བོད་ཀྱི་ཚེ་ཐར་གཏོང་ཚུལ།

    བོད་ཀྱི་དམངས་སྲོལ་རིག་གནས་ལས་ཚེ་ཐར་གཏོང་བའི་ཆོ་ག་འདི་ནི་སྲོལ་བཟང་བོ་ཞིག་དང་། སྲོག་ཆགས་དང་རང་བྱུང་ཁམས་ཆེན་པོར་བཅངས་པའི་ཡ་རབས་ཀྱི་འདུ་ཤེས་འཛིན་སྟངས་ཤིག་ཡིན། སྤྱིར་ཚེ་ཐར་ཞེས་པ་ནི་ཚེ་ལ་ཐར་བ་གཏོང་བ་དང་ཚེ་ཡི་རྒྱུན་སྲིང་བའི་ཆོ་ག་ཞིག་ཡིན་ལ། དེ་ནི་སྒོ་ཕྱུགས་ཚེ་ཐར་གཏོང་བ་ལས་གཞན། ད་དུང་དམངས་ཁྲོད་དུ་འགའ་ཞིག་གིས་ལྗོན་ཤིང་ནགས་ཚལ་དང་རི་ཆུ་གཏེར་རྫས་སོགས་རང་བྱུང་གི་བཀོད་པར་གནོད་སྐྱོན་ཐེབས་པར་མི་འཇུག་པར། ཡུལ་གྱི་མཛེས་སྡུག་རང་སོར་འཇོག་པ་དང་སྲུང་བའི་ལས་སོགས་ལའང་ཚེ་ཐར་དུ་བཏང་ཞེས་བརྗོད་མཁན་ཡོད་ཀྱང་། འདིར་སྒོ་ཕྱུགས་ཚེ་ཐར་གཏོང་ཚུལ་རགས་ཙམ་བརྗོད་ན། བོད་ཀྱིས་སྒོ་ཕྱུགས་ཚེ་ཐར་དུ་གཏོང་བའི་དགེ་བ་ནི། གཅིག་ནི་ཕྱུགས་ཀྱི་ཚེ་སྲོག་ལ་འཇིགས་པ་དང་འཚེ་བ་མེད་པར་རང་ཉིད་ཀྱི་འཚོ་བ་ལོངས་སུ་སྤྱོད་པར་རང་དབང་ལྡན་ཆེད་སྲོག་གཅོད་པར་མི་བྱེད་པ་དང་། གཉིས་སུ་བོད་མི་རང་ཉིད་ལ་མཚོན་ན་སྒོ་ཕྱུགས་ཚེ་ཐར་བཏང་བ་ལས་མི་འདོད་པའི་རྐྱེན་ངན་བཟློག་པ་དང་འཚོ་བ་ཕུན་སུམ་ཚོགས་པ་དང་ཁྱིམ་ཚང་གི་ཕྱི་དོན་ལམ་འགྲོ་ཡོང་བ། ཁ་ལས་རླུང་རྟ་དར་ཞིང་འདོད་དོན་ལྟུན་འགྲུབ་ཡོང་བའི་ཆེད་དུ་ཡིན། དེ་བས་ཚེ་ཐར་གཏོང་བ་ནི་མི་ཕྱུགས་གཉིས་ཀར་དགེ་བའི་བྱ་གཞག་ལེགས་པོ་ཞིག་ཏུ་སེམས་བཞིན་ཡོད།