༄༅།། སྟོན་པ་ཚད་མའི་སྐྱེས་བུར་སྒྲུབ་ཚུལ་གྱི་རིགས་ལམ་ལ་དཔྱད་པ།

རྩོམ་པ་བོ་མི་གསལ།

གསུམ་པ། སྟོན་པ་ཚད་མར་སྒྲུབ་པའི་ཐབས་སུ་བསྟན་པ་སྐྱོན་མེད་དུ་སྒྲུབ་པའི་ཚུལ་བཤད་པ།

དཔྱོད་ལྡན་འགའ་ཞིག་གི་བསམ་ངོར་སྟོན་པ་བཅོམ་ལྡན་འདས་ཚད་མར་སྒྲུབ་པའི་ཐབས་སུ།དང་ཐོག་དེའི་བསྟན་པ་སྐྱོན་མེད་དུ་སྒྲུབ་པ་འབྲེལ་མེད་ཀྱི་བློ་དོགས་འཆར་སྲིད་ཀྱང༌། ཆེས་འབྲེལ་ཆགས་པའི་གསལ་བཤད་འོག་ནས་འཆད་འགྱུར་ལྟར་འཐད་སྒྲུབ་དངོས་སྟོབས་རིགས་པས་དངོས་བརྒྱུད་ཅི་རིགས་ཀྱི་སྒོ་ནས་བདེན་དོན་གང་ཞིག་གཏན་འབེབས་གནང་ནས་ལག་བསྟར་དང་ཁས་ལེན་གནང་རྒྱུ་དེ་ནི་ནང་བསྟན་ཚད་མ་རིག་པ་དང༌།རིག་གསར་ཚན་རིག་གཉིས་ཀྱི་མཐར་ཐུག་གི་དམིགས་གཏད་ཉག་གཅིག་ལས་བབ་ཅོལ་རྨོངས་དད་ཀྱི་དཔྱད་ཚུལ་ཞིག་གཏན་ནས་མིན་པ་བློ་ཐག་གཙང་བཅད་ཀྱིས་བརྗོད་ཐུབ།དེར་བརྟེན། སངས་རྒྱས་ཀྱི་བསྟན་པ་ལ་ལུང་རྟོགས་གཉིས་ལས་རྟོགས་པའི་བསྟན་པ་ཐོག་མར་སྐྱོན་མེད་དུ་བསྒྲུབས་ནས།དེ་རྗེས་ལུང་གི་བསྟན་པ་སྐྱོན་མེད་དུ་བསྒྲུབ་དགོས་པ་ཡིན་ཞིང༌། དེ་ཡང་རྟོགས་པའི་བསྟན་པ་ནི་ཚུར་བསྡུས་ན་བདེན་བཞིའི་བླང་དོར་དང༌།མངོན་མཐོ་ངེས་ལེགས་ཐབས་དང་བཅས་པའི་ནང་དུ་འདུ་བས་སྔོན་དུ་བདེན་བཞིའི་རྣམ་གཞག་དངོས་སྟོབས་རིགས་པས་སྒྲུབ་ཚུལ་ནི།བཅོམ་ལྡན་འདས་ཀྱིས་བདེན་བཞིའི་ཚུལ་ལུགས་ཐོག་མར་གསུང་སྐབས་སྡུག་བསྔལ་ཤེས་པར་བྱ། ཀུན་འབྱུང་སྤང་བར་བྱ།འགོག་པ་ཐོབ་པར་བྱ། ལམ་སྒོམ་པར་བྱ། ཞེས་ཀུན་ཉོན་དང་རྣམ་བྱང་ཕྱོགས་ཀྱི་ཆོས་ཐམས་ཅད་དོན་ཚན་འདི་བཞིའི་ནང་དུ་བསྡུས་པར་མ་ཟད།ཤེས་སྤང་ཐོབ་སྒོམ་གྱི་ཁྱད་པར་སྦྱར་ནས་གསུང་བའི་ཉམས་ལེན་གྱི་གནད་རེ་རེ་དང་བསྟན་ཚུལ་གྱི་གོ་རིམ་སོགས་ལའང་དྲང་བདེན་དངོས་གཙོ་རིགས་པའི་སྲང་ལ་འཇལ་ཐུབ་པ་ཤ་སྟག་སྟེ།ང་ཚོ་སྲོག་ལྡན་འབུ་སྲིན་ཚུན་ལ་བདེ་བ་འདོད་པ་དང་སྡུག་བསྔལ་མི་འདོད་པ་རྐྱང་ལས་སྡུག་བསྔལ་འདོད་པ་གཅིག་ཀྱང་མེད་མོད།བདེ་སྡུག་འདོར་ལེན་གྱི་ཐབས་ཚུལ་ལ་རྨོངས་པས། བདེ་བར་འདོད་ཀྱང་གཏི་མུག་གིས། །རང་གི་བདེ་བ་དགྲ་ལྟར་བཅོམ།།ཞེས་གསུངས་པའི་ནང་དོན་ལས་མ་འདས་པར་བརྟེན། སྟོན་པ་བཅོམ་ལྡན་འདས་ཀྱིས་རྒྱུ་རྐྱེན་གང་ཞིག་བསྟེན་ན་བདེ་སྡུག་གི་འབྲས་བུ་འཆོལ་མེད་འབྱུང་བའི་རྒྱུ་འབྲས་དངོས་གཤིས་རིག་པའི་བབ་ལ་གཞིགས་ནས་བདེན་བཞིའི་རྣམ་གཞག་མཛད་ཅིང༌།སྡུག་བསྔལ་གཏན་ཟད་དུ་འདོད་པ་ཚོས་ཐོག་མར་སྡུག་བསྔལ་གྱི་རང་བཞིན་དཔྱིས་ཕྱིན་པ་ཞིག་མ་ཤེས་ན་སྡུག་བསྔལ་གྱི་ཆ་འགའ་ཞིག་ལ་བདེ་བར་འཁྲུལ་ཏེ་ཟག་བཅས་ཐམས་ཅད་ཀྱི་འབྱུང་རྩ་ཀུན་འབྱུང་ལས་ཉོན་གཉིས་སྤོང་འདོད་མི་སྐྱེ་ཞིང༌།དེ་མ་སྐྱེ་ན་སྡུག་བསྔལ་གཏན་ཟད་ཀྱི་འགོག་བདེན་ཐོབ་འདོད་ཀྱི་བློ་མི་འབྱུང༌། དེ་ལྟ་ན་འགོག་བདེན་ཐོབ་བྱེད་ཀྱི་ལམ་བདེན་བསྒོམ་བྱར་མི་འཛིན་པའི་གནད་ཀྱིས།སྐབས་འདིར་བདེན་བཞིའི་རྒྱུ་འབྲས་ཀྱི་གོ་རིམ་ལྡོག་སྟེ་ཤེས་སྤོང་ཐོབ་སྒོམ་ཀྱི་ཁྱད་པར་སྦྱར་ནས་གསུངས་ཤིང༌།ད་དུང་ཤེས་སྤོང་ཐོབ་སྒོམ་གྱི་ཁྱད་པར་སྦྱར་བ་ལ་སྒྲུབ་བྱེད་ཀྱི་དཔེ་ཡང་མེད་པ་མིན་ཏེ།དཔེར་ན། སྡུག་བསྔལ་བདེན་པ་སྡུག་བསྔལ་དུ་ངོ་ཤེས་པ་ནི་རང་རེ་བདེ་བར་གཉིད་ལོག་བཞིན་པའི་སྐབས་ཤིག་ན་གློ་བུར་དུ་ཆུ་ཞིག་བྱུང་ནས་གཉིད་སད་པར་བྱས་ན་རང་ལ་མི་བདེ་བ་ཞིག་བྱུང་ལ།འདི་ཅི་ཡིན་དུ་སྙམ་དུ་བསམ་པ་ན་གྲང་རེག་གིས་ཉེན་པར་གོ་བ་དང་འདྲ་ལ། སྡུག་བདེན་གྱི་རྒྱུ་ཀུན་འབྱུང་བདེན་པ་ངོས་ཟིན་ནས་སྤོང་བྱར་འཛིན་པ་ནི་གྲང་རེག་གི་སྡུག་བསྔལ་འདི་ཉིད་རྒྱུ་རྐྱེན་གང་ཞིག་གིས་བྱས་སྙམ་དུ་བརྟག་པ་ན་ཆུས་བྱས་པར་ཤེས་ནས་སྤང་བྱ་ཆུ་དང་ཁ་འབྲལ་བར་འདོད་པ་དང་འདྲ།རྒྱུ་ཀུན་འབྱུང་སྤངས་པའི་འགོག་བདེན་ཐོབ་བྱར་འཛིན་པ་ནི་ཆུ་དང་གྲང་རེག་བྲལ་བའི་སྐམ་ས་དོན་དུ་གཉེར་བ་དང༌།འགོག་བདེན་ཐོབ་པའི་ཐབས་སུ་ལམ་བདེན་སྒོམ་པ་ནི་གྲང་རེག་དང་ཁ་བྲལ་བའི་ཐབས་སུ་ཆུ་རྐ་གཞན་དུ་བསྒྱུར་བའི་བྱ་བ་ལ་འབད་པ་དང་མཚུངས་སོ།།དེ་བཞིན་རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར།།སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ།།ཞེས་ནད་དང་དཔེ་སྦྱོར་ཚུལ་གྱི་རིགས་པ་འདི་དག་གིས་བདེན་བཞིའི་རྣམ་གཞག་གསུང་ཚུལ་གྱི་ཆ་རེ་ལའང་དངོས་གཙོ་ཚན་རིག་གི་ལྟ་གྲུབ་དང་འགྲོས་མཐུན་པར་འགྲེལ་བཤད་རྒྱག་ཐུབ་པར་མ་ཟད།ད་དུང་དེ་ལས་ཀྱང་ཚགས་ཇེ་ཞིབ་ཏུ་སོང་འདུག ད་དུང་བདེན་བཞིའི་རྣམ་པ་རིགས་པས་བཞག་ཚུལ་ནི།

