དེ་ཡང་ཟབ་མོ་དབུ་མའི་སྲོལ་འབྱེད་འཕགས་པ་ཀླུ་སྒྲུབ་ཀྱི་དབུ་མ་རྩ་ཤེས་སོགས་བསྟན་པ་སྔ་དར་གྱི་སྐབས་སུ་ལོ་ཙཱ་བ་སྐ་ཅོག་ཞང་གསུམ་གྱིས་ཐོག་མར་བོད་དུ་དྲངས་ནས་འཆད་ཉན་སྤེལ་གསུམ་གྱི་དབུ་བརྩམས་ཏེ་དེང་གི་བར་ལོ་པཎ་གསེར་རིའི་ཕྲེང་བ་བྱོན་པ་རྣམས་ནས་ཕྱོགས་འདི་ལ་བྱས་རྗེས་རང་སོ་སོའི་ནུས་པ་ལྟར་བཞག་ཡོད་པ་ནི་ཟབ་མོ་དབུ་མའི་ལུགས་བཟང་གངས་ཅན་ལྗོངས་སུ་བྱུང་འཕེལ་གྱི་ལོ་རྒྱུས་ལ་ཕྱི་མིག་ཅིག་བལྟས་པ་ལས་གསལ་ལེར་ཤེས་ཐུབ།    དེ་དག་ལས་ལོ་ཙཱ་བ་ཆེན་པོ་པཱ་ཚབ་ཉི་མ་གྲགས་པས་དཔལ་ལྡན་ཟླ་བ་གྲགས་པའི་དབུ་མ་ལ་འཇུག་པ་སོགས་ཐལ་འགྱུར་བའི་གཞུང་ལུགས་བསྒྱུར་ཅིང་ཞུས་ཏེ་གཏན་ལ་ཕབ་རྗེས་འཁོར་སློབ་ཀྱི་རྒྱ་མཚོ་བསྐྱངས་ཤིང་།   ཚིག་ལ་མཁས་པ་དར་ཡོན་ཏན་གྲགས།    དོན་ལ་མཁས་པ་གཙང་པ་ས་སྦོས།   གཉིས་ཀ་ལ་མཁས་པ་རྨ་བྱ་བྱང་ཡེ།   གཉིས་ཀ་ལ་མི་མཁས་པ་ཞང་ཐང་ཟག་པ་ཞེས་བུ་ཆེན་བཞི་བྱོན་ཏེ་སྙན་པའི་གྲགས་ཕྱོགས་བཅུར་འབར་བ་བྱུང་།   དེ་ནས་སློབ་བརྒྱུད་དེ་དག་ལས་མཆེད་པའི་ཐལ་འགྱུར་བའི་འཆད་ཉན་གྱི་ལུགས་འདྲ་མིན་སྣ་ཚོགས་རྒྱ་མཚོ་ཆེན་པོའི་ཀློང་བརྡོལ་བ་ལྟ་བུ་སྟེ།   རྨ་བྱ་བྱང་བརྩོན་ནས་མཆེད་པའི་སློབ་བརྒྱུད་ལས་བུ་སྟོན་རིན་ཆེན་གྲུབ་དང་རེད་མདའ་བ་གཞོན་ནུ་བློ་གྲོས།   ཡར་འབྲོག་པ་རིན་ཆེན་ཏོག     རྗེ་ཙོང་ཁ་པ་བློ་བཟང་གྲགས་པ་སོགས་བྱོན་ཞིང་།   ཞང་ཐང་ཟག་པ་ལས་རོང་སྟོན་ཤེས་བྱ་ཀུན་ཁྱབ་དང་སྟག་ལོ་ཤེས་རབ་རིན་ཆེན།   གསེར་མདོག་པཎ་ཆེན་ཤཱཀྱ་མཆོག་ལྡན།   གོོ་རམས་བསོད་ནམས་སེང་གེ་སོགས་ཟབ་མོ་དབུ་མ་ལས་ཐལ་འགྱུར་ལུགས་བཟང་འཆད་ཉན་སྤེལ་གསུམ་ལ་བྱས་རྗེས་བླ་ལྷག་བཞག་པའི་མཁས་པ་ཚབ་མཚོན་རང་བཞིན་ཅན་དེ་རྣམས་བྱོན་པས།    གངས་ཅན་གྱི་ས་དགེ་བཀའ་རྙིང་སོགས་གྲུབ་མཐའ་རིས་མེད་ཀྱིས་ལྟ་སྤྱོད་གཉིས་ལས་ལྟ་བ་ནི་རྨད་དུ་བྱུང་བ་དཔལ་འཕགས་པ་ཀླུ་ཡི་དབང་པོ་ཁུངས་སུ་བཅོལ་བ་འདི་ཀོ་བྱུང་།    ཟབ་མོ་དབུ་མ་འཆད་སྤེལ་གྱི་ཁྲོད་མཁས་པ་སོ་སོ་ནས་གདུལ་བྱའི་བློ་ཡི་ཁྱད་པར་ལ་བསྟུན།   དོན་གྱི་གནད་ཁྲོལ་བ་ལ་རྩལ་འདོན་ལུགས་མི་འདྲ་བའི་དབང་གིས་ཐ་སྙད་ཀྱི་ཞལ་བཞེས་ཅུང་ཟད་མི་འདྲ་བ་བྱུང་མོད།   མཐར་ཐུག་གི་དགོངས་པ་དབུ་མ་ཆེན་པོ་སྤྲོས་བྲལ་མཉམ་པ་ཉིད་དུ་དབྱེ་བསྲི་མེད་པར་གཅིག་ཏུ་གཞོལ་ཞིང་འབབ་པའོ།།

      སྤྱིར་སྟོང་ཉིད་སྨྲ་བའི་ཁྱུ་མཆོག་ཙོང་ཁ་པ་ཞེས་གངས་ལྗོངས་གྲུབ་མཐའ་རིས་མེད་ཤེས་ནས་སྨྲ་བ་ཀུན་གྱིས་མགྲིན་གཅིག་ཏུ་བརྗོད་ལ།   དོན་དུའང་དེ་ལྟར་ཡིན་ངེས་ཏེ།   རྗེ་བདག་ཉིད་ཆེན་པོ་འདི་པའི་ལྟ་གྲུབ་ནི་ཆོས་རྗེ་དོན་གྲུབ་རིན་ཆེན།   རྗེ་བཙུན་རེད་མདའ་བ།   བླ་མ་དབུ་མ་པ།    ལྷོ་བྲག་ནམ་མཁའ་རྒྱལ་མཚན།   སྐྱབས་ཆེན་ལོ་ཆེན་དཔལ་བཟང་སོགས་སྐབས་དེའི་ཡུལ་གངས་ཅན་གྱི་གྲུབ་མཐའ་རིས་མེད་ཀྱི་གཞུང་ལུགས་རབ་འབྱམས་སྨྲ་བ་སྔ་གཞུག་བཞི་བཅུར་ཉེ་བ་གུས་པས་རྩེ་གཅིག་ཏུ་བསྟེན་ཏེ་བྱུང་བ་ལགས་པས།   དེ་སྔོན་གྲུབ་མཐའ་རིས་མེད་ཀྱི་ལེགས་པའི་སྙིང་བཅུད་འདུས་ཡོད་པ་སྨོས་མེད་ཡིན་སྟབས་གངས་ཅན་ན་མངོན་པར་མཐོ་བ་ཡིན་མོད།   