ཤིང་བཟའ་སྐལ་བཟང་ཆོས་ཀྱི་རྒྱལ་མཚན།

      ཤིང་བཟའ་སྐལ་བཟང་རྒྱ་མཚོ་ལགས་ནི།   ༡༩༢༥ལོར་མཛོད་དགེ་ཨ་སྐྱིད་དུ་སྐུ་འཁྲུངས། དགུང་ལོ་བདུན་གྱི་སྟེང་གཉན་ཐོག་རིན་པོ་ཆེ་སྐལ་བཟང་ཐབས་མཁས་རྒྱ་མཚོའི་དྲུང་ནས་རབ་ཏུ་བྱུང་ཞིང༌། མཚན་ལ་སྐལ་བཟང་ཆོས་ཀྱི་རྒྱལ་མཚན་ཞེས་གསོལ། དགུང་ལོ་བཅུ་གཉིས་པ་མེ་གླང་ལོར་སྟག་ཚང་ལྷ་མོ་ཉིན་དུ་ཆོས་གྲྭར་ཞུགས་ནས་བཀའ་པོད་ལྔ་ལ་གསན་སྦྱོང་གི་མགོ་བརྩམས་ཏེ་ལོ་བཅུའི་བར་དུ་སྦྱངས་བ་མཛད།  

      ༡༩༧༣ལོར་གསང་སྟབས་ཀྱིས་སྨན་ཡིག་རྙིང་བ་འཚོལ་བསྡུ་བྱས་ནས་རྩ་ཆུའི་བརྟག་པ་དང་། ལྕེ་དང་གདུང་ལ་བརྟག་པ་སོགས་ལྗགས་རྩོམ་མཛད།  

      ༡༩༧༩ལོར་རྒྱལ་ཡོངས་བོད་སྨན་གསོ་རིག་ཀུན་འདུས་རྩོམ་འབྲི་བྱེད་པའི་མགོ་ཚུགས། ཟི་ལིང་ནས་ལོ་གསུམ་ལ་མན་ངག་ཡོན་ཏན་རྒྱུད་ཀྱི་ལེའུ་བདུན་ཅུ་དོན་གསུམ་རྩོམ་འབྲི་གནང་དགོས་པའི་བགོ་སྐལ་བབས། སྨན་དཔེ་ཤིན་ཏུ་དཀོན་པས་བླ་བྲང་དང་སྡེ་དགེ་སོགས་ནས་སྨན་ཡིག་དུ་མ་དགུ་ཅུ་རྩ་གྲངས་ཤིག་ཡོད་པར་བཤད་པ་དང༌། དཔེ་རྒྱུན་ཤིན་ཏུ་དཀོན་པ་སུམ་ཅུ་ལྷག་ཕྱག་བྲིས་མི་གནང་ཀ་མེད་བྱུང་ནས་འཚོལ་བསྡུ་བྱས་པས་བོད་ཀྱི་གསོ་རིག་གི་ལས་དོན་ལ་མཛད་རྗེས་ཉམས་པ་མེད་པ་བཞག    གཞན་ཟི་ལིང་དང༌། སྐུ་འབུམ།   བྱ་ཁྱུང༌། གཅན་ཚ་སོགས་དང་དེ་མིན་ཁུལ་དང་རྫོང་སོགས་སུ་བོད་སྨན་སྡེ་ཁག་མི་སྣ་སྐོར་ཚན་མང་པོར་སྔ་གཞུག་ཏུ་གསོ་རིག་གི་རྩ་བའི་ཤེས་བྱ་གཞུང་ཐོག་ནས་ཁྲིད་སྦྱོང་དང་ལག་ལེན་གྱི་མཛུབ་ཁྲིད་གནང༌། བྱ་དགའ་དང་སྲིད་འཛིན་གོ་གནས་ནི་རྒྱལ་ཡོངས་སྲིད་གྲོས་ཨུ་ཡོན་དང་མཚོ་སྔོན་ཞིང་ཆེན་སྲིད་གྲོས་ཀྱི་ཨུ་ཡོན། རྨ་ལྷོ་ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་དང༌། མཚོ་སྔོན་ཞིང་ཆེན་བོད་སྨན་ཁང༌། རྨ་ལྷོ་སོག་རྫོང་བོད་སྨན་ཁང༌། གཅན་ཚ་རྫོང་བོད་སྨན་ཁང་བཅས་ཀྱི་མཚན་འཛིན་ཡོན་ཀྲང་གི་འགན་བཞེས་མྱོང༌། རྒྱལ་ཡོངས་ཀྱི་ཚན་རིག་ཤེས་བྱའི་བྱ་དགའ་ཨང་དང་པོ་ཐོབ་པ་དང༌། རྒྱལ་ཁབ་རིམ་པའི་བོད་སྨན་ཆེད་མཁས་ཀྱི་མཚན་སྙན་གནང་ཡོད།

     ༡༩༩༨ལོའི་ཟླ་བཞི་བའི་ཚེས་བཅུ་དྲུག་ཉིན་ལ་དགོངས་པ་ཆོས་དབྱིངས་སུ་བསྡུས་པའི་ཚུལ་བསྟན་ཏོ། །

     ད་སྐབས་མི་རིགས་དཔེ་སྐྲུན་ཁང་གིས་དཔར་བསྐྲུན་བྱས་པའི་ཁོང་གི་གསུང་འབུམ་པོད་བརྒྱད་བཞུགས།