འཛམ་གླིང་རྒྱ་ཕིབས་ཀྱི་གསེར་གྱི་དྲིལ་ཆུང་།

                                           ཆོས་སྐྱོང་རྒྱལ།

      ང་ནི་ཁྱེད་ཀྱི་ཆུ་རྐྱང་རྩམ་རྐྱང་གི་འཚོ་བ་དང་གྱེས་ནས་ཁ་བའི་གཤོག་འགྱུར་ཐེངས་གསུམ་མཐོང་བའི་ཁྱེད་ཀྱི་གཅེས་ཕྲུག་ཅིག་ཡིན། ང་ནི་ཁྱེད་ཀྱི་ལུས་དང་ངག་གི་སློབ་གསོ་དང་བྲལ་ནས་སྟོན་ལོའི་སྨྲེང་སྐྱོ་ལན་གསུམ་མྱངས་པའི་ཁྱེད་ཀྱི་རེ་སྨོན་འཚོལ་མཁན་ཞིག་ཡིན།  ལོ་ཟླ་འདི་དག་ལ། ཕྲན་གྱིས་ཁྱེད་ཀྱི་དཀའ་སྡུག་མང་བོའི་བཤུལ་ལམ་རིང་མོ་ད་དུང་རྙེད་ཐབས་བྲལ་ཞིང་། ཕྲན་གྱིས་ཁྱེད་ཀྱི་བཟོད་བརྩོན་ཆེན་པོས་འཚོལ་སྙེག་གནང་བ་བསམ་པས་འཆུན་པར་དཀའ།  བསམ་གྱིན་བསམ་གྱིན། བལྟས་ཀྱིན་བལྟས་ཀྱིན་སེམས་པའི་གཏིང་ཞིག་ལ་མིག་ཆུ་ཞིག་འཁྱིལ་ཡོང་ཞིང་། དགའ་སྤོབས་ཤིག་རྒྱས་ཡོང་། བྱེས་ཀྱི་འཚོ་བ་ནི་དཀའ་སྡུག་གིས་ཁེངས་པ་ཞིག་རེད་ལགས། བྱེས་ཀྱི་བཤུལ་ལམ་ནི་ཚེར་མས་གང་བ་ཞིག་རེད་ལགས། བྱེས་ཀྱི་འཚོ་བ་ནི་མི་ཁ་རྒོད་པ་ཞིག་རེད་ལགས། བྱེས་ཀྱི་བཤུལ་ལམ་ནི་རལ་གྲིའི་སོ་ཁ་ཞིག་རེད་ལགས། ལན་རེ་ང་ནི་ཨ་ཐང་ཆད་དྲགས་ཏེ།ཁྱེད་ཀྱི་པང་ལ་མགོ་བོ་བསྙེས་ནས་ངལ་གསོ་ཞིག་བྱེད་འདོད།  སྐབས་རེར་ང་ནི་སྐྱོ་བ་ལངས་དྲགས་ཏེ།  ཁྱེད་ཀྱི་ལག་ཟུང་འགྲམ་པར་གླན་ནས་སྙིང་གཏམ་ཞིག་བརྗོད་འདོད། འོན་ཏེ། ཁྱེད་ཀྱིས་དཔའ་སྤོབས་དང་བཟོད་བརྩོན་ཆེན་པོས། ཤེས་རབ་དང་བྱམས་བརྩེ་ཆེན་པོས། ཁུ་བྱུག་དང་ལྗང་སྨྱུག་གི་རེ་སྨོན་ཉི་ཤུའི་ལང་ཚོ་སེམས་ལ་བཏེགས་ནས།  མེ་ཏོག་དང་རྩི་ལྗོན་གྱི་བཞད་ཐེངས་ཉི་ཤུའི་སྤོབས་པ་སྙིང་ལ་བླངས་ནས། ཁྲུང་ཁྲུང་དང་སྟོན་ལོ་བཞུད་པའི་སྨྲེང་སྐྱོ་ཉི་ཤུའི་ཆོས་ཉིད་མིག་གིས་འཚོས་ནས། ཁ་བ་དང་བུ་ཡུག་ནག་པོའི་གདུག་རྩུབ་ཉི་ཤུ་གདོང་གིས་བསུས་ཏེ། གངས་ཁྲོད་ན་གཟི་བརྗིད་ཆེན་པོས་འཚོ་ཞིང་། འཛམ་གླིང་ན་སྙན་པའི་རོལ་དབྱངས་དཀྲོལ་བ་ཐོས་ན། སྙིང་གི་སྤོབས་པ་རྒྱས་ཡོང་། ངག་གི་སྨྲ་སྒོ་ཕྱེས་ཡོང་། ཕམ་ཁ་དང་དཀའ་སྡུག་མི་ཚེའི་ནོར་བུར་བསམ་ནས།  