སློབ་གསོའི་མཐུན་རྐྱེན་ཐད་མགྲོན་ཁང་ཕུལ་བའི་མཛད་སྒོ།

  ༢༠༡༨ལོའི་སྤྱི་ཟླ་༤ཚེས་༢༥ཉིན་མདོ་སྨད་བླ་བྲང་བཀྲ་ཤིས་འཁྱིལ་གྱི་གྲྭ་བཙུན་ལྷག་བསམ་ཅན་ཧོར་གཙང་དཀོན་མཆོག་རྒྱ་མཚོ་ལགས་ཀྱིས་གངས་ལྗོངས་ཤེས་རིག་ནོར་བུའི་སློབ་གླིང་ལ་ཐོག་བརྩེགས་བཞི་ཅན་གྱི་མགྲོན་ཁང་ཞིག་སློབ་གསོའི་ཞལ་འདེབས་སུ་ཕུལ་བ་ལྟར་སློབ་དཔོན་འཇིགས་མེད་རྒྱལ་མཚན་དང་ཐོན་མིའི་སློབ་ཚོགས་ཀྱི་ལས་འཛིན་པ་རྣམས་ཆེད་དུ་བླ་བྲང་ལ་སོང་སྟེ་རྒྱུས་ལོན་ཞིབ་མོ་བྱས་ཤིང་། གྲྭ་བཙུན་ལྷག་བསམ་ཅན་ཁོང་ལ་བཀའ་དྲིན་ཞུ་བའི་ཚོགས་འདུ་གཟབ་རྒྱས་ངང་གངས་ལྗོངས་ཤེས་རིག་ནོར་བུའི་སློབ་གླིང་གི་ཚོགས་ཁང་ཆེན་མོའི་ནང་དུ་འཚོགས།  ཚོགས་འདུའི་སྟེང་དུ་ཁོང་དང་ཁོང་གི་ཤ་ཉེ་སྐབས་བཅུ་བའི་མཐར་ཕྱིན་སློབ་མ་ཧོར་གཙང་བསོད་ནམས་གཉིས་དངོས་སུ་གདན་འདྲེན་བྱས་པར་མ་ཟད།  ཧོར་གཙང་བསོད་ནམས་ཀྱིས་དགེ་ལས་སྦྱིན་བདག་གྲྭ་བཙུན་ལྷག་བསམ་ཅན་ཁོང་གི་མི་ཚེའི་བརྒྱུད་རིམ་གྱི་དཀའ་ཁག་དང་མཛད་རྗེས་རེ་རེ་ངོ་སྤྲོད་ཞིབ་རྒྱས་བྱས།  རང་གི་ཉམས་མྱོང་དང་འབྲེལ་ནས་མ་ཡུམ་སློབ་གླིང་ལ་བཅངས་པའི་དྲན་འཆར་དངོས་ཁ་ཞེ་གཉིས་མེད་ངང་སྦ་གསང་མེད་པར་བརྗོད་པས་དགེ་སློབ་ཡོངས་ལ་སེམས་འགུལ་ཚད་མེད་ཐེབས་སུ་བཅུག  གྲྭ་བཙུན་ལྷག་བསམ་ཅན་ཁོང་ལ་སློབ་དཔོན་འཇིགས་མེད་རྒྱལ་མཚན་དང་སློབ་དཔོན་ལྡོང་ཡོན་ཏན་རྒྱ་མཚོ་རྣམ་པ་གཉིས་ཀྱིས་བཀའ་དྲིན་མཚོན་བྱེད་དུ་སྐུ་དངོས་ཀྱིས་བསྟོད་བྱང་དང་དགེ་ལས་དཔང་ཡིག  རྟགས་མ་སོགས་ཕུལ་བར་མ་ཟད།  སློབ་མ་རྣམས་ཀྱིས་རིག་རྩལ་སྣ་ཚོགས་ཀྱི་འཁྲབ་སྟོན་གྱ་ནོམ་པ་བྱས་ནས་ཚོགས་འདུ་བདེ་བླག་ངང་མཇུག་བསྒྲིལ།

གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་གསོའི་མཐུན་རྐྱེན་ཐད་མགྲོན་ཁང་ཕུལ་བའི་མཛད་སྒོ།

ཧོར་གཙང་བསོད་ནམས་ཀྱིས་གྲྭ་བཙུན་དཀོན་མཆོག་རྒྱ་མཚོའི་གནས་ཚུལ་ངོ་སྤྲོད་གནང་བ།

ཧོར་གཙང་དཀོན་མཆོག་རྒྱ་མཚོ་མཆོག་ལ་དགེ་ལས་སྦྱིན་བདག་གི་ལེགས་སྐྱེས་གནང་བ།

སློབ་དཔོན་ལྡོང་ཡོན་ཏན་རྒྱ་མཚོ་མཆོག་གིས་ཧོར་གཙང་བསོད་ནམས་ལ་བསྟོད་བྱང་འབུལ་བཞིན་པ།

ཚོགས་རའི་ཡུལ་དངོས།

སློབ་གསོའི་མཐུན་རྐྱེན་ཐད་ཕུལ་བའི་མགྲོན་ཁང་ལ་རྒྱུས་ལོན་བྱས་པ།