གཅིག༽ སྡུག་བདེན་གྱི་རྣམ་པ་མི་རྟག་པ་དང༌།སྡུག་བསྔལ་བ། སྟོང་པ༌། བདག་མེད་བཞི།

སྡུག་བདེན་གྱི་རྣམ་པ་མི་རྟག་པ་དང༌།སྡུག་བསྔལ་བ། སྟོང་པ༌། བདག་མེད་བཞི་སྟེ་སྔ་མ་སྔ་མ་རགས་པ་དང་ཕྱི་མ་ཕྱི་མ་ཕྲ་མོར་བཞག་པའི་ཚུལ་དེ་ཡང་ཕྲ་རགས་ཀྱི་འཇོག་ལུགས་མང་པོ་ཞིག་ཡོད་པ་ལས་རྟོགས་དཀའ་སླའི་འཇོག་ཚུལ་གྱི་རིམ་པ་གཞི་ལ་བཞག་ནས་སྔ་མ་སྔ་མ་རྟགས་སུ་བཀོད་དེ་ཕྱི་མ་ཕྱི་མ་བསྒྲུབ་བྱར་བཟུང་བའི་དཔྱད་སྟངས་ལའང་དངོས་སྟོབས་རིགས་པའི་གསང་གནད་ཀྱི་བྲོ་བ་སླེབས་ཡོད་པ་འོག་ནས་འཆད་འགྱུར་བཞིན་དེ་ནི་སྡུག་བདེན་གྱི་རྣམ་པ་སོ་སོའི་གཤིས་བབ་ལ་བརྟག་ཚེ།སྡུག་བསྔལ་འཁོར་བ་ཅན་ཕུང་པོ། །ཞེས་གསུངས་པ་ལྟར། བཅོམ་ལྡན་འདས་ཀྱིས་ཐོག་མར་གང་ལ་དགོངས་ནས་སྡུག་བདེན་གྱི་ཚུལ་ལུགས་གཏན་འབེབས་གནང་བའི་ཟག་བཅས་ཉེར་ལེན་གྱི་ཕུང་པོ་ཉིད་ཆོས་ཅན་དུ་བཟུང་ནས་དཔྱད་ན།ཟག་བཅས་ཉེར་ལེན་གྱི་ཕུང་པོ་ཆོས་ཅན། མི་རྟག་པ་ཡིན་ཏེ། སྐད་ཅིག་རེ་རེ་བཞིན་འཇིག་པའི་ཕྱིར།དེ་ཡང་ཡིན་ཏེ། དཔེར་ན། ཉི་འོད་ཀྱིས་བཞུས་པའི་ཁ་བའི་ཕུང་པོ་ལ་རྒྱང་རིང་དུ་བལྟས་ཚེ་ཅུང་ཟད་ཙམ་ཡང་ཁ་མ་བྲི་བར་གནས་པར་སྙམ་མོད།མིག་གི་ཁ་གཏད་ཚེ་ཁ་བའི་རྡུལ་ཕྲེང་རེ་རེ་བཞིན་ནང་དུ་རྡིབ་ནས་ཆུའི་རྒྱུན་དུ་གྱུར་ཏེ་སྐད་ཅིག་ཙམ་ཡང་སྡོད་དབང་མེད་པར་འགྱུར་ནས་འགྲོ་བ་བཞིན་ཡིན་པའི་ཕྱིར། ཡང་ཟག་བཅས་ཉེར་ལེན་གྱི་ཕུང་པོ་ཆོས་ཅན།སྡུག་བསྔལ་བ་ཡིན་ཏེ། འཕགས་པ་རྣམས་དང་མི་མཐུན་པའི་ཕྱིར། དེ་ཡང་ཡིན་ཏེ། འཕགས་པ་རྣམས་ཀྱིས་ཁྱོད་ལ་ཉེས་པར་བལྟས་ཏེ།དེ་ནས་འཁོར་བ་འཕེན་བྱེད་ཀྱི་ལས་གསར་དུ་མི་བསོག་པའི་ཕྱིར། དཔེར་ན། སྲོག་ལ་ཐུག་པའི་རྒྱལ་ཁྲིམས་ཕོག་པའི་མི་ཞིག་ཅི་སྟེ་ལན་གཅིག་དེ་ལས་ཐར་ན་ཕྱིས་སུ་སྲོག་ཁྲིམས་ཕོག་པའི་ལས་དེ་ལ་ཉེས་སྐྱོན་དུ་རྟོགས་ནས་མི་འཇུག་པ་བཞིན་ཡིན་པའི་ཕྱིར། ཡང་ཟག་བཅས་ཉེར་ལེན་གྱི་ཕུང་པོ་ཆོས་ཅན།སྟོང་པ་ཡིན་ཏེ། རང་ལས་དོན་གཞན་དུ་གྱུར་པའི་བདག་དང་བྲལ་བའི་ཕྱིར། དེ་ཡང་ཡིན་ཏེ། དཔེར་ན།ཤིང་རྟའི་ཚོགས་པ་ལས་ལོགས་སུ་ཤིང་རྟ་མེད་པ་བཞིན་ཡིན་པའི་ཕྱིར། ཡང་ཟག་བཅས་ཉེར་ལེན་གྱི་ཕུང་པོ་ཆོས་ཅན།བདག་མེད་པ་ཡིན་ཏེ། རང་གི་ངོ་བོའི་བདག་དང་བྲལ་བའི་ཕྱིར། དེ་ཡང་ཡིན་ཏེ། དཔེར་ན། ཤིང་རྟ་དེ་ཉིད་འཁོར་ལོ་དང་རྩུབ་ཤིང་སོགས་ལ་མ་བརྟེན་པའི་ཤིང་རྟས་སྟོང་པ་བཞིན་ཡིན་པའི་ཕྱིར་རོ།།གཞན་ཡང༌། ཚད་མ་གྲུབ་པའི་ལེའུ་ལས། དེ་ཕྱིར་མི་རྟག་ལས་སྡུག་བསྔལ། །སྡུག་བསྔལ་ལས་ནི་བདག་མེད་གསུངས།།ཞེས་མི་རྟག་སྡུག་བསྔལ་སྟོང་བདག་མེད་རྣམས་སྔ་མ་སྔ་མའི་རྟགས་ལས་ཕྱི་མ་ཕྱི་མ་དག་རིམ་གྱིས་སྒྲུབ་དགོས་པར་གསུངས་པ་ལྟར།མི་རྟག་པའི་རྟགས་ཀྱིས་སྡུག་བདེན་སྡུག་བསྔལ་བར་སྒྲུབ་ཚུལ་ཇི་ལྟར་ཡིན་ཞེ་ན། རྣམ་འགྲེལ་ལེའུ་གཉིས་པ་ལས།འདུ་བྱེད་སྡུག་བསྔལ་ལ་དགོངས་ནས། །སྡུག་བསྔལ་བསྒོམ་པར་གསུངས་པ་ཡིན། །ཞེས་འབྱུང་བ་ལྟར་སྐབས་འདིའི་སྡུག་བསྔལ་དེ་ནི་ཁྱབ་པ་འདུ་བྱེད་ཀྱི་སྡུག་བསྔལ་ལས་མ་འདས་ཤིང༌།དེ་ལྟར་ན་ཁྱབ་པ་འདུ་བྱེད་ཀྱི་སྡུག་བསྔལ་གྱི་གོ་དོན་ནི་ལས་དང་ཉོན་མོངས་ཀྱི་གཞན་དབང་ཅན་ལ་བྱ་དགོས་པར་སྡེ་བདུན་རྒྱན་ལས་ཆེས་གསལ་བར་གསུངས་ཤིང།དོན་གནད་འདི་དག་ལ་དཔག་ན་གཞི་གང་ཞིག་ཀ་བ་ཡིན་པར་རྟོགས་པ་ལ། གདུང་འདེགས་ཀྱི་དོན་བྱེད་ནུས་པ་རྟོགས་དགོས་པ་བཞིན་དུ་ཟག་བཅས་ཀྱི་ཕུང་པོ་འདི་ཉིད་སྡུག་བསྔལ་བར་རྟོགས་པ་ལ།ལས་དང་ཉོན་མོངས་ཀྱི་གཞན་དབང་དུ་སོང་བའི་ཚུལ་ཤེས་རྟོགས་བྱེད་དགོས་པའི་གནད་ཀྱིས། ཟག་ཕུང་ཆོས་ཅན།སྡུག་བསྔལ་བ་ཡིན་ཏེ། མི་རྟག་པ་ཡིན་པའི་ཕྱིར། ཞེས་བཀོད་ཀྱང་བསྒྲུབ་བྱའི་ཆོས་སུ་འགྲོ་རྒྱུ་ངོ་མ་ནི་ལས་དང་ཉོན་མོངས་པའི་གཞན་དབང་ཅན་དེ་ཉིད་ཡིན་པར་མ་ཟད།རྟགས་ལ་འགོད་རྒྱུའི་མི་རྟག་པ་ཡང་མི་རྟག་པ་རང་ལྡོག་ཙམ་མ་ཡིན་པར་རྐྱེན་ལས་སྐྱེ་བའི་ཁྱད་པར་སྦྱར་དགོས་པར་རྣམ་འགྲེལ་ལས་གསུངས་པས་གྲུབ་ལ།དེས་ན་མི་རྟག་སྡུག་བསྔལ་སོགས་རྟགས་ཀྱིས་སྒྲུབ་པའི་རིམ་པ་ནི། ཟག་བཅས་ཉེར་ལེན་གྱི་ཕུང་པོ་ཆོས་ཅན།མི་རྟག་སྟེ། རྐྱེན་ལས་སྐྱེ་བའི་འཁོར་བ་ཡིན་པའི་ཕྱིར། འདོད་ན། དེ་ཆོས་ཅན། ལས་དང་ཉོན་མོངས་ཀྱི་གཞན་དབང་ཅན་ཡིན་ཏེ།ལས་ཉོན་ལས་སྐྱེ་ཞིང་སྐད་ཅིག་ཀྱང་སྡོད་དབང་མེད་པའི་མི་རྟག་པ་ཡིན་པའི་ཕྱིར། འདོད་ན། དེ་ཆོས་ཅན།ཕུང་སོགས་ལ་མ་བརྟེན་པའི་བདག་ཡན་གར་བ་དང་རང་གིས་ངོ་བོ་ཉིད་ཀྱི་བདག་གིས་སྟོང་བ་ཡིན་ཏེ།ལས་དང་ཉོན་མོངས་ཀྱི་གཞན་དབང་ཅན་ཡིན་པའི་ཕྱིར། ཞེས་སོགས་ཀྱིས་སྡུག་བདེན་གྱི་རྣམ་པ་རིགས་པས་བཞག་པ་ཡིན་ནོ།།

གཉིས། ༽ ཀུན་འབྱུང་གི་རྣམ་པ་རྒྱུ་དང༌།ཀུན་འབྱུང། རབ་སྐྱེ། རྐྱེན་བཞི་ནི།

ཀུན་འབྱུང་གི་རྣམ་པ་རྒྱུ་དང༌། ཀུན་འབྱུང། རབ་སྐྱེ། རྐྱེན་བཞི་ནི།སྡུག་བདེན་གྱི་རྣམ་པ་བཞིན་ཕྲ་རགས་ཀྱི་བར་ཁྱད་དང་ནང་ཕན་ཚུན་ཁྱབ་ཆེ་ཆུང་མེད་ཅིང་ཀུན་འབྱུང་བདེན་པ་དང་དོན་གཅིག་མིང་གི་རྣམ་གྲངས་སུ་གྲུབ་མོད།ལོག་རྟོག་སེལ་ཚུལ་གྱི་བྱེད་ལས་ཀྱི་ཆ་ནས་མིང་གི་རྣམ་གྲངས་བཞིར་འབྱེད་པ་ཡིན་ཞིང༌། དེ་ཡང་འཐད་སྒྲུབ་ཀྱིས་རྒྱུ་མཚན་ཞིག་གི་སྒོ་ནས་བཞག་པ་ཤ་སྟག་སྟེ།སྡུག་བསྔལ་གྱི་ངོ་བོ་བསྐྱེད་པས་རྒྱུ་དང༌། སྡུག་བསྔལ་རྫས་རིགས་ཀུན་གྱི་འབྱུང་ཁུངས་སུ་གྱུར་པས་ཀུན་འབྱུང་དང༌།སྡུག་བསྔལ་དྲག་ཏུ་བསྐྱེད་པས་རབ་སྐྱེ་དང༌། སྡུག་བསྔལ་བརྒྱུད་མར་ལན་མང་དུ་སྐྱེད་པས་རྐྱེན་ཞེས་གསུངས་ཡོད།