རང་དཔའ་རང་གིས་བསྐྱེད་དེ། ཕུགས་བསམ་གྱི་དོན་དུ་བཟོད་བརྩོན་གྱིས་འགྲོ་བ་ནི་ཁྱེད་ཀྱིས་ཕྲན་ལ་བསྩལ་བའི་མི་ཚེའི་གདམས་ངག་ཡིན། འཚོ་གནས་ལ་དཀའ་སྡུག་མེད་ན་ཕ་མས་ང་ལ་ལག་ཟུང་ཅིའི་ཕྱིར་བསྐྲུན། འཇིག་རྟེན་ན་རྙོག་འཛིང་མེད་ན་ཁྱེད་ཀྱིས་ང་ལ་རིག་པ་ཅིའི་ཕྱིར་བསླབས། ཁྱེད་ཀྱིས་ང་ཚོར་རིག་པ་སློབ་པའི་དཀའ་སྡུག་ནི་ཚད་ཡོད་ཅིག་དང་། ཅི་ཡང་མི་ཤེས་པའི་དཀའ་སྡུག་ནི་ཚད་མེད་ཅིག་སྟེ་ཚེ་རབས་ཕྲེང་བའི་དཀའ་སྡུག་ཡིན་པ་བསྟན།ཁྱེད་ཀྱིས་རིག་པ་ནངས་པར་འཆི་ཡང་བརྩོན་པས་སློབས་དང་དེ་ཡི་ཕན་ཡོན་ཕྱི་ནས་ཐོབ་འོང་གསུངས། ཁྱེད་ཀྱིས་ང་ཚོས་བདེ་སྐྱིད་ཆེན་པོ་ཞིག་འདོད་ན་བདེ་བ་ཕྲན་ཚེགས་བློ་ཡིས་ཐོངས་དང་བདེ་སྐྱིད་དཔལ་གྱི་ཉི་མ་འདྲེན་འོང་གསུངས།  ཁྱེད་ཀྱིས་ང་ཚོར་ཚེ་རབས་ཕྲེང་བརྒྱུད་ཀྱི་སློབ་གསོའི་བདུད་རྩི་གནངས། རྒྱུ་འབྲས་ཀྱི་བློ་མིག་བསྩལ། ཁྱེད་ནི་དྲིན་ཆེན་ཕ་མ་དང་འདྲ་སྟེ།  ཁྱེད་ཀྱིས་ཤ་ཁྲག་གི་ལུས་ཕུང་འདི་བསྐྱེད་པ་མིན་ནའང་། ཡོན་ཏན་འོ་མ་ལྡུད་པའི་ཨ་མ་དང་། ལེགས་ཉེས་འཇུག་ལྡོག་སྟོན་པའི་ཨ་ཕ་ཡིན། ང་ཚོའི་བློ་མུན་སེལ་ཆེད། རིག་པའི་དྭངས་མ་གསོ་སླད། ཤེས་རབ་མིག་ཟུང་གནང་ཆེད། ཁྱེད་ཀྱིས་སྡུག་བསྔལ་བརྒྱ་ཕྲག་དང་ལ་བླངས། དུས་དེ་ནས་བཟུང་། ཁྱེད་ཀྱི་དཀའ་ངལ་ནི་ཆུ་ཡི་གཉེར་མ་བཞིན་རྫོགས་མཐའ་མེད་པ་དཔྱོད་ལྡན་ཀུན་ལ་གསལ།  རིག་པ་སློབ་ལ་ལེ་ལོས་ནོན་དུས། ངས་ཁྱེད་ཀྱི་བཟོད་བརྩོན་ཆེན་པོའི་རྣམ་པ་ཡིད་ལ་སྒོམ། དེས་ང་འགྱེལ་དུ་མི་འཇུག  ཐོས་པ་འཚོལ་ལ་སྐྱོ་ཞུམ་སྐྱེ་དུས། ངས་ཁྱེད་ཀྱི་ཚེ་རབས་ཕྲེང་བརྒྱུད་ཀྱི་སློབ་གསོ་སེམས་ལ་དྲན། དེས་ང་འདུག་དུ་མི་འཇུག  རང་ལ་གཅེས་འཛིན་ཆེན་པོས་དུག་ནག་ཐོན་དུས། ངས་ཁྱེད་ཀྱི་ལྷག་བསམ་དཀར་བོ་སྙིང་ལ་བཞག   དེས་གཞན་འདོར་དུ་མི་འཇུག

