༄༅།། ནང་བ་སངས་རྒྱས་ཀྱི་བསྟན་པའི་ཁྱད་ཆོས་བཤད་པ་བློ་གསལ་བྱིས་པའི་ལམ་སྟོན།

བཛྲ་ཚུལ་ཁྲིམས་རྒྱ་མཚོ། (བླ་བྲང)「

 དཔྱད 」གླེང་བསླངས་པའི་གཏམ། ༡

ལེའུ་དང་པོ། རྩོམ་འདི་འབྲི་བའི་ཀུན་སློང་།

「 དཔྱད 」རྩོམ་འདི་འབྲི་བའི་ཀུན་སློང་དང་པོ། ༢

「 དཔྱད 」རྩོམ་འདི་འབྲི་བའི་ཀུན་སློང་གཉིས་པ། ༣

 「 དཔྱད 」རྩོམ་འདི་འབྲི་བའི་ཀུན་སློང་གསུམ་པ།  ༤

ལེའུ་གཉིས་པ། ནང་བསྟན་གྱི་ཁྱད་ཆོས་བསྟན་པ།「

 དཔྱད 」ནང་བསྟན་གྱི་ཁྱད་ཆོས། ༡

 「 དཔྱད 」ནང་བསྟན་གྱི་ཁྱད་ཆོས། ༢ - ༣

 「 དཔྱད 」ནང་བསྟན་གྱི་ཁྱད་ཆོས། ༤ - ༥ 

「 དཔྱད 」ནང་བསྟན་གྱི་ཁྱད་ཆོས། ༦ - ༧

དགུ་བ། མཆོག་དམན་གྱི་ཁྱད་པར་རིགས་པས་ལེགས་པར་འབྱེད་པ་ལས་རང་ལྟ་མཆོག་འཛིན་དང་སྡང་སེམས་མི་བྱེད་པའི་ཁྱད་ཆོས།