འོན་ཏེ་གདུལ་བྱ་བློ་ཡི་མོས་པ་སྣ་ཚོགས་ལ་གང་ལ་གང་འཚམས་དེ་ལ་དེ་བསྟུན་གྱི་ཚུལ་དུ་སོང་བས་གྲུབ་མཐའ་གཞན་དག་ཀྱང་རང་སོ་སོའི་ཐུན་མིན་གྱི་ཁྱད་ཆོས་རེ་ཡོད་པས་མཐའ་གཅིག་ཏུ་འདི་ནི་མཆོག་འདི་ནི་དམན་ནོ་ཞེས་པའི་ཤན་འབྱེད་དུ་མེད་ལ་གཅིག་ཚབ་གཅིག་གིས་ཀྱང་བྱེད་ག་ལ་ཐུབ་སྙམ་མོ།   གལ་སྲིད་ཕན་ཚུན་རིགས་པའི་བགྲོ་གླེང་བྱེད་དུས་གྲུབ་མཐའི་ལ་རྒྱའི་ཤན་ངན་མི་ཞུགས་ལ།   མཐའ་གཅིག་ཏུ་རང་ལྟ་མཆོག་འཛིན་གྱིས་གཞན་ཕྱོགས་ལ་ལྟ་ངན་ལྟ་ལོག་ཆོས་ལོག་སོགས་ཀྱི་ཚིག་གིས་དམོད་པར་མི་བྱེད་པར་ངོ་མཚར་བའི་ལུང་རིགས་ཀྱི་འཕྲུལ་འཁོར་སྐོར་བ་ཞིག་ཡིན་ན།   ཆོས་ལུགས་པ་ཞིག་གི་ངོར་དེ་ནི་རང་བཞིན་གྱི་ཁ་ཏོན་དགེ་སྦྱོར་གང་གིས་ཀྱང་འགྲན་མི་ནུས་པའི་རླབས་ཆེན་གྱི་ཚོགས་བསགས་ཡིན་ལ།   རིག་གནས་འཛུགས་སྐྲུན་གྱི་ལས་ལ་གཞོལ་བའི་འཇིག་རྟེན་པའི་ངོར་དེ་ནི་མེ་ཏོག་མཉམ་བཞད།   མཁས་བརྒྱ་འགྲན་གླེང་གི་རྣམ་པ་སྟེ་རིག་གནས་གོང་འཕེལ་དུ་འགྲོ་བཞིན་པའི་དན་རྟགས་རྣལ་མ་ཡིན་ནོ།།

     དེ་བཞིན་སྐབས་སུ་བབ་པ་གླེང་བར་བྱ་བའི་གཞི་དགེ་ཆོས་ཀྱི་ཀླུ་སྒྲུབ་དགོངས་རྒྱན་དུ་ཟབ་མོ་དབུ་མའི་དཀའ་གནད་སྐོར་ཞིག་སྟེ།   ཐ་སྙད་ཚད་གྲུབ་འདོད་མིན།   དབུ་མ་བ་ལ་ཁས་ལེན་ཡོད་མེད།   བདེན་གཉིས་གང་གཞི་གཙོ་བོ་འཛིན་པ་སོགས་ཀྱི་ཐད་ལ་གྲགས་པའི་རྗེས་སུ་མ་འབྲང་བར་རང་གི་དཔྱད་སྟོབས་རིགས་པས་ཕྲ་ཞིང་ཞིབ་པར་འཇུག་པ་བྱས་ཏེ་བོད་སྔ་རབས་དང་ཕྱི་རབས་གང་གི་ལུགས་ལའང་སྔ་རྒོལ་དུ་དམིགས་སུ་མ་བཟུང་བར་དོགས་པ་བསླང་བའི་ཚུལ་གྱིས་རང་ལུགས་ཤུགས་ནས་བཞག་སྟེ་བརྗོད་ཅིང་།  ཐ་སྙད་ཚད་མས་གྲུབ་མིན་དང་དབུ་མ་བ་ལ་ཁས་ལེན་ཡོད་མེད་སྐོར་ལ་དངོས་སྟོབས་རིགས་པའི་རྗེས་སུ་འབྲངས་ཏེ་སྔ་རབས་ལུགས་འཛིན་གོོ་རམས་པའི་ལྟ་བ་འཐད་ཕྱོགས་སུ་དམིགས་ཤིང་རྗེ་བློ་བཟང་གྲགས་པའི་ལུགས་འཛིན་གྱི་མཁས་པ་དག་གི་དགོངས་པ་ལ་ཅུང་ཟུར་ཟའི་ཚུལ་དུ་སོང་བས་རྗེ་ཤེས་རབ་རྒྱ་མཚོ་ནས་ཀླུ་སྒྲུབ་དགོངས་རྒྱན་ལ་ཆེ་ལོང་དུ་བརྟགས་པ་མི་འཇིགས་སེང་གེའི་ང་རོ་ཞེས་པའི་དགག་ཡིག་བརྩམས་ཏེ་སུན་འབྱིན་མཛད།   ལར་མི་འཇིགས་སེང་གེའི་ང་རོ་ལྟ་བུ་བརྒལ་བརྟག་གི་གཞུང་འདི་རྒྱབ་རྫོང་གི་ལུང་དང་།   གོ་བ་ཆུ་ཐུབ་ཀྱི་རིགས་པ་སོགས་ཕྱོགས་གང་ནས་གཞིགས་ཀྱང་རྗེ་རིན་པོ་ཆེའི་ལྟ་གྲུབ་གསལ་ཁ་བཏོན་པའི་གཞུང་བཟང་རིན་ཆེན་དང་པོའི་གཤིས་སུ་སོང་བས་དགེ་ལྡན་ལུགས་བཟང་འཛིན་པའི་སྐྱེས་བུ་ལྟ་ཅི།   གངས་ལྗོངས་རྒྱལ་བསྟན་རིས་མེད་ཀྱི་གཟུར་གནས་མཁས་དབང་རྣམས་ཀྱིས་ཀྱང་ཨེ་མ་ཧོ་ཞེས་བསྟོད་སྤྲིན་ཕུལ་བའི་གནས་སུ་སོང་མོད།   འོན་ཏེ་གཞུང་དེ་ཉིད་དུ་སྔ་རྒོལ་ལ་ལྟ་ལོག་པ།   ཆད་ལྟ་བ།   སྨྱོན་པ།    འཆལ་པོ་སོགས་ཚིག་གི་དུག་མདའ་མང་པོ་འཕངས་ཤིང་།   ཉག་རོང་རོང་དགུའི་ཕུལ་དུ་བརྗིད་མོད་ཀྱི།།    ལ་ལས་ལས་འབྲས་མེད་པར་སྨྲ་འདི་ནོངས།།   ཟླ་གྲགས་བ་འཇོ་ཀུན་བཟང་ལྷུན་པོ་ཡང་།།   དགེ་མིང་བདུད་འདུན་ཆོས་མིན་འཕེལ་བས་སྨད།།   