རོང་ཆེན་བསྟན་པའི་སྒྲོན་མེའི་སྐུ་ཕྲེང་རིམ་བྱོན་གྱི་གདན་ས་གོང་འོག་གིས་གཙོས་དགེ་འདུན་པའི་སྡེ་རྣམས་སུ་འཇུག་པ་པོའི་རྟེན་གྱི་གང་ཟག་ཇི་ལྟ་བུ་ཞིག་དགོས་ཤེ་ན། རྟེན་གྱི་གང་ཟག་ནི། འདུལ་བ་ནས་བཤད་པའི་བར་ཆད་ཀུན་དང་བྲལ་བ་མཁན་སློབ་ཚད་ལྡན་ལས་རབ་ཏུ་བྱུང་ཞིང་། ན་ཚོད་དང་བསྟུན་ཏེ་དགེ་ཚུལ་སློང་གང་རུང་གི་སྡོམ་པ་ནོད་པ། རང་དང་འབྲེལ་ཡོད་མེད་ལ་མ་ལྟོས་པར་དགོན་སྡེ་གཞན་ནས་གནས་དབྱུང་བྱས་པ་སོགས་ཀྱི་ཁ་སྨྲས་ངན་པ་ཕོག་པ་མ་ཡིན་པ་ཞིག་དགོས། བསླབ་པ་བླངས་པ་ཙམ་དུ་བཞག་སྟེ་རྙེད་པ་ཁོ་ན་དོན་དུ་གཉེར་བ་ནི། ཁྱིམ་པ་དང་གོས་ཀྱི་ཁྱད་ཙམ་ལས་མ་ཞིག་པ་ཡིན་པས་ཤིན་ཏུ་མི་རུང་། ཡོན་ཏན་ཐམས་ཅད་ཀྱི་གཞི་མ། བསྟན་པའི་གདུང་འཚོབ།སོ་སོར་ཐར་པའི་བསླབ་ཁྲིམས་རྣམ་པར་དག་པ་སྲུང་བ་ཉམས་ལེན་གྱི་མཐིལ་དུ་མཛད་མཁན་ཞིག་དགོས། དགེ་སློང་ལ་ཕམ་པ། ལྷག་མ། ལྟུང་བྱེད། སོར་བཤགས། ཉེས་བྱས་ཏེ་སྡེ་ལྔ་དང་། དགེ་ཚུལ་ལ་བླངས་འདས་སོ་དྲུག་སོགས་སྡོམ་དང་གཞིས་བསྡུས་པའི་བཅས་མཚམས་མཐའ་དག་ཤེས་པར་བྱས་ནས་སྲོག་དང་མིག་འབྲས་བཞིན་དུ་སྲུང་ཞིང་། བརྒྱ་ལ་ཅུང་ཟད་འདས་ཀྱང་ཕྱིར་བཅོས་ཚུལ་འདུལ་བ་ནས་བཤད་པ་བཞིན་དུ་མཛད། ཁྱད་པར་ཏུ་ཕམ་པ་བཞི་གང་ཡང་རུང་བས་གོས་ན་སྡོམ་པ་གཏོང་བས་སླར་ཡང་བླང་དུ་མེད་པས་གདན་ས་གོང་འོག་གིས་མཚོན་དགོན་སྡེ་གང་དུའང་འཇུག་མི་རུང་། ཆང་ནི་ཉེས་པ་ཀུན་གྱི་སྣ་འདྲེན། རྩྭ་རྩེའི་བཏུང་བ་ཙམ་གྱིས་ཀྱང་སྟོན་པའི་ཉན་ཐོས་སུ་མི་རུང་བར་གསུངས། མི་ཚངས་པར་སྤྱོད་པ་དང་། མ་བྱིན་པར་ལེན་པ་དང་། མི་གསོད་པ་དང་། མི་ཆོས་བླ་མའི་རྫུན་སྨྲ་བ་སྟེ་རྩ་བ་བཞི། ཆང་དང་ལྔ་བོ་འདིས་མཐོང་ཐོས་དོགས་གསུམ་མེད་པའི་གཙང་སེང་ངེ་བ་ཞིག་སེམས་ལ་འཛིན་རྒྱུ་མེད་ན། སྤྱིར་ཡུལ་ཁམས་དེར་བསྟན་པ་དར་ཡོད་ཀྱང་རང་གི་རྒྱུད་ལ་བསྟན་པ་སྒོས་ནུབ་ཏུ་གྱུར་པ་ཡིན་ཞིང་། ས་ལམ་གྱི་ཡོན་ཏན་སྐྱེ་བའི་སྒོ་བཀག་སྟེ་ཕྱི་མར་བཟོད་པར་དཀའ་བའི་སྡུག་བསྔལ་མྱོང་བར་འགྱུར་བའི་ཚུལ་ལེགས་པར་བསམས་ནས་སྲོག་དང་བསྡོས་ཏེ་སྲུང་དགོས།། རྗེ་བློ་བཟང་འཕྲིན་ལས་པས། སྐྲ་བྲེག་དགོས་པར་ཐར་པ་བསྒྲུབ་པ་སྟེ།། གཞུང་ལུགས་སྦྱངས་པའི་དགོས་པ་ཉམས་ལེན་ཡིན།། ཉམས་ལེན་དགོས་དོན་སེམས་རྒྱུད་ཐུལ་བ་དགོས།། དགོས་དོན་དེ་གསུམ་སྙིང་གི་དཀྱིལ་དུ་ཆོངས།། ཞེས་གསུངས་པ་ལྟར་སྡེ་འདིར་ཞུགས་པའི་རབ་ཏུ་བྱུང་བ་རྣམས་ཀྱི་ལས་སུ་བྱ་བ་ནི། ཕན་བདེ་ཐམས་ཅད་ཀྱི་འབྱུང་གནས་བསྟན་པ་རིན་པོ་ཆེ་ལ་བཤད་སྒྲུབ་གཉིས་ཀྱི་སྒོ་ནས་ཕྱག་རྗེས་བཞག་སྟེ་དལ་འབྱོར་དོན་ལྡན་དུ་བྱེད་པ་ཉིད་ཡིན་ལ། བསྟན་པ་ཞེས་པ་ཡང་གྲྭ་པ་མང་པོ་ལྷན་ཅིག་ཏུ་འཚོགས་ནས་འདོན་རྟ་དབྱངས་གང་ལེགས་གྱེར་ཞིང་རྔ་སྦུབ་དུང་ཆེན་གྱི་སྒྲ་རྫིག་ཉམས་ལྡན་པ་ཙམ་དང་། སྐྱེ་བོ་མང་པོའི་འདུ་ལོང་ཆེ་ཞིང་། ཕྱིའི་ཆ་ལུགས་མཛེས་པ། ལྷ་ཁང་དང་འདུ་ཁང་བརྗིད་ཉམས་ལྡན་ཞིང་སྐུ་གསུང་ཐུགས་རྟེན་མང་བ། བསྙེན་བཀུར་དང་མང་ཇ། སྦྱིན་བདག་དང་འབུལ་བ་མང་བ་ཙམ་ལ་མི་ཟེར་གྱི། བསྟན་པའི་རྩ་བ་འདུལ་བའི་བཅས་ཁྲིམས་གཙང་མ་ཡོད་པའི་དགེ་འདུན་པའི་སྡེ་གཞི་གསུམ་ཆོ་གའི་ཕྱག་ལེན་ངོས་གཙང་ཞིག་ཡོད་མེད་ཀྱི་སྒོ་ནས་བསྟན་པ་གནས་མི་གནས་འཇོག་དགོས་ན རང་རང་གིས་ཁས་བླངས་པའི་དགེ་ཚུལ་སློང་གི་བསླབ་ཁྲིམས་རྣམ་པར་དག་པ་ཞིག་དགོས། དེ་ཡོང་བ་ལ་སྲུང་ཚུལ་ཤེས་དགོས་པས་གསར་བུ་བ་རྣམས་རྡོ་གཅལ་ཐོག་ལ་མ་སླེབས་པར་དུ་བསླབ་པ་རྒན་པ་དང་གནས་ཀྱི་བླ་མའམ་ཤག་གི་དགེ་རྒན་རེ་མ་བུ་ལྟོ་འབྱར་གྱི་ཚུལ་གྱིས་བསྟེན་དུ་བཅུག་ནས་དེའི་ཤག་ཏུ་སྡོད་པ་མ་གཏོགས་རང་ཉིད་གཅིག་པུས་གྲྭ་ཤག་ལོགས་སུ་བཟུང་ནས་སྡོད་མི་རུང་བའི་ཕྱག་བཞེས་ཡོད་པ་བཞིན་ནན་ཏན་མཛད་དགོས་གསར་བུ་རྣམས་བསླབ་པ་རྒན་པའམ་གནས་ཀྱི་བླ་མ་ཁ་མིག་ཡར་ལྟའི་སྒོ་ནས་སྒོ་གསུམ་གྱི་སྤྱོད་ལམ་ཞི་ཞིང་དུལ་བ་ཆོས་དང་མཐུན་པར་ལག་ལེན་ལ་བསྟར་ཅི་ཐུབ་ལ་དང་པོ་ནས་གོམས་སུ་འཇུག་དགོས། དགེ་འདུན་པའམ་གྲྭ་པ་ནི་བསྟན་པའི་རྩ་ལག་འདུལ་བའི་བཅས་ཁྲིམས་རྣམ་པར་དག་པ་ལ་གནས་པའི་སྒོ་ནས་འགྲོ་བ་ཐམས་ཅད་ཀྱིས་བསོད་ནམས་གསོག་པའི་ཞིང་། ཕྱག་བྱ་བའི་གནས། བསྟན་པའི་རྒྱན་དུ་གྱུར་པ་ཞིག་མཛད་དགོས། རྒྱུན་དུ་བསླབ་པ་རྒན་གཞོན་ལ་བརྟགས་ཏེ་བསླབ་པ་རྒན་པ་གྲལ་གོང་དུ་འཇོག་པ་སོགས་ཀྱི་ཡ་རབས་སྤྱོད་བཟང་རྒན་རིམ་ནས་ཕྱག་ལེན་བསྟར་ཏེ་བཀུར་རེས་མཛད་ན་རང་གཞན་གྱི་བསླབ་པ་ལ་གུས་པ་བྱ་བའི་ཕན་ཡོན་ཡོད་པར་མ་ཟད་མིག་ལྟོས་ལའང་ཤིན་ཏུ་ལེགས། མཁན་པོ་དང་ལས་སྣེ། ལས་སྣེ་ཐོན་ཟུར། དཔེ་ཁྲིད་དགེ་རྒན། བསླབ་པ་རྒན་པ་སོགས་ལ་ཞྭ་ཕུད་གཟན་འབེབས། ལམ་འོག་ཏུ་ག ཟུར་བ་སོགས་ཀྱིས་གུས་བཀུར་རྒྱུན་དུ་མཛད་ན་ཕྱི་མི་ཆོས་ཁས་མི་ལེན་པ་ཞིག་གིས་བལྟས་ཀྱང་འཇིག་རྟེན་མི་ཆོས་ཀྱི་ཡ་རབས་སྤྱོད་བཟང་དང་ལྡན་པ་ཞིག་ཏུ་མཐོང་བས་རྒྱུན་དུ་འདིའི་ཐད་དོ་སྣང་མཛད་པ་གལ་ཆེ།

      ༢གནས་ཀྱི་བླ་མའམ་ཤག་གི་དགེ་རྒན་ཇི་ལྟ་བུ་བསྟེན་དགོས་ཤེ་ན། དགེ་རྒན་ནམ་ཤག་གི་དགེ་རྒན་ནི། བཤེས་གཉེན་དུལ་བ་ཞི་བ་ཉེར་ཞི་བ།། ཞེས་གསུངས་པ་ལྟར་གྱི་མཚན་ཉིད་ཆ་ཚང་དང་ལྡན་པ་ཞིག་བྱུང་ན་རབ་དང་གལ་སྲིད་དེ་ལྟར་མ་རྙེད་ན། རང་མ་དུལ་བར་གཞན་འདུལ་བའི་གནས་མེད་ཅེས་གསུངས་པ་བཞིན་དགེ་རྒན་རང་ཉིད་ཀྱི་སྒོ་གསུམ་སྤྱོད་པ་ཆོས་དང་མཐུན་གང་ཐུབ་མཛད་ཅིང་། ཡ་རབས་སྤྱོད་བཟང་ལ་རང་ཉིད་གནས་ཏེ་དགེ་ཕྲུག་གིས་མིག་ལྟོས་ཡར་ལྟ་བྱེད་ས་ཡོད་པ་ཞིག་མ་མཐའ་དགོས་དེ་ཡང་སྤྱི་སྒེར་གྱི་བསྟན་པ་ལ་ལྷག་བསམ་དཀར་བ། ཕྱོགས་རིས་འཐེན་ཁྱེར་ཅན་གྱི་ཀུན་སློང་སྐྱོན་ཅན་མ་ཡིན་པ། སྨྲ་བ་ཉུང་བ། རྒྱུན་དུ་ལུས་ངག་ཡིད་གསུམ་མི་མཐུན་ཕྱོགས་ལས་ལྡོག་པའི་དྲན་ཤེས་བག་ཡོད་བརྟན་པོས་རྒྱལ་བའི་དགོངས་པ་དང་མཐུན་པའི་འདུལ་ཁྲིམས་ཡན་ལག་དང་བཅས་པ་སྲུང་བ་ལ་དགའ་ཞིང་དགེ་འདུན་པའི་ནང་ཁྲིམས་བཅའ་ཡིག་བཞིན་སྒྲིགས་ལམ་ཆེ་ཕྲ་ཀུན་ལ་རང་ཉིད་གནས་གཞན་དེ་ལ་འགོད་པའི་ཐབས་ཚུལ་བཟང་པོ་ལྷུར་ལེན་པ། རྗེ་ཡབ་སྲས་ཀྱི་གསུང་ལ་ཐོས་བསམ་ཉམས་ལེན་གང་ཐུབ་མཛད་ཅིང་། འཆད་སྤེལ་གྱི་སྒོ་ནས་ཚེ་རབས་ཀུན་ཏུ་རྗེའི་རིང་ལུགས་འདི་ཉིད་བསྲེ་སླད་དང་བྲལ་བར་འཛིན་པའི་དམ་བཅའ་སྒྲུབ་པའི་མཆོད་པར་འབུལ་བ། གསར་བུ་བླང་དོར་མི་ཤེས་མཁན་རྣམས་ལ་སྙིང་བརྩེ་ཞིང་ཐབས་མཁས་པས་སློབ་སྟོན་མཛད་པ་སོགས་ཆོས་དང་ཟང་ཟིང་གིས་བསྡུ་ཞིང་ཕན་འདོགས་པ་ལ་བརྩོན་པ་ལས་དགེ་ཕྲུག་ཡལ་བར་དོར་བའམ་ཞེ་བསུན། ཡིད་ཕམ་དུ་འགྲོ་བའི་རིགས་མི་བྱེད་པར་བློ་གྲོས་དང་ལྡན་པའི་ཕས་བུ་བཞིན་དུ་སྐྱོང་བར་བྱེད་ཅིང་། གདུལ་བྱའི་བློ་ཚོད་མཐོ་དམན་དང་བསྟུན་ནས་སློབ་མ་སྐྱོང་ཐུབ་པའི་ཐབས་མཁས་དང་ལྡན་པ་ཞིག་དགོས། དེང་སྐབས་ཀྱི་དགེ་རྒན་འགའ་རེས་དུས་ཚོད་ལ་བསྙད་ནས་རང་ཉིད་སྒྲིགས་ལམ་ལ་མི་གནས་པའི་མིག་ལྟོས་ངན་པ་ཞིག་རང་བཞིན་གྱིས་དགེ་ཕྲུག་ལ་བསྒོས་པ་དང་། འགའ་ཞིག་གིས་དགེ་ཕྲུག་ཚོང་ཁེ་སྤོགས། ལག་ཤེས་དང་སྐད་ཡིག་སློབ་པ་སོགས་དོན་ཆེན་པོ་མིན་པ་དང་། རྩེད་འཇོ། ཡུལ་ལུང་ལྟ་སྐོར། རྒྱུན་དུ་སྤྲོ་སྐྱིད་གཏོང་བ་སོགས་བག་མེད་ཀྱི་བྱ་བར་སྦྱོར་བ་དང་ངོ་ཚ་ཁྲེལ་མེད་ཀྱིས་འོས་དང་མི་འོས་པའི་གཡོག་ཏུ་སྡུག་གཏོང་བ། ཆོས་དང་མི་མཐུན་པའི་ལོང་གཏམ་སྣ་ཚོགས་ཀྱིས་དུས་འདའ་བར་བྱེད་པ་མ་གཏོགས་བློ་ཁ་ཡར་སྐོར་ཐབས་བྱེད་མཁན་ཤིན་ཏུ་དཀོན་པར་འདུག་པས་ཕྱིན་ཆད་དགེ་རྒན་དགེ་ཕྲུག་སོ་སོའི་ཐད་ལ་བླ་མ་ལས་སྣེ་སོགས་ཀྱིས་ཚགས་འཛིན་རེ་ངོས་པར་གནང་དགོས། གདན་ས་གོང་འོག་ཏུ་དང་པོར་མཚན་ཉིད་གྲྭ་ཚང་ནས་འཇུག་དགོས་པའི་ཕྱག་སྲོལ་ཡོད་པ་བཞིན་མཚན་ཉིད་གྲྭ་ཚང་ལ་ཞུགས་པའི་དུས་དེ་ནས་བཟུང་ཤག་གི་དགེ་རྒན་ཞིག་ངེས་པར་བསྟེན་དུ་བཅུག་ནས། འབྲི་བ། འདོན་པ། ཀློག་པ། དཔེ་ཆ་སྐྱོར་སྦྱངས། བསླབ་པ་སློབ་གཉེར་བྱེད་ཚུལ། འགྲོ་འཆག་ཉལ་འདུག   གཟན་ཤམ་གྱོན་སྟངས། ཟས་གོས་གནས་མལ་ལ་ལོངས་སྤྱོད་ཚུལ་སོགས་ཡ་རབས་ཚུལ་མཐུན་ཅན་ཞིག་དགེ་རྒན་སོ་སོས་ལག་ལེན་དམར་ཁྲིད་ཀྱི་སྒོ་ནས་སློབ་དགོས། དགེ་རྒན་གྱིས་དགེ་ཕྲུག་ཚུལ་བཞིན་སྐྱོང་གི་ཡོད་མེད་ཀྱི་ལྟ་རྟོག་ཀྱང་ལས་སྣེས་མཛད་དགོས། གསར་བུ་བས་ཀྱང་དགེ་རྒན་ནས་ཆོས་མཐུན་གྱི་བསླབ་བྱ་གང་གནང་བ་རྣམས་ཚུལ་མཐུན་གྱིས་བསྒྲུབ་པ་མ་གཏོགས་ཉིན་འགྲོ་ཞག་འགྲོའི་སྒོ་ནས་དལ་འབྱོར་དོན་མེད་དུ་འགྲོ་རིགས་མཛད་མི་ཉན། ཆོས་འབྲེལ་དངོས་ཐོབ་ཀྱི་བླ་མ་དང་དགེ་རྒན་རྣམས་ལ་དད་གུས་མེད་པར་ཆོས་བྱེད་པར་རློམ་པ་ནི་སྒོ་ལྕགས་འབྱེད་པའི་ལྡེའུ་མིག་བོར་བ་བཞིན་བྱིན་རླབས་དང་དངོས་གྲུབ་ཀྱི་སྒོ་ཕྱེ་བའི་དུས་མེད་པས་བསམ་སྦྱོར་གཉིས་ཀྱི་སྒོ་ནས་བཤེས་གཉེན་ཚུལ་བཞིན་དུ་བསྟེན་པ་ལ་བཤེས་གཉེན་བསྟེན་ཚུལ་ཡང་དང་པོ་ནས་བསླབས་ཏེ་ཤེས་པར་བྱེད་རྒྱུ་གལ་ཆེ།

རྩོམ་སྒྲིག་འགན་འཁུར་བ།  ཁཱ་ཤེས་རབ་རྒྱ་མཚོ།  མགར་རྩེ་འོད་ཟེར།  ཨ་བུ་འབྲོང་།