༄༅། །སྨན་འཐུང་མ་ཐག་ཏུ་གཉིད་མི་རུང་།

      མི་མང་པོ་ཞིག་ལ་དགོང་མོ་གཉིད་ཁར་སྨན་འཐུང་བའི་གོམས་སྲོལ་ཡོད་པ་དང་། སྨན་འཐུང་རྗེས་མྱུར་དུ་ངལ་གསོས་ན། སྨན་རྫས་བསྡུ་ལེན་བྱེད་པར་ཕན་པ་ཆེ་བར་འདོད་ཀྱིན་ཡོད། དོན་དངོས་སུ་སྨན་འཐུང་མ་ཐག་གཉིད་པ་དང་། ལྷག་པར་དུ་བཏུང་ཆུ་འཐུང་ཚད་ཉུང་བའི་སྐབས་སུ་སྨན་རྫས་མིད་པའི་སྟེང་འབྱར་ནས་ཕོ་བའི་ནང་བསྡུ་ལེན་བྱེད་མི་ཐུབ་། སྨན་རྫས་ཁ་ཤས་ཤིག་ལ་རུལ་སླད་རང་བཞིན་ཅུང་དྲག་པ་དང་མིད་པའི་ནང་ཞུ་རྗེས་མིད་པའི་འབྱར་སྐྱི་རུལ་བསླད་དུ་འགྲོ་བས་མིད་པར་གནོད་པ་ཧ་ཅང་ཆེ། ནད་བབ་ཅུང་ཡང་བའི་མིས་ཟ་མ་མིད་སྐབས་ན་ཟུག་སྐྱེས་པ་དང་། ནད་བབ་ཅུང་ཚབས་ཆེ་ན་ཁྲག་རྩར་གནོད་པ་ཐེབས་ནས་ཁྲག་བཞུར་ཡོང་ངེས། ནད་པ་མང་པོ་ཞིག་ལ་སྨན་རྫས་རང་བཞིན་གྱི་མིད་པའི་རུལ་འགྱུར་ནད་བྱུང་བ་དེ་ནི་གཉིད་ལོག་པའི་སྔོན་ལ་སྤྱིན་ཐུམ་རིགས་ཀྱི་སྨན་རྫས་འཐུང་བའི་རྐྱེན་རེད།