སེམས་གནས་དགུ།
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2020 ལོའི་ཟླ 5 ཚེས 26 རེས་གཟའ་མིག་དམར་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» ཆོས་ལུགས།» ནང་བསྟན་རིག་གཞུང་། »སེམས་གནས་དགུ།
སེམས་གནས་དགུ།
རྩོམ་སྒྲིག་པ།  ཨ་བུ་འབྲོང་། སྤེལ་དུས 2015-05-10ལྟ་ཀློག (807)རྩོམ་ཁུངས: མཚོ་སྔོན་པོའི་དྲ་བ།པར་འདེབ།

སེམས་གནས་དགུ།

རྩོམ་པ་བོ་མི་གསལ།

    ཐེག་པ་གསུམ་གྱི་ཡོན་ཏན་ཐམས་ཅད་ཞི་ལྷག་དངོས་སམ་རྗེས་མཐུན་གྱི་སྒོ་གང་ཡང་རུང་བའི་འབྲས་བུར་གསུངས་ཤིང་། ཞི་གནས་གྲུབ་ནས་དགེ་སྦྱོར་བྱས་སྟོབས་ཆེ་བ་སོགས་ཕན་ཡོན་དང་དགེ་བ་ཤིན་ཏུ་ཆེ་བས། ཐར་བ་དོན་དུ་གཉེར་བའི་རྣལ་འབྱོར་བ་རྣམས་ཀྱི་ཞི་གནས་གྲུབ་པ་གལ་ཆེ་ཞིང་། འདི་ལ་ཞི་གནས་ཀྱི་ཚོགས་དྲུག་ལ་གནས་པའི་སྒོམ་པ་པོས། དབུས་མཐའ་ནས་བཤད་པ་ལྟར། ལེ་ལོ་དང་། གདམས་ངག་བརྗེད་པ་དང་། བྱིང་རྒོད་དང་། འདུ་མི་བྱེད་པ་དང་། འདུ་བྱེད་པ་སྟེ་ཏིང་ངེ་འཛིན་གྱི་ཉེས་པ་རིག་ནས་དང་པོའི་གཉེན་པོར། དད་པ། འདུན་པ། ཤིན་སྦྱངས། རྩོལ་བ་བཞི། གཉིས་པའི་གཉེན་པོར། དྲན་པ། གསུམ་པའི་གཉེན་པོར་ཤེས་བཞིན། བཞི་བའི་གཉེན་པོར་འདུ་བྱེད་པ། ལྔ་བའི་གཉེན་པོར་བཏང་སྙོམས་ཏེ་གཉེན་པོ་འདུ་བྱེད་བརྒྱད་བསྟེན་ནས་སྒྲུབ་དགོས་ལ། དེ་དག་ཀྱང་སེམས་གནས་དགུར་ཕྱེ་དང་། དེ་རྣམས་སྟོབས་དྲུག་གི་འགྲུབ་ལུགས་དང་། ཡིད་བྱེད་བཞིར་སྡུད་ཚུལ་རྣམས་ཤེས་ནས་ཏིང་འཛིན་སྐྱོན་མེད་བདེ་བླག་ཏུ་འགྲུབ་ལུགས་གསུངས་པས། དབུ་མ་སྙིང་པོ་ལས། ཡིད་ཀྱི་གླང་པོ་ལོག་འགྲོ་བ། ། དམིགས་པའི་ཀ་བ་བརྟན་པོ་ལ། ། དྲན་པའི་ཐག་པས་ངེས་བཅིངས་ནས། ། ཤེས་རབ་ལྕགས་ཀྱུས་རིམ་དབང་བྱ། ། ཞེས་པ་ལྟར་གླང་པོ་ཆེ་མ་དུལ་བ་འདུལ་བའི་དཔེ་དང་སྦྱར་ཏེ་གོང་དུ་རི་མོ་བཀོད་པ་རྣམས་ཀྱི་དོན་དག་རིམ་ཙམ་དགོངས།