  ཁྱེད་ནི་བདག་གི་སྤོབས་པ་ཡིན།  གཟི་བརྗིད་ཡིན། ཁྱེད་ནི་བདག་གི་ཉི་མ་ཡིན། མིག་ཟུང་ཡིན། ལོ་ཟླ་འདི་ཚོར། དྭངས་མོ་ཆུ་ཡིས་ཁྱེད་ཀྱི་ལྷག་བསམ་དྲན་གྱིན་འདུག ལོ་ཟླ་འདི་ཚོར། རི་རྒྱལ་ལྷུན་པོས་ཁྱེད་ཀྱི་བརྟན་བརླིང་བརྗོད་ཀྱིན་འདུག ལོ་ཟླ་འདི་ཚོར། རྒྱ་མཚོ་ཆེན་པོས་ཁྱེད་ཀྱི་སེམས་རྒྱར་སྙེག་གིན་འདུག ལོ་ཟླ་འདི་ཚོར། ཁྲི་གདུགས་ཉི་མས་ཁྱེད་ཀྱི་ཤེས་རབ་དྲན་ནས་བཟི་འདུག ལོ་ཟླ་འདི་ཚོར། ཁུ་བྱུག་སྔོན་མོས་ཁྱེད་ཀྱི་གསུང་དབྱངས་བརྐུས་ནས་ཚིམས་འདུག ལོ་ཟླ་འདི་ཚོར། དྲིན་ཆེན་མ་ལོའི་བྱམས་བརྩེ་ལས་ཁྱེད་རང་འཛུམ་ཡོང་། ལོ་ཟླ་འདི་ཚོར། དྲིན་ཆེན་ཕ་ལོའི་ཕན་སེམས་ལས་ཁྱེད་རང་མཐོང་ཡོང་། ལོ་ཟླ་འདི་ཚོར། ཁྱེད་ཀྱིས་ང་རང་དྲན་པར་ཁག་མི་འདུག་སྟེ། ངའི་ཁོར་ཡུག་གི་རི་ཆུ་རྩི་ལྗོན་ཚོགས་ཀྱིས་ཀྱང་ཁྱེད་རང་དྲན་ནས། ལྷག་ཏུ་ཁྱེད་ཀྱི་བཀའ་དྲིན་དྲན་ནས་ཉིན་མཚན་ཇེ་རིང་དུ་གྱུར་འདུག ཁྱེད་ནི་ལོ་རྒྱུས་ཀྱི་རི་སུལ་དུ་སྐྱེས་པའི་གསོམ་དཀར་ཤུག་པའི་སྡོང་བོ་རེད། ཁྱེད་ནི་དུས་རབས་ཀྱི་གོས་ཁུད་དུ་འཐོར་བའི་མུ་ཏིག་དཀར་བོའི་ཚོམ་བུ་རེད། ཁྱེད་ཀྱིས་ད་ལྟ་ཡོད་ཚད་ཅུང་ཟད་ཀྱང་ཆུད་ཟོས་སུ་བཏང་མ་མྱོང་བས། ཁྱེད་ནི་ལེགས་འགྲུབ་ཀྱི་དགའ་སྤྲོ་ཉམས་སུ་མྱོང་མཁན་དེ་ཡིན་ངེས། ཁྱེད་ཀྱིས་རང་གི་ཡོད་ཚད་གཞན་དོན་དུ་བཏང་བས། ཁྱེད་ནི་མི་ཡུལ་གྱི་དགོས་འདོད་འབྱུང་བའི་ནོར་བུ་དེ་ཡིན་ངེས།  མེས་པོས་གནང་བའི་ཤེས་རབ་ཀྱི་གཡང་སྒོ་འབྱེད་ཆེད། སྐྱ་རེངས་གསར་བའི་གསེར་མདོག་གི་ཉི་གཞོན་བསུ་ཆེད།  བསམ་གྱིས་མི་ཁྱབ་པའི་དཀའ་སྡུག