གུང་ཐང་བསྟན་པའི་སྒྲོན་མེས་མཛད།

      གང་ལ་བརྟེན་ན་ནམ་ཡང་མི་བསླུ་ཞིང་།  །   བཀའ་བཞིན་སྒྲུབ་ན་འདོད་དགུའི་མཆོག་སྩོལ་བ། །   པད་དཀར་ལྟར་བསྔགས་ཐུབ་པའི་དབང་པོ་ལ།  །  དད་པའི་དངོས་ཀུན་གྱིས་ཕྱག་བགྱིའོ།།   རྒྱལ་བསྟན་སྙིང་པོ་ཟབ་དང་རྒྱ་ཆེ་བའི།། གནད་ཀུན་ཀུན་ཚུལ་ཁྲིམས་རྣམ་པར་དག་པའི་གཞིར ། །ལེགས་པར་བསྐྲུན་པའི་ལམ་གྱི་སྲོག་འཛིན་པ། །  འཇམ་མགོན་ཡབ་སྲས་བརྒྱུད་པར་བཅས་ལ་འདུད།  །   དུག་གསུམ་ནད་ཀྱི་གདུང་སེལ་ཨ་མྲི་ཏ།  །  མངོན་མཐོ་ངེ་ལེགས་ཡོན་ཏན་ཀུན་གྱི་གཞི།  །  བསྟན་པའི་རྩ་བ་སྟོན་པའི་གདུང་འཚོབ་མཆོག  །   ཉེས་ལྟུང་རྙོག་མས་དབེན་པའི་ཁྲིམསའདི་ཡིན། །  དེ་སླད་ཚུལ་ཁྲིམས་་དག་སྲུངས་ཤིག་ཅེས།   ། འདོམས་པ་འདི་ནི་གདམས་པའི་ཡང་རྩེ་དང་།  ། རང་སེམས་ཆོས་འདུལ་སྲོལ་དུ་བཙུད་པ་ནི།། བསྟན་པའི་བྱ་བ་ཀུན་གྱི་རབ་དང་ཕུལ།  ། མི་ཤིས་ལྟུང་བ་འབྱུང་བའི་སྒོར་གསུང་ཡང་།  ། ད་ལྟ་ལུང་གི་ལེའུའི་མཐར་སོན་པས། །  ཤས་ཆེར་མ་གུས་པ་དང་བག་མེད་པས།  ། བསམ་བཞིན་བསྟན་ལ་རང་དགར་སྤྱོད་པ་མཐོང་།། དགག་སྒྲུབ་གནང་གསུམ་ལྟུང་བ་ན་སྨད་སོགས། །  སྡོམ་དང་གཞིས་བསྡུས་བཅས་མཚམས་མ་ལུས་པ། ། ལྷུག་ལྷུག་བཤད་པའི་རླབས་ཕྲེང་ཆེར་གསལ་ཡང་།།  གཏིང་མཐའ་ཉེས་ལྟུང་འདམ་གྱིས་གང་འདིས་སྐྱོ། །  སྔོན་བྱོན་དམ་པ་རྣམས་ཀྱིས་མཛད་པ་ཡི  །  །  བསླབ་བྱ་གླང་ཆེན་རྒྱབ་ཁལ་ལོང་ན་ཡང་། སྙིགས་དུས་སྐྱེ་བོའི་དོན་དུ་མི་འགྱུར་བ།  །སློབ་པའི་འདུན་པ་གཞི་ནས་སྟོར་བས་ནོངས།  །  གླེང་གཞི་འདི་ཡིས་འདི་ལྟར་བཀགག་གོ་ཞེས། །གསལ་བར་སྒྲོག་བཞིན་རང་གི་སྤྱོད་པ་ནི།།  སྙིགས་མ་བདོ་བའི་དམག་གི་རུ་འདྲེན་རྣམས།།  རྒྱལ་བའི་བསྟན་ལ་ངོ་རྒོལ་བྱེད་པ་འདྲ།  །  ཤེས་བཞིན་ཁྱེད་དུ་གསོད་པས་རབ་ཞུགས་ན།   །  བཅས་རྐྱང་ཕྲ་མོར་འགལ་བའི་གཞི་ལས་ཀྱང་།  །  བདེ་གཤེགས་བཀའ་འདས་རྩ་ལྟུང་བསྐྱེད་པ་ཡིས།  ། བཟོད་དཀའ་རྡོ་རྗེ་དམྱལ་བའི་སྒོ་འཕར་འབྱེད།།  དེ་ཕྱིར་དམ་པའི་གསུང་རབ་སྔ་མ་ལ།  ། བྲི་བསྣན་སྦྱོར་བས་རྩོམ་གྱི་ཁུར་འཛིན་པ།  ། རང་ཉིད་ངལ་བ་འབྲས་བུར་ཟད་པའི་ཕྱིར།། དེ་བས་བསླབ་བྱ་སྣ་གཅིག་བསྲུང་བ་གཅེས། ། ནམ་ཞིག་འདི་སྣང་བསླུ་བའི་ མཚང་རིག་ཅིང་། །  ངན་སོང་སྡུག་བསྔལ་ཚུལ་ལ་སྙིང་ནས་འཇིགས།།  ལས་འབྲས་བསླུ་བ་མེད་པར་ཡིད་ཆེས་ན།། རྒྱལ་དང་དེ་ཡི་བཅས་པར་གུས་པ་སྐྱེ། །   དེ་ལྟར་བསྐུལ་མ་ནང་ནས་ཐེབས་པ་ཡིས། ། ངེས་འབྱུང་ཤུགས་ཀྱི་སློབ་འདུན་སྐྱེས་པ་ན། ། འདུལ་བའི་གཞུང་ཀུན་གདམས་པར་ངེས་འཆར་བས།  །  བསླབ་བྱས་ནམ་ཡང་ཕོངས་པར་མི་འགྱུར་རོ།། དེས་ན་ཐོག་མ་ཁོ་ནར་འདི་སྙམ་དུ། །  རྒྱལ་བ་ས།ས་བཅས་དཔང་དུ་ལེགས་བཞག་སྟེ།  །  མཁན་སློབ་དགེ་འདུན་བཅས་པའི་སྤྱན་སྔ་རུ། །  བསླབ་བྱའི་གནས་ཀུན་བསྲུང་བར་དམ་བཅས་ཀྱང་།  ། རང་གི་སྒོ་གསུམ་བག་མེད་གྱུར་པ་འདིས།  །  ཐེག་གསུམ་ཐར་པའི་གོ་འཕང་སྨོས་ཅི་དགོས། །  མངོན་མཐོའི་སྒྲ་ཡང་ཐོས་པར་མི་འགྱུར་སྙམ།  ། སྔར་བྱས་ལས་ལ་འགྱོད་པ་ཤུགས་དྲག་བསྐྱེད།། ད་ནི་ཚེ་ལྷག་ཅི་ཙམ་ཡོད་པ་འདིར།  །  བདུད་ཀྱི་གཡབ་མོའི་རྗེས་སུ་མི་འབྲང་བར། །   ཉམས་ལེན་སྙིང་པོ་ཁྲིམས་ཀྱི་བླང་དོར་ལ།  ། ཆིག་དྲིལ་འབད་སྙམ་དམ་བཅའ་ཡང་ཡང་བྱ།  ། ཐོས་བསམ་ལ་སོགས་སྒོ་གསུམ་བྱ་བ་ཀུན། །   འཁྱག་སྟེང་ཆུ་བཞིན་འཁོར་བའི་ཁ་འཛིན་དུ།།  མི་གཏོང་རང་རྒྱུད་འདིལ་ཕྱིར་སྦྱོར་བ་ནི། །  གཏན་འདུན་འཕྱུག་མེད་གྲོས་ཀྱི་ཡང་རྩེ་ཡིན།  །  དེ་ལྟར་སྒྲུབ་ན་ཐར་པའི་གོ་འཕང་ཞེས། ། ཕ་རོལ་རྒྱང་རིང་ལྟ་བུར་གྲགས་དེ་ཡང་།  །རང་གི་ལག་པའི་རྩེ་མོར་གནས་པའི་ཕྱིར།  །   དེ་འདྲ་དེ་ལ་དལ་འབྱོར་དོན་ལྡན་ཟེར  །   ། གསལ་ཞིང་རྣོ་བའི་བློ་དང་བརྩོན་པའི་དཔུང་།   ། འཇིགས་མེད་སྙིང་སྟོབས་ལ་སོགས་མཛངས་རྟུལ་ཕོད་དཔའ་བོ་ཡིན།།དམ་ཆོས་མ་བྱུང་སྡུག་སྐད་འདོན་པའི་མི། །  མང་དུ་སྣང་ཡང་རྩ་བ་རང་རང་གིས ། །  མ་བྱས་པ་ལ་འབྱུང་བའི་ཐབས་མེད་ཀྱི། །   བྱས་ནས་མ་བྱུང་བ་ནི་འགའ་ཡང་མེད།  །  མདོར་ན་མང་དུ་སྨོས་ལྟ་ཅི་ཞིག་འཚལ །  །   རང་གི་རྒྱུད་ལ་སྐོར་ནས་ལེགས་བརྟགས་ཚེ། །  སྙིང་ནས་ཆོས་ལ་དོན་གཉེར་བློ་སྐྱེས་ན།  །   དེ་ཡི་ལེགས་ཚོགས་རྩ་བ་ཚུགས་པ་ཡིན།  །  དེ་སླདབསླབ་བྱའི་སྙིང་བོ་མདོར་བསྡུས་པ། ། སློབ་པའི་མདུན་པ་བསྐྱེད་པ་འདི་ཡིན་པས།།  སྐྱིད་སྡུག་འདམ་ཀའི་དབང་ཡོད་གནས་སྐབས་འདིར།།  རང་གིས་རང་ལ་བརྩེ་བ་མ་དོར་ཞིག།    འདི་ལྟར་བསྙད་པ་ལས་བྱུང་རྣམ་དཀར་དགེ  །  སྟོན་ཟླའི་མཛེས་པ་དམན་པར་བྱེད་པ་དེས།  ། ལུས་ཅན་ཡིད་ཀྱི་མུན་པ་ཀུན་བསལ་ནས།  །  རྣམ་གྲོལ་ཀུན་དའི་དགའ་ཚལ་རྒྱས་གྱུར་ཅིག  །   ཅེས་པ་འདི་ནི་མཐོ་རིས་ཡོན་ཏན་བདུན་གྱིས་མངོན་པར་མཐོ་བ་ཧར་ཆེན་ཝང་གི་ཐོ་ཡོན་དྷརྨ་ཀིརྟིས་འདུལ་བའི་བསླབ་བྱ་ཞིག་དགོས་ཚུལ་བྱུང་ཡང་སྤྱིར་རྗེ་བདག་ཉིད་ཆེན་པོ།  འདུལ་འཛིན  །  སྤྱན་སྔ་པ།   པཎ་ཆེན །   ཡོངས་འཛིན་ཡེ་ཤེས་རྒྱལ་མཚན་སོགས་ཀྱིས་མཛད་པའི་བསླབ་བྱ་རྒྱས་བསྡུས་ཅི་འདྲ་ཞིག་དགོས་ཀྱང་འདུག་པ་ཤེས་གསལ་དུ་བྲི་མི་དགོས་ལ།   ལྷག་པར་དེང་དུས་བསླབ་བྱ་ལྟ་བ་རྣམས་ཀྱིས་རྒྱུའི་འདུན་པ་ཞིག་གཞི་ནས་མ་སྐྱེས་པས་ལན་འདུག་སྟབས།  སྡེ་ལྔའི་ངོས་འཛིན་སོགས་མ་སྤྲོས་པར།   སློབ་འདོད་རྣལ་མ་ཞིག་སྐྱེད་དགོས་ཚུལ་མདོར་བསྡུས་ཏེ།   བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །   དགེའོ ། །