བོད་མིའི་སྐད་ཡིག་གི་དར་རྒུད་གླེང་བ།

གྲོལ་སྡེ་རྒྱ་མཚོ།

སྤྱིར་མི་རིགས་ཤིག་གི་དར་རྒུད་ནི། མིའི་ཚོ་ཁག་ཅིག་མི་རིགས་ཤིག་ཏུ་གྲུབ་པ་དང་། གྲུབ་ཟིན་པའི་མི་རིགས་ཤིག་རྩ་མེད་དུ་འགྲོ་བ་ལ་བྱ་དགོས་ཤིང་། དེ་ཡང་སྐད་ཡི་གེ་ཟས་གོས་ཡོ་བྱད་ཡུལ་སྲོལ་གོམས་གཤིས་སོགས་མི་རིགས་གཞན་དང་ཐུན་མོང་མ་ཡིན་པ་ཞིག་ཏུ་གྲུབ་ཅིང་གནས་པ་ནི་མི་རིགས་དེའི་དར་བའི་གནས་སྐབས་དང་། མི་རིགས་ཤིག་གི་ཁྱད་ཆོས་སུ་བརྩི་ཆོག་པའི་སྐད་དང་ཡི་གེ་སོགས་ལ་མི་རིགས་དང་རྒྱལ་ཁམས་གཞན་ཞིག་གི་ཤན་ཞུགས་ནས་ཕར་མི་རིགས་དེ་དང་དབྱེར་མེད་དུ་འདྲེས་པ་ལ་ཕྱོགས་པ་ནི་མི་རིགས་དེའི་ཉམས་རྒུད་ཀྱི་གནས་སྐབས་ཡིན། དེས་ན་འདིར་སྐབས་སུ་བབས་པ་རང་རེ་བོད་ཁ་བ་ཅན་པའི་དར་རྒུད་ཀྱི་སྲོག་རྩ་སྐད་ཡིག་གི་སྐོར་གླེང་བ་ལ། དར་བའི་གནས་སྐབས་དང་། རྒུད་པའི་གནས་སྐབས། མ་འོངས་པའི་འབྱུང་འགྱུར་གླེང་བ་དང་གསུམ།

དང་པོ། དར་བའི་གནས་སྐབས་དེ་གང་ཞེ་ན། འགོས་ལོའི་དེབ་སྔོན་ལས། བོད་ཀྱི་ཡུལ་འདི་རྒྱ་གར་དང་འདྲ་བར་ཡུལ་དང་མི་ལ་སོགས་པ་གནས་པའི་བསྐལ་བ་ནས་བྱུང་བར་བྱས་ན་ཡང་ལུང་དང་རིགས་པས་གནོད་པ་མེད་དོ།། ཞེས་བསྐལ་བ་ལ་གསུམ་དུ་ཕྱེ་བའི་ནང་ཚན་གནས་པའི་བསྐལ་བ་ནས་བོད་ཀྱི་ཡུལ་དུ་མིའི་འགྲོ་བ་ཡོད་པར་གསུངས་ཤིང་། དེང་སང་ཡར་ཀླུང་ལྷོ་རྒྱུད་དུ་རྡོ་ཆས་གསར་རྙིང་གི་དུས་སྐབས་ཏེ་མི་ལོ་ཁྲི་ཕྲག་གི་སྔ་རོལ་གྱི་མིའི་ལག་ཆ་སོགས་རྗེས་ཤུལ་མང་པོ་གསར་རྙེད་བྱུང་པས་ཀྱང་བོད་ཀྱི་མི་རྒྱུད་འདི་ཆེས་སྔ་མོའི་དུས་ཤིག་ནས་བྱུང་བར་ཤེས། དེའི་སྟབས་ཀྱིས་བོད་ཀྱི་སྐད་ནི་དུས་འདི་ཙམ་ན་གསར་དུ་བྱུང་ངོ་ཞེས་སུས་ཀྱང་ཁ་ཚོན་མི་ཆོད་མོད། མི་ལོ་ཁྲི་ཕྲག་དུ་མའི་སྔ་རོལ་ཞིག་ནས་བྱུང་བར་ནི་སུས་ཀྱང་སྨྲ་བར་སྤོབས་སོ།།