གསུམ། ༽ འགོག་བདེན་གྱི་རྣམ་པ་འགོག་པ་དང༌།ཞི་བ། གྱ་ནོམ། ངེས་འབྱུང་བཞི

འགོག་བདེན་གྱི་རྣམ་པ་འགོག་པ་དང༌། ཞི་བ། གྱ་ནོམ། ངེས་འབྱུང་བཞི་ཡང་ཕྲ་རགས་སོགས་མེད་པར་ཀུན་འབྱུང་གི་རྣམ་པ་འཇོག་ཚུལ་དང་གཅིག་མཚུངས་ཡིན་ཞིང༌།དེ་ཡང་སྡུག་བསྔལ་སྤངས་པས་འགོག་པ་དང༌། ཉོན་མོངས་སྤངས་པས་ཞི་བ་དང༌། འདི་ལས་མཆོག་ཏུ་གྱུར་པའི་ཐོབ་བྱ་གཞན་མེད་པས་གྱ་ནོམ་པ་དང༌།འགོག་བདེན་དེ་ཐོབ་ནས་སླར་མི་ལྡོག་པས་ངེས་འབྱུང་སོགས་ཀྱི་མིང་གིས་བསྟན་འདུག

བཞི།༽ ལམ་བདེན་གྱི་རྣམ་པ་ལམ་དང༌།རིག་པ། སྒྲུབ་པ། ངེས་འབྱིན་བཞི

ལམ་བདེན་གྱི་རྣམ་པ་ལམ་དང༌། རིག་པ། སྒྲུབ་པ། ངེས་འབྱིན་བཞི་དེ་ཡང་ཐར་བར་བགྲོད་པར་བྱེད་པའི་དོན་གྱིས་ལམ་དང༌།ཉོན་མོངས་པའི་གཉེན་པོ་བྱེད་པའི་དོན་གྱིས་རིག་པ་དང༌། སེམས་ཕྱིན་ཅི་མ་ལོག་པར་སྒྲུབ་པར་བྱེད་པའི་དོན་གྱིས་སྒྲུབ་པ་དང༌།ཐར་པའི་གནས་སུ་གདོན་མི་ཟ་བར་འཁྲིད་པའི་དོན་གྱིས་ངེས་འབྱིན་ཏེ། ལམ་བདེན་གྱི་རྣམ་པ་བཞི་རིགས་པས་བཞག་པ་འདི་བཞིན་བདེན་བཞིའི་རྣམ་པ་ལྷག་མ་དག་ཀྱང་དངོས་སྟོབས་རིགས་པས་བཞག་པ་གོང་སྨོས་ལྟར་ཡིན་ཞིང༌།ལྷག་པར་སྟོང་ཉིད་ཀྱི་ལྟ་བ་ནི་ཆོས་ཕུང་བརྒྱད་ཁྲི་བཞི་སྟོང་གི་སྙིང་པོར་གྱུར་སྟབས། སྟོང་ཉིད་ཀྱི་ལྟ་བ་བརྗོད་བྱར་བྱེད་པའི་ཤེར་མདོ་ལ་རབ་དང་ཕུལ་དང་གཙོ་བོ་དང་གྱ་ནོམ་པ་ལྟ་བུར་གྱུར་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ཉིད་དེ།ཞེས་བཅོམ་ལྡན་འདས་རང་ཉིད་ཀྱིས་གསུངས་ཤིང༌། དེ་བཞིན་རྗེ་ཙོང་ཁ་པས་ཀྱང༌། ཁྱེད་ཀྱིས་ཇི་སྙེད་བཀའ་བསྩལ་པ།།རྟེན་འབྲེལ་ཉིད་ལས་བརྩམས་ཏེ་འཇུག །ཅེས་ལས་འབྲས་སྐོར་གྱི་བརྗོད་བྱ་གང་བཟུང་ནས་གསུངས་པ་ཐམས་ཅད་སྟོང་པ་ཉིད་ལ་འཇུག་ཆེད་ཁོ་ནར་གསུངས།དེ་ཕྱིར་བསྟན་པའི་སྙིང་པོ་སྟོང་ཉིད་ཀྱི་འཇོག་ཚུལ་རིགས་པས་གྲུབ་ན་ཆོས་ཀྱི་ཡན་ལག་དག་ཀྱང་རང་ཤུགས་ཀྱིས་མི་བསླུ་བར་རྟོགས་ནུས་པ་ཡིན་ཏེ།ཆོས་ཀྱི་གྲགས་པས། གཙོ་བོའི་དོན་ལ་མི་བསླུ་ཕྱིར། །གཞན་ལའང་རྗེས་སུ་དཔག་པ་ཡིན། །ཞེས་དང༌།སངས་རྒྱས་ཀྱིས་གསུང་ལྐོག་གྱུར་ལ། །གང་ཞིག་ཐེ་ཚོམ་སྐྱེ་འགྱུར་བ། །དེ་ཡིས་སྟོང་པ་ཉིད་བརྟེན་ཏེ།།འདི་ཉིད་ཁོ་ནར་ཡིད་ཆེས་བྱ། །ཞེས་གསུངས་པའི་གནད་ཀྱང་དེ་ལ་ཐུག་པས་ཡིན། འོ་ན་ཅི་ཞིག་ལ་སྟོང་པ་ཉིད་ཀྱི་ལྟ་བ་ཞེས་ཟེར་ན།རང་གི་མཚན་ཉིད་ཀྱིས་གྲུབ་པས་སྟོང་པའི་སྟོང་པ་ཞིག་ལ་ཟེར།རང་གི་མཚན་ཉིད་ཀྱིས་གྲུབ་པ་དང༌། རང་ངོས་ནས་གྲུབ་པ། རང་བཞིན་གྱིས་གྲུབ་པ། དོན་དམ་པར་གྲུབ་པ།བདེན་པར་གྲུབ་པ། བདག་ཏུ་གྲུབ་པ་སོགས་སྐབས་འདིར་མིང་གི་བར་ཁྱད་ཙམ་ལས་དོན་གཅིག་མཚུངས་ཡིན།གཞི་གྲུབ་ན་དེ་དག་གིས་སྟོང་པས་ཁྱབ་ཏེ། གལ་སྲིད་རང་གི་མཚན་ཉིད་ཀྱིས་གྲུབ་ན་མིང་བརྡས་བཞག་ཙམ་ལ་མ་ལྟོས་པར་ཆོས་རང་སྟེང་ནས་ཚུགས་ཐུབ་ཏུ་གྲུབ་པ་ཞིག་དགོས་པས་གནས་ཚུལ་དེ་འདྲ་ཞིག་དངོས་པོའི་གཤིས་བབ་ལ་རིགས་པས་བརྟག་ཚེ་རྙེད་རྒྱུ་ཤེས་བྱ་ལ་མི་སྲིད་པ་ཡིན།རིགས་པའི་དཔྱོད་ཚུལ་གྱི་སྒོ་དེ་ཡང་འདིར་རྩ་བའི་དོན་ཚན་གཉིས་སུ་བསྡུས་ནས་བཤད་རྒྱུ་ཡིན།