ཅེས་པ་ལྟ་བུ་རྩོམ་གྱི་ཉམས་ཧ་ཅང་ཆེ་བའི་ཤོ་ལོ་ཀ་མང་པོ་བར་སྐབས་སུ་བཅུག་སྟེ་ངན་དམོད་མང་པོ་བྱས་པ་ནི་སྤྱིར་ཅོལ་ཆུང་བྱིས་པ་དེའི་རྗེས་སུ་འབྲང་བར་དོགས་ནས་དགོངས་གཞི་དགོས་པ་ཅན་གྱི་གཏམ་དུ་སོང་བ་ཡིན་ཀྱང་སྲིད་རུང་།   ཉི་མ་ཤར་རིའི་ཕྲག་ནས་འཕགས་ཚེ་ལག་པས་མི་ཁེབས་པའི་དཔེ་བཞིན་གཟུར་གནས་རྟོག་གེ་རིགས་པའི་བརྒལ་བརྟག་གི་གླིང་དུ་ཚུལ་དེ་ཧ་ཅང་ངན་ཐལ་དུ་སོང་བས་ཕྱིས་བྱོན་པའི་མདུན་དུ་ངམ་ངམ་ཤུགས་ཀྱིས་ངན་དཔེ་ཞིག་ཀྱང་བཟོས་སོང་སྙམ་སྟེ།   ཆོས་ལ་མི་རྟོན་གང་ཟག་ལ་རྟོན་པའི་ཚུལ་གྱིས་དགེ་ཆོས་ཀྱི་ཐུན་མོང་སྣང་ངོའི་བྱ་སྤྱོད་ལ་དམོད་པའི་ཆ་ནས་ཁོང་གི་བརྩམས་ཆོས་ནང་གི་གཟི་འོད་རབ་ཏུ་འཕྲོ་བའི་རྟོག་གེ་རིགས་པའི་འོད་རླབས་དང་རིག་གནས་ལ་དཔྱད་པ་ལྷུར་ལེན་པའི་ཐབས་ལམ་མ་རྨད་དེ་ཉིད་མོག་པོར་བྱས་པ་ནི་ཕྱོགས་གང་ནས་དམིགས་ཀྱང་མི་འོས་པ་ཞིག་ཡིན་ལ།   ཁ་ཕྱི་ལྟོས་སུ་དཔྱད་ན་ཚུལ་དེས་མི་འཇིགས་སེང་གེའི་ང་རོ་ཞེས་པ་རང་གཞུང་ཡང་གཡའ་ཡིས་སྒྲིབ་པའི་གསེར་རྡོག་ཏུ་སོང་སྟེ་གངས་ལྗོངས་རིས་མེད་ཤེས་ནས་སྨྲ་བའི་སྣང་ངོར་དེ་ཡི་གཟི་བྱིན་ཇི་བཞིན་འཕྲོ་མི་ཐུབ་པས་ཡིད་ཕངས་དགོས་པའི་གནས་སོ།   དེ་བཞིན་ཀླུ་སྒྲུབ་དགོངས་རྒྱན་ལ་དགག་པ་གཏོང་བའི་དེང་གི་གསར་བྱུང་བརྩམས་ཆོས་དག་ཀྱང་སྤྱིར་རྩོད་སྒྲུབ་རིགས་པའི་བརྒལ་བརྟག་ཏུ་སོང་བས་ཚད་མཐོ་དམན་གང་ཡིན་ཡང་རུང་དེ་བསྟུན་གྱི་རིན་ཐང་ཞིག་ཡོད་ངེས་མོད་ཀྱང་།   ཕལ་མོ་ཆེ་རྩོམ་གྱི་འཇུག་པ་ཐོག་མ་ཉིད་ནས་ཕ་རོལ་པོ་ལ་ལྟ་ངན་རྒོལ་ངན་ཞེས་པ་ངན་རྟོག་གིས་དྲངས་པའི་ཚིག་འཆལ་དང་གཞན་ལ་སྤ་བཀོང་བའི་རྫིགས་ཉམས་ཀྱིས་བརྗོད་པར་བྱས་པས་སྔ་རྒོལ་ལྟ་ཅི།   གཟུར་གནས་ཀུན་གྱི་ཡི་གར་མི་འོང་བར་བྱས་འདུག་པས་དོན་གྱི་རིན་ཐང་དེ་ཉིད་ཀྱང་སྒྲིབ་སོང་བ་ནི་བློ་ཕམ་དགོས་པའི་གནས་ཤིག་ཡིན་སྙམ།  འདི་ལ་དམིགས་ན་གོོ་རམས་པས་ལྟ་བའི་ཤན་འབྱེད་ཐེག་མཆོག་གནད་ཀྱི་ཟླ་ཟེར་ནང་དུ།   རྗེ་ཙོང་ཁ་པའི་ལྟ་དགོངས་ལ་མི་འཐད་ཚུལ་བརྗོད་སྐབས་ཐོག་མ་ཉིད་དུ་ལེགས་པར་དཔྱོད་པའི་བློ་གྲོས་ཀྱིས་གསུང་རབ་ཀྱི་དགོངས་པ་རང་སྟོབས་ཀྱིས་འགྲེལ་ཞིང་སྙིང་རྗེ་དང་སེམས་བསྐྱེད་ལ་སོགས་པའི་ཡོན་ཏན་གྱི་རྒྱན་གྱིས་མཛེས་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱི་ཞལ་སྔ་ནས་ཞེས་ཆེ་བརྗོད་ཀྱི་མཚན་ནས་དྲངས་ཏེ་ལུང་རིགས་ཀྱི་དཔྱད་པར་འཇུག་ཅིང་མཇུག་བསྡུ་སྐབས་ཀྱང་།  རྩོད་འདོད་རྒོལ་བ་ཡོད་ན་ཟླ་བ་ཡི།།    འགྲེལ་ཆེན་གསུམ་པོ་དཔང་པོར་བྱས་ནས་ནི།།   རྩོད་པར་བགྱི་ཡི་མདུན་དུ་ལྷགས་པར་གྱིས།།   དེ་ལྟར་མིན་པ་དེང་སང་བྱིས་པ་ཡི།།  མགོ་བོ་སྐོར་བའི་ཚིག་གི་ཟེར་ཟློས་ལ།།   ཁོ་བོ་རྩོད་པ་དག་ནི་མི་བགྱི་སྟེ།།  འཇིག་རྟེན་བྱ་བ་སྙིང་པོ་མེད་ཕྱིར་རོ།།   ངན་རྟོག་རླུང་གིས་བློ་གྲོས་མ་དཀྲུགས་པར།།   གནས་ལུགས་འཁྲུལ་མེད་ཇི་བཞིན་རྟོགས་འདོད་ན།།   ཞེས་པ་སོགས་རིགས་པའི་བགྲོ་གླེང་རྣལ་མ་ལས་ཆགས་སྡང་གིས་རང་རྒྱུད་མ་བསླད་པ་ནི་ཇི་འདྲའི་ལེགས་པ་ལ་ཨང་།    དེས་ན།   གཞོན་སྐྱེས་རྣམས་ནས་སྤྱིར་རིགས་པའི་བརྒལ་བརྟག་ནི་རིག་གནས་དར་བའི་གསོས་སུ་དམིགས་ནས་རྗེས་སུ་ཡི་རངས་བྱེད་ཅིང་རང་ཡང་དེ་ལྟ་བུར་ཞུགས་དགོས་མོད།   འོན་ཏང་རང་གི་གྲགས་འདོད་སོགས་ངན་རྟོག་གིས་དྲངས་པའི་གཞུང་ལུགས་ཀྱི་བགྲོ་གླེང་ནི་ནམ་ཞིག་མཐུན་སྒྲིལ་གྱི་གཤེད་དུ་གྱུར་པས་དོགས་ཟོན་བྱེད་དགོས་པའི་གནས་སུ་ཤེས་པར་བྱའོ།།

གཉིས།    ཐ་སྙད་ཚད་གྲུབ་མི་བཞེད་པའི་སྐོར།

    དེ་ཡང་བོད་སྔ་རབས་ཀྱི་ལུགས་སུ་སོང་བའི་ཐ་སྙད་ཚད་གྲུབ་མི་བཞེད་པའི་ལྟ་དགོངས་འདི་ཀོ་ཕྱིས་བྱོན་སྟོང་ཉིད་སྨྲ་བའི་ཁྱུ་མཆོག་རྗེ་ཙོང་ཁ་པ་བློ་བཟང་གྲགས་པའི་དཔལ་གྱིས་དགག་བྱ་ཁྱབ་ཆེའི་སྐྱོན་དུ་གཟིགས་ཏེ་ལེགས་བཤད་ལྔ་དང་ཁྱད་པར་དུ་བྱང་ཆུབ་ལམ་རིམ་ནང་དུ་བཀག་ཡོད་པ་ལ།  སྔ་རབས་ལུགས་འཛིན་སྟག་ལོ་ནས་རྗེའི་ལྟ་བ་ལ་འགལ་ཁུར་བཅོ་བརྒྱད་བརྩེགས་པའི་བརྒལ་བརྟག་ཕུལ།  དེ་ལའང་རྗེའི་སློབ་བརྒྱུད་སེ་ར་རྗེ་བཙུན་དང་འཇམ་དབྱངས་དགའ་བློ།   འཇམ་དབྱངས་བཞད་པ་སོགས་ནས་རྗེའི་ལྟ་བ་འཐད་ལྡན་དུ་སྒྲུབ་པའི་ཆ་ནས་གཞན་ལུགས་མ་རྟོགས་ལོག་རྟོག་ཕྱོགས་རྟོགས་ཀྱི་སྐྱོན་གྱི་ཕུང་པོར་བཏང་ཡོད།   དགེ་ཆོས་ནས་སྔ་རབས་ལུགས་འཛིན་རྣམས་ཀྱི་ལྟ་བ་དང་ལྟ་བ་དེ་ཉིད་གཏན་ལ་འབེབས་པའི་རིགས་པ་ལ་ཡིད་རབ་ཕྱོགས་ཤིང་རྗེའི་སློབ་བརྒྱུད་དུ་གཏོགས་པའི་མཁས་པ་རེ་ཟུང་གིས་རྗེའི་ལྟ་བའི་འཛིན་མཚམས་གོལ་བར་མཐོང་སྟེ་ཟུར་ཟ་དང་དོགས་སློང་ཚུལ་གྱིས་ཐ་སྙད་ཚད་གྲུབ་འདོད་མི་རིགས་ཚུལ་རྩལ་དུ་བཏོན་ཏེ་བརྗོད་ཡོད།   དགེ་འདུན་ཆོས་འཕེལ་གྱི་ཐ་སྙད་ཚད་གྲུབ་མི་བཞེད་པའི་འདོད་ཚུལ་དེ་སྟག་ལོའི་ཚད་མ་མི་འདོད་པ་དང་ཚད་གྲུབ་མི་བཞེད་པ་ལས་གསལ་ཁ་ཆེ་ཞིང་འཇུ་མི་ཕམ་སོགས་སྔ་འགྱུར་ལུགས་འཛིན་པའི་ཚད་མའི་ལྟ་དགོངས་ལས་ཀྱང་ཐལ་ཆེ་བའི་ཚུལ་དུ་སྣང་སྟེ།   སྟག་ཚང་ལོ་ཙཱ་བས།   འོན་ཀྱང་ཐ་སྙད་ཚད་གྲུབ་འདོད་ན་ནི།།    རང་རྒྱུད་འཐད་ཕྱིར་རྒྱ་བོད་མཁས་མང་བཞེད།།     འདི་ཡང་ཀུན་རྫོབ་མ་བཏགས་ཉམས་དགའི་ངོར།།   འཇོག་ཅེས་གསུངས་ཀྱང་རྟོག་གེར་གོམས་ཆེས་པས།།   མཐུན་སྣང་རྟེན་འབྲེལ་བཏགས་བྲལ་མ་ཚང་ན།།   བློས་བཏགས་ཙམ་ལ་བྱ་བྱེད་མ་མཁྱེན་པས།།   སྟོང་དང་བརྟེན་འབྱུང་དོན་གཅིག་མཚན་ཉིད་ལ།།   ཅུང་ཟད་འཁྲུལ་ཕྱིར་དབུ་མ་ཆེན་པོ་མིན།།    འོན་ཀྱང་དོན་དམ་རིགས་པས་དཔྱད་བཟོད་འགོག།    སྤྲོས་པ་ཉེར་ཞི་མཐར་ཐུག་དོན་དམ་དང་།།   སྐྱེ་མེད་རྣམ་གྲངས་པར་བཞེད་མཐའ་བྲལ་ཕྱིར།།   དངོས་སྨྲ་ལས་ལྷག་དབུ་མ་ཁོ་ནའོ།།   ཞེས་གསུངས་པ་ལྟར་ཐ་སྙད་ཚད་གྲུབ་འདོད་པ་ནི་དབུ་མ་རང་རྒྱུད་པའི་ལྟ་བ་ལས་ཐལ་འགྱུར་བའི་ལྟ་བ་མིན་པ་བརྗོད་པ་དང་།   དེ་བཞིན་བོད་པ་སྤྲུལ་སྐུས་ལྟ་གྲུབ་ཤན་འབྱེད་དུ།   རིགས་དེ་ཐ་སྙད་ཙམ་དུ་ཡང་།།  སྐྱེ་སོགས་དཔྱད་བཟོད་མེད་པར་སྒྲུབ།།   ཅེས་དོན་དམ་དཔྱོད་བྱེད་ཀྱི་རིགས་ཤེས་དེས་ནི།  ཐ་སྙད་ཙམ་དུ་ཡང་སྐྱེ་སོགས་སྤྲོས་པའི་སྣང་བ་དཔྱད་བཟོད་མེད་པར་སྒྲུབ་པར་བྱེད་ཅེས་བརྗོད་པ་ལྟ་བུ་དང་།  འཇུ་མི་ཕམ་ནས་དོན་རྣམ་ངེས་ཤེས་རབ་རལ་གྲིར།    དོན་དམ་ལ་ཡང་རྣམ་གྲངས་དང་།།   རྣམ་གྲངས་མིན་པའི་ཚུལ་གཉིས་ཀྱིས།།   དེ་འཇལ་དོན་དམ་དཔྱོད་བྱེད་ཀྱི།།   ཚད་མ་དེ་ཡང་གཉིས་སུ་འགྱུར།།   ཅེས་གསུངས་པ་ལྟར།    དོན་དམ་ལ་ཡང་རྣམ་གྲངས་དང་རྣམ་གྲངས་མིན་པ་གཉིས་སུ་ཕྱེས་ཏེ།   རང་རྒྱུད་པས་དོན་དམ་གཏན་ལ་འབེབས་པའི་སྐབས་སུ།   བདེན་གཉིས་སོ་སོར་མ་ཕྱེས་པར་ཀུན་རྫོབ་བམ་ཐ་སྙད་ཀྱི་སྣང་བ་བཀག་སྟེ་ཁས་མ་བླངས་ན་ཆད་ལྟར་འགྱུར་གྱི་དོགས་པས།   བདེན་གཉིས་སོ་སོར་དབྱེ་སྟེ་ཐ་སྙད་ཀྱི་སྣང་བ་མི་འགོག་པར་བདེན་གྲུབ་སོགས་ཀྱི་ཁྱད་པར་སྦྱར་ཏེ།   ཆོས་ཅན་ཀ་བ་མི་འགོག་པར་ཆོས་ཉིད་ཀ་བའི་བདེན་གྲུབ་བཟློག་དགོས་པར་བརྗོད་ནས་རྣམ་གྲངས་པའི་དོན་དམ་ཙམ་བསྒྲུབ་ཅིང་།    ཐལ་འགྱུར་བས་དོན་དམ་གཏན་ལ་འབེབས་པའི་སྐབས་སུ་བདེན་གཉིས་སོ་སོར་མ་ཕྱེས་ཏེ་ཀུན་རྫོབ་ཐ་སྙད་ཀྱི་སྣང་བ་ཐད་ཀར་མ་བཀག་ན།   བདེན་གྲུབ་ཏུ་འགྱུར་བའི་ཕྱིར་དང་བདེན་གཉིས་མ་ཕྱེ་བར་ཐ་སྙད་ཀྱི་སྣང་བ་ལ།   བདེན་གྲུབ་སོགས་ཀྱི་ཁྱད་པར་གང་ཡང་མི་སྦྱོར་བར་ཀ་བ་ཀ་བས་སྟོང་པར་བརྗོད་དེ་རྣམ་གྲངས་མ་ཡིན་པའི་དོན་དམ་ཆེན་པོར་བསྒྲུབ་པ་མཛད་དོ།   དེས་ཐ་སྙད་ཚད་གྲུབ་བཞེད་པ་ནི་རང་རྒྱུད་པའི་རྣམ་གྲངས་དོན་དམ་དུ་བརྗོད་ལ།   ཐ་སྙད་ཚད་གྲུབ་མི་བཞེད་པ་ནི་ཐལ་འགྱུར་བའི་རྣམ་གྲངས་མ་ཡིན་པའི་དོན་དམ་དུ་བཞེད་དོ།   དགེ་འདུན་ཆོས་འཕེལ་ནས་དེ་ལྟ་བུའི་ཆ་རྐྱེན་གང་ཡང་སྦྱར་མི་དགོས་པར་ཐལ་འགྱུར་བའི་ལུགས་ལ་མཐའ་གཅིག་ཏུ་ཐ་སྙད་ཚད་གྲུབ་མི་བཞེད་པ་སྟེ།   འཁོར་བའི་ཡུལ་འདིར་ཇི་སྲིད་གནས་པ་དེ་སྲིད་དུ་ཐག་བཅད་ཚད་ཐམས་ཅད་ཡིད་བརྟན་མེད་པའི་བློ་འདི་ལ་ཡིད་བརྟན་བྱས་ནས་ཐག་གཅོད་པ་ཙམ་ལས་ཐབས་གཞན་ཅི་ཡང་མེད་པ་ཞེས་དང་།   དེའི་ཕྱིར་དོན་དམ་པའི་དཔྱད་པ་ལྷུར་ལེན་ན་རང་ཅག་ཐག་བཅད་ཚད་ཐམས་ཅད་རྩ་བ་ནས་མེད་པའི་བློ་བཟོ་ཤ་སྟག་ཡིན་པ་ལ་ཆ་འཇོག་དགོས་ཞེས་དང་།  རང་ཅག་གིས་ཡིན་མིན་ཐག་བཅད་པ་ཐམས་ཅད་ཀྱང་།   རང་གི་སེམས་ལ་ཇི་ལྟར་ཤར་བ་བཞིན་ཐག་བཅད་པ་ཙམ་ལས།   རྩ་བ་གཞན་ཅི་ཡང་མེད་ཅེས་དང་།   དེས་ན་རང་ཅག་ཐོག་མ་མེད་པ་ནས་མ་རིག་པའི་སྨྱོ་ཆུ་བཏུང་བཏུང་བའི་སྨྱོན་པ་ཆེན་པོ་གཅིག་གིས།  ཡོད་མེད།   ཡིན་མིན་ཐག་བཅད་པ་ལ་་ཡིད་བརྟན་ཅི་ཡང་མེད་ཅིང་།   སྨྱོན་པ་དེ་འདྲ་བརྒྱ་སྟོང་ཁྲི་འབུམ་ཁ་མཐུན་ཀྱང་ཁུངས་བཙན་དུ་འགྲོ་རྒྱུ་ཅི་ཡང་མེད་ཅེས་པ་སོགས་ཀྱིས་མཚོན།   སྣང་སྲིད་ཀྱི་ཆོས་ཀུན་རྟེན་ཅིང་འབྲེལ་འབྱུང་གི་ཟོལ་ལ་བརྟེན་ཏེ་སྣང་བ་ཙམ་ལས་བརྟག་ཅིང་དཔྱད་ན་གཅིག་གི་རྫུན་ཁུངས་གཅིག་གིས་བརྡོལ་བའི་ཕྱིར་ཐ་སྙད་ཚད་གྲུབ་ཅིག་ནམ་ཡང་བཞག་ཏུ་མེད་པར་བརྗོད་དོ།   བོད་ཕྱི་རབས་པ་ན་རེ།   ཐ་སྙད་ཚད་གྲུབ་མ་བཞེད་ན།  དགག་བྱ་ཁྱབ་ཆེས་ཆད་ལྟར་ལྷུང་བ་དང་།   རྟེན་འབྲེལ་ལ་ཡིད་རྟོན་མེད་པར་འགྱུར་རོ་ཞེས་དང་།  བུམ་པ་བུམ་པས་མི་སྟོང་བུམ་པ་བདེན་གྲུབ་ཀྱིས་སྟོང་།   རིགས་པས་བདེན་གྲུབ་འགོག་གི་བུམ་པ་མིན།   