༄༅། །བསླབ་བྱ་ཚིག་གསུམ་མ་བཞུགས་སོ།།

 

                 རྫ་དཔལ་སྤྲུལ་གྱིས།

 

༈ ཡོད་དགོས་པ་གསུམ།

མལ་ན་ལུས།

ལུས་ན་སེམས།

སེམས་ན་ལྷོད།

 

༈ ཉན་མི་རུང་བ་གསུམ།

གཞན་གྱི་ངོ་བསྟོད།

ཨ་གསར་གྱི་སྐད་ཆ།

ཤེས་མེད་ཀྱི་ཁ་ཏ།

 

༈ སྨོད་མི་ཉན་པ་གསུམ།

ཡུལ་སྡེས་བརྩི་བའི་མི།

གཞན་གྱིས་བཙོང་རྒྱུའི་ནོར།

རང་ལ་བརྩེ་བའི་བཤེས།

 

༈ བསྟོད་མི་ཉན་པ་གསུམ།

ཀུན་གྱིས་སྨད་པའི་མི།

རང་མཐོང་ཅན་གྱི་གླེན་པ།

གང་ཡང་མི་ཤེས་པའི་བྱིས་པ།

 

༈ ཡིད་ཀྱིས་སྨོན་མི་ཉན་པ་གསུམ།

ཕྱུག་པོའི་རྒྱུ།

མཐོན་པོའི་ཐོབ།

འཕྱོར་པོའི་རྒྱན།

 

༈ བརྗེད་མི་རུང་བ་གསུམ།

བཀའ་དྲིན་ཅན་གྱི་བླ་མ།

ཐུགས་རྗེ་ཅན་གྱི་སངས་རྒྱས།

དྲན་ཤེས་བག་ཡོད།

 

༈ དྲན་དགོས་པ་གསུམ།

བསླབ་པ་སྦྱིན་པའི་མཁན་པོ།

བསླབ་པ་སྟོན་པའི་ཆོས།

བསླབ་བྱའི་དམ་སྡོམ།

 

༈ བརྗེད་ན་དགའ་བ་གསུམ།

ཁྲོ་བོའི་དགྲ

ཆགས་པའི་ཡུལ།

གཏི་མུག་གཉིད།

 

༈ འཛིན་ན་དགའ་བ་གསུམ།

ཚོགས་སུ་ཁ།

གཅིག་པུར་ལག

རྟག་ཏུ་སེམས།

 

༈ ངོམས་མི་རུང་བ་གསུམ།

གློ་བུར་གྱི་ངེས་འབྱུང༌།

གཡོ་སྒྱུའི་ཁུག་མགོ

འཕྲལ་གྱི་དགེ་སྦྱོར།

 

༈ མི་རུང་བ་གསུམ།

གྲོགས་ལ་དགའ་སྡུག

གཏམ་ལ་འགྱུར་ལྡོག

བྱ་བ་ལ་ངོ་ལྐོག

 

༈ བྱེད་མི་རུང་བ་གསུམ།

རང་གདོང་གི་འགྱིང༌།

གཞན་གྱི་བླ་བཙག

སུ་ལའང་བརྙས་བཅོས།

 

༈ འཆོར་མི་ཉན་པ་གསུམ།

མཐོན་པོ་ལ་རྒྱུ།

ཟོག་པོ་ལ་དད་པ།

སུ་ལའང་སྙིང་གཏམ།

 

༈ བསྟུན་དགོས་པ་གསུམ།

གཏམ་གྲོགས་དང་བསྟུན།

ཟས་ཁམས་དང་བསྟུན།

སེམས་ཆོས་དང་བསྟུན།  

---

                                 རྩོམ་སྒྲིག་འགན་འཁུར་བ། ཁྰ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ། ཨ་བུ་འབྲོང་།