(༡)བྱ་དངོས་གང་ཞིག་ལ་མིང་གི་བཏགས་དོན་བཙལ་ནས་མི་རྙེད་པའི་ཚུལ་རིགས་པས་གྲུབ་ཚུལ་ནི།

བྱ་དངོས་ཐམས་ཅད་རྣམ་རྟོག་དང་མིང་བརྡས་བཞག་པ་ཙམ་ལས་བྱ་དངོས་རང་རང་ལ་ཐ་སྙད་བཏགས་པའི་དོན་དེ་ཐ་སྙད་གདགས་གཞིའི་སྟེང་དུ་རྡུལ་ཙམ་ཡང་རྙེད་རྒྱུ་མེད་པར་ཐ་སྙད་གང་བཏགས་པ་ཚང་མ་བློ་གློ་བུར་བས་བཏགས་པ་ཤ་སྟག་ཡིན་ལ།དཔེར་ན། གཞི་ཆང་ཕོར་ལྟ་བུར་མཚོན་ན་ཆང་ཕོར་ཞེས་པའི་ཐ་སྙད་དེའི་གདགས་གཞིའི་སྟེང་དུ་ཆང་ཕོར་ཞེས་འདོགས་དགོས་པའི་རྒྱུ་མཚན་རྡུལ་ཙམ་ཡང་མེད་ཅིང༌།ཐ་སྙད་གདགས་གཞི་དེར་ཆང་ཕོར་ཞེས་བཏགས་པའི་དོན་དེ་ཆང་ཕོར་དེའི་ཕྱི་ནང་གཉིས་དང༌། སྟོད་སྨད་བར་གསུམ་དབྱིབས་ཁ་དོག་ཆ་ཤས་ཚོགས་པ་སོགས་གང་དུ་བཙལ་ཀྱང་རྙེད་རྒྱུ་མེད་མོད།འགའ་ཞིག་གི་བསམ་ངོར་ཆང་ཕོར་གྱི་ཚོགས་པ་ཉིད་ཆང་ཕོར་ལས་མ་འདས་སྙམ་ན།དེ་ལ་དཔྱད་གཞི་འདི་ཡོད་དེ།ཇ་ཕོར་དུ་བེད་སྤྱོད་གཏོང་བཞིན་པའི་ཕོར་བ་དེ་ཆང་ཕོར་ཞེས་པའི་ཐ་སྙད་གདགས་གཞི་དེའི་ཆ་ཤས་དང༌།མཐུན་པའི་རྐྱེན་སོགས་ཚོགས་ཡོད་པས་དེ་ཡང་ཆང་ཕོར་ཡིན་པར་ཐལ། ཁྱེད་ཀྱི་བསམ་ཚུལ་བཞིན་ཇ་ཕོར་དེ་ལ་ཆང་ཕོར་དུ་འཇོག་པའི་རྒྱུ་མཚན་མཐའ་དག་ཚང་བའི་ཕྱིར།འདོད་ན། ཆ་ཤས་ཀྱི་ཚོགས་པ་ལྡན་ཚད་ཀྱི་གཟུགས་ཅན་ཐམས་ཅད་ཆང་ཕོར་དུ་ཐལ་བར་འགྱུར་རོ། །ད་དུང་གཞི་ཤིང་རྟ་ལྟ་བུར་མཚོན་ན་ཤིང་རྟའི་རྩུབ་ཤིང་དང་འཁོར་ལོ་ཚོགས་པ་སོགས་གང་ཡང་ཤིང་རྟ་མ་ཡིན་པའི་ཚུལ་དེ་ཡང༌།དབུ་མ་འཇུག་པ་ལས།ཤིང་རྟ་རང་ཡན་ལག་ལས་གཞན་འདོད་མིན། །གཞན་མིན་མ་ཡིན་དེ་ལྡན་ཡང་མིན་ཞིང༌།།ཡན་ལག་ལ་མིན་ཡན་ལག་དག་དེར་མིན། ། འདུས་པ་ཙམ་མིན་དབྱིབས་མིན་ཇི་བཞིན་ནོ། །ཞེས་གསུངས་པས་གྲུབ་ཅིང༌།འོ་ན་ཤིང་རྟ་སོགས་མེད་དམ་སྙམ་ན། གདགས་གཞི་ཤིང་ཕྲན་སོགས་ཚོགས་པའི་ངོས་ནས་མིང་རྐྱང་བཏགས་ཡོད་ཙམ་གྱི་ཤིང་རྟའམ་འཇིག་རྟེན་པ་ལ་གྲགས་ཚོད་ཀྱིས་བཞག་པའི་ཤིང་རྟ་ནི་སུས་ཀྱང་བསྙོན་དུ་མེད་པས།དཔལ་ལྡན་ཟླ་བས། འཇིག་རྟེན་གྲགས་པའི་ཀུན་རྫོབ་མ་བརླག་ཅིག །ཅེས་དབུ་མ་འཇུག་པར་གསུངས།དེས་ན་དོན་དམ་དཔྱོད་བྱེད་ཀྱི་རིགས་པས་བརྟགས་ནས་མེད་ན་མེད་གོ་མི་ཆོད་ལ། ཐ་སྙད་དཔྱོད་བྱེད་ཀྱི་རིགས་པས་རྙེད་ན་ཡོད་གོ་ཆོད་དོ།།མིང་རྐྱང་བཏགས་ཡོད་ཙམ་གྱི་ཤིང་རྟ་དེ་ཡང་དོན་དམ་དཔྱོད་བྱེད་ཀྱི་རིགས་པས་བཙལ་ན་རྙེད་རྒྱུ་མེད་པ་ནི་གོང་དང་མཚུངས།དེ་ལྟ་ན་རིགས་པ་འདིས་འཇིག་རྟེན་གྱི་བྱ་དངོས་མཆིས་སོ་ཅོག་གི་གཤིས་ལུགས་ལ་འགྲེལ་བཤད་རྒྱག་ཐུབ་པ་སྨོས་མ་དགོས།

(༢)ཆོས་ཐམས་ཅད་རང་རང་གི་ངོས་ནས་ཚུགས་ཐུབ་ཏུ་གྲུབ་པ་རྡུལ་ཙམ་ཡང་མེད་ཅིང་ཕན་ཚུན་བརྟེན་པའམ་ལྟོས་པའི་སྒོ་ནས་ཡོད་ཚུལ་ནི།