    སེམས་གནས་དགུ་ནི། ༡.སེམས་འཇོག་པ། ༢.རྒྱུན་དུ་འཇོག་པ། ༣.གླན་དུ་འཇོག་པ། ༤.ཉེ་བར་འཇོག་པ། ༥.དུལ་བར་བྱེད་པ། ༦.ཞི་བར་བྱེད་པ། ༧.རྣམ་པར་ཞི་བར་བྱེད་པ། ༨.རྩེ་གཅིག་ཏུ་བྱེད་པ། ༩.མཉམ་པར་འཇོག་པ་རྣམས་ཡིན་ལ། དེ་དག་སྟོབས་དྲུག་གི་གྲུབ་ལུགས་ནི། བླ་མའི་གདམས་ངག་ཐོས་པའི་སྟོབས་ཀྱིས་སེམས་དང་པོ་འགྲུབ། བསམ་པའི་སྟོབས་ཀྱིས་གཉིས་པ་འགྲུབ། དྲན་པའི་སྟོབས་ཀྱིས་གསུམ་པ་དང་བཞི་བ་འགྲུབ། ཤེས་བཞིན་གྱི་སྟོབས་ཀྱིས་ལྔ་བ་དང་དྲུག་པ་འགྲུབ། བརྩོན་འགྲུས་ཀྱི་སྟོབས་ཀྱིས་བདུན་པ་དང་བརྒྱད་པ་འགྲུབ། འདྲིས་པའི་སྟོབས་ཀྱིས་དགུ་བ་འགྲུབ་བོ། དེ་དག་ཡིད་བྱེད་བཞིར་སྡུས་ཚུལ་ནི། དང་པོ་དང་། གཉིས་པའི་སྐབས་བསྒྲིམས་ཏེ་འཇུག་པའི་ཡིད་བྱེད་དང་། བར་བ་ལྔའི་སྐབས་ཆད་ཅིང་འཇུག་པའི་ཡིད་བྱེད་དང་། བརྒྱད་པ་ནི་ཆད་པ་མེད་པར་འཇུག་པའི་ཡིད་བྱེད་དང་། དགུ་པ་ནི་ལྷུན་གྱི་འགྲུབ་བྱེད་དུ་འཇོག་པ་ཡིན་ནོ། དེ་ལྟར་སེམས་གནས་དགུ་རིམ་གྱིས་འགྲུབ་པའི་མཐར་ཤིན་སྦྱངས་མི་གཡོ་བ་ཐོབ་པ་དང་། དུས་མཉམ་དུ་བསམ་གཏན་དང་པོའི་ཉར་བསྡོགས་ཀྱིས་བསྡུས་པའི་ཞི་གནས་འགྲུབ་པ་ཡིན་ནོ། དེ་ལྟ་བུའི་ཞི་གནས་གྲུབ་པའི་རྗེས་སུ་ཟབ་མོ་དབུ་མའི་ལྟ་བ་ལ་རྩེ་གཅིག་ཏུ་དཔྱད་འཇོག་ཆ་མཉམ་དུ་གོམས་པར་བྱེད་པ་དཔྱད་པ་རང་སྟོབས་ཀྱིས་དྲངས་ཤིན་སྦྱངས་ཁྱད་པར་ཅན་ཐོབ་པ་ན། ལྷག་མཐོང་མཚན་ཉིད་པ་ཐོབ་པ་ཡིན་ལ། དེ་ལྟར་ཚུལ་བཞིན་ཉམས་སུ་བླངས་ན་ཞི་ལྷག་ཟུང་དུ་འབྲེལ་བའི་ཏིང་འཛིན་ཤེས་རབ་ཀྱིས་རལ་གྲི་རྣོན་པོས་སྤང་བྱ་སྒྲིབ་གཉིས་ཀྱི་གཡུལ་ངོ་རིམ་གྱིས་བཅོམ་ནས་སྐུ་བཞིའི་རྒྱལ་ཐབས་ཆེན་པོ་མངོན་དུ་བྱས་ཏེ་ནམ་མཁའ་ཇི་སྲིད་བར་འགྲོ་བའི་རེ་བ་སྐོང་བའི་འཕྲིན་ལས་ལྷུན་གྲུབ་རྒྱུན་མི་ཆད་པ་འབྱུང་བ་ཡིན་ནོ། བསླབ་པ་ནོད་པའི་དགེ་སློང་དག ། དབེན་པ་དག་ཀྱང་ཐོབ་པར་ཤོག ། གཡེང་བ་ཐམས་ཅད་སྤང་ནས་ནི། ། སེམས་ནི་ལས་རུང་སྒོམ་གྱུར་ཅིག ། འདི་ལྟར་པིར་བྲིས་ལས་བྱུང་དགེ་བ་དེས། ། ཀུན་གྱི་སེམས་གནས་དོན་འདི་རྟོགས་གྱུར་ཏེ། ། འཁོར་བའི་རྒྱ་མཚོ་ཆེ་ལས་མྱུར་ཐར་ཏེ། ། བླ་མེད་བྱང་ཆུབ་གོ་འཕང་ཐོབ་པར་ཤོག།།

 རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ།


དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། if7l བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
6350327
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།