ཚད་མས་བུམ་པ་འཇོག་གི་བདེན་གྲུབ་མིན་ཞེས་བརྗོད་དེ་དགག་བྱ་ལ་བདེན་གྲུབ་ཀྱི་ཁྱད་པར་སྦྱོར་དགོས་པའི་རྣམ་བཞག་མཛད།   དགེ་འདུན་ཆོས་འཕེལ་ནས་ཚུལ་དེ་ཐུགས་ལ་མ་སོང་བས་ཀླུ་སྒྲུབ་དགོངས་རྒྱན་དུ།   ཡིད་ཀྱིས་མེད་པར་ཐག་ཆོད་ཅིང་།།   མིག་གིས་ཡོད་པར་མཐོང་བའི་ཚེ།།   ཞྭ་སེར་མཁན་པས་མ་བསླབ་ཀྱང་།།   སྒྱུ་མའི་བློ་ལས་གཞན་ཅི་འབྱུང་།།  ཞེས་པ་སྟེ།   བུམ་པ་ཀ་བ་སོགས་རིགས་པས་དགག་ན་ཐམས་ཅད་མེད་པར་ལྟ་བའི་ཆད་ལྟ་སྐྱེ་འགྲོ་སྙམ་པའི་འཇིགས་པ་ནི་དོན་མེད་པའི་སེམས་ཁྲལ་ཏེ།   སྤྱིར་མདུན་ན་མཐོང་བཞིན་པའི་བུམ་པ་འདི་གཏན་ནས་མེད་སྙམ་པའི་ཆད་ལྟ་ཞིག་སོ་སྐྱེ་རང་ག་བ་ལ་སྐྱེ་བར་མི་སྲིད་མོད།  གལ་ཏེ་དེ་འདྲའི་བློ་ཞིག་སྐྱེས་ན་བུམ་པ་མཐོང་རྒྱུ་ཡོད་པ་དང་རེག་རྒྱུ་ཡོད་པ་དངོས་སུ་ཤེས་པས།   ཤེས་བཞིན་པ་འདི་ཀོ་གཏན་ནས་མེད་དོ་སྙམ་པ་ཞིག་ཤར་ཐུབ་ན།  དེ་ནི་ཆད་ལྟ་མིན་གྱི་སྣང་ལ་སྣང་བ་ལྟར་དུ་མེད་པར་འཛིན་པའི་སྣང་སྟོང་གཉིས་ཚོགས་ཀྱི་དབུ་མའི་ལྟ་བ་ཡིན་པར་བརྗོད་པ་དང་།   ཡང་དེ་ལས།  དེའི་ཕྱིར་རིགས་པའི་དགག་བྱ་ལ་ཁ་ནས་ཁྱད་ཅི་ཙམ་ཕྱེ་ཡང་དོན་ལ་དགོག་རྒྱུ་དེ།   བུམ་པ་འགོག་དགོས།  ཀ་བ་འགོག་དགོས།   ཡོད་པ་འགོག་དགོས།   མེད་པ་འགོག་དགོས་ཀྱི།   བུམ་པ་བཞག་ནས་བུམ་པ་བདེན་གྲུབ་བྱ་བ་ཞིག་ཏུ་འགོག་དགོས་ཟེར་བ་འདི་ཚིག་སྐམ་ཁ་ལ་བྱང་བའི་མཁས་པ་འགའ་ཞིག་གི་ངག་སྒྲོས་ཙམ་ཡིན་ཞེས་དང་།   ཚུལ་འདི་ནི་སྔ་རབས་ཞིག་གི་ངག་སྒྲོས་ཙམ་ཡིན་ཞེས་དང་།   ཚུལ་འདི་ནི་སྔ་རབས་པའི་མཁས་པ་རྣམས་སུ་མ་ཟད།   དགེ་ལྡན་ཕྱོགས་ཀྱི་མཁས་གྲུབ་ཉམས་མྱོང་ཅན་ཚོས་ཀྱང་གསལ་བ་དགོངས་འདུག་སྟེ།   དཔེར་ན་ལྕང་སྐྱ་རིན་པོ་ཆེས།   སྣང་བ་ལིང་ལིང་འདི་རང་སོར་བཞག་ནས།   དགག་རྒྱུ་རྭ་ཅན་ཞིག་འཚོལ་བར་འདུག་སྟེ།   སོགས་མ་མཉེས་པའི་གསུང་བྱུང་བ་བཞིན།  གུང་ཐང་བསྟན་པའི་སྒྲོན་མེ་དང་།  པཎ་ཆེན་བློ་བཟང་ཆོས་རྒྱན་གྱིས་ཀྱང་དེ་ཁོ་ན་བཞིན་དུ་གསུངས་སོ།   ཞེས་དང་།    རྗེ་བླ་མ་རང་གི་ཞལ་ནས།   སྟོང་ཉིད་མ་རྟོགས་བར་དུ།  ཡོད་པ་ཙམ་དང་།   བདེན་པར་ཡོད་པའི་ཁྱད་པར་ནམ་ཡང་ཕྱེ་མི་སྲིད་ཅིང་དེ་བཞིན་བདེན་པ་མེད་པ་དང་།   མེད་པ་ཙམ་གྱི་ཁྱད་པར་ཡང་འབྱེད་མི་ནུས་ཞེས་གསུངས་ཤིང་ཐལ་རང་ལ་ཆོས་ཅན་མཐུན་སྣང་བ་མེད་པའི་རྒྱུ་མཚན་མཐར་ཐུག་ཀྱང་དེ་ཡིན་པར་གསུངས་པས།   ལྟ་བ་མ་རྟོགས་གོང་དུ་བདེན་གྲུབ་ཟུར་དུ་ངོས་ཟིན་པ་ག་ལ་སྲིད།  དེས་ན་དགག་བྱ་ངོས་འཛིན་ཁུལ་བྱས་པ་དེ་ལ་ཡིད་རྟོན་ག་ལ་ཡོད་ཅེས་བརྗོད་པ་བཞིན།   གསར་ཕྱོགས་ཀྱི་མཁས་པའི་ངག་སྒྲོས་ནས་བྱུང་བའི་ཀ་བ་ཀ་བས་མི་སྟོང་ཀ་བ་བདེན་གྲུབ་ཀྱིས་སྟོང་བུམ་པ་བུམ་པས་མི་སྟོང་བུམ་པ་བདེན་གྲུབ་ཀྱིས་སྟོང་ཞེས་ཆོས་ཅན་ལ་བདེན་གྲུབ་ཀྱི་ཁྱད་པར་སྦྱར་བ་འདི་ཀོ་རྗེ་རིན་པོ་ཆེའི་གསུང་གི་ཚིག་ཟིན་ལ་མེད་པར་ཕྱིས་བྱོན་སློབ་བརྒྱུད་ལ་ལས་རྗེའི་ལྟ་བ་གསལ་ཁ་འདོན་སྐབས་བརྗོད་པ་ཡིན་པ་སོགས་ལྕང་སྐྱའི་གསུང་ལས་རྗེས་སུ་དཔོག་ནུས་སོ།   