གཞི་ཁང་པ་ལྟ་བུ་ལ་མཚོན་ན།རང་ཉིད་ཀྱི་ལྷན་ཅིག་བྱེད་རྐྱེན་བཟོ་མཁན་གྱི་སྐྱེས་བུ་དང་ཉེར་ལེན་ས་རྡོ་ཤིང་སོགས་ལ་བརྟེན་ནས་གྲུབ་ཅིང་གནས་པ་ཙམ་དང༌།ཁང་པའི་མཐོ་དམན་དང་ཆེ་ཆུང་དག་ཀྱང་ཁང་གཟུགས་རང་ཉིད་ལས་ཆེ་བ་དག་ལ་ལྟོས་ཏེ་རང་ཉིད་ཆུང་བའི་ངོ་བོར་བཞག་པ་ཙམ་དུ་གནས་པས་གཞན་ལ་བརྟེན་པ་དང༌།གཞན་ལ་ལྟོས་པ་སོགས་མེད་པར་བྱ་དངོས་གཅིག་ཀྱང་མེད་ཅིང། དེར་བརྟེན་གཞན་ལ་མ་བརྟེན་པར་རང་དབང་ཚུགས་ཐུབ་དུ་གྲུབ་པའི་ཆོས་ཀྱིས་སྟོང་པ་དེ་ནི་སྟོང་ཉིད་དང་ཆོས་ཀུན་གྱི་གནས་ལུགས་མཐར་ཐུག་པ་དེ་ཡིན།དེ་བཞིན་དུ་བདེན་རྫུན་དང༌། ཡིན་མིན། རྒྱུ་འབྲས། སྤང་བླང༌། འཁོར་འདས། སྣང་མུན། ཉིན་མཚན།རིང་ཐུང་སོགས་འཇིག་རྟེན་རང་ག་བའི་ངོར་གང་བཞག་པ་ཐམས་ཅད་ཀྱང་ཕན་ཚུན་ལྟོས་ནས་བཞག་ཙམ་མ་ཡིན་པར་བྱ་དངོས་རང་རང་གི་ངོས་ནས་རང་བཞིན་གྱིས་གྲུབ་པ་རྡུལ་ཙམ་ཡང་མེད་པའང་རྟོགས་ནུས་སོ།།ཞོར་དུ་དབུ་མའི་གཞུང་རྣམས་སུ་གསུང་བའི་བདེན་མེད་སྒྲུབ་བྱེད་ཀྱི་གཏན་ཚིགས་གནད་ཆེ་བ་འགའ་འགྲེལ་བཤད་དང་བཅས་འགོད་པར།

ཀ༽ ཆོས་རྣམས་ཀྱི་ངོ་བོ་ལ་དཔྱོད་པ་གཅིག་ཏུ་བྲལ་གྱི་གཏན་ཚིགས་ནི།

དབུ་མ་རྒྱན་ལས།བདག་དང་གཞན་སྨྲའི་དངོས་འདི་དག ། ཡང་དག་པར་ནི་གཅིག་པ་དང༌། །དུ་མའི་རང་བཞིན་བྲལ་བའི་ཕྱིར།། བདེན་པར་མེད་དེ་གཟུགས་བརྙན་བཞིན། །ཞེས་གསུངས། དོན་ནི། གཞན་སྡེ་ཕྱི་རོལ་བ་དག་གིས་བདག་སྟེ་རྟག་གཅིག་རང་དབང་ཅན་གྱི་ངོ་བོར་དང༌།རང་སྡེ་དོན་སྨྲ་སྡེ་གཉིས་ཀྱིས་གཞན་ཏེ་བདེན་གྲུབ་ཀྱི་ངོ་བོར་སྨྲ་བའི་ཕལ་བའི་མིག་ལ་རྗེན་པར་སྣང་བཞིན་པའི་བྱ་དངོས་འདི་དག་ནི།དོན་དངོས་སུ། དོན་དམ་དཔྱོད་བྱེད་ཀྱི་རིགས་པས་བརྟག་ཚེ་ཡང་དག་པར་ནི་སྟེ་བདེན་གྲུབ་ཀྱི་གཅིག་དང༌།བདེན་གྲུབ་ཀྱི་དུ་མའི་རང་བཞིན་གང་དུའང་གྲུབ་པ་བྲལ་བའི་ཕྱིར་ན། བདེན་པར་མེད་པ་སྟེ་བློ་གནོད་མེད་ལ་སྣང་བའི་དབང་གིས་བཞག་ཙམ་མ་ཡིན་པར་ཡུལ་རང་གི་ངོས་ནས་སྡོད་ལུགས་སུ་གྲུབ་པ་རྡུལ་ཙམ་ཡང་མེད་དེ།དཔེར་ན། ང་ཚོའི་མིག་སྔར་སྣང་བའི་བྱད་བཞིན་གྱི་འདྲ་རིས་མེ་ལོང་ནང་འཕོས་པའི་གཟུགས་བརྙན་བཞིན་བདེན་བདེན་ལྟར་སྣང་ཡང་དོན་ལ་སྙིང་པོས་དབེན་པ་ལྟ་བུའོ་ཞེས་པའི་དོན་དང༌།གཏན་ཚིགས་ཀྱི་རྣམ་པར་སྦྱར་ཚེ། མྱུ་གུ་ཆོས་ཅན། བདེན་པར་མེད་དེ། བདེན་གྲུབ་ཀྱི་གཅིག་དང་བདེན་གྲུབ་ཀྱི་དུ་མ་གང་རུང་དང་བྲལ་བའི་ཕྱིར་ཞེས་པའོ།།སྒྲུབ་ཚུལ་དེ་ཡང་ཆོས་འཐད་པ་ཡིན་ཏེ། གལ་སྲིད་གཞི་མྱུ་གུ་དེ་ཉིད་བདེན་པར་གྲུབ་ན་བདེན་གྲུབ་ཀྱི་གཅིག་དང་བདེན་གྲུབ་ཀྱི་ཐ་དད་གང་རུང་དུ་གྲུབ་དགོས་ལ།གྲུབ་ཚུལ་དེ་གཉིས་ལས་བདེན་པར་གྲུབ་ཚུལ་ཕུང་སུམ་པ་ཞིག་མེད་པ་དངོས་པོའི་གནས་ཚད་ལ་སོང་སྟབས།མྱུ་གུ་དེ་ཉིད་རིགས་པས་བརྟགས་ཚེ་བདེན་པར་གྲུབ་ཚུལ་དེ་གཉིས་གང་དུའང་གྲུབ་མེད་པའི་གནད་ཀྱིས་མྱུ་གུ་བདེན་མེད་དུ་སྒྲུབ་པ་ཡིན་ནོ།།

ཁ༽ དངོས་པོ་རྣམས་ཀྱི་རྒྱུ་ལ་དཔྱོད་པ་རྡོ་རྗེ་ཟེགས་མའི་གཏན་ཚིགས་ནི།

རྩ་བ་ཤེས་རབ་ལས། བདག་ལས་མ་ཡིན་གཞན་ལས་མིན།།གཉིས་ལས་མ་ཡིན་རྒྱུ་མེད་མིན། །དངོས་པོ་གང་དང་གང་ན་ཡང༌། །སྐྱེ་བ་ནམ་ཡང་ཡོད་མ་ཡིན། །ཞེས་གསུངས།དོན་ནི། དངོས་པོ་རྣམས་རང་རང་གི་རྒྱུ་ལས་སྐྱེ་བའི་ཚུལ་ལ་དོན་དམ་དཔྱོད་བྱེད་ཀྱི་རིགས་པས་བརྟག་ཚེ།བདག་སྟེ་རང་དང་ངོ་བོ་གཅིག་པའི་རྒྱུ་ལས་སྐྱེ་བ་མ་ཡིན་ཞིང༌། གཞན་ཏེ་དོན་དམ་པར་རང་གི་མཚན་ཉིད་ཀྱིས་གྲུབ་པའི་རྒྱུ་ལས་སྐྱེ་བའང་མིན་ལ།གཞན་ཡང་དེ་གཉིས་ཚོགས་ལས་སྐྱེ་བ་མ་ཡིན་ཞིང༌། ཀུན་རྫོབ་རྟེན་འབྲེལ་གྱི་རྒྱུ་ཙམ་ལའང་མ་ལྟོས་པར་གཏན་མེད་ཀྱི་རྒྱུ་གཞན་ལས་སྐྱེ་བའང་མིན་པའི་གནད་ཀྱིས་དངོས་པོར་གྲུབ་པ་གང་དག་ཡུལ་དུས་གང་དུའང་སྐྱེ་བ་དུས་ནམ་ཡང་ཡོད་པ་མ་ཡིན་ཞེས་པའི་དོན་དང༌།གཏན་ཚིགས་ཀྱི་རྣམ་པར་བཀོད་ན། མྱུ་གུ་ཆོས་ཅན། དོན་དམ་པར་མི་སྐྱེ་སྟེ། དོན་དམ་པར་བདག་དང༌།གཞན་དང༌། གཉིས་ཀ་དང༌། རྒྱུ་མེད་སོགས་མཐའ་བཞི་གང་དུའང་མི་སྐྱེ་བའི་ཕྱིར་ཞེས་པའོ། །

