༄༅། །དཔལ་ལྡན་བྱ་ཁྱུང་ལ་བསྔགས་པའི་རབ་ཏུ་བྱེད་པ་ལི་ཤིའི་མེ་ཏོག

ཤར་གདོང་བློ་བཟང་བཤད་སྒྲུབ་རྒྱ་མཚོ།

༄༅། ། རྒྱ་ཆེན་ཤེས་བྱའི་ཁྱོན་དང་མཉམ་འཇུག་པའི། །

དཔལ་སྟུག་མཁྱེན་པའི་ཆ་ཤས་མ་ལུས་པ། །

གཅིག་བསྡུས་བྱི་རུའི་མདངས་འདྲེས་གསེར་བཟང་སྐུ། །

རྨོངས་གཅོད་རལ་གྲི་གདེངས་པ་དེ་ལ་འདུད། །

བེེ་ཌྰུར་ཞུན་མས་གཡོགས་པའི་ཏམ་བུ་རའི། །

ཟབ་དོན་དབྱངས་ལ་ཆགས་པའི་ཚངས་སྲས་ཀྱེ། །

བདག་མགྲིན་དྲི་ཟ་དགའ་བའི་ཚལ་ཡངས་སུ། །

དགྱེས་དགུར་རོལ་ནས་ངག་གི་དབང་ཕྱུག་སྩོལ། །

བློ་ཆེན་ཡེ་ཤེས་མེ་ལོང་ངུར་སྨྲིག་གར། ། 

བཟང་བོའི་ལེགས་བཤད་གསེར་སྦྱངས་ལྷུན་པོའི་ཟླ། །

གྲགས་སྙན་འོག་མིན་ཞིང་ན་ལྡིར་བ་ཅན། །

པ་སངས་ཟླ་བ་ཉ་བའི་ལུས་དེ་དྲན། །

དོན་གཉིས་མཐར་ཕྱིན་སྟོབས་བཅུའི་རྩལ་རྫོགས་ཤིང་། །

མཁས་གྲུབ་བྱེ་བའི་གཙུག་ཏོར་རྩེར་འཕགས་ཏེ། །

སྲི་ཞིའི་རིན་ཆེན་ཟླ་མེད་ཙོང་ཁའི་ཡུལ། །

འཇམ་དབྱངས་བྱིས་པ་སྐྱོང་བའི་ཕ་དེ་དྲན། །

ཐུབ་པའི་ལེགས་གསུང་གསུང་གི་སྙིང་བོ་ཆེ། །

ལུང་རིགས་རབ་གསལ་གསལ་བའི་ལེགས་བཤད་ཀྱིས། །

ཉི་མ་ལྟར་མཛད་མཛད་པའི་རྩེ་མོ་ཞེས། །

འཛམ་གླིང་མཁས་པས་བས་མཐའ་མེད་པར་བསྔགས། །

བགྲང་ཡས་བསྐལ་པའི་སྔོན་ནས་མགོན་པོ་འདིས། །

ཐུབ་བསྟན་སྙིང་བོ་སྤེལ་བའི་དམ་བཅའི་ཁུར། །

རྡོ་རྗེའི་ལྷུན་པོ་བརྩེགས་པའི་མངའ་ཐང་ཅན། །

བཟུང་ལ་རབ་འབྱམས་རྒྱལ་བས་མེ་ཏོག་འཐོར། །

དེ་སླད་སྟོང་གསུམ་མི་མཇེད་ཞིང་ཁམས་སུ། །

ཟབ་གསང་ཟུང་འཇུག་གནད་ཀྱི་རྡོ་རྗེའི་རྒྱ། །

གྲོལ་བའི་ཚུལ་ལ་ས་བཅུའི་དབང་ཕྱུག་ཀྱང་། །

བསྙེམས་པའི་རི་བོ་ཡུས་ཀྱིས་རྨང་ནས་ཉིལ། །

བྱ་ཆེན་ཁྱུང་གི་མིང་ལྡན་པའི། །

རྨད་བྱུང་ས་འཛིན་ལྷུན་ཆགས་པར། །

རྒྱུ་སྐར་ཕྲེང་ཐག་ཆད་འདྲ་བའི། །

གནས་ལ་མཆོད་པའི་སྤྲིན་ཕུང་གཏིབ། །

