དུས་ཆེན་གྱི་བཤད་པ་ངོ་མཚར་དགའ་སྐྱེད་ཅེས་བྱ་བ་བཞུགས་སོ།།

སྟོན་པ་བཅོམ་ལྡན་འདས་མཉམ་མེད་ཤཱཀྱའི་རྒྱལ་པོ་ལ་ཕྱག་འཚལ་ལོ། ། བདག་ཅག་གི་སྟོན་པ་དང་རྒྱུད་གཅིག་པའི་ལྷའི་བུ་དམ་པ་དོག་དཀར་པོས་དགའ་ལྡན་གྱི་ལྷ་རྣམས་ལ་ཆོས་སྟོན་ཅིང་བཞུགས་པ་ལས་འཛམ་བུ་གླིང་དུ་མཛད་པ་བཅུ་གཉིས་སྟོན་པའི་དུས་ལ་བབ་པ་ན་མི་ཕམ་པ་རང་གི་ཚབ་ཏུ་བསྐོས་ཏེ་དགའ་ལྡན་ནས་འཕོ་ཚུལ་བསྟན་ཅིང༌། ས་ལུག་ཧོར་ཟླ་དྲུག་པའི་ཚེས་བཅོ་ལྔ་ལ་ཡུམ་སྒྱུ་མ་ལྷ་མཛེས་ཀྱི་ལྷུམས་སུ་ཞུགས། དེ་ནས་ཟླ་བ་བཅུ་རྫོགས་པའི་ལྕགས་སྤྲེལ་ས་ག་ཟླ་བ་བཞི་པའི་ཚེས་བདུན་ལ་ལུམྦཱིའི་ཚལ་དུ་ཡུམ་བཞེངས་ནས་པ་ལཀྵའི༌ཡལ་ག་ལ་ཕྱག་གཡས་པས་བརྟེན་ནས་བཞུགས་པའི་གློ་གཡས་པ་ནས་སྐུ་བལྟམས།
     ས་བྱི་ཧོར་ཟླ་བཞི་པའི་ཚེས་བརྒྱད་ལ་མཆོད་རྟེན་རྣམ་དག་གི་དྲུང་དུ་ཉིད་ཀྱི་དབུ་སྐྲ་ཉིད་ཀྱིས་གསིལ།བརྒྱ་བྱིན་གྱིས་གོས་ངུར་སྨྲིག་ཕུལ་བ་བཞེས་ཏེ་རབ་ཏུ་བྱུང༌།
     ཤིང་རྩ་ཟླ་བ་བཞི་བའི་ཚེས་བཅོ་ལྔ་ལ་མ་ག་ཏ་རྡོ་རྗེ་གདན་གྱི་བྱང་ཆུབ་ཀྱི་ཤིང་ཨ་ཤོད་ཐའི་དྲུང་དུ་རྩྭ་ཟོར་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་ཏེ་མངོན་པར་རྫོགས་པར་སངས་རྒྱས།ལོ་དེ་ཀའི་ཟླ་བ་དྲུག་པའི་ཚེས་བཞི་ལ་ཚངས་པ་དང་བརྒྱ་བྱིན་གཉིས་ཀྱིས་ཆོས་འཁོར་བསྐོར་བར་གསོལ་བ་བཏབ་པ་ལ་བརྟེན་ནས་ཝ་ར་ཎ་སེར་འཁོར་ལྔ་སྡེ་བཟང་པོ་སོགས་ལ་བཀའ་དང་པོ་བདེན་པ་བཞིའི་ཆོས་འཁོར་བསྐོར།
     ལྕགས་བྱི་ཟླ་བ་དགུ་པའི་ཉེར་གཉིས་ལ་ཡུམ་སྒྱུ་མ་ལྷ་མཛེས་ཀྱི་སྐུའི་སྐྱེ་བ་སོགས་ལྷ་མང་པོ་བདེན་པ་མཐོང་བ་ལ་བཀོད་དེ་སུམ་བཅུ་རྩ་གསུམ་ནས་འཛམ་བུ་གླིང་དུ་བྱོན་པས་ལྷ་ལས་བབ།
     ལྕགས་འབྲུག་ས་ག་ཟླ་བའི་ཚེས་བཅོ་ལྔ་ལ་ཡུལ་རྩ་ཅན་དུ་ཤིང་སཱ་ལ་ཟུང་གི་བར་དུ་སྐུ་དངོས་ཀྱི་གདུལ་བྱ་རྣམས་ཀྱི་དོན་རྫོགས་པར་མཛད་དེ་རྟག་འཛིན་ཅན་ཆོས་ལ་བསྐུལ་བ་དང་མི་རྟག་པའི་ངང་ཚུལ་སྟོན་པའི་ཕྱིར་མྱ་ངན་ལས་འདས་པའི་མཛད་པ་བསྟན་པས་ཚེ་གྲངས་དེ་རྣམས་དུས་ཆེན་དུ་བྱིན་གྱིས་བརླབས་པ་ཡིན།
