ཚེ་ཐར་གྱི་ཕན་ཡོན་བཤད་པ་དགེ་བའི་ལམ་གསལ།
རྩོམ་པ་བོ། ཤེས་རབ་བསྟན་དར།
ཨོཾ་བདེ་ལེགས་སུ་གྱུར་ཅིག འདིར་ཚེ་ཐར་རམ་ཚེ་བླུ་བྱས་པའི་ཕན་ཡོན་མདོ་ཙམ་བརྗོད་ན་དེ་ཡང་བདག་ཅག་གི་སྟོན་པ་ཐུགས་རྗེ་ཅན་གྱིས་སྔོན་སློབ་པའི་གནས་སྐབས་སུ་རྒྱལ་བུ་སྙིང་སྟོབས་ཆེན་པོའི་སྐྱེ་བ་བཞེས་པའི་ཚེ།བཀྲེས་སྐོམ་གྱིས་མནར་བའི་སྟག་ཕྲུག་མ་བུ་དྲུག་གི་སྲོག་སྐྱོབ་པའི་ཆེད་དུ་རང་གི་དལ་འབྱོར་གྱི་མི་ལུས་ཁྱད་པར་ཅན་བཏང༌། ཤ་དང་ཁྲག་གི་སྦྱིན་པ་བཏང་ནས་སྐྱོབ་པར་མཛད་པ་དང༌། ཚོང་དཔོན་གྱི་བུ་ཆུ་འབེབས་ཀྱི་སྐྱེ་བ་བཞེས་པའི་ཚེ་རྫིང་བུ་ཞིག་ཏུ་ཉ་ཁྲི་གནས་པ་ཆུ་དང་བྲལ་བ་མཐོང་ནས་དེར་ཆུ་བླུགས་ནས་སྲོག་བསྐྱབས་ཤིང༌། ཁ་ཟས་སྦྱིན་ཏེ་དེ་བཞིན་གཤེགས་པ་རིན་ཆེན་གཙུག་དོར་ཅན་གྱི་མཚན་བསྒྲགས་པས་དེ་དག་ཤི་ནས་སུམ་ཅུ་རྩ་གསུམ་གྱི་ལྷར་སྐྱེས་ནས་མུ་ཏིག་དང་མེ་ཏོག་གི་ཆར་ཕབ་པ་ལྟ་བུའི་ལོ་རྒྱུས་ཤིན་ཏུ་མང༌། དེ་བཞིན་སྐྱེས་བུ་དམ་པ་ནི་གཞན་གྱི་སྲོག་སྐྱོབ་པ་ལ་ལྷག་པར་བརྩོན་པར་མཛད་པ་ཡིན། ལྷག་པར་སྙིགས་མའི་དུས་སུ་ཚེ་ཐུང་ཞིང་ནད་མང་བ། ལོངས་སྤྱོད་དབུལ་བ་འདི་ཡང་མི་དགེ་བའི་སྟོབས་དང༌། ལྷག་པར་སྲོག་གཅོད་བྱས་པའི་རྐྱེན་གྱིས་ཡིན་པས་འདི་དག་ལྡོག་པའི་ཐབས་ཉག་ཅིག་ཀྱང་སེམས་ཅན་ཚེ་ཐར་དང་ཚེ་བླུ་བྱེད་པ་འདི་ཡིན་ཏེ་ལམ་རིམ་ཆེན་མོ་ལས། སྲོག་གཅོད་པ་སོགས་ཆེན་པོ་བཅུ་བོ་རེ་རེས་དམྱལ་བ། འབྲིང་བཅུ་བོ་རེ་རེས་ཡི་དྭགས། ཆུང་ངུ་བཅུ་བོ་རེས་དུད་འགྲོར་སའི་དངོས་གཞི་ལས་གསུངས་ལ། རྒྱུ་མཐུན་གྱི་འབྲས་བུ་ནི། ངན་འགྲོ་ནས་མིར་སྐྱེས་ཀྱང་རིམ་པ་ལྟར་ཚེ་ཐུང་ལ། ཞེས་དང༌།བདག་པོའི་འབྲས་བུའམ་དབང་གི་འབྲས་བུ་ནི། སྲོག་གཅོད་ལས་ཕྱི་སྣོད་ཀྱི་འཇིག་རྟེན་གྱི་བཟའ་བཏུང་དང༌། སྨན་དང་འབྲས་བུ་སོགས་ལ་མཐུ་ཆུང་བ་དང༌། བསྙེམས་པ་དང༌། ནུས་པ་དང་སྟོབས་ཆུང་བ་དང༌། འཇུ་དཀའ་ཞིང་ནད་བསྐྱེད་པས་སེམས་ཅན་ཕལ་ཆེར་ཚེ་མ་ཟད་པར་ཡང་འཆི་བར་འགྱུར་བ་ཞེས་དང༌། སྲོག་གཅོད་སྤངས་པའི་འབྲས་བུ་ཡང་དེ་ལས་ལྡོག་ཏེ་གསལ་བོར་གསུངས་པས་སོ། །
དེ་བས་ཚེ་ཐར་དང་ཚེ་བླུ་བྱེད་པ་ནི་ཚེ་ཐུང་བ་དང་ནད་མང་བ། ལོངས་སྤྱོད་ཀྱིས་དབུལ་བ་སོགས་ལྡོག་པའི་ཐབས་ཉག་གཅིག་ཡིན་པ་སོགས་ཕན་ཡོན་མང་བོ་མདོ་རྒྱུད་ཀྱི་བསྟན་བཅོས་མང་བོ་ནས་འབྱུང་བ་ཡིན་ཏེ། མདོ་དྲན་པ་ཉེར་བཞག་ལས། ཚུལ་ཁྲིམས་ཀྱི་ནང་ནས་མཐོ་རིས་སུ་སྐྱེ་བ་མཆོག་ནི་འདི་ཡིན་ཏེ། སྲོག་སྦྱིན་པའི་ཚུལ་ཁྲིམས་སོ། ། ཞེས་ཚེ་བླུ་བྱས་པས་མཐོ་རིས་སུ་སྐྱེས་པར་གསུངས་པ་དང༌། སློབ་དཔོན་དབྱིན་གཉེན་གྱིས།གསོད་སར་ཁྲིད་པ་ཡོངས་བཏང་ནས། ། དེ་བཞིན་སྲོག་གི་ཕན་བཏགས་ཤིང༌། ། སྲོག་ཆགས་འཚེ་བ་ཡོངས་སྤངས་པས། ། ཚེ་རིང་བ་ནི་འཐོབ་པར་འགྱུར། ། ནད་གཡོག་བྱེད་ཅིང་སྨན་པ་དང༌། ། སྨན་རྣམས་སྦྱིན་པར་བྱ་བ་དང༌། ། སྲོག་ཆགས་རྣམས་ལ་རྡོ་དབྱུག་དང༌། ། འཚེ་བ་སྤངས་པས་ནད་མེད་གྱུར། ། ཞེས་དང༌། སློབ་དཔོན་ངག་གི་དབང་ཕྱུག་གྲགས་པས། བྱ་ཉ་རི་དྭགས་རྐུན་མ་དང༌། ། སྦྲུལ་སོགས་གསད་བྱའི་ཕྱོགས་གྱུར་རྣམས། ། སྲོག་བསྐྱབས་པ་ཡིས་འཕྲལ་དུ་ནི། ། ཚེ་ཐུང་བ་ཡང་ཚེ་རིང་གྱུར། ། ཞེས་ཚེ་ཐར་བཏང་བས་ཚེ་འཕེལ་བར་གསུངས་ཤིང༌། སའི་སྙིང་བོ་འཁོར་ལོ་བཅུ་བའི་མདོ་ལས།གལ་ཏེ་སྲོག་གཅོད་ཡོངས་སྤངས་ན། ། ཀུན་གྱིས་བཀུར་ཞིང་བླ་མར་བྱེད། ། རྟག་ཏུ་ནད་མེད་ཚེ་ཡང་རིང༌། ། བདེ་ཞིང་སྐྱིད་ལ་གནོད་པ་མེད། ། སྐྱེ་བའི་གནས་ནི་ཐམས་ཅད་དུ། ། སངས་རྒྱས་སྤྱོད་ལམ་ལམ་ལ་མོས། ། སངས་རྒྱས་ཆོས་དང་དགེ་འདུན་མཐོང༌། ། མྱུར་ཏུ་བླ་མེད་བྱང་ཆུབ་འཐོབ། ། ཞེས་སོགས་མདོ་རྒྱུད་ཀྱི་བསྟན