ཡེ་ཤེས་མེ་ལོང་བྱིས་པའི་གཟུགས། །

གུར་ཀུམ་ཚོན་གྱིས་བསྒོས་པའི་ཡུལ། །

ཐེག་ཆེན་ཆོས་ཀྱི་ཡོན་ཏན་ཀུན། །

དར་ཞིང་རྒྱས་པའི་གླིང་འདི་མཚར། །

ཆོས་མངོན་སྨྲ་བའི་ཉི་མ་ཆེ། །

མཆིམས་ཀྱིས་དོན་གྲུབ་རིན་ཆེན་ལ། །

ལུང་བསྟན་མེ་ཏོག་འདབ་སྟོང་བ། །

གཙུག་ཏུ་བཅིངས་པའི་དགེ་མཚན་ཤར། །

ཡང་གཅིག་འཇམ་དཔལ་ཁྲོས་པ་ཡི། །

ཞལ་དཀྱིལ་དངོས་སུ་མཇལ་འདོད་ན། །

མདོ་སྨད་ཡུལ་དུ་སོང་ཞིག་དང་། །

དངོས་སུ་མཇལ་བ་འོང་ངོ་གསུངས། །

ས་དཔྱད་སྤོར་ཐང་གཙུག་ལག་གི ། །

གྲུབ་ཆ་འཇིག་རྟེན་བྱེད་པོ་ཡིས། །

ཆེད་དུ་བསྐྲུན་པ་ལྟ་བུ་རུ། །

བྱུང་བ་འདྲེན་བྱེད་ལམ་དུ་གསལ། །

སྐྱེས་མཆོག་བཛྲ་སཱ་ངྷུ་ཡིས། །

འཕགས་མཆོག་རོལ་བའི་རྡོ་རྗེ་ལ། །

ཐེག་ཆེན་ཡོན་ཏན་དར་རྒྱས་གླིང་། །

ཞེས་པ་དགོན་པའི་མཚན་དུ་ཞུས། །

ཁྱད་པར་འཇམ་དབྱངས་གཞོན་ནུ་དེ། །

མདོ་སྔགས་ཆོས་ཀྱི་སྒོ་མོ་ཆེར། །

ཞུགས་ནས་བཤད་སྒྲུབ་དཔག་བསམ་གྱི། །

ལྗོན་པའི་རྩ་བ་བརྟན་པོར་ཚུགས། །

མི་ཡི་འཇམ་དབྱངས་གཞོན་ནུ་དེས། །

བརྟན་པའི་འཁོར་ལོ་བསྙེན་པ་ལས། །

ཤིང་རྡོ་རྩིག་པའི་མེ་ལོང་ལ། །

ཡི་གེའི་རི་མོའི་འཕྲ་ཚོམ་ཤར། །

ལྔ་བདོའི་ཡང་ཐའི་དུས་འདིར་ཡང་། །

རྡོ་དང་ཇེ་འུར་ཡི་གེའི་འབྲུ། །

གསལ་བར་བཀྲ་བ་བདག་ལྟ་བུའི། །

མིག་ལ་ཤར་བའང་བརྩིར་མི་ལང་། །

ངེས་དོན་དམ་པའི་སྐྱེས་བུ་འགའ། །

།བྱོན་དུས་འཇའ་གུར་ཟླུམ་པོ་ཡང་། །

ཆེད་དུ་བྱེད་པོས་བཀྲམ་འདྲ་བར། །

ཤར་བ་མིག་གི་གཟིགས་མོར་བསྟར། །

ཡབ་རྗེ་བགྲང་བྱ་ཞེ་གཅིག་སྟེང་། །

ཆོས་སྡེ་ཆེན་པོ་བཏབ་པ་ནས། །

དགུང་གྲངས་དོན་བདུན་འདས་ཀྱི་བར། །

འཆད་ཉན་གའི་རྒྱུན་ལ་བསྡེབས། །

བགྲང་བྱའི་ཉག་མ་བརྒྱ་ཕྲག་དྲུག །

འདས་པའི་རིང་ལ་གློག་སྤོང་གི ། །

བྱ་བ་གསེར་ལྡན་ཆུ་བོ་མས། །