ཀུན་རྫོབ་ཐ་སྙད་ཀྱི་སྣང་བ་ཚད་གྲུབ་ཏུ་མེད་པར་ཐད་ཀར་འགོག་འོས་པའི་ཚུལ་དེ་སྔ་འགྱུར་ལུགས་འཛིན་བོད་པ་སྤྲུལ་སྐུ་ནས་ཀྱང་ལྟ་གྲུབ་ཤན་འབྱེད་དུ་འདི་ལྟར་གསུངས་འདུག་སྟེ།    དོན་དམ་རྣམ་གྲངས་དཔྱོད་པའི་སྐབས།།    བདེན་གཉིས་ཕྱེས་ཏེ་ཀུན་རྫོབ་ཀྱི།།   སྣང་བ་མི་འགོག་དགག་བྱ་ལ།།   ཁྱད་པར་སྦྱར་ཏེ་བདེན་གྲུབ་འགོག།   དེའི་ཕྱིར་ཡང་དག་དོན་དམ་ངོར།།   བསྒྲུབ་བྱ་བདེན་སྟོང་རྣམ་གྲངས་ཙམ།།   བསྒྲུབ་འདི་རང་རྒྱུད་ལྟ་བ་སྟེ།།  ཞེས་དང་།  རིགས་པའི་དགག་བྱ་ཁྱབ་ཆེ་བས།།   ཆད་ལྟར་འགྱུར་གྱི་དོགས་པ་སྟེ།།   རྟེན་འབྱུང་མི་ཤེས་དངོས་སྨྲ་ལས།།   དབུ་མར་སྨྲ་རྣམས་དོགས་མི་འཚལ།།   ཞེས་དང་།  ཕྱི་འགྱུར་ལ་ལ་འདི་རྗེས་མཐུན།།   སྣང་བ་བཀག་ན་ཆད་ལྟ་ཟེར།།   ཚུར་མཐོང་ཙམ་ཞིག་མཁྱེན་པར་ཟད།།   དགག་བྱ་བདེན་གྲུབ་ཡན་གར་འགོག།   དགག་བྱའི་སྣང་ཚུལ་ངེས་སོ་ལོ།།  ཞེས་པ་སོགས་ཏེ།   ཀུན་རྫོབ་སྣང་བ་ཐད་ཀར་མི་འགོག་པར་དགག་བྱ་བདེན་གྲུབ་ཀྱི་ཁྱད་པར་སྦྱར་བ་ནི་རྣམ་གྲངས་པའི་དོན་དམ་ཙམ་སྒྲུབ་པར་བྱེད་པའི་དབུ་མ་རང་རྒྱུད་པའི་འདོད་ཚུལ་ཡིན་ཏེ་ཐལ་འགྱུར་བའི་བཞེད་དགོངས་མིན་པ་དང་།  ཆད་ལྟར་འགྱུར་གྱི་དོགས་ཏེ་དགག་བྱར་བདེན་གྲུབ་ཀྱི་ཁྱད་པར་སྦྱར་བ་འདི་ཚུར་མཐོང་ཚད་མའི་ལུགས་ཙམ་ཞིག་མཁྱེན་པར་ཟད་དོ།།     

ཐ་སྙད་ཚད་གྲུབ་ཁས་མ་བླངས་ཀྱང་རྟེན་འབྲེལ་ལ་ཡིད་རྟོན་མེད་པར་མི་འགྱུར་བའི་ཚུལ་འདི་ཀླུ་སྒྲུབ་དགོངས་རྒྱན་དུ་དགེ་ཆོས་ཀྱིས་ཆེས་གོ་སླ་བའི་དཔེ་ལ་སྦྱར་ནས་འདི་ལྟར་གསུངས་ཡོད་དེ།   སྤྱིར་ཚད་མས་གྲུབ་པ་བྱ་བ་འདི་ཀུན་ཀུན་རྫོབ་ཀྱི་སྣང་བ་རགས་པ་རྣམས་ཕྲ་ཞིང་ཞིབ་ཏུ་བཏང་བའི་དགོས་པ་རྒྱ་ཆེན་པོ་འདིའི་ཆེད་དུ་མཁས་པ་རྣམས་ཀྱིས་ཚུལ་གསུམ་གྱི་རིགས་པས་གྲུབ་པ་བྱ་བ་དང་དོན་གཅིག་ཅིང་།   དོན་ལ་ཀུན་བཏགས་ཀྱི་མ་རིག་པའི་ཡུལ་གྱི་ཁྱད་པར་འགའ་ཞིག་དགོས་པ་རྒྱ་ཆེན་པོའི་དོན་དུ་མཁས་པ་རྣམས་ཀྱི་རྟོག་གེའི་རིགས་པས་ཆེས་གསལ་དུ་བཏང་བ་ཞིག་འདུག་ལ།   སྤྱིར་ཚད་གྲུབ་བྱ་བ་དང་།  ཡིད་ཆེས་པ།   བསླུ་མེད།   བསྙོན་མེད་སོགས་རྟོག་གེའི་རིགས་པས་སྣོན་པ་བཏབ་མ་བཏབ་ཙམ་གྱི་ཁྱད་པར་ལས།  རིགས་དྲུག་ཀུན་གྱི་རྒྱུད་ལ་རང་བྱུང་དུ་ཡོད་པའི་ཀུན་རྫོབ་ཀྱི་རྣམ་ཤེས་འདི་ཁ་ཕྱོགས་བསྒྱུར་ལུགས་ཀྱིས་སྣང་བ་ཙམ་ལས་གཞན་དུ་མེད་ཅིང་།   བུ་ཡི་ལག་པ་མེ་དང་ཕྲད་ན་ཨ་ཚ་ཚ་ཟེར་བ་དེ།   བསླུ་མེད།   བསྙོན་མེད་ཁས་ལེན་སོགས་ཡིན་ལ།  ཕ་ཡིས་མེ་ཚ་བ་ཡིན།   ལག་པ་ཤ་ཡིན་པས་མེ་ལ་ཐུག་ན་ཅི་ལ་མི་ཚ་སོགས་རྒྱུ་མཚན་དང་སྦྱར་བའི་བཀའ་བཀྱོན་གནང་བ་དེ་ལུང་རིགས་ཀྱི་ཚད་མས་གྲུབ་ལུགས་ཡིན།   དེས་ན་ཇི་སྲིད་ས་རྡོ་རི་བྲག་ལ་སོགས་པའི་སྣང་བ་འདི་དག་མ་ཡལ་བ་དེ་སྲིད་དུ་མཆོག་གསུམ་རྒྱུ་འབྲས་རྟེན་འབྲེལ་ལ་སོགས་པའི་སྣང་བ་ཡང་ཡལ་བའི་དོན་མེད་ལ།   དགོས་པའི་སྣང་བ་སྔོན་དུ་ཡལ་ནས།   མི་དགོས་པའི་སྣང་བ་རྗེས་སུ་ལུས་ན་སོ་སོའི་སྐྱེ་བོ་ཆོས་མེད་ཐ་ཤལ་བའི་རང་བཞིན་ལས་འོས་ཅི་ཡོད།   ཅེས་གོ་བ་ཆུ་ཐུབ་ཀྱི་རིགས་པ་དཔེ་ལ་དྲངས་ཏེ་བརྗོད་པ་དང་།  