་བཅོས་གཞན་དང་གཞན་ལས་ཕན་ཡོན་རྒྱ་ཆེར་གསུངས་སོ། ། དེ་ལྟར་ཚེ་ཐར་བྱས་པ་ལ་ཕན་ཡོན་མཐའ་མེད་ཀྱང་མདོར་བསྡུས་ན་འདི་དག་ཏུ་འདུས་ཏེ། ༡སྐྱེ་བ་ཕྱི་མར་ངན་འགྲོའི་སྐྱེ་བ་ཁེགས་ནས་བདེ་འགྲོར་སྐྱེས་པ། ༢དུས་མིན་གྱི་འཆི་བ་བཟློགས་ནས་ཚེ་རིང་བོར་འགྱུར་བ། ༣ནད་རིགས་བཞི་བརྒྱ་རྩ་བཞི་དང་བྲལ་ཏེ་བདེ་སྐྱིད་ཀྱི་དཔལ་ལ་རོལ་བ། ༤སྨན་རྣམས་མཐུ་དང་ལྡན་པར་འགྱུར་བ། ༥ནོར་དང་ལོངས་སྤྱོད་རྒྱས་པ། ༦གཟའ་གདོན་མི་མ་ཡིན་གྱི་གནོད་པ་མེད་པ། ༧དཀར་ཕྱོགས་སྐྱོང་བའི་སྲུང་ཞིང་གཞན་གྱིས་བཀུར་བ། ༨སྐྱེ་བ་གཞན་དུ་རང་གིས་ཆོས་གསུངས་པའི་འཁོར་དུ་འགྱུར་བ། ༩རང་གི་འདོད་པའི་དོན་ཐམས་ཅད་བླག་ཏུ་འགྲུབ་པ། ༡༠དཀོན་མཆོག་གསུམ་མངོན་སུམ་དུ་མཐོང་ནས་ཆོས་ཀྱི་དཔལ་ལ་སྤྱོད་ཅིང་བླ་མེད་བྱང་ཆུབ་འཐོབ་པ་བཅས་སོ། ། དེ་བས་ཀྱང་སྟོན་པས་བྱིན་གྱིས་རླབས་པའི་དུས་ཆེན་དག་ཏུ་ཚེ་ཐར་གཏོང་བ་སོགས་དགེ་བའི་ལས་ལ་བརྩོན་ན་ཕན་ཡོན་ལྷག་པར་ཆེ་ཞིང༌། དེ་ལྟར་དགེ་བ་སྒྲུབ་པའི་འགོ་ཁྲིད་བྱེད་མཁན་རྣམས་ལ་དགེ་བ་དེ་ཡོངས་སུ་རྫོགས་པ་འཐོབ་པ་ཚད་ལྡན་གྱི་གཞུང་ལས་འབྱུང་བས་ན་སྲོག་གཅོད་སྤང་བ་དང༌། མི་ནས་དུད་འགྲོ་བར་གྱི་སྲོག་སྐྱོབ་པའི་ཐབས་ལ་བརྩོན་པ་དང༌། དེ་བཞིན་དགེ་སྐུལ་བྱེད་པ། རང་ལ་དབང་ཡོད་པའི་རི་དང་ཆུ། ནགས་སོགས་སུ་ཡོད་པའི་སྲོག་ཆགས་སྲུང་སྐྱོབ་བྱེད་པའི་ཆེད་དུ་བྱ་བྱེའུ་འབའ་འབུ།ཉ་དང་རི་དྭགས་བཅས་ལ་སྲུང་སྐྱོབ་བྱེད་པ། ནད་པ་སོགས་ཀྱི་ཆེད་དུ་སྲོག་གསོད་སར་ཁྲིད་པའི་དུད་འགྲོའི་སྲོག་བླུ་བྱེད་པ་བཅས་དགེ་བའི་ལས་ལ་བརྩོན་པར་བྱའོ། ། ཞེས་པ་འདི་ནི་་བཙུན་གཟུགས་ཤེས་རབ་བསྟན་དར་གྱིས་བྲིས་པ་དགེ་གྱུར་ཅིག
རྩོམ་སྒྲིག་འགན་འཁུར་བ། མགར་རྩེ་ཉི་ཟེར། ཁཱ་ཤེས་རབ་རྒྱ་མཚོ། འབའ་སྣང་གྲོལ།
|