གངས་ཅན་ཕོ་མོ་ཡོངས་ཀྱི་སྙན་ལམ་དུ་ཕུལ་བའི་ཞུ་ཡིག
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2020 ལོའི་ཟླ 5 ཚེས 25 རེས་གཟའ་ཟླ་བ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» ཆོས་ལུགས།» ནང་བསྟན་རིག་གཞུང་། »གངས་ཅན་ཕོ་མོ་ཡོངས་ཀྱི་སྙན་ལམ་དུ་ཕུལ་བའི་ཞུ་ཡིག
གངས་ཅན་ཕོ་མོ་ཡོངས་ཀྱི་སྙན་ལམ་དུ་ཕུལ་བའི་ཞུ་ཡིག
རྩོམ་སྒྲིག་པ།  འབའ་སྣང་གྲོལ། སྤེལ་དུས 2015-04-02ལྟ་ཀློག (768)རྩོམ་ཁུངས: ངེད་དྲ་བ།པར་འདེབ།

གངས་ཅན་ཕོ་མོ་ཡོངས་ཀྱི་སྙན་ལམ་དུ་ཕུལ་བའི་ཞུ་ཡིག

 ཆོས་རྗེ་འཇིགས་མེད་ཕུན་ཚོགས་འབྱུང་གནས།

རྒྱལ་ཀུན་སྙིང་རྗེའི་རང་གཟུགས་སྤྱན་རས་གཟིགས། ། བདག་གིས་ཚེ་རབས་དུ་མར་བསྙེན་པའི་ལྷ། ། བརྩེ་ཆེན་ཐུགས་རྗེའི་སྤྱན་རས་མ་ཡོལ་བར། ། ལས་ངན་འགྲོ་བའི་ལས་སྣང་འདི་ལ་ཟིགས། ། འདི་ན་བགྲང་ཡས་ཉམ་ཐག་སེམས་ཅན་ལ། ། སྐྱབས་དང་སྐྱོབ་པ་ཁྱེད་ལས་གཞན་མེད་པས། །བདག་ཅག་ལུས་ཀྱི་བ་སྤུ་གཟེངས་དང་ལྷན། ། མིག་ནས་མཆི་མ་འདོན་འདི་གཟིགས་སམ་ཀྱེ། ། དེ་ཕྱིར་དམིགས་མེད་ཐུགས་རྗེས་རབ་དགོངས་ནས། ། དབང་མེད་སྡུག་བསྔལ་དྲག་པོས་གཟིར་བའི་འགྲོ། ། མྱུར་དུ་བདེ་ཆེན་དག་པའི་ཞིང་མཆོག་ཏུ། ། མིག་འཕྲུལ་བཞིན་དུ་འདྲེན་པར་མཛད་དུ་གསོལ། །
   དེ་ཡང་ཉེ་བའི་ལོ་ཤས་རིང་ལ་འབྲོག་སྡེ་དག་གིས་ཧ་ཅང་ཐལ་དྲགས་པའི་སྒོ་ནས་ཟོག་ལུག་རྣམས་བཤས་རྭར་ཕབ་སྟེ་མནར་གཅོད་ཚད་ལས་འདས་པ་གཏོང་བར་འདུག་པ་འདི་ཆོས་དང་འཇིག་རྟེན་གྱི་ལུགས་གཉིས་ཆར་དང་ཤིན་ཏུ་མི་མཐུན་པའི་གདུག་རྩུབ་ཀྱི་སྤྱོད་པ་ཡ་ང་བ་ཞིག་སྟེ། ཆོས་ཕྱོགས་ནས་བཤད་ན། སྲོག་གཅོད་གོང་ན་སྡིག་གཞན་མེད། ། ཅེས་གསུངས་པ་བཞིན་དུ་སྲོག་གཅོད་པ་འདི་སྡིག་པ་ཧ་ཅང་ཆེ་ལ ། ཁྱད་པར་དུ་འདི་ལྟ་བུའི་སྨིན་གྱི་འབྲས་བུ་དམྱལ་བའི་གནས་སུ་སྐྱེས་ཏེ་ཡུན་རིང་པོར་སྡུག་བསྔལ་དྲག་པོ་ངེས་པར་ མྱོང་དགོས ། མྱོང་བ་རྒྱུ་མཐུན་གྱི་འབྲས་བུས་ཚེ་རབས་ཐམས་ཅད་དུ་གང་དུ་སྐྱེས་ཀྱང་ཚེ་ཐུང་བར་འགྱུར་བ་དང་། བདག་འབྲས་ཚེ་ཕྱི་མར་ས་ཕྱོགས་ཡིད་དུ་མི་འོང་བ་གཟི་བྱིན་ཆུང་བར་སྐྱེ་བ་ཡིན་ཏེ ། ། སེམས་ཅན་དེ་ལ་སྡུག་བསྔལ་དྲག་པོ་མྱོང་དུ་བཅུག་པ་དང་། སྲོག་ བཅད་ནས་ཚེ་ཐུང་བར་བྱས་པ་དང་། གསོན་པོའི་གཟི་བྱིན་མེད་པར་བྱས་པའི་ལས་འབྲས་རང་བྱས་རང་ལ་འཁོར་བ་ཡིན། ཟོག་ལུག་སོགས་བཤན་པ་དག་ལ་བཙོང་ནས་གོ་བཞིན་ ཤེས་བཞིན་དུ་གསོད་དུ་བཅུག་ན་དེའི་སྡིག་པ་རང་ལའང་འདྲ་མཉམ་དུ་འཐོབ ། དེས་ན་མི་སུ་ཡིན་ཡང་འཆི་མི་དགོས་པ་ནི་མེད་ལ། ཤི་ནས་ལས་ཀྱི་རྣམ་སྨིན་མྱོང་དགོས་པའང་བསླུ་ མེད་ཡིན་པས་ཅིས་ཀྱང་སྡིག་པ་ཚབས་ཆེན་འདི་འདྲ་མི་བྱེད་པར་ཞུ།
  ཁྱད་པར་དུའང་དེང་དུས་སུ་རྟ་ཟོག་ལུག་རྣམས་ལན་ཀྲོའུ་དང་ཁྲིང་ཏུའུ་སོགས་ཡུལ་ཐག་རིང་པོར་ཁྱེར་ནས་མ་ཤི་བའི་སྔ་རོལ་དུའང་སྲོག་ལན་གྲངས་དུ་མར་བཅད་པ་ལྟ་བུའི་ སྡུག་བསྔལ་མྱོང་དུ་འཇུག་སྟེ། དེའང་འདི་ལྟར། དབྱར་དུས་ཚད་པ་ཧ་ཅང་ཆེ་བའི་དུས་ཉིན་མཚན་མང་པོར་ཟོག་རྣམས་ཀྱིས་ཆུ་འཐུང་རྒྱུ་མ་རྙེད་པས་སྐོམ་གདུང་མ་བཟོད་དེ། ཆུ་མཐོང་བ་ན་རླངས་འཁོར་སྟེང་ནས་འཛེམ་མེད་དུ་མཆོངས་ཏེ་རྐང་ལག་བཞི་ཆར་བཅག་པ་དང་། རླངས་འཁོར་གྱིས་ཁྱེར་བ་ལ་སྐྲག་སྟེ་རྐང་ལག་རྣམས་ཀྱིས་ཉིན་ཞག་མང་པོར་ཤེད་ ཕྱུང་ནས་
བསྡད་པས་རྨིག་པ་ཐམས་ཅད་ས་ལ་ལྷུང་བ་དང་། བཀྲེས་པ་མ་བཟོད་ནས་ཕན་ ཚུན་རྔ་མ་དང་ཟེ་བ་རྣམས་ཟོས་ཏེ་ཟད་པར་གྱུར་པ་དང་། ལུག་རྣམས་རླངས་འཁོར་གྱི་ཕྱིར་དཔྱངས་ཏེ་ཁྱེར་བ་སོགས་བྱེད། དེར་མ་ཟད་འགའ་རེས་ཤ་མི་ངན་པའི་ཕྱིར་དུ་གསོན་པོའི་མཆུ་ལ་ལྕགས་གཟེར་འདེབས་པ་དང་། ལྕེ་ལྐོག་མར་འབྱིན་པ་སོགས་བྱས་ཏེ་ཁྱེར་བའང་ ཐོས། དེ་ཡང་བོད་ཡུལ་ནས་རྒྱ་ནག་ཏུ་ཁྱེར་བའི་ལམ་བར་དུ་ཉིན་གཉིས་གསུམ་ཡན་ཆད་འགོར།