སྒྲུབ་ཚུལ་དེ་ཡང་ཆེས་འཐད་པ་ཡིན་ཏེ། དཔེར་ན། གཞི་མྱུ་གུ་ལྟ་བུར་མཚོན་ན།གལ་སྲིད་མྱུ་གུ་དེ་ཉིད་དོན་དམ་པར་སྐྱེ་ན་དོན་དམ་པར་བདག་གཞན་གང་རུང་དང༌། ཡང་ན་དེ་གཉིས་ཀ་དང༌།རྒྱུ་མེད་གང་རུང་སྟེ་སྐྱེ་ཚུལ་གྱི་མཐའ་བཞི་ཅི་རིགས་ལས་སྐྱེ་དགོས་པར་སོང༌། དངོས་སྟོབས་ཀྱི་རིགས་པས་དཔྱད་ཚེ།མཐའ་དེའི་གང་དུའང་སྐྱེ་བ་མེད་སྟབས། དོན་དམ་པར་སྐྱེ་བ་མེད་ཅེས་པ་ཡིན། སྐྱེ་དངོས་ཐམས་ཅད་ཀྱང་དོན་དམ་པར་སྐྱེ་བ་མེད་པ་འདི་དང་གཅིག་མཚུངས་ཡིན་མོད།འོན་ཀྱང་དོན་དམ་པར་སྐྱེ་བ་བཀག་པའི་ཤུགས་ཀྱིས་རྟེན་འབྲེལ་ཙམ་གྱི་སྐྱེ་བ་ལ་བརྟེན་པ་ཡང་གཅིག་མཚུངས་ཡིན་པ་ཤེས་དགོས།

ག༽ འབྲས་བུ་ལ་དཔྱོད་པ་ཡོད་མེད་སྐྱེ་འགོག་གི་གཏན་ཚིགས་ནི།

དབུ་མ་སྣང་བ་ལས། ཡོད་པ་རྣམ་པར་མི་སྐྱེ་སྟེ། །མེད་པ་ནམ་མཁའི་པདྨོ་བཞིན།།ཞེས་པས་བསྟན་ཅིང༌། གཏན་ཚིགས་ཀྱི་རྣམ་པར་བཀོད་ན། མྱུ་གུ་ཆོས་ཅན། དོན་དམ་པར་མི་སྐྱེ་སྟེ།རང་གི་རྒྱུའི་དུས་སུ་ཡོད་པར་ཡང་མི་སྐྱེ། རང་གི་རྒྱུའི་དུས་སུ་མེད་པར་ཡང་མི་སྐྱེ་བའི་ཕྱིར་རོ།།དེ་ཡང་དངོས་པོའི་འབྲས་བུ་རྣམས་དོན་དམ་པར་སྐྱེ་ན་རང་གི་རྒྱུའི་དུས་སུ་ཡོད་པ་དང་མེད་པ་གང་རུང་ལས་སྐྱེ་དགོས་ལ།སྐྱེ་ཚུལ་དེ་ལས་ཕུང་སུམ་པ་ཞིག་མེད་ཅིང༌། དངོས་གཤིས་རིགས་པས་བརྟག་ཚེ་འབྲས་བུ་རྣམས་རང་གི་རྒྱུའི་དུས་སུ་ཡོད་པ་དང་མེད་པ་གང་དུའང་སྐྱེ་བ་མེད་པར་མཐོང་བས་དོན་དམ་པར་སྐྱེ་བ་མེད་པར་སྒྲུབ་པ་ཡིན་ནོ།།

ང༽ རྒྱུ་འབྲས་གཉིས་ཀ་ལ་དཔྱོད་པ་མུ་བཞི་སྐྱེ་འགོག་གི་གཏན་ཚིགས་ནི།

བདེན་གཉིས་ལས།དུ་མས་གཅིག་གི་དངོས་མི་བྱེད། །དུ་མས་དུ་མ་བྱེད་པའང་མིན། །གཅིག་གིས་དུ་མའི་དངོས་མི་བྱེད།།གཅིག་གིས་གཅིག་བྱེད་པ་ཡང་མིན། །ཞེས་བསྟན་ཅིང༌། གཏན་ཚིགས་ཀྱི་རྣམ་པར་བཀོད་ན། མྱུ་གུ་ཆོས་ཅན།དོན་དམ་པར་མི་སྐྱེ་སྟེ། རྒྱུ་དུ་མས་འབྲས་བུ་གཅིག་ཁོ་ན་དོན་དམ་པར་སྐྱེད་པ་ཡང་མ་ཡིན།རྒྱུ་དུ་མས་འབྲས་བུ་དུ་མ་ཁོ་ན་དོན་དམ་པར་སྐྱེད་པ་ཡང་མ་ཡིན། རྒྱུ་གཅིག་གིས་འབྲས་བུ་དུ་མ་ཁོ་ན་དོན་དམ་པར་སྐྱེད་པ་ཡང་མ་ཡིན།རྒྱུ་གཅིག་གིས་འབྲས་བུ་གཅིག་ཁོ་ན་དོན་དམ་པར་སྐྱེད་པ་ཡང་མ་ཡིན་པའི་ཕྱིར་ཞེས་པའོ། །

སྒྲུབ་ཚུལ་དེ་ནི་ཆེས་འཐད་པ་ཞིག་སྟེ། དེ་ཡང་མྱུ་གུས་མཚོན་པའི་བྱ་དངོས་ཀྱི་འབྲས་བུ་རྣམས་ནི།གལ་སྲིད་དོན་དམ་པར་རང་རྒྱུ་ལས་སྐྱེས་ན་རྒྱུ་དེས་འབྲས་བུ་སྐྱེད་ཚུལ་ལ་བརྟགས་ཏེ་རྒྱུ་དུ་མས་འབྲས་བུ་གཅིག་ཁོ་ན་དོན་དམ་པར་སྐྱེད་པ་ཡིན་ནམ།རྒྱུ་དུ་མས་འབྲས་བུ་དུ་མ་ཁོ་ན་དོན་དམ་པར་སྐྱེད་པ་ཡིན། ཡང་ན། རྒྱུ་གཅིག་གིས་འབྲས་བུ་དུ་མ་ཁོ་ན་དོན་དམ་པར་སྐྱེད་པ་ཡིན་ནམ།རྒྱུ་གཅིག་གིས་འབྲས་བུ་གཅིག་ཁོ་ན་དོན་དམ་པར་སྐྱེད་པ་ཡིན། ཞེས་ཕྲ་ཞིབ་རིགས་པས་དཔྱད་ཚེ་སྐྱེད་ཚུལ་དེ་དག་གང་དུའང་གནས་པ་མིན་སྟབས།དེ་དག་རྒྱུ་མཚན་དུ་བཀོད་ནས་འབྲས་བུ་རྣམས་དོན་དམ་པར་རྒྱུ་ལས་སྐྱེ་བ་མེད་ཅེས་སྒྲུབ་པ་ཡིན་ནོ།།