ཚུལ་དེ་ཡང་བོད་པ་སྤྲུལ་སྐུ་ནས།  སྣང་བ་དཔྱད་བཟོད་བདེན་པ་གཉིས་ཆར་འགོག།   རྟེན་འབྱུང་སྣང་བའི་ངང་ཚུལ་འགོག་མ་ལགས།།  ཞེས་པ་སྟེ།   ཇི་ལྟར་སྣང་བ་དེ་ཉིད་སྟོང་པར་ངེས་དགོས་པས་ན།   སྣང་བ་དཔྱད་བཟོད་དུ་འགྱུར་བ་ནི་བདེན་པ་གཉིས་ཆར་དུ་ཡང་ཞལ་གྱིས་མི་བཞེས་པའི་སྒོ་ནས་འགོག་པར་མཛད་དགོས་མོད་ཀྱང་།   སྣང་བ་སྟོང་པར་གཏན་ལ་ཕབ་ཟིན་པའི་ལག་རྗེས་ལ་ཤར་བའི་རྟེན་འབྱུང་སྣང་བའི་ངང་ཚུལ་ནམ་ཡང་འགོག་པར་མཛད་པ་མ་ལགས་པར་བརྗོད་ཅིང་རང་རྒྱུད་པ་སོགས་ཀྱིས་དོན་དཔྱོད་ཚད་མས་སྟོང་བ་རྟེན་འབྱུང་དུ་མ་ངེས་གོང་དུ།   སྣང་བ་མི་འགོག་པར་དེའི་སྟེང་གི་བདེན་གྲུབ་སོགས་འགོག་པ་དང་།   ཐལ་འགྱུར་བས་སྣང་བ་དེ་ཉིད་སྟོང་པར་གཏན་ལ་ཕབ་ཟིན་པའི་རྗེས་སུ་སྟོང་པ་རྟེན་འབྱུང་དུ་ངེས་པའི་སྣང་བ་ཙམ་ཐ་སྙད་དུ་མི་འགོག་པ་སོགས་ཚུལ་དེ་ཇི་བཞིན་རྟོགས་ན་གཞན་དཀའ་བའི་གནད་ཀྱི་མདུན་རྒྱ་རང་གྲོལ་དུ་འགྱུར་བར་བརྗོད་དོ།།

      དེ་ཡང་ཐ་སྙད་ཚད་གྲུབ་མི་བཞེད་པའི་ཚུལ་ལུགས་སྤྱིར་དགེ་ལྡན་ཕྱོགས་ཀྱི་མཁས་པ་ཕལ་མོ་ཆེས་དབུ་མའི་གཞུང་ལུགས་སམ་ལྟ་བའི་སྐོར་འཆད་སྐབས་མི་འཐད་པའི་ཚུལ་བརྗོད་ཅིང་།   དགེ་བཤེས་ཤེས་རབ་རྒྱ་མཚོ་ནས་ཚུལ་དེ་ཉིད་འབེན་དུ་བཀོད་ནས་དགག་པ་ཆེར་མཛད་ཡོད་དེ།   མི་འཇིག་སེང་གེའི་ང་རོ་རུ།   དགག་བྱ་ཁྱབ་ཆེ་སྤྱི་དང་ཁྱད་པར་དུ།།  སྟག་ལོ་ལྟ་བུའི་ཚད་མ་མེད་པ་དང་།།   ཚད་མས་གྲུབ་པ་མེད་པའི་ལུགས་ངན་ལ།།   འགལ་བ་སྟོང་གི་ཐོག་སེར་འཇུག་པའི་ཕྱིར།།  རྨི་ལམ་དུ་ཡང་དག་པ་མི་སྟེར་རོ།།   ཞེས་དང་།  ཐ་སྙད་བདེན་པ་མི་འདོད་ཆད་ལྟ་དང་།།  འཕུར་བྱེད་གཤོག་ཡ་གཅིག་པའི་མཁའ་ལྡིང་ཞེས།།  ཞེས་དང་།  རྒྱུ་འབྲས་རྟེན་འབྲེལ་འགོག་པའི་སྤྲོས་བྲལ་ལས།།   ཞྭ་སེར་ཆད་ལྟ་དུས་གསུམ་རྒྱལ་བའི་འོད།།   ཐ་སྙད་ཚད་གྲུབ་འགོག་པའི་སྤྲོས་བྲལ་ལས།།  ཇོ་ནང་རྟག་བརྟན་ཕུན་ཚོགས་སྟོང་གིས་འཕགས།།  ཞེས་དང་།  ཐལ་འགྱུར་སྨྲ་བས་ཚད་གྲུབ་མི་བཞེད་ཅེས།།   ཐལ་འགྱུར་ལུགས་བཟང་ལོག་པ་སྨྲ་བ་རྣམས།།  ཐལ་འགྱུར་བ་དང་དཔག་ཚད་བྱེ་བས་རིང་།།  ཞེས་ཐ་སྙད་ཚད་གྲུབ་མི་བཞེད་ན་འགལ་བའི་ཁུར་ཆེན་གྲངས་མེད་ཁུར་དགོས་པའི་ཚུལ་བསྟན་པ་དང་ཆབས་ཅིག་ཏུ།   ཐ་སྙད་དུ་ཡོད་ཅེས་བདེན་གྲུབ་འགོག།   དེ་སྣང་བས་ཡོད་མཐའ་སེལ་ཚུལ་ཡིན།།  དོན་དམ་དུ་མེད་ཅེས་གཏན་མེད་འགོག།   དེ་སྟོང་པས་མེད་མཐའ་སེལ་ཚུལ་ཡིན།།  ཞེས་དང་།   དཔྱད་ན་ཏིལ་འབྲུའི་ཆ་ཡང་མི་རྙེད་དེ།།   བརྟག་བཟོད་ཁས་ལེན་བྲལ་བ་དངོས་པོའི་གཤིས།།   ཐ་སྙད་རྟེན་ཅིང་འབྲེལ་འབྱུང་མི་བསླུ་བས།།   ཡོད་ཀྱང་བདེན་པར་མེད་པ་ཀླུ་སྒྲུབ་ལུགས།།   ཞེས་དང་།   ཀུན་རྫོབ་སྣང་བས་སྟོང་པ་མི་འགོག་ཡིན།།   དོན་དམ་སྟོང་པས་སྣང་བ་མི་འགོག་པའི།།   བདེན་གཉིས་འགལ་མེད་ཟུང་འཇུག་འོད་སྣང་གིས།།   མཐའ་བྲལ་དབུ་མའི་ལམ་བཟང་གསལ་བར་བྱས།།   ཞེས་སོགས་རྒྱབ་རྟེན་གྱི་ལུང་དང་རྣམ་དཔྱོད་ཆེན་པོའི་ལུགས་ཀྱི་རིགས་ལམ་ཀྱིས་དགེ་ལྡན་ལུགས་བཟང་གི་ཕྱོགས་འདིའི་བཞེད་པ་ཆེས་གསལ་བར་བྱས་སོ།།