དེ་ནི་གདུགས་དང་། གསེར་ཉ། པདྨ། དུང་དཀར། བུམ་པ། དཔལ་བེའུ། རྒྱལ་མཚན། འཁོར་ལོ་བཅས་ལ་ཟེར་ཞིང་།དེ་དག་གི་མཚོན་དོན་ནི་ཚངས་པ་ལ་སོགས་པས་སངས་རྒྱས་ལ་ཕུལ་བ་དང་། སངས་རྒྱས་རང་གི་སྐུ་ལ་དབུ་གདུགས་ལྟར་དུ་ཡོད་པ་སོགས་བསོད་ནམས་དང་ཡེ་ཤེས་ཀྱི་རང་རྩལ་ལས་སོ་སོའི་མཚན་མ་མངོན་པའི་གདུགས་ཀྱིས་རང་གཞན་སེམས་ཅན་ཐམས་ཅད་ཉོན་མོངས་པའི་ཚ་གདུང་ལས་སྐྱོབ་པ་དང་།ཤེས་རབ་དང་ཡེ་ཤེས་ཀྱི་སྤྱན་གྱི་མཚོན་བྱེད་གསེར་ཉ་གཡུའི་འདབ་གཤོག་ཅན། ། མིག་འབྲས་སྒོར་ཞིང་འོད་འཁྱུག་པ། མཁྱེན་ཞིང་ལྕུག་པའི་ཉམས་འགྱུར་ཅི་ཡང་མངོན་ཞིང་སྐྱེས་བོ་ཀུན་ལ་ཤེས་རབ་ཀྱི་མིག་སྦྱིན་པར་བྱེད་པ་དང་།པདྨ་ལ་ཆུ་མི་ཆགས་པ་ལྟར་འཁོར་བ་ལ་གནས་ཀྱང་འཁོར་བའི་སྐྱོན་་གྱིས་མི་གོས་ཤིང་ཚེ་རབས་ཀུན་ལ་རྫུན་སྤངསཔས་ལྗགས་པདྨ་ལྟ་བུ་ཐོབ་པ་དང་།བྱང་ཆུབ་སེམས་དཔའ་གཞན་དོན་དུ་སྐྱེ་བ་བཟུང་བའི་ཆོས་དུང་གཡས་སུ་འཁྱིལ་བས་དམ་པའི་ཆོས་ཀྱི་སྒྲ་དབྱང་སྒྲོག་པ་དང་།བུམ་པ་འཆི་མེད་དུ་བདུད་རྩིའི་བཅུད་ཀྱིས་བཀང་བ་ལྟར་རང་རྒྱུད་ཆོས་ཀྱིས་བཀང་ནས་གདུལ་བྱའི་རྒྱུད་ཚིམས་པ་དང་། དཔལ་བེའུས་སངས་རྒྱས་ཀྱི་ཐོག་མཐའ་མེད་པ་གཏིང་དཔག་དཀའ་བའི་སྟོབས་རང་རྒྱུད་ལ་ཐོབ་པ་དང་།རྒྱལ་མཚན་གྱིས་ཕས་ཀྱི་རྒོལ་བ་དང་མི་མཐུན་ཕྱོགས་ལས་རྣམ་པར་རྒྱལ་བ་མཚོན་པ་དང་། འཁོར་ལོས་སྲིད་པའི་དྲ་བ་ཉོན་མོངས་པའི་རང་བཞིན་ཅན་རྩད་ནས་གཅོད་ཅིང་ཕ་རོལ་གྱི་རྒོལ་བ་ཐམས་ཅད་ཟིལ་གྱིས་གནོན་པར་བྱེད་པ་དང་རང་གི་དཔལ་དང་ལོངས་སྤྱོད་སྙན་གྲགས་དང་དབང་ཐང་ཐམས་ཅད་བསྐྱེད་པ་བཅས་ཐེག་གསུམ་ཆོས་ཀྱི་འཁོར་ལོ་བསྐོར་བ་མཚོན་པའོ།།

རྩོམ་ཁུངས། བོད་ཀྱི་དགོན་སྡེའི་རིག་གནས་སྤྱི་བཤད་མེ་ཏོག་ཕྲེང་བ 》 ཡིན།