དེ་ནས་ཚོང་རྭ་ནས་ཉོ་མཁན་མི་རྙེད་དེ་ཉིན་རེ་ཟུང་ལུས། དེ་རྗེས་བཤས་རྭར་འབྱོར་ཚེ་དེ་གར་ཡང་ཉིན་ ལྔ་དྲུག་ཡན་ཆད་ཅིག་འཆི་བསྒུག་བྱ་དགོས་པས་ཁྱོན་ཉིན་བཅུ་བཅོ་ལྔ་ཙམ་རེ་ལ་རྩྭ་ཉག་མ་གཅིག་དང་ཆུ་གཙང་ཐིགས་པ་གཅིག་ཀྱང་བཏུང་རྒྱུ་མི་རྙེད། དེའི་དབང་གིས་སེམས་ཅན་འགའ་རེའི་ལུས་ཟུངས་ཤིན་ཏུ་ཟད་ནས་རུས་མགོ་པགས་བཏུམས་ སུ་སོང་བས་བཤའ་མི་རུང་བར་གྱུར་ཏེ་བཤས་རྭའི་སྒོ་དྲུང་ན་མུ་གེ་འབའ་ཞིག་གིས་འཆི་བ་དག་ཀྱང་འདུག གཞན་དག་ཕྱོགས་ཐམས་ཅད་འདམ་རྫབ་ཀྱིས་གང་བའི་མུན་ཁང་གི་བཤས་རྭའི་ནང་ན་ཤི་མ་གསོན་གྱི་ངང་དུ་སོ་སྒྲ་ཁྲིག་ཁྲིག་བྱེད་ཅིང་མིག་སྔོ་ཅེ་རེ་འཆི་རྒྱུ་ཁོ་ན་བསྒུགས་ཏེ་འདུག དེ་ནས་ཉིན་ཐ་མའི་ཉིན་གཤེད་མ་དག་འོངས་ཏེ་སྐེ་གཅོད་པའི་སར་ཁྲིད། དེར་རྐང་ལག་ཐག་པས་བཀྱིགས་ཏེ་གསོན་གསོན་དུ་སྐེ་བྲེག་པས་སྙིང་ཁྲག་དྲོན་མོ་རྒྱང་གིས་ཐོན་ཏེ་ས་ཕྱོགས་དེ་ཀུན་དམར་ཡོམ་མེར་འགྲོ། སྐེ་བཅད་ཤུལ་ནས་ཁྲག་དང་དབུགས་ཕྱུ་རུ་རུ་བྱེད་ཅིང་། མིད་པ་ནས་ཧར་སྒྲ་སྒྲོག་བཞིན་ད་དུང་ཡར་ལང་མར་འགྱེལ་བྱེད་པ་ན་ཤན་པ་དག་གིས་མགོ་ལྡོག་པས་མནན་ཏེ་འདུག ཡུན་རིང་པོར་འཆི་མི་ཐུབ་པས་སྡུག་བསྔལ་བསམ་གྱིས་མི་ཁྱབ་བོ། ། གཞན་ཡང་བོད་ཡུལ་གྱི་རྫོང་ཁག་མང་པོར་འཕྲུལ་ཆས་ཀྱི་བཤས་ཁང་དམྱལ་བ་ས་ཁར་ཐོན་པ་ལྟ་བུ་དག་འདུག་སྟེ། དེར་ཡང་བཤས་ཟོག་མང་ཆེ་ཡུན་རིང་བསྒུག་དགོས་པས་བཀྲེས་སྐོམ་གྱི་སྡུག་བསྔལ་ཀྱང་དཔག་མེད་མྱོང་། དེ་ནས་གསོད་པའི་དུས་ལ་བབས་པ་ན། གཡས་གཡོན་གང་དུའང་འབྲོ་ས་མེད་པའི་སྒོ་ཞིག་ནས་ནང་དུ་འདེད། བཤས་ཁང་ནང་དུ་འཕྲུལ་ཆས་དག་གི་འགུལ་སྐྱོད་ཀྱི་སྒྲ་དང་། ཕྱུགས་ཀྱི་སྐེ་བཅད་པའི་མིད་པ་ནས་བྱུང་བའི་ཧར་སྒྲ། ཁྲག་བཞུར་བའི་ཆིལ་ སྒྲ། ཟོག་གསོན་པོ་དག་སྐྲག་པའི་ངུར་སྒྲ་དང་འཁུན་སྒྲ་སོགས་ཀྱིས་ཡོངས་སུ་གང་བས་འཇིགས་རུང་གཤིན་རྗེའི་གྲོང་ཁྱེར་མངོན་སུམ་དུ་སྣང་བ་ལྟ་བུ་དེ་མཐོང་ཚེ་ཕྱུགས་རྣམས་སྲོག་བསྡོས་ཀྱིས་ཕྱིར་འབྲོ། དེའི་ཚེ་མགོ་ལ་ཐག་པ་བཏགས་ཏེ་འཕྲུལ་ཤུགས་ཀྱིས་དྲུད་དེ་འགྲོ། སྐབས་འགར་ཤན་པ་དག་གིས་ལྕགས་དབྱུག་ཐོགས་ནས་ཟོག་གི་མིག་གཉིས་ཀ་བཅར་ནས་མི་མཐོང་བར་བྱས་ཏེ་ནང་དུ་འདེད་པའང་ མཐོང་ཟེར། སྒོའི་ནང་དུ་འབྱོར་བ་ན་ལྕགས་ཀྱི་སྐམ་པ་ཆེན་པོས་རྐང་པ་ནས་བཟུང་སྟེ་མགོ་ཐུར་དུ་བསྟན་ནས་བར་སྣང་ལ་ཁྱེར་ཏེ་འགྲོ།ཕར་ཙམ་སོང་ཚེ་སྐེ་བཅད་དེ། ཟུངས་ཁྲག་དྲོན་མོ་རླངས་པ་ཕ་ལེ་བ་བར་སྣང་ནས་མར་དམར་རྒྱང་རྒྱང་དུ་འབབ་ཅིང་། བཙོག་ཁུ་རྣམས་ཀྱང་མིད་པ་ནས་ཕྱིར་ཐོན། ད་དུང་འཕག་ར་བྱེད་བཞིན་བར་སྣང་ནས་ཕར་ཅུང་ཟད་ཁྱེར་ཏེ་ཕལ་ཆེར་གསོན་པོའི་པགས་པ་བཤུ་ཞིང་ཁོག་པ་གཤགས་ཏེ་ནང་ཁྲོལ་རྣམས་འདར་ཕྲིལ་ཕྲིལ་ཕྱིར་ཕྱུང་བ་སོགས་བྱེད། མདོར་ན་བྱ་བ་འདི་རྣམས་མི་སྙིང་རྗེ་ཅན་གྱིས་མཐོང་ན་སྙིང་ཚལ་པ་བརྒྱར་འགས་པར་འགྱུར་པ་ཞིག་ཏུ་སྣང་། དེང་སང་མི་ལ་སྲོག་ཆད་གཅོད་པ་དེ་རང་ཅག་གིས་སྡུག་བསྔལ་རབ་ཀྱི་ཚད་དུ་བརྩི་མོད། འོན་ཀྱང་ལུས་ཀྱི་ཐོག་ནས་ནི་སེམས་ཅན་ འདི་རྣམས་ཀྱི་སྡུག་བསྔལ་གྱི་བཞི་ཆ་གཅིག་ཀྱང་ཡོད་ཚོད་མི་འདུག དེས་ན་སེམས་ཅན་འདི་རྣམས་རང་རེའི་མེས་པོ་ཕ་མ་ཉེ་འབྲེལ་སོགས་སྔོན་ཤི་བ་རྣམས་ལན་ཆགས་ཀྱི་དབང་གིས་ད་ལྟ་ངེད་ཚོའི་སྒོ་ཕྱུགས་སུ་གྱུར་པ་ངེས་པར་ཡིན་པས་ན་འདི་འདྲའི་སྡུག་བསྔལ་དྲག་པོ་མྱོང་ དུ་འཇུག་པ་ནི་དྲིན་ལན་ལོག་འཇལ་གྱི་སྤྱོད་ངན་དཔེ་མེད་པ་ཞིག་གོ །