ནཱ་ལེཎྜྲ་ཡི་མཆེད་པོར་བསྐྲུན། །

གསེར་རིས་སྤ་བའི་སྒྲོམ་བུའི་ནང་། །

རིན་ཆེན་ནོར་གྱིས་མ་གཏམས་ན། །

བཅུད ཀྱིས་སྟོངས་པའི་བུམ་པ་བཞིན། །

མཁས་རྣམས་ཁྲེལ་བའི་གཞི་ལས་ཅི། །

བསམ་སྦྱོར་དགའ་བའི་གཤོང་བ་ལ། །

བླ་མའི་བྱིན་རླབས་ཆུ་བོ་འབུམ། །

འཁྱིལ་ལས་སྤངས་རྟོགས་ཡོན་ཏན་འབྲས། །

ལྷུན་གྱིས་གྲུབ་པའི་དཔག་བསམ་འཁྲུངས། །

རྩ་བ་མེད་པའི་རྩེ་མོ་བརྒྱ། །

འཚལ་དུ་བཀྲ་བ་མང་མཆིས་ཏེ། །

མདོ་རྒྱུད་ཚད་མ་དཔང་བཞག་ནས། །

ཅི་ཞིག་བརྟག་པར་བྱ་བའི་གཞི། །

དཔག་ཡས་ཆོས་ཚུལ་རིན་ཆེན་འབྱུང་། །

བླ་མའི་རྣལ་འབྱོར་མནྟ་རས། །

བསྲུབས་ལས་གྲུབ་གཉིས་ཉི་ཟླའི་འཕྲེང་། །

ཤར་བ་འདི་ལས་གཞན་ན་གང་། །

ལྡན་དཔྱིད་ཀྱི་ཕོ་ཉ་མོས། །

མགྲིན་གླུ་བསྒྱུར་པས་གཞན་ཡིད་འགུགས། །

ནགས་ཚལ་སྟུག་པོའི་ཤྭ་ན་མོས། །

གཞན་ཟིལ་གནོན་པ་དངོས་པོའི་གཤིས། །

ཚད་གཞུང་ཆར་སྤྲིན་སྟུག་པོ་ལས། །

དངོས་སྟོབས་རིགས་པའི་གློག་ཞགས་ཀྱིས། །

རྒོལ་བའི་བྲག་སྐྱ་ཕྱེར་བཏགས་ནས། །

རྣམ་རྒྱལ་གྲགས་པའི་རྒྱལ་རྔ་བརྡུངས། །

བློ་གྲོས་མིའུ་ཐུང་གོམ་གཅིག་གིས། །

དབུ་ཕར་འདུལ་མངོན་ས་ཆེན་ཁྱོན། །

གཞལ་བས་རྟོག་གེ་ལྷ་མིན་སྡེ། །

བརྟན་པ་ཕྲོགས་ཏེ་ས་འོག་བཅིངས། །

སྒྲ་ཚད་བཟོ་དང་གསོ་རིག་ལ། །

མང་ཐོས་རྒྱ་མཚོའི་མཐར་སོན་པས། །

ཀུན་ལས་རྒྱལ་བའི་དཔལ་མཐོང་ནས། །

མཁས་རྣམས་དགྱེས་པའི་མགོ་ལྕོག་ལྡེམ། །

འཕགས་བོད་གཞུང་བརྒྱའི་ཟབ་གནད་འཕྲུལ། །

ནམ་མཁའི་གྲུ་ཆེན་ལ་ཞུགས་ཏེ། །

མཐའ་མེད་དབྱིངས་ཀྱི་མཐའ་བརྒལ་ནས། །

ཐར་བ་ཆེན་པོའི་གྲོང་དུ་གཤེགས། །

རྣ་བརྒྱད་ཚངས་པས་མ་ཐོས་ཤིང་། །

མིག་སྟོང་དབང་བོས་མ་མཐོང་བ། །

རྡོ་རྗེ་ཐེག་པའི་ངོ་མཚར་འབུམ། །

ཐུགས་གསང་མེ་ལོང་ངོས་ན་གསལ། །

འབྱུང་གསེར་གཞི་ལ་བརྟེན་པའི། །

བག་ཡོད་རིན་ཆེན་ཐེམ་སྐས་ལས། །