བོད་ཀྱི་ཡི་གེ་ནི། མཁས་པ་ལ་ལས་སྲོང་བཙན་ཡན་ཆད་ཅིག་ནས་ཡོད་པར་བཞེད་ལ། ཡོངས་གྲགས་སུ་སྲོང་བཙན་གྱི་དུས་སུ་བྱུང་བར་བཞེད། གང་ལྟར་བྱས་ཀྱང་སྐད་དང་ཡི་གེ་གཉིས་ཀ་དུས་སྔ་མོ་དེ་ཙམ་ནས་ཉེ་སྔོན་སྤྱི་ལོའི་དུས་རབས་དང་ཆབ་སྲིད་རིག་གནས་བཅས་ཀྱི་འཕོ་འགྱུར་གང་འདྲ་ཞིག་གི་འོག་ཏུའང་སྐད་ཡིག་གཞན་གྱི་དྲི་མས་མ་སྦགས་པར་བོད་སྐད་དང་བོད་ཡིག་ཅེས་མཛུབ་མོ་འཛུགས་ས་ལས་མ་འགྱུར་བར་ཆབ་དཔལ་རིག་གསུམ་གང་གི་ཐད་ལའང་དེས་མ་ཆོག་པ་མ་བྱུང་། ལྷག་པར་འཛམ་གླིང་ན་སྐད་གྲགས་ཆེ་བའི་རིག་གཞུང་འདི་དག་རང་གི་སྐད་ཡིག་ལ་བསྟེན་ནས་འཆད་ཉན་སྤེལ་གསུམ་གྱིས་མི་རབས་ནས་མི་རབས་སུ་རྒྱུན་འཛིན་བྱས་ཀྱང་སྐད་དང་ཡི་གེས་མ་འདང་བའམ་དགོས་མཁོ་སྐོང་མ་ཐུབ་ས་གང་ཡང་མ་བྱུང་། དེས་ན་བོད་ཀྱི་སྐད་དང་ཡི་གེ་འདི་འཇིག་རྟེན་ན་ཡོད་པར་གྱུར་པ་ནས་སྤྱི་ལོའི་དུས་རབས་ཉི་ཤུ་བའི་དུས་དཀྱིལ་ཡན་ཆད་ནི་བོད་ཀྱི་སྐད་ཡིག་གི་དར་བའི་དུས་སྐབས་སུ་བརྩིས་ཆོག །

