས་འབྲས་བུ་གཡུར་ཟ་བའི། །དཔག་བསམ་རྐང་འཐུང་ཀུན་བཟང་མཆོད་པའི་སྤྲིན། །སྟོང་ཐུན་མུ་ཏིག་ཕྲེང་མཛེས་ལས་བཤུས། འདི་ནི་མཛེས་པའི་ཚིག་རྒྱན་གྱིས་སྤྲས་པ་ཆེར་མེད་ཀྱང་སྙན་ཞིང་འཇེབས་ལ་བབས་ཆགས་པ། བརྗོད་བྱའི་དོན་དང་རྗོད་བྱེད་ཀྱི་ཚིག་ལྕི་ཡང་མེད་པར་དཔེ་དོན་ཐད་ཀ་ཐད་ཀར་འབྱོར་བ་སོགས་ཀྱི་ཁྱད་ཆོས་འབུར་དུ་ཐོན་ཡོད་པས། འདི་ལྟ་བུ་ནི་གཙོ་བོ་སྙན་པའི་ཉམས་རང་སྟོབས་ཀྱིས་ཐོན་པའི་རྩོམ་ལུས་སུ་གཟུང་ངོ་།། གཞན་ཡང་། མཛེས་པའི་ཉམས་འདོན་ཚུལ་ལ་ལྷ་སྐུ་དང་། མེ་ཏོག བུད་མེད། ཟླ་བ། མཛེས་ལྗོངས་སོགས་ལ་བསྟོད་པའི་སྐབས་སུ་སྙན་པ་ལས་གཙོ་བོ་མཛེས་པའི་ཉམས་ཐོན་པ་མང་སྟེ། དཔེར་ན། ནེའུ་གསིང་གི་སྐྱེད་ཚལ་ངོགས་སུ་ཆུ་ཕྲན་ལྷུང་ལྷུང་འབབ་པའི་ཕྱིའི་རྐྱེན་གྱིས་འདུས་བྱས་མི་རྟག་པར་བསམ་པའི་ཡིད་ཀྱི་འགྱུར་བ་གསལ་བར་སྟོན་པ་ལ། མར་གད་ཁུ་བས་བརླན་བྱས་ནེའུ་གསིང་ཚལ། །ཡིད་འོང་ལྟ་ན་ཉམས་དགའི་འཇུག་ངོགས་ལ། །ཆུ་ཀླུང་ཆབ་སྒྲ་སྙན་སྒྲོག་གྱ་གྱུར་འབབ། །འདུས་བྱས་གཡོ་བའི་ངང་ཚུལ་འདིས་ཀྱང་སྟོན། །གཞོན་ནུ་ཟླ་མེད་ཀྱི་གཏམ་རྒྱུད་ལས་བཤུས། ཞེས་མར་གད་ཁུ་བ། བརླན་བྱས། ཡིད་འོང་། ཉམས་དགའ། ཆབ་སྒྲ། སྙན་སྒྲོག གྱ་གྱུར་འབབ་སོགས་ཚིག་རྒྱན་གྱིས་མཛེས་པའི་ཁྱད་པར་མངོན་སུམ་དུ་གསལ་བའི་སྒོ་ནས་ཡིད་ཀྱི་འགྱུར་བ་མཚོན་པ་འདི་ལྟ་བུ་ནི་ཚིག་རྒྱན་སྦྱར་ཚུལ་གྱི་སྟེང་ནས་མཛེས་པའི་ཉམས་འགྱུར་འབུར་ཚུགས་སུ་ཐོན་པའི་སྙན་ངག་གི་ཚད་བླ་ན་མེད་པའོ།།

