སྤྱི་ལོ༢༠༡༨ལོའི་ཟླ་༡༡པའི་ཚེས་༤ཉིན་བརྡ་སྤྲོད་སྨྲ་བའི་དབང་བོ་མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེན་མོ་ལྕགས་ཐར་རྒྱལ་ལགས་སློབ་གཙོ་བཀྲ་ཤིས་ལགས་ཀྱིས་བསྐུལ་ངོར་དགའ་བདེ་རྫོང་མི་རིགས་དམའ་འབྲིང་དུ་ཕེབས་ཤིང་སྔ་དྲོའི་དུས་ཚོད་༩ནས་དུས་ཚོད་གཉིས་ཡས་མས་ལ་ངེད་ཅག་གིས་རང་ཉིད་ངོས་ཟིན་ཡག་པོ་བྱེད་ཅེས་པའི་བརྗོད་དོན་གཞིར་བཟུང་སྟེ་དགེ་རྒན་ཞེས་པའི་མིང་དེ་ལ་ངོས་ཟིན་དགོས་ཚུལ་དང་དགེ་རྒན་ཞེས་པའི་མིང་གི་འགན་ཐེག་དགོས་ཚུལ།  དགེ་རྒན་གྱི་བསམ་བློའི་ཀུན་སྤྱོད་དང་སློབ་མའི་མིག་དཔེར་འོས་པའི་དགེ་རྒན་བྱེད་པའི་འཆད་ཁྲིད་གནང་།

     ཉིན་དེའི་ཕྱི་དྲོའི་དུས་ཚོད་གསུམ་སྟེང་ནས་དུས་ཚོད་གཅིག་ལྷག་ལ་དགེ་རྒན་དང་ཁྱིམ་བདག  སློབ་མ་བཅས་ལ་གསུང་བཤད་གྱ་ནོམ་པ་གནང་། ཁོང་གིས་བསྟན་དོན། འཛམ་གླིང་གི་ཁྲོད་ན་བོད་ཅེས་ཤེས་པ་ནི་རིག་གནས་ཀྱི་ཆ་ནས་ཤེས་པ་མ་གཏོགས་མི་གྲངས་ཀྱི་ཆ་ནས་ཤེས་པ་མ་རེད། འཛམ་བུ་གླིང་དུ་བོད་ཅེས་གླེང་གིན་ཡོད་པ་ནི་བོད་ཀྱི་རིག་གནས་ཀྱི་ཆ་ནས་གླེང་གིན་ཡོད་པ་མ་གཏོགས་བོད་དེ་ཉིད་སྟོབས་འབྱོར་མངའ་ཐང་ལྡན་པ་དང་མི་རིགས་གཞན་དང་མི་འདྲ་བར་མི་རིགས་རང་ཉིད་ལ་རང་གིས་བདག་ཡག་པོ་རྒྱག་ཐུབ་པས་མ་རེད།   རྒྱལ་ཁབ་ཀྱི་སྲིད་ཇུས་མ་བཟང་བ་མ་ཡིན་ལ། མི་རིགས་ཕན་ཚུན་བར་གྱི་གནོན་ཤུགས་ལས་བྱུང་བ་མ་ཡིན་པར།  མ་གཞི་བོད་པ་རང་གིས་རང་མགོ་མ་འཁྱོངས་པའི་རྟགས་རེད།   བོད་པ་རང་གིས་རང་མགོ་མ་འཁྱོངས་པའི་རྟགས་གཙོ་བོ་གང་ལ་ཐུག་པ་རེད་ཟེར་ན།  བོད་རང་གི་ཞིང་འབྲོག་མང་ཚོགས་ནང་ན་སློབ་གསོ་མྱོང་བའི་མི་གྲངས་ཉུང་བ་དང་སློབ་གསོ་ལ་དོ་ཁུར་དང་རྒྱབ་སྐྱོར་བྱེད་མཁན་ཉུང་བས་ཡིན་སྟབས། ཕ་མས་རང་གི་བུ་ཕྲུག་ལ་རིག་གནས་སྦྱོང་དུ་འཇུག་པ་ནི་འགན་འཁྲི་ལྡོག་མེད་ཅིག་ཡིན་པ་ངོས་ཟིན་མེད་པའི་རྟགས་རེད་གསུངས།

     ཚེས་༥ཉིན་ཁོང་མགོ་ལོག་ཁུལ་རྟ་བྲག་དྭ་ཕྲུག་སློབ་གྲྭར་ཕེབས་ཤིང་དགེ་རྒན་དང་མ་ཚབ་རྣམས་ལ་བརྩེ་བ་ནི་སློབ་གསོའི་རྩ་བ་ཡིན་ཞེས་པའི་བརྗོད་གཞིའི་སྟེང་ནས་འཆད་ཁྲིད་ཟབ་རྒྱས་གནང་སྟེ།  དེ་གའི་དགེ་སློབ་ཡོངས་ལ་སློབ་གསོའི་ཐད་ཀྱི་མཛུབ་སྟོན་གང་ལེགས་བྱས།

གཟབ་ནན་གྱིས་འཆད་ཁྲིད་ལ་ཉན་བཞིན་པ།

རྟ་བྲག་དྭ་ཕྲུག་སློབ་གྲྭའི་ནང་དུ་འཆད་ཁྲིད་གནང་བཞིན་པ།