ངེས་འབྱུང་ཁྲིམས་ཀྱི་ཁང་བཟང་རྩེར། །

ཉེས་འདི་ཐར་བའི་རྒྱལ་མཚན་བསྒྲེངས། །

བྱམས་སྙིང་འཁོར་ལོ་ཟུང་ལྡན་པའི། །

བྱང་སེམས་གསེར་གྱི་ཤིང་རྟ་ཆེ། །

སྤྱོད་པའི་ནོར་བུས་ཡོངས་གང་སྟེ། །

འགྲོ་ལ་སྦྱིན་པའི་དཔལ་དུ་ཆས། །

རྣམ་དག་དབང་བཞིའི་འཛིན་མ་ལ། །

དམ་སྡོམ་འཁྲི་ཤིང་རབ་རྒྱས་པར། །

བཟླས་སྒོམ་མེ་ཏོག་ཟེའུ་འབྲུ་ལས། །

ལས་བཞི་སྦྲང་རྩིའི་གཏེར་བརྒྱ་བརྡོལ། །

བྱིང་རྒོད་གཡོ་རླུང་དང་བྲལ་བའི། །

ཞི་གནས་ཏིང་འཛིན་བརྟན་པོའི་མཁར། །

བྱུང་དང་འབྱུང་བའི་རི་མོ་འབུམ། །

འགོག་མེད་ཤར་བའི་གཟིགས་མོར་འབྱམས། །

སྣང་སྲིད་ཤེས་བྱའི་འཁོར་ལོ་ཀུན། །

སྣང་སྟོང་དབྱེ་བ་འདི་རྟོགས་ཏེ། །

སྣང་གྲག་རིག་གསུམ་སྒྱུ་མ་བཞིན། །

སྣང་ཙམ་ཉིད་ནས་གསལ་ལེར་གཟིགས། །

མ་དག་སྣང་ཞེན་འཛིན་མའི་ཁྱོན། །

ང་རྒྱལ་གསལ་སྣང་གོམ་གཅིག་གིས། །

རྣམ་གནོན་ངོ་མཚར་སྒྱུ་འཕྲུལ་གྱིས། །

བདུད་བགེགས་སྟོབས་ལྡན་ས་འོག་བདས། །

ཤེས་རབ་ཉི་མ་ཙ་ཎྚ་ལིས། །

བདེ་ཆེན་ཟླ་བ་ཞུ་བ་ཡིས། །

དགའ་བཞིའི་ལང་ཚོ་ཆེར་འབར་བ། །

ངེས་དོན་རིག་སྔགས་འཆང་བའི་རྒྱན། །

འཁོར་ལོ་བཞི་ལྡན་ཐོབ་དུས་འདིར། །

སྒོ་གསུམ་ཆོས་ལ་གཞོལ་གྱུར་ན། །

ཆོས་གཟུགས་སྐུ་གཉིས་འཐོབ་འགྱུར་ཞེས། །

འདོམས་ཕྱིར་རྩེ་གཅིག་སྒྲུབ་ལ་དགྱེས། །

དེ་ལྟའི་དམ་པའི་སྐྱེས་བུའི་ཚོགས། །

དྲུག་བརྒྱའི་བགྲང་བྱར་རིམ་པ་བཞིན། །

བྱོན་པའི་ངང་ཚུལ་རྗེས་དྲན་ཏེ། །

རང་བཞིན་བརྗོད་པའི་ཚིག་གིས་སྦྲེང་། །

འཇམ་མགོན་བླ་མ་ཡབ་སྲས་ཀྱི། ། 

ཐུགས་བསྐྱེད་འོ་མཚོ་འཁྱིལ་བའི་གླིང་། །

འདི་ཡི་འཁོར་ལོ་གསུམ་གྱི་དཔལ། །

གཡར་ཟླའི་འཕེལ་བར་འགྲན་ན་ཡང་། །

དཀར་མིན་ལས་ཀྱི་རྟེན་འབྱུང་གི། །

འབྲས་སྐལ་མཚོ་ལྟར་བརྡོལ་བའི་ཚེ། །

ཉི་ཟེར་རེག་པའི་བ་མོ་བཞིན། །

མིང་གི་ལྷག་མ་ཙམ་དུ་གྱུར། །

འོན་ཀྱང་ཐུགས་བསྐྱེད་རླུང་ཤུགས་ཀྱིས། །

རྒྱལ་བསྟན་ཉི་མའི་དཀྱིལ་འཁོར་ཆེ། །

གླིང་འདིའི་མཁའ་ལ་དྲངས་པའི་ཚེ། །

སླར་ཡང་རྗེས་དྲན་བསྔགས་པས་མཆོད། །

ལེགས་བཤད་གསུང་གི་ཆ་ཤས་རེར། །

རྒྱལ་ཀུན་དགོངས་པའི་བཅུད་འཁྱིལ་བ། །

ངེས་དོན་བཤེས་གཉེན་དམ་པའི་ཕྲེང་། །

འཕྲ་ཚོམ་སྤུངས་པ་ལྟ་བུར་བྱོན། །

བཀའ་དང་དགོངས་འགྲེལ་ཆེན་མོ་ཡི། །

ཟབ་དོན་ཐང་མར་བརྡལ་བ་ལ། །

མི་འཇིགས་གདོང་ལྔའི་རྩལ་རྫོགས་པའི། །

མཁས་པས་ས་འདི་ཁྱབ་པ་བྱུང་། །

ཡུལ་སྦྱོར་འབྲས་བུའི་དངོས་པོ་བརྒྱད། །

ཤེར་མདོའི་སྦས་དོན་བདུན་ཅུ་ཡིས། །

མཚོན་ཚུལ་རབ་གསལ་མེ་ལོང་མཆོག །

འཕགས་སེང་ལྟ་བུའི་དམ་པ་བྱོན། །

ཀླུ་སྒྲུབ་གཞུང་ལུགས་རིགས་པའི་ཚོགས། །

ཟླ་བའི་ ལེགས་བཤད་ཀྱིས་གསལ་བའི། །

སྲིད་རྩ་འདོན་པའི་བློ་གྲོས་ཅན། །

བློ་བཟང་རྒྱལ་བ་དགྱེས་པ་མང་། །

ཆོས་མངོན་མཛོད་དང་འདུལ་བའི་མདོར། །

མངོན་པའི་རྒྱན་དང་ཉི་མའི་ཟེར། །

འཇམ་དབྱངས་ཆོས་ཀྱི་རྒྱལ་མཚན་གྱི། །

གཞུང་ལ་ལུང་རིགས་གད་རྒྱངས་བསྒྲགས། །

འཆད་པས་གདུལ་བྱའི་བློ་མུན་བསལ། ། 

རྩོད་པས་ལོག་རྟོག་བྲག་རི་གསིལ། །

རྩོམ་པས་མཁས་དགུའི་ཡིད་འཕྲོག་པའི། །

ངེས་དོན་དམ་པ་མང་བོ་བྱོན། །

རིམ་གཉིས་རྣལ་འབྱོར་མཐར་ཕྱིན་པས། །

སྣང་སྲིད་དྲེགས་པ་ཟིལ་གནོན་ཅིང་། །

དམ་ཅན་གཤིན་རྗེ་བྲན་བཀོལ་བའི། །

གྲུབ་བརྙེས་སྐྱེས་བུ་དུ་མ་བྱུང་། །

ཐུབ་པ་གངས་ཀྱི་རི་བོ་ལས། །

འོངས་པའི་ལུང་རྟོགས་ཆུ་བོ་བརྒྱར། །

བློ་ལྡན་ངུར་བའི་ཁྱུ་འཁྲིགས་པའི། །

ཆོས་ཀྱི་རྒྱ་མཚོ་ཆེ་འདི་མཚར། །

འཇམ་མགོན་ཐུགས་བསྐྱེད་གསེར་ལྡན་མར། །

རིག་གྲོལ་འདུས་པའི་ལྷུན་པོ་བརྗིད། །

ལྷ་བླའི་ཉི་ཟླ་རབ་གསལ་བའི། །

ཐེག་ཆེན་ཆོས་ཀྱི་མཎྜལ་མཛེས། །