     གསུམ་པ་དུས་ཆེན་དེ་རྣམས་ལ་དགེ་བ་བྱས་པའི་ཕན་ཡོན་ནི། སྤྱིར་དུས་ཆེན་དེ་ཐམས་ཅད་ལ་དགེ་བ་གང་བྱས་ཕན་ཡོན་ཆེ་ཞིང་ཁྱད་པར་དུ། ཆོ་འཕྲུལ་ཆེན་པོ་བྱང་ཆུབ་བརྙེས་པ་ཆོས་འཁོར་བསྐོར་བ། ལྷ་ལས་བབ་པའི་དུས་ཆེན་བཞི་ལ་ཁ་དོན་དགེ་སྦྱོར་རྟེན་ལ་ཕྱག་མཆོད། དགེ་འདུན་ལ་བསྙེན་བཀུར་སོགས་དགེ་བ་གང་བྱས་བྱེ་བ་ཕྲག་བརྒྱར་འགྱུར་བར་མདོ་ལས་བཤད།དེ་ཡང་དཔེར་མཚོན་ན་ལྷག་བསམ་རྣམ་པར་དག་པའི་འབྲལ་ཕུལ་གང་སྦྱིན་པར་བཏང་བའི་འབྲས་བུས་འབྲས་ཁལ་བརྒྱད་འབུམ་སུམ་ཁྲི་སུམ་སྟོང་སུམ་བརྒྱ་སུམ་ཅུ་རྩ་གསུམ་དང་བྲེ་དྲུག་ཕུལ་བཞི་འབྱང་བར་བཤད་པ་སོགས་ཀྱིས་མཚོན་ཏེ་ཤེས་པར་བྱ།
     བཞི་པ་ཞར་བྱུང་གཞན་བཤད་པ་ནི། ཆོ་འཕྲུལ་སྨོན་ལམ་གྱི་སྐབས་སུ་སྐོར་ལམ་ལ་རྗེ་བཙུན་བྱམས་པའི་སྐུ་བརྙན་སྤྱན་འདྲེན་བྱེད་པ་ནི། འཛམ་བུ་གླིང་པའི་མིའི་ཚེ་ཚད་ཚེ་ལོ་བཅུ་བའི་བར་དུ་མར་འགྲིབ་ཏེ། དེ་ནས་སླར་རིམ་གྱིས་ཡར་འཕེལ་ནས་ཚེ་ལོ་བརྒྱད་ཁྲི་བར་གྱུར་བ་ན་རྒྱལ་བ་བྱམས་པ་མགོན་པོ་འཇིག་རྟེན་དུ་འབྱོན་པར་འགྱུར་བ་ཡིན་ལ་དེའི་ཚེ་འཁོར་གྱི་ཐོག་མར་སྐྱེ་བའི་རྟེན་འབྲེལ་བསྒྲིགས་པའི་ཆེད་དུ་ད་ལྟ་སྐུ་བརྙན་སྤྱན་འདྲེན་བ་དང་དེ་ལ་ཕྱག་མཆོད་སྨོན་ལམ་འདེབས་བ་སོགས་ཚུལ་བཞིན་དུ་བྱས་ན་དོན་དེ་འགྲུབ་པའི་དགོས་པ་ཡོད་པས་རྗེ་བདག་ཉིད་ཆེན་པོས་ཆོ་འཕྲུལ་མཆོད་པའི་དུས་སུ་བྱམས་པ་སྤྱན་འདྲེན་སོགས་མཛད་པ། དེའི་སྲོལ་རྒྱུན་ད་ལྟའི་བར་དུ་མཛད་པ་ཡིན། འཆམ་མཛད་པ་ནི། རྒྱལ་བའི་བསྟན་སྲུང་མཐུ་རྩལ་ཅན་རྣམས་དང་སྔགས་འཆང་རྣལ་འབྱོར་རྣམས་ཀྱིས་དགྲ་བགེགས་གདུག་པ་ཅན་རྣམས་ཚར་གཅོད་པའི་གར་འཆམས་ཇི་ལྟར་མཛད་པ་དེའི་གར་ཆས་སུ་ཞུགས་ནས་དེའི་ང་རྒྱལ་དང་ལྡན་པས་འཆམ་སྟབས་རྣམས་བྱས་ན་རང་ཉིད་ཀྱིས་ལས་བྱེད་པ་ལ་ནུས་མཐུ་ཆེ་བ་དང་ཆོས་སྐྱོང་སྔགས་འཆང་རྣམས་ཀྱི་ཐུགས་རྒྱུད་བསྐུལ་ཏེ་དེ་རྣམས་ཀྱང་འཆམ་སྟབས་དང་བཅས་ཏེ་དགྲ་བགེགས་སྒྲོལ་བ་སོགས་ཀྱི་ལས་ལ་འཇུག་པར་འགྱུར་བའི་དགོས་པ་ཆེན་པོ་ཡོད། དེ་ལྟར་ན་ཆོ་འཕྲུལ་མཆོད་པ་དང་བྱམས་པའི་སྐུ་བརྙན་སྤྱན་འདྲེན་པ་དང༌། གར་འཆམས་བྱེད་པ་སོགས་ཀྱང་དགོས་པ་ཆེན་པོ་དང་བཅས་པ་ཡིན་པས་བྱེད་པ་པོ་དང་ལྟད་མོ་བ་རྣམས་ཀྱིས་རྗེས་སུ་ཡི་རང་བ་བྱ་བར་རིགས་སོ། །

རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། ཨ་བུ་འབྲོང་།