དེས་ན་མཛེས་པའི་ཉམས་ཕུལ་དུ་བྱུང་བའི་རྟོག་བཏགས་ཀྱི་འཆར་སྣང་བཟོ་བསྐྲུན་བྱེད་པ་ལ།རྩོམ་སྟངས་སྒྱུ་རྩལ་གྱི་ཆ་ནས་གཅིག་དང་ཚིག་རྒྱན་སྦྱར་ཚུལ་གྱི་སྟེང་ནས་གཅིག་སྟེ་གཉིས་ཡོད་དམ་ཕྲ་བའི་བློ་གྲོས་ཅན་རྣམས་ཀྱིས་དཔྱད་པར་བྱའོ།། གལ་ཏེ་གཟུགས་མཛེས་པ། སྒྲ་སྙན་པ། བབས་ཆགས་པ། ཡིད་དུ་འོང་བའི་རིགས་ལ་མཛེས་པ་དང་སྙན་པའི་སྒྲ་དག་ཐོན་པ་ཅུང་སླ་ན་ཡང་། དེ་ལས་ལྡོག་སྟེ། སྐྱེ་མཆེད་མི་མཛེས་ཤིང་ཁ་དོག་ངན་པ། གདངས་མི་སྙན་ཞིང་སྐད་འཛེར་བའི་རིགས་ལ་སྙན་རྩོམ་མཛེས་པའམ་འཇེབས་པའི་ཁྱད་པར་ཇི་ལྟར་ཞེ་ན། རྩོམ་པ་པོའི་སྐྱེས་སྦྱངས་ཤེས་རབ་ཀྱི་མཐུ་ཇི་ལྟར་འཕེལ་བ་མཐའ་མེད་པའི་རྒྱུ་མཚན་གྱིས་རྩོམ་སྟངས་སྒྱུ་རྩལ་གྱི་འཇིག་རྟེན་གསར་དུ་བཞེངས་པའི་སྣང་ཆའང་མཐའ་མེད་པ་དང་། དེས་དྲངས་པའི་སྙན་ཞིང་འཇེབས་པ་དང་མཛེས་ཤིང་ཉམས་འགྱུར་ལྡན་པའི་སྐད་ཡིག་ཀྱང་བརྗོད་བྱའི་དོན་ལ་མི་ལྟོས་པའི་དབང་གིས་ཤིན་ཏུ་འཐད་པ་ཡིན་ཏེ། དཔེར་ན། རབ་དམར་མཆུ་སྒྲོས་དམར་གསལ་འཛུམ་བར་ནས། །ནད་མེད་མུ་ཏིག་སོ་ཕྲེང་མཚར་བཞད་པ། །འཛུམ་མེད་གདངས་ཤིང་མཆེ་གཙིགས་ཁྲོས་པ་བཞིན། ལྕེ་ཕྱུང་དེ་ནི་ལྟ་ན་ཉམས་མི་དགའ། །གཞོན་ནུ་ཟླ་མེད་ཀྱི་གཏམ་རྒྱུད་ལས་བཤུས།ཞེས་པ་འདིར་མཚོན་ན། སྤྱིར་མཛེས་པའི་ཚིག་སྦྱོར་ཕུན་སུམ་ཚོགས་པས་སྤྲས་པར་མ་ཟད་རྩོམ་སྟངས་སྒྱུ་རྩལ་གྱི་ཁྱད་ཆོས་ཀྱང་མངོན་གྱུར་དུ་ཡོད། ལྷག་པར་དུ། དམར་གསལ། འཛུམ། ནད་མེད། མཚར། བཞད་པ། ཞེས་པའི་ཚིག་རྒྱན་དག་གིས་མཛེས་པའི་ཉམས་འབུར་ཚུགས་སུ་ཐོན་ཡོད་ལ། འཛུམ་མེད། གདངས། མཆེ་གཙིགས། ལྕེ་ཕྱུང་། ཉམས་མི་དགའ། ཞེས་པ་འདི་དག་གིས་རྩོམ་སྟངས་སྒྱུ་རྩལ་གྱིས་མཛེས་པའི་ཁྱད་ཆོས་ངོམ་སྟེ་ཡིད་ཀྱི་འགྱུར་བའི་རང་བཞིན་མཚོན་འདུག