གཉིས་པ་རྒུད་པའི་གནས་སྐབས་ནི། སྤྱི་ལོའི་དུས་རབས་ཉི་ཤུ་བའི་དུས་དཀྱིལ་དུ་རིག་གནས་གསར་བརྗེ་ཆེན་པོ་ཞེས་པའི་དུས་ཟིང་ལངས་ནས་གནམ་ས་བླ་འོག་བསྒྱུར་བ་ལྟ་བུའི་འཕོ་འགྱུར་བྱུང་སྟེ་མི་རིགས་འདིའི་ཐུན་མིན་ཁྱད་ཆོས་ཡོད་པའི་སྐད་དང་ཡི་གེར་ཉམས་རྒུད་ཐེབས་པའི་འགོ་བརྩམས་ཤིང་། དེ་ལས་བོད་སྐད་ལ་རྒུད་སྐྱོན་ཐེབས་པའི་ཚུལ་ནི། དེང་སྐབས་བོད་ཡུལ་གྱི་ཁུལ་དང་རྫོང་ཞང་བཅས་ཀྱི་རྒྱ་རིགས་འདུས་ཚད་བརྒྱ་ཆའི་བརྒྱད་ཅུ་དང་ལྔ་བཅུ་སུམ་ཅུ་ཙམ་དུ་སླེབས་ཡོད་སྙམ་བྱེད་ལ། རྒྱ་རིགས་དེ་དག་ཕལ་ཆེ་བ་འགོ་ཁྲིད་ལས་བྱེད་པ་དང་། ཚོང་ལས་གཉེར་མཁན་སོགས་མང་ཚོགས་དང་འབྲེལ་འདྲིས་མང་དུ་བྱེད་དགོས་པའི་རིགས་ཡིན་སྟབས། དམངས་དོན་ཞུ་གཏུག་བྱེད་པ། སྨན་བཅོས་དང་ཉོ་ཚོང་བྱེད་པ། ཡུལ་སྐོར་འགྲིམ་འགྲུལ་བྱེད་པ་སོགས་ཀྱི་ཐ་སྙད་རྒྱའི་སྐད་ཀྱི་ལམ་ནས་མ་ཤེས་ཚེ་བརྡ་སྤྲོད་ཐབས་མེད་ལ། ལས་དོན་གང་ཡང་སྒྲུབ་ཁག་པོ་བྱུང་བས་གྲོང་དང་གྲོང་ཁྱེར་དུ་བོད་སྐད་བཀོལ་ས་མེད་པའམ། བཀོལ་སྤྱོད་བྱེད་ས་ཉུང་ངུར་གྱུར་ནས་བོད་སྐད་ཀྱིས་གོ་མི་ཆོད་པའི་གནས་ཚུལ་བྱུང་དང་འབྱུང་བཞིན་ཡོད། གཞན་ཡང་སྐད་རིགས་གཉིས་འདྲེས་མར་བཀོལ་སྤྱོད་བྱས་པའི་རྐྱེན་གྱིས་རྒྱའི་ཐ་སྙད་མང་པོ་ནད་ཡམས་བཞིན་དུ་བོད་སྐད་ཀྱི་ཁྲོད་དུ་མཆེད་ནས་དེང་སང་བོད་ཆོལ་ཁ་གསུམ་པོའི་གང་དུ་སོང་ཡང་ཆུ་ཚོད་གཅིག་གི་ཡུན་ཙམ་ལའང་རྒྱའི་ཐ་སྙད་གཅིག་ཀྱང་མ་འདྲེས་པར་སྤྱིར་བཏང་གི་ཁ་བརྡ་བྱེད་ཐུབ་མཁན་ཞིག་མི་རྙེད་པའི་ཚད་ལ་སླེབས་ཡོད། ལྷག་པར་གྲོང་ཁྱེར་སོགས་སུ་སྡོད་པའི་བོད་མི་དར་མ་ཞིག་ཡིན་ན ། དེའི་རྒྱུན་སྤྱོད་སྐད་ཆའི་ཕྱེད་ཙམ་ལ་རྒྱ་སྐད་འདྲེས་ཡོད། ཆུང་དུས་ནས་གྲོང་ཁྱེར་དུ་ནར་སོན་པའི་བོད་རིགས་ན་ཆུང་ཞིག་ཡིན་ན། བོད་སྐད་མི་ཤེས་པའམ་བོད་སྐད་ལས་རྒྱ་སྐད་ལ་དགའ་ཞིང་བཤད་བདེ་བོ་ཆགས་ཡོད། བོད་ཀྱི་ཡི་གེ་ལ་རྒུད་སྐྱོན་ཐེབས་པའི་ཚུལ་ནི། ཡིག་རིགས་གཞན་གྱི་ཤན་ཞུགས་ནས།

དཔེ་མིང་མཚོན་པའི་རྟགས་དང་བཤད་རྟགས་སོགས་མི་དགོས་བཞིན་དུ་བསྲེས་ནས་བཀོལ་སྤྱོད་བྱེད་བཞིན་པ་དཔེར་ན་<<དེབ་ཐེར་དཀར་པོ>>ལས་ཞེས་བྲིས་དང་།ཡང་།