    ད་ལྟ་འཛམ་གླིང་དུ་དར་ཁྱབ་ཆེ་བའི་ཆོས་ལུགས་གཞན་མང་བོ་ཞིག་གིས་རང་ལུགས་ལས་ཕྱི་རོལ་དུ་གྱུར་བའི་གྲུབ་མཐའ་སྨྲ་བ་དག་ལ་སྙིང་རྗེ་གཏན་ནས་སྐྱེ་མི་རུང་བར་བཤད་པས་ཆགས་སྡང་ཆེ་ཡང་། ནང་བའི་ཆོས་ལུགས་ལས་ནི་སྙིང་རྗེ་སྐྱེ་བའི་ཡུལ་ལ་དགྲ་གཉེན་དང་གྲུབ་མཐས་ཁྱད་པར་ཕྱེས་ནས་མི་འཇོག་ཅིང་གཞན་ལུགས་ལ་སྡང་སེམས་བྱེད་མི་རུང་གསུངས་ཏེ། དཔལ་ལྡན་ཟླ་བ་གྲགས་པས། རང་གི་ལྟ་ལ་ཆགས་དང་དེ་བཞིན་དུ། ། གཞན་གྱི་ལྟ་ལ་འཁྲུག་གང་རྟོག་པ་ཉིད། ། ཅེས་དང་དབུ་མ་སྙིང་བོ་ལས། ཕྱོགས་སུ་ལྷུང་བས་སེམས་གདུང་བས། ། ཞི་བ་ནམ་ཡང་རྟོགས་མི་འགྱུར། ། ཞེས་དང་སློབ་དཔོན་ཡེ་ཤེས་སྙིང་བོའི་བདེན་གཉིས་ལས་ཀྱང་། དེ་ལྟར་བདེན་གཉིས་རྣམ་ཕྱེ་འདིར། ། ཅི་ཉེས་ཡོད་དམ་འོན་ཏེ་མེད། ། ཕྱོགས་འཛིན་པ་ཡིས་དཀྲུགས་པའི་ཡིད། ། ལེགས་པར་དོར་ལ་དཔྱད་པར་གྱིས། ། ཞེས་པ་ནས། སྡང་བས་ཚིག་པ་ཁྱོད་ལ་ནི། ། དལ་བ་འབྱོར་བའང་རིང་དུ་གསལ། ། ཞེས་དང་སྤེལ་མར་བསྟོད་པར་ཆོས་ལྡན་རབ་འབྱོར་རམ་སློབ་དཔོན་དཔའ་བོས་ཀྱང་། དམ་ཆོས་རབ་ཏུ་བསྟོད་པ་དང་། ། དམ་ཆོས་མ་ལགས་སྨོད་མཛད་ཀྱང་། ། དམ་པ་དག་དང་ཐ་མ་ལ། ། ཁྱོད་ནི་ཆགས་དང་ཁྲོ་མི་མངའ། ། དགྲ་བཅོམ་དག་དང་མུ་སྟེགས་ལ། ། རྗེས་སུ་ཆགས་དང་ཁོང་ཁྲོ་བར། ། ཁྱོད་ཀྱི་ཐུགས་ནི་མི་འགྱུར་ན། ། ཞེས་སོགས་འདི་ལྟ་བུའི་ཚིག་མདོ་དང་བསྟན་བཅོས་དག་ལས་མང་དུ་གསུངས་པའི་ཕྱིར། འོན་ཀྱང་ལྷ་ལས་ཕུལ་བྱུང་གི་བསྟོད་པ་ལས། བདག་ནི་སངས་རྒྱས་ཕྱོགས་མི་འཛིན། ། སེར་སྐྱ་སོགས་ལ་མི་སྡང་ཡང་། ། གང་ཞིག་རིགས་པར་ལྡན་པའི་ཚིག ། དེ་ཉིད་སྟོན་པར་ཡོངས་སུ་འཛིན། ། ཞེས་དང་རྗེ་བདག་ཉིད་ཆེན་པོའི་རིན་པོ་ཆེ་གསུམ་གྱི་གཏམ་ལས། གལ་ཏེ་ཡང་དག་དམ་བཅའ་ཙམ་ཞིག་གིས། ། ངེས་པ་རྙེད་ཀྱང་སྒྲུབ་དང་སུན་འབྱིན་གྱི། ། ཚད་མའི་སྟོབས་ཀྱིས་ཐེ་ཚོམ་མ་ཆོད་ཕྱིར། ། འདམ་ལ་བཏབ་པའི་ཕུར་བ་བཞིན་འགྱུར་བས། ། ཡང་དག་བག་ཆགས་བརྟན་པོ་འཇོག་མི་ནུས། ། དེ་ཕྱིར་བློ་གྲོས་ཕྲ་ཞིང་འཛངས་པ་དང་། ། ཀུ་ཤའི་རྩེ་ལྟར་མ་གྱུར་དེ་སྲིད་དུ། ། ངོམས་མི་སླ་བར་ཞེས་གསུངས་པ་ལྟར་རིགས་པས་ལེགས་པར་དཔྱད་ནས་འཇུག་དགོས་ཀྱི། རང་གཞན་གྱི་ཕྱོགས་ཕྱེས་ན་ཆགས་སྡང་ཅན་ཡིན་ལ་བདག་ལ་ཕྱི་ནང་གི་ལུགས་དང་། གྲུབ་མཐའ་ལའང་ཁྱད་པར་མེད་དོ།། ཞེས་མཉམ་མཉམ་དུ་འཛིན་པ་ནི་བླུན་པོ་ཆུ་སྣ་གར་འཁྲིད་ཀྱི་ངང་ཚུལ་ལས་བློ་ཁོག་ཡངས་པའི་ཡོན་ཏན་མིན་ནོ།།

    དེས་ན་ནང་བའི་ཆོས་ལུགས་སུ་རང་གཞན་གྱི་ལུགས་ལ་རིགས་པས་དགག་སྒྲུབ་མང་དུ་མཐོང་བ་ནི་མ་རིག་པས་ལམ་ལོག་པར་འཕྱན་པ་རྣམས་ཡང་དག་པའི་ལམ་དུ་དྲངས་པའི་ཕྱིར་སྙིང་རྗེས་ཀུན་ནས་བསླངས་ཏེ་མཛད་པ་ལས་ཆགས་སྡང་དང་ཕྱོགས་ལྷུང་གི་དབང་གིས་མ་ཡིན་པས། འདི་ལས་ལྷག་པའི་ཚན་རིག་དང་། འདི་ལས་ལྷག་པའི་དངོས་གཙོ་རྩོད་སྒྲུབ་ཀྱི་རིག་པ་ཞིག་གང་ནས་ཀྱང་རྙེད་པར་མི་འགྱུར་རོ།།

--- མུ་འགོད། ---