   དེ་བཞིན་དུ་རང་རེ་ལ་སྔར་ནས་དར་བའི་སེམས་ཅན་གྱི་མཆུ་བསྡམས་ནས་དབུགས་བཀག་སྟེ་གསོད་པའི་སྲོལ་འདིའང་ཤིན་ཏུ་ཐ་ཆད་པ་ཞིག་སྟེ།སེམས་ཅན་ལ་སྡུག་བསྔལ་ཧ་ཅང་ཆེ་བ་དང་ ། ངན་གསོད་མི་བཟད་པ་ཡིན་པས་སྡིག་པའང་ཤིན་ཏུ་ཆེ། དེས་ན་ངེས་པར་གསོད་དགོས་ཕྱིན་བོད་ཀྱི་དམངས་ཁྲོད་ན་སྡུག་བསྔལ་དེ་ཙམ་ཆེན་པོ་མྱོང་མི་དགོས་པའི་ གསོད་ཐབས་འདུག་པས་ངེས་པར་དེ་ལྟར་བྱ་རྒྱུ་གལ་ཤུན་ཏུ་ཆེའོ། །
   ལར་སེམས་ཅན་སུ་ལའང་རང་གི་སྲོག་ལས་གཅེས་པ་ནི་མེད། དེའི་ཕྱིར་སྲོག་ལ་གནོད་པ་ བྱུང་བ་ལས་ལྷག་པའི་འཇིགས་སྐྲག་དང་སྡུག་བསྔལ་ཅི་ཡང་མེད༑ སྲོག་ལ་གནོད་པ་མི་འབྱུང་བའི་ཕྱིར་དུ་གཞན་གང་ལའང་ཕངས་སེམས་མེད་པ་སོགས་རང་ཅག་ལ་མངོན་སུམ་ཡིན། དེ་བཞིན་དུ་དུད་འགྲོ་འདི་རྣམས་ཀྱིས་ཀྱང་གཏམ་བཤད་མི་ཤེས་པ་ཙམ་ལས་སྡུག་བསྔལ་གྱི་ཚོར་བ་ལ་ནི་ཁྱད་པར་གང་མེད་དེ། བཤས་རྭར་གནས་པའི་སེམས་ཅན་དེ་དག་གིས་ཀྱང་གྲོགས་རྣམས་བསད་པ་མཐོང་ཚེ་ཤིན་ཏུ་སྐྲག་སྟེ་ལུས་འདར་སིག་གེ་སྡོད་མི་ཚུགས་པ་ལྟ་བུའི་ངང་ལ་འདུག་པ་མངོན་སུམ་མིག་གིས་བལྟ་སར་ཡོད་པ་འདི་ག་རེད། སེམས་ཅན་རྣམས་ལ་སྡུག་བསྔལ་དྲག་པོ་འདི་འདྲ་མྱོང་དུ་བཅུག་ནས། ད་དུང་ཁ་མ་ཎི་ལག་འཁོར་ལོ་ བྱས་ཏེ་ཆོས་སྒྲུབ་པ་ཡིན་ཟེར་བ་ནི་དམ་པའི་ཆོས་ཀྱི་སྙིང་པོ་དང་རྩ་བ་ནས་རྒྱབ་འགལ་དུ་ གྱུར་ཟིན་པ་མ་ཤེས་པའོ། །
   དེར་མ་ཟད་དཀོན་མཆོག་གི་རྟེན་བཞེངས་སོགས་ཀྱི་ཆེད་དུ་སེམས་ཅན་གྱི་སྲོག་ལ་ གནོད་པ་བྱེད་པའང་ཆོས་ཀྱི་རྩ་བ་མི་འཚེ་བ་དང་དངོས་སུ་འགལ་བ་ཡིན་ནོ། །དེ་ལྟར་བོད་ ཆོས་ལྡན་གྱི་ཞིང་ཁམས་འདི་གསོད་གཅོད་སྡིག་པའི་ན་བུན་འཁྲིགས་པའི་སྲིན་པོའི་གྲོང་ ཁྱེར་ལྟ་བུ་ཞིག་ཏུ་གྱུར་པ་འདི་ལས་ཡི་མུག་པ་ནི་གང་ཡང་མི་འདུག དེ་ན་སེམས་ཅན་རྣམས་གསོད་གཏུབ་ཀྱི་ལས་འདི་ལྟ་བུ་མ་བྱས་ཀྱང་རང་རེ་ལ་ཟས་གོས་གང་ཐད་ནས་འཚོ་ཐབས་གཏན་ནས་མེད་པ་ནི་མ་ཡིན་པས་རྒྱལ་ཁབ་ཀྱི་ཁྲིམས་ཀྱིས་རང་དབང་གཏན་ནས་མེད་པར་གྱུར་ན་ནི་དེར་ཟད། གཞན་དུ་ཅི་ནས་ཀྱང་སྡིག་ལས་རྔམ་པོ་ཆེ་འདི་མཚམས་འཇོག་ཅིག་ བྱེད་པར་ཞུ་ཞེས་སྙིང་ཐག་པ་ནས་གསོལ་བ་ལན་བརྒྱའི་བར་དུ་འདེབས་པ་ཡིན་ན། བླ་མ་དཀོན་མཆོག་གསུམ་སྐྱབས་སུ་འཛིན་ཅིང༑ དགེ་སྡིག་གི་ལས་འབྲས་ལ་ཡིད་ཆེས་བྱེད་པ་ཡིན་ཟེར་བའི་བོད་པ་རྣམས་ཀྱིས་ཅིས་ཀྱང་ཡིད་འཇོག་ཅིག་གནང་བར་ཞུ་ཞུ་ཞུ།
   གཞན་ཡང་འཇིག་རྟེན་ཕྱོགས་ནས་བཤད་ན། ཉེ་ཆར་རང་རེའི་ཡུལ་གྱི་ནགས་ཚལ་རྣམས་བཅད་ནས་ཕལ་ཆེར་ཟད་དེ་འབྲུ་ཆུའི་སྨད་རྒྱུད་དུ་ཆུའི་འཇིགས་པ་ཆེན་པོ་བྱུང་ བའི་དབང་གིས་ཤིང་སྡོང་གཅིག་ཀྱང་གཅོད་མི་ཆོག་པའི་ཁྲིམས་འཕྲལ་དུ་བཅའ་དགོས་ བྱུང་། སྔར་ཤིང་ཁྱེར་བའི་རླངས་འཁོར་དང་ད་ལྟ་ཟོག་ལུག་འཁྱེར་བའི་རླངས་འཁོར་གྱི་གྲངས་ཕལ་ཆེར་འདྲ་མཉམ་ཡིན། ད་དུང་མི་མཐུད་ནས་འདི་ལྟར་བྱས་ན་མི་རིང་བའི་རྗེས་སུ་བོད་ཡུལ་གྱི་ཟོག་ལུག་རྣམས་ཟད་པའམ་ཤིན་ཏུ་ཉུང་བར་གྱུར་ནས་འབྲོག་སྡེ་རྣམས་འཚོ་ཐབས་བྲལ་བ་ཞིག་འོང་བའི་ཉེན་ཤིན་ཏུ་ཆེ། ཁྱད་པར་དུའང་སེམས་ཅན་འདི་རྣམས་ཀྱི་ཁྲོད་ན་མོ་ཕྱུགས་ཤིན་ཏུ་མང་བར་མ་ཟད་མངལ་ན་བེའུ་དང་ལུག་གུ་ཆགས་པའང་ཤིན་ཏུ་ མང་པོ་འདུག་པ་བཤས་རྭར་སོང་ནས་ལྟོས་དང་མངོན་སུམ་ཡིན། ཟོག་ལུག་རྒྱ་ནག་ཏུ་འཁྱེར་བར་བཀག་སྡོམ་མི་བྱེད་པའི་དབང་གིས་ཆོམ་རྐུན་པ་དག་གིས་ཀྱང་གོ་སྐབས་རྙེད་ནས་ཟོག་ལུག་རླངས་འཁོར་མང་པོ་བརྐུས་ཏེ་ཁྱེར་བ་དེས་བོད་དམངས་ཚོགས་ཀྱི་འཚོ་བ་དང་བདེ་འཇགས་གཉིས་ཆར་ལ་གནོད་པ་ཚབས་ཆེན་ཐེབས། སེམས་ཅན་རྣམས་རྒྱ་ནག་ཏུ་བཙོང་སྟེ་འགྲོ་འགྲོན་ཐམས་ཅད་ཕར་ཕུད་ཤུལ་ན་འོང་སྒོ་གང་ཡང་མེད་པར་མ་རྩ་བརླགས་པའམ་ཁེ་སྐྱེད་ཕྲན་བུ་ལས་མེད་པའི་བོད་པ་བཤས་འཚོང་པ་མང་པོ་མཐོང་སྟེ། དེས་ན་བྱ་བ་འདིས་འབྲོག་ཁུལ་གྱི་དཔལ་འབྱོར་ཆུད་ཟོས་སུ་བཏང་བ་ཙམ་ལས་ཕན་པ་ཅི་ཡང་མ་མཐོང་ངོ་། །དེ་བཞིན་དུ་བོད་ཡུལ་ན་ཡོད་པའི་བཤས་རྭ་འདི་རྣམས་ནས་ཀྱང་ལོ་མང་པོའི་རིང་ལ་སེམས་ཅན་ཁྲི་ཚོ་དུ་མའི་སྲོག་བཅད་བཅད་དེ་མཐར་རང་ཁ་ཙམ་མ་སོས་པར་མ་རྩའང་བརླགས་ ནས་འདུག་པ་མང་པོ་མཐོང་སྟེ། དེ་ལྟ་ན་འདི་དག་གིས་བོད་མི་དམངས་ཀྱི་འཚོ་བ་ཡར་རྒྱས་འོང་བ་ལ་ཕན་པ་ཅི་ཞིག་འདུག གཞན་ཡང་འདི་ཕྱི་གང་ལའང་འཛེམ་པ་མེད་པར་སྲོག་ཆགས་རྣམས་ལ་མནར་གཅོད་དྲག་པོ་གཏོང་བའི་ལུགས་སྲོལ་འདིས་མི་རབས་ཕྱི་མ་དང་ བཅས་པ་སྲོག་ཆགས་ལ་ཤ་ཚ་དང་སྲུང་སྐྱོབ་གཏན་ནས་བྱེད་མི་ཤེས་པའི་གཅན་གཟན་ གདུག་པ་ལྟ་བུར་འགྱུར་བས་བསམ་པའི་དཔལ་ཡོན་ལའང་གནོད་པ་ཚབས་པོ་ཆེ་འོང་བ་ གོར་མ་ཆག་གོ །
དེས་ན་རང་གི་ཚེ་འདི་ཕྱི་གཉིས་ཆར་ལ་བསམ་བློ་ཞིག་བཏང་། སྒོ་ཕྱུགས་རྣམས་ཀྱིས་ཀྱང་ བདེ་བ་འདོད་སྡུག་བསྔལ་མི་འདོད་པ་རང་རེ་དང་མཚུངས་པས་བྱམས་དང་སྙིང་རྗེ་ཞིག་བསྐྱེད་དེ། རང་དབང་ཡོད་བཞིན་དུ་སེམས་ཅན་རྣམས་སྡུག་བསྔལ་དྲག་པོའི་བཙོན་དོང་ འདི་དག་གི་ནང་དུ་མི་འཕེན་པར་ཞུ་ཞེས་ཐལ་མོ་སྙིང་ཁར་སྦྱར་ནས་ཞུ་བ་ཕུལ་བ་ལགས་ན། སེམས་ཅན་གྱི་ཕན་བདེ་ཁུར་དུ་འཁྱེར་བའི་བསྟན་འཛིན་གྱི་སྐྱེ་བུ་དམ་པ་རྣམས་ཀྱིས་མཐུན་འགྱུར་དང་། སྐྱེ་བོ་ཡོངས་ཀྱི་ཐུགས་ལ་འཇགས་པར་མཁྱེན་མཁྱེན་མཁྱེན། ཞེས་བོད་རབ་
རྒྱན་ལྕགས་འབྲུག་ལོའི་སྟོན་པ་ལྷ་བབས་ཀྱི་དུས་ཆེན་ལ་གསེར་ཐང་བླ་རུང་ལྔ་རིག་ནང་བསྟན་སློབ་གླིང་ནས་འཇིགས་མེད་ཕུན་ཚོགས་འབྱུང་གནས་ཀྱིས་ཕུལ་བའོ། །
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར།  ཨ་བུ་འབྲོང་། 

དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K
ལྟ་ཀློག་གྲངས་ཀ
6345821
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།