ངས་ཀྱང་སྔ་མོ་ཞིག་ནས་དེ་ལྟར་བསམས་ཡོད་ཟེར་ཞེས་བྲིས་པས་ཆོག་མོད ། “ངས་ཀྱང་སྔ་མོ་ཞིག་ནས་དེ་ལྟར་བསམས་ཡོད་ཟེར”། ཞེས་བྲིས་པ་སོགས་བརྗོད་དོན་སྟོན་པ་ལ་ཁྱད་པར་ལྷག་པོ་གང་ཡང་མེད་ཀྱང་། ད་ལྟ་རྟགས་དེ་ཚོ་མ་བཀོལ་ན་ཡི་གེ་མ་དག་པར་བརྩི་བའི་ཚད་ལ་སླེབས་ཡོད། གཞན་ཡང་ཁུལ་དང་རྫོང་སོ་སོའི་ལས་ཁུངས་ཆེ་གེ་མོ་དང་ག་གེ་མོ་སོགས་ཀྱི་སྒོ་བྱང་སྟེང་དུའང་ཡིག་ནོར་མཐོང་ལ ། ཐ་ན་ཐོག་ཁང་སྟེང་གི་གསེར་འོད་ལམ་ལམ་འཕྲོ་བའི་བོད་ཡིག་ལའང་ཡིག་ནོར་དང་བརྡ་སྤྲོད་དང་འགལ་བའི་སྐྱོན་ཡོད་པ་མཐོང་རྒྱུ་ཡོད། དེ་ལྟར་བོད་ཀྱི་སྐད་དང་ཡི་གེ་ཉམས་བཞིན་པ་མངོན་སུམ་དུ་མཐོང་ཡང་དོ་སྣང་དང་སེམས་ཁྲལ་བྱེད་མཁན་ཉུང་ཉུང་ལས་མེད་པར་བལྟས་ན ། འདས་པའི་མི་ལོ་བཅུ་ཕྲག་ཁ་ཤས་ནས་ད་ལྟའི་བར་ནི་བོད་ཀྱི་སྐད་དང་ཡི་གེའི་ཉམས་རྒུད་ཀྱི་དུས་སྐབས་ཡིན་ཞེས་བཤད་ཆོག་ཆོག་ཡིན ། འདིར་སྐད་ཡིག་ཉམས་པའི་རྐྱེན་གྱིས་མི་རིགས་ཀྱི་ཁྱད་ཆོས་གཞན་དང་གཞན་དག་ཀྱང་ཉམས་རྒུད་དུ་འགྲོ་བཞིན་ཡོད་པའི་ཚུལ་ཅུང་ཟད་བརྗོད་ན། གོང་ནས་ཞུས་པ་ལྟར། མི་རབས་རེ་རེ་བཞིན་སྐད་ཡིག་འགྱུར་བ་དང་བསྟུན་ནས་བོད་ཀྱི་སྐད་ཡིག་རིག་གནས་ཡུལ་སྲོལ་གོམས་གཤིས་སོགས་ལ་བཅངས་པའི་དུང་ཞེན་རིམ་བཞིན་ཉམས་ནས་མི་རིགས་གཞན་གྱི་ཤན་ཞུགས་ཏེ། བོད་ཟས་བཟའ་མི་འདོད་པ།བོད་གོས་གོན་མི་འདོད་པ། བོད་སྐད་བཤད་མི་འདོད་པ། བོད་ཆས་སྤྲ་མི་འདོད་པ།བོད་ཀྱི་རིག་གནས་སྦྱང་མི་འདོད་པ། ཐ་ན་མགོ་སྐྲ་སེར་པོར་སྒྱུར་བར་བྱེད་པ་སོགས་རང་གི་ཤ་ཁྲག་གི་ཕུང་བོ་དེ་བོད་མིའི་བརྒྱུད་པ་ཞིག་ཡིན་པར་ངོ་གནོང་བཞིན་པའང་ཉུང་ཉུང་མིན། མདོར་ན་སྐད་རིགས་གཉིས་དབྱེ་འབྱེད་མེད་པར་མཉམ་གནས་བྱས་པས། བོད་ཀྱི་སྐད་ཡིག་གཙོས་བོད་ཀྱི་ཤེས་རིག་དང་གཤིས་ཀ་སོགས་བོད་མིའི་ཁྱད་ཆོས་ཀྱི་དྲི་ཙམ་ཡང་མི་བྲོ་བའི་མི་རབས་གསར་བ་ཞིག་འཚར་ལོངས་འབྱུང་བཞིན་ཡོད་པ་སོགས་འཇིགས་སྣང་དང་དངངས་སྐྲག་སྐྱེ་དགོས་པའི་དུས་སྐབས་ཤིག་མིག་མདུན་དུ་སླེབས་ཡོད།