ཅ༽རིགས་པའི་རྒྱལ་པོ་རྟེན་འབྲེལ་གྱི་གཏན་ཚིགས་ནི།

དབུ་མ་འཇུག་པ་ལས།དེའི་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲ་བ་མཐའ་དག་གཅོད་པར་བྱེད། །ཅེས་བསྟན་ལ།གཏན་ཚིགས་ཀྱི་རྣམ་པར་བཀོད་ན། མྱུ་གུ་ཆོས་ཅན། བདེན་པར་མེད་དེ། རྟེན་འབྲེལ་ཡིན་པའི་ཕྱིར།ཞེས་པའོ། །དེ་ཡང་འདོགས་བྱེད་ལ་ལྟོས་ནས་གྲུབ་པའི་ཆོས་ནི་རྟེན་འབྱུང་གི་གོ་དོན་ཡིན་ཞིང༌།བྱ་དངོས་གང་དང་གང་ཡིན་ཀྱང་རང་རང་གི་འདོགས་བྱེད་མིང་བརྡ་ཙམ་གྱིས་བཞག་པ་ལ་མ་ལྟོས་པར་རང་ངོས་ནས་གྲུབ་པ་རྡུལ་ཙམ་ཡང་ཤེས་བྱ་ལ་མི་སྲིད་དེ།དཔེར་ན། ཕོར་པ་ཞིག་ཆང་འཐུང་བྱེད་དུ་བེད་སྤྱོད་བཏང་ཚེ་ཆང་ཕོར་དང་ཇ་འཐུང་བྱེད་དུ་བེད་སྤྱོད་བཏང་ཚེ་ཇ་ཕོར་ཞེས་མིང་བརྡས་དབང་བསྒྱུར་བའི་དཔེ་མཚོན་གོང་སྨོས་བཞིན་དང༌།ཡང་གལ་ཏེ་མིང་བརྡས་བཞག་ཙམ་དུ་གྲུབ་པ་མ་ཡིན་པར་ཡུལ་རང་གི་ངོས་ནས་གྲུབ་པ་ཡིན་ན། མིང་བརྡས་གདགས་གཞིར་ཚུགས་ཐུབ་ཏུ་གྲུབ་དགོས།དེ་ལྟར་ན་དངོས་མཐོང་ལག་ཟིན་གྱི་གཟུགས་ཅན་འདི་ཚོ་མིང་དོན་གྱི་འབྲེལ་བ་ཤེས་མིན་ལ་མ་ལྟོས་པར་ང་ཚོའི་མིག་སྔར་གཏད་པ་ཙམ་གྱིས་བྱ་དངོས་འདིའི་མིང་ལ་འདི་དང་འདིའོ་ཞེས་མིང་སྦྱོར་གྱི་ཀུན་རྟོག་འབད་མེད་དུ་སྐྱེ་དགོས་པར་འགྱུར་བའི་ཐལ་བ་ཟློག་ཏུ་མེད་པ་དང༌།འདུས་བྱས་ཀྱི་རིགས་རྣམས་རང་སྐྱེད་བྱེད་ཀྱི་རྒྱུ་རྐྱེན་ལ་བརྟེན་པ་ཡང་ཤིན་ཏུ་མི་རུང་བར་འགྱུར་བ་འདི་བཞིན་ཤེས་བྱ་ཐམས་ཅད་མིང་བརྡས་བཞག་ཙམ་དུ་གྲུབ་པ་མིན་ན་དངོས་གཤིས་རིགས་པའི་དོན་གནད་མང་པོ་ཞིག་དང་འགལ་བར་དོགས་སོ།།དོན་གྱི་གནད་འདི་ཚོ་ལ་དགོངས་ནས་སློབ་དཔོན་ཀླུ་སྒྲུབ་ཀྱིས་ཀྱང༌། གང་ཕྱིར་རྟེན་འབྱུང་མ་ཡིན་པའི།།ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་སོ། །དངོས་པོའི་གཤིས་ལུགས་ལ་དཔྱོད་པའི་རིགས་པ་དེ་དག་ལས་རྟེན་འབྱུང་གི་རིགས་པ་འདི་ནི་ཤིན་ཏུ་གལ་ཆེ་ཞིང་མཐའ་གཉིས་ཅིག་ཅར་བསལ་བའི་ནུས་སྟོབས་ལྡན་པར་མ་ཟད་རིགས་པ་ཐམས་ཅད་ཀྱི་རྒྱལ་པོ་ལྟ་བུར་བསྔགས་པ་ཡིན་ཏེ།དཔེར་ན། ཞབས་འོག་གི་བླུན་པོ་ཚོགས་ཀྱིས་བྱ་བའི་ཐད་ལ་གྲོས་མོལ་གཏན་འབེབས་གང་གནང་བ་ཐམས་ཅད་མཐར་རྒྱལ་པོ་ལ་སྙན་གསན་གྱིས་ཐག་གཅོད་པ་བཞིན་དུ་གཅིག་དུ་བྲལ་སོགས་རིགས་པ་གཞན་གྱིས་གང་དཔྱད་པ་ཐམས་ཅད་མཐར་རྟེན་འབྱུང་གི་རིགས་པ་འདི་ལ་གཏུག་དགོས་པའི་གནད་ཀྱིས་ཡིན་ཞིང༌།དེ་ལྟར་སངས་རྒྱས་ཀྱི་མདོ་ལས་གསུངས་པའི་བདེན་བཞིའི་འཇུག་ལྡོག་གི་རྣམ་གཞག་དང༌། ཆོས་ཐམས་ཅད་བདེན་གྲུབ་ཀྱིས་སྟོང་པའི་སྟོང་པ་ཉིད་ཀྱི་འཇོག་ཚུལ་ལ་དངོས་གཤིས་བདེན་དོན་རིགས་པས་བརྟགས་གཞིགས་གནང་ཚེ་ཡང་དག་པའི་རིགས་ལམ་དང་འགལ་བའི་ཆ་རྒྱུས་ཙམ་ཡང་མེད་པར་མ་ཟད།གནད་གང་ཡིན་ལ་རིགས་པའི་རྒྱབ་གཉེར་དང་བཅས་པར་ངེས་པ་ན། རྒྱལ་བའི་གསུང་རབ་ཀྱི་ནང་དོན་རྟོགས་པའི་བསྟན་པ་ཐབས་དང་བཅས་པ་སྐྱོན་མེད་མི་བསླུ་བར་རྟོགས་པ་ཡིན་ལ།དེ་ལས་རྒྱལ་བའི་ལུང་གི་བསྟན་པ་མི་བསླུ་བར་གྲུབ་པ་ཡིན་ཏེ། དེ་ཡང་དཔེར་ན། མིའི་གཞན་གྱི་སྐད་ཆ་བདེན་པ་ཡིན་མིན་སྐད་ཆ་དེའི་ནང་དོན་ལ་བརྟགས་ཏེ་མཐར་སྐད་ཆ་དེ་བདེན་རྫུན་ཡིན་མིན་གྱི་ཐག་གཅོད་བྱ་བ་དང་ཆེས་མཚུངས་སོ།།

རྩོམ་སྒྲིག་འགན་འཁུར་བ།  ཁཱ་ཤེས་རབ་རྒྱ་མཚོ།  མགར་རྩེ་ཉི་ཟེར། འབའ་སྣང་གྲོལ།