ཨ་རབ་མནའ་འབྲེལ་གྱི་མཐོ་རིམ་གྲོས་ཚོགས་ནས་ཨ་རབ་རྒྱལ་ཁབ་ཀྱི་མཉམ་འབྲེལ་དམག་དཔུང་འཛུགས་རྒྱུ་ཐག་བཅད།

      ཟླ་གསུམ་པའི་ཚེས་ཉེར་དགུའི་ཉིན།   ཨེ་ཅིབ་ཀྱི་ཙུང་ཐུང་སེ་ཞི་ཨེ་ཅིབ་ཧྲ་མུའུ་ཧྲ་དབྱེ་ཧི་ནས་བསྡུས་པའི་ཨ་རབ་རྒྱལ་ཁབ་མནའ་འབྲེལ་གྱི་མགོ་གཙོའི་གྲོས་ཚོགས་མཇུག་བསྡུ་བའི་ཚོགས་འདུར་ཞུགས།    ཉིན་དེར་ཨེ་ཅིབ་ཀྱི་ཙུང་ཐུང་སེ་ཞི་ཡིས་ཨ་རབ་རྒྱལ་ཁབ་མནའ་འབྲེལ་གྱི་མགོ་གཙོའི་གྲོས་ཚོགས་མཇུག་བསྡུ་བའི་ཚོགས་འདུའི་སྟེང་བཤད་རྒྱུར།    ཨ་རབ་རྒྱལ་ཁབ་ཀྱི་མགོ་གཙོས་ཨ་རབ་རྒྱལ་ཁབ་ཀྱི་མཉམ་འབྲེལ་དམག་དཔུང་འཛུགས་པར་ཡིད་འཐད་བྱུང་ཡོད་ཟེར།

     ཟླ་གསུམ་པའི་ཚེས་ཉེར་དགུའི་ཉིན། ཡེ་མིན་གྱི་ཕྱི་འབྲེལ་བློན་ཆེན་ཡཱ་ཞིན་ཨེ་ཅིབ་ཀྱི་ཧྲ་མུའུ་ཧྲ་དབྱེ་ཧི་ནས་བསྡུས་པའི་ཨ་རབ་རྒྱལ་ཁབ་མནའ་འབྲེལ་གྱི་མགོ་གཙོའི་གྲོས་ཚོགས་མཇུག་བསྡུ་བའི་ཚོགས་འདུར་ཞུགས།

      ཨ་རབ་རྒྱལ་ཁབ་མནའ་འབྲེལ་གྱི་མགོ་གཙོའི་གྲོས་ཚོགས་སྐབས་ཉེར་དྲུག་པ་ཚེས་ཉེར་དགུའི་ཉིན་ཨེ་ཅིབ་ཀྱི་ཧྲ་མུའུ་ཧྲ་དབྱེ་ཧི་ནས་གྲོལ།     གྲོས་ཚོགས་ནས་ཨ་རབ་རྒྱལ་ཁབ་ཀྱི་མཉམ་འབྲེལ་དམག་དཔུང་འཛུགས་རྒྱུ་ཐག་བཅད་པར་མ་ ཟད། ཡེ་མིན་གྱི་ཧུའུ་སེ་དྲག་ཆས་རྩ་འཛུགས་ཀྱིས་མཚོན་ཆ་བསྐྱུར་ནས་བཙན་བཟུང་བྱས་ པའི་ས་ཁོངས་ནས་ཕྱིར་འཐེན་བྱེད་དགོས་པའི་རེ་བ་བཏོན།

      སྐབས་འདིའི་མཐོ་རིམ་གྲོས་ཚོགས་ནས་ཨ་རབ་རྒྱལ་ཁབ་ཀྱི་བདེ་འཇགས་ལ་སྲུང་སྐྱོབ་བྱེད་པ་བརྗོད་སྙིང་ཡིན་པའི་ཧྲ་མུའུ་ཧྲ་དབྱེ་ཧིའི་བསྒྲགས་གཏམ་ལ་གྲོས་འཆམ་བྱུང་།   བསྒྲགས་གཏམ་ལས་བཤད་རྒྱུར།   ཨ་རབ་རྒྱལ་ཁབ་ཀྱིས་མཉམ་དུ་མིག་སྔའི་ས་ཁུལ་གྱི་བདེ་འཇགས་ཐད་གནས་པའི་འགྲན་རྩོད་དང་སྔར་ལས་ཛ་དྲག་ཏུ་འགྱུར་བཞིན་པའི་བདེ་འཇགས་གནས་བབ་ཐག་གཅོད་བྱེད་པ་དང་།   དེའི་ཐད་སྔོན་འགོག་འགུལ་སྐྱོད་སྤེལ་བའི་ཆོད་སེམས་ཡོད་ཟེར།    བསྒྲགས་གཏམ་ལས་ད་རུང་ཡེ་མིན་གྱི་ཧུའུ་སེ་དྲག་ཆས་རྩ་འཛུགས་ཀྱིས་མཚོན་ཆ་བསྐྱུར་ནས་རྒྱལ་ས་སཱ་ནཱ་དང་བཅས་པའི་བཙན་བཟུང་ས་ཁུལ་ནས་ཕྱིར་འཐེན་བྱས་ཏེ།   ཡེ་མིན་གྱི་བདེ་འཇགས་དང་བརྟན་འཇགས་སླར་གསོ་བྱེད་དགོས་པའི་རེ་བ་བཏོན་ཡོད།