གསུམ་པ། མ་འོངས་པར་རང་རེའི་སྐད་ཡིག་ལ་དར་རྒུད་ཅི་འབྱུང་ཞེ་ན། དེ་ནི་གཙོ་ཆེར་ད་ལྟའི་བོད་མི་རྣམས་ལ་རག་ལས་ཡོད། འདས་པའི་མི་ལོ་ལྔ་བཅུ་ཙམ་གྱི་དུས་ཡུན་

ཐུང་ཐུང་འདིའི་ནང་རང་རེའི་སྐད་ཡིག་ལ་ཉམས་ཆག་དེ་ཙམ་ཐེབས་པར་གཞིགས་ན།ང་ཚོ་ད་དུང་འདི་ལྟར་ཤེས་མེད་ཚོར་མེད་དང་རེ་མེད་སྤོབས་མེད་ངང་མདུན་དུ་བསྐྱོད་པ་ཡིན་ཚེ ། མི་རིགས་འདིའི་ཐུན་མོང་མ་ཡིན་པའི་སྐད་དང་ཡི་གེ་འཛིན་སྐྱོང་སྤེལ་གསུམ་བྱེད་མཁན་མེད་པར་ངང་ངམ་ཤུགས་ཀྱིས་ཉམས་དམས་སུ་གྱུར་ནས། དེང་ཕྱིན་མི་ལོ་བརྒྱ་ཙམ་འགོར་ཚེ་བོད་སྐད་གཙང་མ་ཞིག་དང་བོད་ཡིག་དག་མོ་ཞིག་ནི་གང་དུ་ཡང་མི་རྙེད་ལ། དེའི་རྐྱེན་གྱིས་འཛམ་གླིང་ན་སྐད་གྲགས་མཐོ་བའི་བོད་མིའི་ཤེས་རིག་འདི་ཀུན་ཀྱང་ཉེ་སྔོན་ལོ་རབས་དྲུག་ཅུ་བར་བཤད་པར་ལྟར་ངེས་པར་དུ་རྨོངས་དད་ཀྱི་ཆ་ལག་ཅིག་ཏུ་འགྱུར་རྒྱུ་གདོན་མི་ཟ། རྒྱུ་མཚན་ནི། སྐད་ཆ་འགྱུར་ཚབས་ཆེ་ན་ཡི་གེ་དང་བར་ཐག་ཇེ་རིང་ཇེ་རིང་དུ་གྱུར་ནས་སྐད་ཆ་ཡོད་ཚད་ཡིག་ཐོག་ཏུ་འགོད་མི་ཐུབ་པས། སྐད་དང་བསྟུན་ནས་ཡི་གེ་གསར་པ་ཞིག་བཟོ་བའམ། ཡང་ན། མི་རིགས་གཞན་གྱི་ཡི་གེ་ཞིག་ཏུ་འགྱུར་རྒྱུ་ཡིན་པས་སོ།། འདིར་ཁ་ཅིག་གིས། སྐད་ཡིག་རིག་གནས་རྙིང་བ་དེ་དག་ལ་ཤི་སྤར་འཐམས་ནས་ཅི་བྱེད། གསར་བ་གསར་སྤེལ་བྱས་ན་མི་ཆོག་གམ་སྙམ་ན།