བརྗོད་ཀྱིས་མི་ལངས་པའི་ངན་སྨོད། ས་ཡིས་མི་ཐེག་པའི་གནོན་ཤུགས། གནམ་གྱིས་མི་ཐུམ་པའི་ཞེ་ནག་གི་དུག་རླངས་བརྒལ་ནས་ད་དུང་འཛུམ་གྱི་ལེར་ལྷོད་དྭངས་ངེར་ཕེབས་བྱུང་བ་འདི་ཅི་འདྲའི་ངོ་མཚར་ཨང་། སེམས་དྲོ་ཨང་། ཀུན་ཀྱི་ཡིད་དབང་འཕྲོག་པ་ནི་ཐོན་མིས་བོད་ཀྱི་མུན་པ་སེལ་ཆེད་གཅེས་པའི་སྲོག་ལའང་མ་འཛེམ་པ་ལྟ་བུའི་ཁྱེད་ཀྱི་བྱ་སྤྱོད་འདི་མ་ཡིན་ནམ། འདི་ནི་ཁྱེད་ཀྱི་ཉིན་ཐོ་ཡིན་ཞིང་། འདི་ནི་ཁྱེད་ཀྱི་ལོ་རྒྱུས་ཡིན། འདི་ནི་ཁྱེད་རང་དུས་རབས་ཀྱིས་བརྗེད་མི་སྲིད་ཀྱང་། མིའི་རིགས་ཀྱིས་ཀྱང་བརྗེད་མི་ཕོད་པའི་རྒྱུ་མཚན་ཁོ་ན་ཡིན།

      ཁྱེད་ཀྱི་ཐིགས་ཆུ་མི་ཁོག་པའི་ཁང་མིག་དེ་དག་ཏུ་ང་ཚོའི་མཛའ་བརྩེའི་དགོད་སྒྲ་སིམ་ཡོད། ཁྱེད་ཀྱི་སྤུས་ཀ་ཞན་པའི་སློབ་ཁང་དེ་དག་ཏུ་ང་ཚོས་རིག་པའི་མེ་ཏོག་འཐུས་མྱོང་། ཁྱེད་ཀྱི་པང་ནས་ང་ཚོས་མངར་སྐྱུར་ཁ་མོའི་འཚོ་བའི་ཆུ་འཁྱག་འཐུང་མྱོང་།  ང་དང་ཁྱེད་ལ་གསང་བ་མེད་ཅིང་། ང་དང་ཁྱེད་ལ་སྦས་དོན་མེད། ཁྱེད་ཀྱི་པང་ནས་ངས་ཅི་ཡང་འཁྲབ་མི་དགོས་དེ། ཁྱེད་ཀྱི་པང་ལ་ལོག་ན་ང་བདེ་ལྷོད་ཀྱིས་གཉིད་རྐྱང་ཡིན། ཁྱེད་ཀྱིས་དུང་གི་ཁ་བའི་གཤོག་འགྱུར་ཉི་ཤུ་མཐོང་བའི་དེ་རིང་།  ཁྱེད་ལ་གསེར་གྱི་ལོ་མས་གྱེས་ཕྱག་ཉི་ཤུ་ཕུལ་བའི་དེ་རིང་།  ཁྱེད་རང་འཛམ་གླིང་རྒྱ་ཕིབས་ཀྱི་སྟེང་གི་གསེར་གྱི་དྲིལ་ཆུང་ཞིག་རེད།  ང་ཚོར་དྲིན་གྱིས་བསྐྱངས་པའི་མ་ཡུམ་སློབ་གྲྭ་སྟེ། གངས་ལྗོངས་ཤེས་རིག་ནོར་བུའི་སློབ་གླིང་ཀྱེ།  ང་ཡིས་ད་དུང་ཁྱེད་ཀྱི་ཆེས་སྙན་པའི་སྒྲ་དབྱངས་ལ་ཉན་འདོད་ཡོད་ལགས།

                                                                                                              ༢༠༡༤ .༤ .༡༨ཉིན།

རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར།  ཨ་བུ་འབྲོང་།  བན་ཤུལ་འཇམ་དབྱངས།