ཨེ་ཅིབ་ཀྱི་ཙུང་ཐུང་སེ་ཞི་ཡིས་ཉིན་དེར་མཇུག་བསྡུ་བའི་ཚོགས་འདུའི་སྟེང་བཤད་རྒྱུར།    ཨ་རབ་རྒྱལ་ཁབ་ཀྱི་མཉམ་འབྲེལ་དམག་དཔུང་གིས་འབྲེལ་ཡོད་རྒྱལ་ཁབ་ཀྱི་རེ་བ་ལྟར་དུ་མངའ་ཁོངས་བདེ་འཇགས་དང་རྒྱལ་ཁབ་བདག་དབང་ལ་ཐད་ཀར་དུ་འཇིགས་ཉེན་ཐེབས་པའི་ཁོངས་གཏོགས་རྒྱལ་ཁབ་ལ་དམག་དོན་འགུལ་སྐྱོད་སྤེལ་བ་དང་།   དབང་ཆ་བསྩལ་ནས་ལག་བསྟར་བྱེད་པའི་ལས་འགན་གཞན་པ་སོགས་ཀྱི་འགན་ཁུར་དགོས་ཟེར།    དེ་ལས་གཞན་མཉམ་འབྲེལ་དམག་དཔུང་རྩ་འཛུགས་བྱེད་པའི་གནད་དོན་དང་འཁོར་སྐྱོད་ནང་རྐྱེན་ལ་གྲོས་བསྡུར་བྱེད་པའི་འགན་ཁུར་བའི་མཐོ་རིམ་ཨུ་ཡོན་ལྷན་ཁང་ཞིག་ཟླ་གཅིག་གི་དུས་ཚོད་ནང་འཛུགས་རྒྱུ་ཡིན་པ་དང་།    མཉམ་འབྲེལ་དམག་དཔུང་རྩ་འཛུགས་བྱེད་པའི་མཇུག་མཐའི་མཇུག་འབྲས་དེ་ཟླ་གསུམ་གྱི་ ནང་ཆེད་དོན་གྲོས་ཚོགས་ལ་བརྟེན་ནས་ཁྱབ་སྒྲོག་བྱེད་རྒྱུ་ཡིན་ཟེར།

      ཟླ་གསུམ་པའི་ཚེས་ཉེར་དགུའི་ཉིན། ཨེ་ཅིབ་ཀྱི་ཧྲ་མུའུ་ཧྲ་དབྱེ་ཧི་ནས། ཨ་རབ་རྒྱལ་ཁབ་མནའ་འབྲེལ་གྱི་དྲུང་ཡིག་ཆེན་མོ་ཨ་ལཱ་པུས་ཀྱིསི་གསར་འགྱུར་སྒྲོག་སྤེལ་ཚོགས་འདུའི་སྟེང་གཏམ་བཤད་སྤེལ་བཞིན་པ།

      ཨ་རབ་རྒྱལ་ཁབ་མནའ་འབྲེལ་གྱི་དྲུང་ཡིག་ཆེན་མོ་ཨ་ལཱ་པུས་ཀྱིས་ཨ་རབ་རྒྱལ་ཁབ་ཀྱི་མཉམ་འབྲེལ་དམག་དཔུང་རྩ་འཛུགས་བྱེད་པ་དེས་ཨ་རབ་མནའ་འབྲེལ་ལ་གསོན་ཤུགས་གསར་བ་རྒྱས་སྲིད་པར་བཤད།   ཁོས་ད་རུང་མཉམ་འབྲེལ་དམག་དཔུང་གིས་སི་རི་ཡཱའི་ཉམས་ཉེན་དང་ཕཱ་ལེ་སི་ཐན་སོགས་ཀྱི་གནད་དོན་ལ་ཐེ་གཏོགས་བྱེད་མི་སྲིད་ཟེར།   ཡེ་མིན་གྱི་གནས་བབ་ཐད་ནས་ཨ་ལཱ་པུས་ཀྱིས་བཤད་རྒྱུར།   ཨ་རབ་རྒྱལ་ཁབ་དག་གིས་ཡེ་མིན་གྱི་དམག་དོན་ཐེ་གཏོགས་འགུལ་སྐྱོད་དེ་ཧུའུ་སེ་དྲག་ཆས་རྩ་འཛུགས་ཀྱིས་མཚོན་ཆ་བསྐྱུར་ནས་བཙན་བཟུང་ས་ཁུལ་ནས་ཕྱིར་འཐེན་བྱེད་རག་བར་མུ་མཐུད་དུ་སྤེལ་རྒྱུ་ཡིན་ཟེར།

     སྐབས་འདིའི་ཨ་རབ་མནའ་འབྲེལ་གྱི་མགོ་གཙོའི་གྲོས་ཚོགས་ཀྱི་ཚོགས་ཡུན་ཉིན་གཉིས་ཡིན་པ་དང་། གྲོས་ཚོགས་ལ་ཞུགས་པའི་ཨ་རབ་རྒྱལ་ཁབ་སོ་སོའི་མགོ་ཁྲིད་པས་ཡེ་མིན་དང་ལི་པུ་ཡཱ། སི་རི་ཡཱ། ཕཱ་ལེ་སི་ཐན་དང་དབྱི་སི་རལ་གྱི་གནས་བབ། ས་ཁུལ་གྱི་འཇིགས་སྐུལ་ལ་ངོ་རྒོལ་བྱེད་པ་སོགས་གནད་དོན་ཐད་ནས་གྲོས་བསྡུར་བྱས།