གསར་བཏོད་མ་བྱས་ན་འཕེལ་རྒྱས་མི་འབྱུང་བ་ནི་ཀུན་ལ་གྲགས་ཤིང་གྲུབ་པ་ཞིག་རེད་མོད། མིའི་རིགས་སུ་གྱུར་ཏོ་ཅོག་གིས་ལུས་ངག་གི་རྩོལ་བ་ཅི་དང་ཅི་བྱེད་པ་ཐམས་ཅད་དངོས་སམ་བརྒྱུད་ནས་རང་གཞན་ལ་བདེ་བ་འཐོང་པའི་ཆེད་ཁོ་ན་ཡིན་ལ། བདེ་སྐྱིད་འཐོབ་པ་དེ་ཡང་ནང་བསམ་བློ་ཡར་རྒྱས་དང་ཕྱི་འབྱོར་བ་ཡར་གཏོང་བ་ཁོ་ན་ལ་རག་ལས་པའི་ཕྱིར་དང་། དེ་ལས་ཀྱང་ཞི་བདེ་དང་གཞན་ཕན་ལ་དམིགས་པའི་བསམ་བློ་ཞིག་མེད་ན་ཕྱིའི་འབྱོར་བ་གཅིག་པུ་ཡང་རྒྱས་ཅི་ཙམ་བཏང་ཡང་མཐར་ཐུག་གི་བདེ་སྐྱིད་ངོ་མ་ཞིག་འཐོབ་མི་ཐུབ་པའི་ཕྱིར། དེ་འདྲའི་བསམ་བློ་ཡར་རྒྱས་གཏོང་བ་ལ་ཡང་བོད་མིའི་ཤེས་རིག་ལས་ལྷག་པའི་བསླབ་བྱ་ཞིག་སྔར་མ་བྱུང་ལ་ཕྱིས་ཀྱང་མི་དགོས་པས་ནོར་བུ་ལག་ན་ཡོད་དུས་ངོ་ཤེས་པར་བྱེད་རྒྱུ་གལ་ཆེ་བས། ཕྱིའི་འབྱོར་བ་ཡར་རྒྱས་གཏོང་ཐབས་ཁོ་ནར་ཆགས་པས་ཟིལ་གྱིས་ནོན་ཏེ་ནང་བསམ་བློ་ཡར་རྒྱས་གཏོང་པའི་ཐབས་བླ་ན་མེད་པ་དེ་དག་ཡལ་བར་མི་འདོར་བར་ཞུ། མདོར་ན་གོང་དུ་ཞུས་པ་ལྟར། ང་ཚོ་ད་དུང་འདི་ལྟར་ཤེས་མེད་ཚོར་མེད་དང་རེ་མེད་སྤོབས་མེད་ངང་མདུན་དུ་བསྐྱོད་པ་ཡིན་ན།

བོད་བརྒྱུད་ནས་བསྟན་ཤེས་རིག་གི་གཙོས་སྔར་ཡོད་རིག་གནས་སྤྱིའི་དར་རྒུད་ཀྱི་སྲོག་རྩ་ཉག་ཅིག་འབྱུང་འགྱུར་འཕེལ་རྒྱས་དང་གསར་བཏོད་ཀྱི་རྨང་གཞི་ཁོ་ན། བོད་མི་རིགས་ཐུན་མིན་དུ་མཚོན་བྱེད་ཀྱི་ཁྱད་ཆོས་གཅིག་པུ་བོད་མིའི་སྐད་དང་ཡི་གེ་ཉམས་རྒུད་དང་བསླད་སྐྱོན་ཅན་དུ་གྱུར་ཏེ། མི་རིང་བར་མི་རིགས་འདི་རིག་གཞུང་དང་སྐད་ཡིག་དང་བཅས་ཏེ་རྩ་མེད་དུ་འགྲོ་རྒྱུ་ཐག་ཆོད་ཡིན།