སྙན་འཇེབས་ཀྱི་འགྱུར་ཁུགས་ལྡན་པའི་བརྗོད་བྱ་མི་མཛེས་པ་ཡང་དེ་ལས། ལང་ཚོའི་ཤ་བྲི་སྐྱ་སང་མདངས་རབ་ཉམས། །བ་སྤུའི་ཚོགས་ལངས་མཛེས་པའི་མིག་དག་ཀྱང་། །དོང་དུ་ལྷུང་བས་རེ་ཞིག་དེ་ཡི་ལུས། །མཐོང་ན་མི་དགའ་སྐལ་བ་ངན་པར་འགྱུར། ། ཞེས་པ་འདིའི་ལང་ཚོ་ཉམས་པ། བཞིན་མི་སྡུག་པ། ལུས་རིད་བ། ཡིད་དུ་མི་འོང་བ། སྐལ་བ་ངན་པའི་ཚུལ་ལས་བརྩམས་ཏེ་གཙོ་བོ་སྙན་འཇེབས་ངག་གི་རོལ་མོའིའགྱུར་རྟ་ལས་དྲངས་པའི་དབྱངས་ཀྱི་ཡན་ལག་མངོན་གསལ་དུ་དོད་པས་ན། མཛེས་པ་དང་སྙན་པ་གཉིས་ལས་ཕྱི་མ་ཕྱོགས་ལ་ངེས་པར་དུ་འགྲོ་བའི་རྩོམ་མོ།། དེ་ལྟར་བརྗོད་བྱའི་དོན་ལ་སྙན་མི་སྙན་གྱི་ཁྱད་པར་མ་རེག་པར་སྙན་ཞིང་འཇེབས་པའི་ཉམས་འགྱུར་གྱི་གཤིས་ཀ་དང་མཛེས་པའི་ཁྱད་པར་མངོན་གྱུར་ཏུ་ཐོན་པའམ་མཛེས་པ་གཙོ་བོའིཉམས་བཏོད་ཚུལ་གཉིས་སྙན་ངག་གི་རིན་ཐང་མཐོར་འདེགས་བྱེད་པའི་ཆེས་གཙོ་བོའིགྲུབ་ཆ་དང་། མཁས་རྒུའི་ཡིད་དབང་མེད་དུ་འཕྲོག་པར་བྱེད་པའི་སྙན་རྩོམ་གྱི་འབུར་དུ་ཐོན་པའི་ཁྱད་ཆོས་རེད།

གཞན་ཡང་། མཛེས་པའམ་སྙན་པའི་ཉམས་ཁྱད་མཚར་དོད་པའི་སྙན་རྩོམ་གྱི་རང་མདངས་འདི་སྙན་ངག་ཁོ་ནར་མ་ཟད། རྣམ་ཐར་རྟོགས་བརྗོད་དང་། མགུར་མ། བསླབ་བྱ། བརྩམས་སྒྲུང་རྣམས་སུའང་ཐོར་བུའི་ཚུལ་གྱིས་ཁྱབ་ཡོད་དེ། ཞང་བཙུན་བསྟན་པ་རྒྱ་མཚོས་གསུངས་པའི་མཁན་པོ་ངག་དབང་ཐུབ་བསྟན་རྒྱ་མཚོའི་རྣམ་ཐར་ལས། དཔྱིད་ཀྱི་ལང་ཚོ་རྫོགས་པ་མནྜ་རིའི། །འཁྲི་ཤིང་སྒེག་མོ་ཕྱོགས་སུ་གར་བསྒྱུར་བ། །དགེ་མཚན་ཧ་རིའི་དྲི་བསུང་འཐུལ་བའི་ངད། །སྙིང་གི་གདུང་བ་སེལ་བའི་བསངས་གཏོར་ཉིད། །ཞེས་པ་འདིས་ཕྱི་ཚུལ་གྱི་དྲི་བཟང་ཁྱབ་པའི་རྣམ་པ་ཙམ་ལ་རྩོམ་པ ་པོའི་མཁྱེན་རབ་ཀྱི་རྩལ་ལས་ཐོན་པའི་རྩོམ་གཤིས་ཕུན་སུམ་ཚོགས་པ། སྙན་ངག་མཁན་པོ་དག་གི་ཚོར་སྣང་ལའང་འཆར་མི་སྲིད་པ་ལྟ་བུའི་ཐུན་མོང་མ་ཡིན་པ་ཞིག་ལ། མཛེས་ཤིང་སྙན་ལ་བབས་ཆགས་པའི་ཚིག་རྒྱན་རིན་ཐང་ཆེ་བ་དག་གིས་རྐང་བ་བཞི་བོ་དོ་མཉམ་པར་སྤྲས་ཡོད།

གཞན་ཡང་། ཁོང་གིས་སྙན་ངག་གི་བསྟན་བཅོས་རྟོགས་བརྗོད་དང་། རྣམ་ཐར། ཆབ་ཤོག བསྟོད་ཚོགས། གཡུ་ལོ་བཀོད་པའི་དགའ་ཚལ་སོགས་སུ་འདི་འདྲ་ཡ་མཚན་པའི་རྩོམ་སྟངས་དང་ཚིག་རྒྱན་རྒྱུན་མར་འབྱུང་ལ། ཤོ་ལོ་ཀ་འདིར་མཚོན་ན། སྙན་རྩོམ་རིག་པའི་ཚིག་རྒྱན་སྦྱོར་ཚུལ་ལ་རང་གི་བློ་གྲོས་ཀྱི་རྩལ་ཅི་ཙམ་མཐོ་བ་ལྟར་བླ་ལྷག་ཏུ་མཛེས་པ་དང་སྙན་པའི་རྩོམ་ཉམས་ཐོན་འདུག་པས། འདིས་བོད་ཀྱི་སྙན་རྩོམ་རིག་པའི་ཚིག་རྒྱན་སྦྱོར་ཚུལ་ལ་མཐའ་མེད། ཅེས་སྤོབས་པ་གཟེངས་སུ་མཐོ་བའི་དར་ཆ་དེ་མཛེས་ཤིང་སྙན་པའི་ཉམས་འགྱུར་གྱི་རྩེ་ལ་བཙུགས་ཡོད་པས། སྙན་རྩོམ་འདི་དང་འདི་ལྟ་བུ་ལ་དུས་རབས་བཅུ་དགུ་བའི་ནང་གི་མཛེས་པ་དང་སྙན་པའི་ཉམས་འགྱུར་གྱི་སྟེང་ནས་རིགས་སྨྲ་བྱེ་བས་བསྟོད་བསྔགས་ཀྱི་ཤིས་ཚིག་དང་མེ་ཏོག་གི་ཕྲེང་བ་འབུལ་འོས་པ་ཞིག་རེད།

མདོར་ན། བོད་རིགས་རྩོམ་པ་པོ་སུ་ཡིན་ཡང་བསམ་བློའི་འདུ་ཤེས་དང་འཚོ་གཞིས་ཉམས་མྱོང་གི་སྟེང་ནས་བོད་ལ་བརྩེ་དུང་ཟབ་མོ་ཞིག་བཅིངས་ཡོད་པ་སྨོས་མ་དགོས་པས། བོད་མི་རིགས་ཀྱི་ལོ་རྒྱུས་དང་རིག་གནས། ཆོས་ལུགས། དད་མོས་སོགས་ལ་མཐོང་ཆེན་བྱས་ཏེ། བོད་ཀྱི་སྤྱི་ཚོགས་ཀྱི་བདེ་སྡུག་དང་འཚོ་བའི་གོམས་གཤིས། མ་འོངས་པའི་མདུན་ལམ་སོགས་བརྗོད་བྱར་བྱས་ནས་བརྟག་ཅིང་དཔྱད་པའི་མྱོང་ཚོར་དང་། བསམ་གཞིགས་བྱས་པའི་ཚུར་སྣང་གི་གཟུགས་རིས་རྩོམ་རིག་སྒྱུ་རྩལ་གྱིས་འབྲི་བཞེངས་བྱེད་པའི་ཚེ། གོང་དུ་དྲངས་པའི་སྙན་རྩོམ་འདི་དག་གི་ཁྱད་ཆོས་གཙོ་བོ་མཛེས་པ་དང་སྙན་པའི་ཚིག་གི་རྒྱན་འདོགས་ཚུལ། བརྗོད་བྱར་འབྲེལ་ཞིང་བབས་ཆགས་པ། ལེགས་པར་སྡེབས་པའི་དོ་མཉམ་པ་སྟེ། འདི་དག་མཚན་གཞིར་བཟུང་ནས་ཕྱོགས་ཞེན་མེད་པར་མཁས་པ་སོ་སོའ ་ི སྙན་རྩོམ་རིག་པའི་འབྲི་བཞེངས་ཁྱད་དུ་འཕགས་པའི་རྩོམ་སྟངས་སྤྱད་དེ། དུས་རབས་ཉེར་གཅིག་པའི་སྙན་རྩོམ་རིག་པའི་རིན་ཐང་མཐོར་འདེགས་བྱེད་རྒྱུ་དང་རང་ཉིད་ཀྱི་བློ་རིག་ཇེ་གསལ་དུ་གཏོང་བ་ལ་ཤ་ཐང་ཐང་དུ་འབད་དེ། བོད་ཀྱི་ཤེས་རིག་གོང་འཕེལ་ལ་ནུས་པ་གང་ཡོད་ཀྱིས་སྲི་ཞུ་རེ་སྒྲུབ་རྒྱུ་ནི་རེ་བའི་ཕུགས་བསམ་ཉག་གཅིག་གོ །

མཚར་བའི་ཡིད་འཕྲོག་བུ་མོ་དབྱངས་ཅན་མ། ། ངག་རིག་རི་མོ་བཀྲ་བའི་འབབ་སྟེགས་སུ། ། བཞུགས་པའི་གཟི་བྱིན་རྣམ་དཔྱོད་འཕྲོས་པའི་ངག ། སྙན་རྩོམ་གཞོན་ནུ་རྩེ་དགའ་རོལ་བའི་གྲོགས། །རབ་འབྱམས་ཤེས་བྱའི་མཐའ་རུ་སོང་བའི་མཁྱེན་རབ་འོད་ཀྱི་རང་མདངས་མཛེས། །ཉི་ཟླ་ལོ་ཡི་འཕྲང་རིང་བརྒྱུད་པའི་ངལ་དུབ་སྐྱོ་ངག་གདངས་སུ་རྩེན། ། གངས་ཅན་གཞོན་ནུ་དགེ་བའི་སླད་དུ་སྙན་གཏམ་བཅུད་ཀྱི་ཐིགས་པ་འདྲེན། །  ཞེས་རང་བྱུང་བསིལ་རླུང་འཐོར་བའི་ནགས་ཚལ་ཉམས་དགའ་བའི་འཇུག་ངོགས།དབེན་གནས་གསང་ཆེན་དཀར་མོའི་སྒྲུབ་ཕུག་ཆོས་གླིང་ནས༧རིགས་སྨྲའི་གྲལ་མཐར་འཚང་བ་ཨོའུ་རྒྱའི་སྤྲུལ་མིང་གསེར་ལག་བློ་བཟང་འཇམ་དཔལ་དགྱེས་པའི་རྒྱ་མཚོས་དགའ་བའི་རང་མདངས་ཕྱིར་མངོན་ཏེ་བྲིས་པའོ།།

རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར།  ཨ་བུ་འབྲོང་།  བན་ཤུལ་འཇམ་དབྱངས།