དེས་ན་ཉེན་ཁ་དེ་དག་སེལ་བའི་ཐབས་ཡོད་དམ་མེད་སྙམ་ན་ཡོད་དེ། འཛམ་གླིང་མཁས་རྒུས་བསྔགས་བརྗོད་དང་ཡིད་སྨོན་ཚད་མེད་གནང་བཞིན་པའི་བོད་ཀྱི་རིག་གཞུང་འདི་དག་དང་། མི་ལོ་ཁྲི་ཕྲག་དུ་མའི་ལོ་རྒྱུས་ཡོད་པའི་རླབས་ཆེ་བའི་མི་རིགས་འདི་ཉིད་རྩ་འཐོར་ཤུལ་མེད་དུ་མ་གྱུར་བའི་གོང་རོལ་འདི་ཉིད་ནས། རྒྱལ་ཁབ་ཕྱི་ནང་ཀུན་ན་ཡོད་པའི་བོད་མི་ཡོངས་ཀྱིས་མཐུན་སྒྲིལ་དང་སྟོབས་ཤུགས་གཅིག་ཏུ་བསྒྲིལ་ཏེ།སློབ་གསོའི་བྱ་བ་རྒྱ་ཁྱབ་ཏུ་སྤེལ་ནས། སྲོལ་རྒྱུན་རིག་གནས་རྒྱུན་འཛིན་དང་དར་སྤེལ། དེང་རབས་སྔོན་ཐོན་ཚན་རྩལ་ནང་འདྲེན་དང་བཀོལ་སྤྱོད། མི་རིགས་འདིའི་ཁྱད་ཆོས་ཡོད་པའི་གསར་བཏོད། མི་རིགས་འདིའི་དགོས་མཁོ་སྐོང་ཐུབ་པའི་ཤེས་ལྡན་རྗེས་རབས་པ་གསོ་སྐྱོང་བཅས་བྱས་ན་མི་རིགས་འདིའི་ཉམས་རྒུད་རྩ་བ་ནས་བཟློག་ཐུབ་ཅིང་། རིག་གནས་གསར་རྙིང་གི་ཕ་བུ་ངོ་འཕྲོད་ནས་མ་འོངས་པར་གངས་ལྗོངས་འདི་ཉིད་ཆོས་སྲིད་གཉིས་ཀར་འཛམ་གླིང་ན་འགྲན་ཟླ་བྲལ་ཞིང་། འཛམ་གླིང་འཚེ་མེད་ཞི་བདེ་དང་སྣོད་བཅུད་མཉམ་གནས་ལ་ཁྲིད་སྟོན་དང་བཀའ་བཀོད་བྱེད་ཐུབ་པའི་ཡུལ་ཁམས་ཁྱད་པར་བ་ཞིག་ཏུ་འགྱུར་ཐུབ་པར་ཡིད་ཆེས་བྱས་ཆོག

ཡ་མཐའ་ཐུག་པ་མེད་པའི་དུས་ཤིག་ནས་བརྩམས་ཏེ།།

རྔུལ་ཁྲག་རྒྱ་མཚོས་བསྐྲུན་པའི་མི་རིགས་ཀྱི་སྲོག་རྩ།།

དུས་འགྱུར་འཐག་སོ་འཁོར་བའི་བར་མཚམས་ལ་ཚུད་ན།།

སུ་དང་གང་ནི་སྐྱོབ་པའི་དཔུང་གཉེན་དེ་ཡིན་ཨང་།།

ལྟ་ངན་མུན་སྟུག་གཏིབས་པའི་གཞི་དཀྱིལ་ལ་མ་འཁྱམས།།

འཛམ་གླིང་རིག་པས་འཁོར་བའི་བློ་རྒྱ་རེ་སྐྱེད་ལ།།

ཕྱི་ནང་དཔུང་ཁ་སྡེབས་པའི་ཐབས་ཚུལ་ལ་བརྩོན་དང་།།

སྨུག་སྤྲིན་གོར་མོ་འདི་ཡི་ཕར་རྒྱབ་དེ་མཐོང་ཡོང་།།

ཡོད་ཚད་གནམ་ལ་རེ་བ་བླུན་པོ་ཡི་ལུགས་ཡིན།།

ཐམས་ཅད་ལག་པས་མི་འགྲུབ་དཀའ་ངལ་གྱི་ཁ་སྣོན།།

གང་ལ་གང་འཚམ་སྤྱོད་པའི་ཐབས་འཕྲུལ་ཞིག་ཡོད་ན།།

མ་འོངས་གངས་ལྗོངས་རང་གི་ལག་མཐིལ་ན་ཡོད་དོ།།

རྩོམ་སྒྲིག་འགན་འཁུར་བ། མགར་རྩེ་ཉི་ཟེར། འབའ་སྣང་གྲོལ། ཨ་བུ་འབྲོང་། བན་ཤུལ་འཇམ་དབྱངས་ཡེ་ཤེས།