ངེས་འབྱུང་ཁྲིམས་ཀྱི་རྩ་བ་བརྟན། །

སྡོམ་པ་གོང་མའི་གྲིབ་བསིལ་སྣུམ། །

ཐེག་གསུམ་འབྲས་བུས་ཡོངས་དུད་པའི། །

ཆོས་ཀྱི་ལྗོན་ཤིང་དད་པའི་ཞིང་། །

ཤིང་རྡོ་རྩིག་པའི་མེ་ལོང་ལ། །

རང་བྱོན་སྣང་བ་དཔག་མེད་པས། །

མཐོང་ཐོས་འབྲེལ་ཚད་དོན་ལྡན་དུ། །

གྲུབ་པས་སྐལ་ལྡན་ཡིད་དབང་འགུགས། །

ཕལ་ཆེར་ཐོས་བསམ་ཀློག་པས་བྲེལ། །

ལ་ལ་ཏིང་འཛིན་མལ་སྟན་ཆགས། །

གཞན་དག་རྟེན་བཞེངས་མཆོད་ལ་བརྩོན། །

འཁོར་ལོ་གསུམ་ལྡན་བྱ་ཁྱུང་བྲག ། 

ཕྱི་དབྱིབས་འབྲོག་གི་རི་བོར་འགྲན། །

ནང་ན་རྟེན་གྱི་བཀོད་པ་སྤུངས། །

གསང་བ་བཤད་སྒྲུབ་ནཱ་ལེཎྜྲ། །

མདོ་སྨད་ནོར་འཛིན་མཛེས་པའི་རྒྱན། །

བདེ་གཤེགས་མོས་པ་སྣང་མཛད་ཀྱི། ། 

རྣམ་འཕྲུལ་དོན་གྲུབ་རིན་ཆེན་ཞབས། །

གང་གི་གདུང་རྟེན་མཆོད་སྡོང་ལས། །

བདུད་རྩིའི་ཟིལ་བ་ཕྲོམ་མེར་འབྱུང་། །

དགའ་ལྡན་གསེར་གྱི་ཁྲི་འཕང་ལ། །

འགྱིངས་པའི་གསེར་གྱི་ཀ་བ་བཞི། །

ཕྱག་ན་པདྨོ་རྣམ་གསུམ་གྱིས། །

ཞབས་སྐྱེས་གཙུག་གི་ནོར་བུར་བཞེས། ། 

ཟུར་ཕུད་ལྔ་བ་མི་རྗེའི་སྲོལ། །

གནམ་བསྐོས་གོང་མ་ཆེན་ལུང་གིས། །

ཐེག་ཆེན་ཡོན་ཏན་དར་རྒྱས་པའི། །

གླིང་ཞེས་བསྔགས་པའི་གསེར་ཡིག་ཕབས། །

སྡེ་འདིའི་ཡོན་ཏན་ཕྲ་མོ་ཡང་། །

བདག་ལྟས་བརྗོད་ཀྱིས་ག་ལ་ལང་། །

སྐྲ་རྩེས་བཟུང་བའི་ཐིགས་པ་ཙམ། །

རང་གཞན་དད་པའི་རྐྱེན་དུ་སྤེལ། །

འདིར་འབད་ལེགས་བྱས་ཏེ་སེ་རི་བོ་ལ། །

བཅོ་ལྔའི་ཟླ་འོད་འབུམ་ཕྲག་ལྟུང་འདྲ་དེ། །

མི་ཕམ་འཇམ་དབྱངས་ཀུན་བཟང་སྨོན་ལམ་དང་། །

ཀུན་ནས་འདྲེས་ཤིང་རོ་གཅིག་ཉིད་གྱུར་ཅིག །

སྡེ་འདིར་བྱོན་དང་འབྱོན་འགྱུར་ཇི་སྙེད་པས། །

འདི་ཕྱིའི་ལེགས་ཚོགས་ཀུན་གྱི་རྩ་བ་མཆོག །

མཚན་ཉིད་ལྡན་པའི་ངེས་དོན་བཤེས་གཉེན་ལ། །

སེམས་དགུའི་རྩལ་གྱིས་འབྲལ་མེད་སྟེན་པར་ཤོག །

མཁས་པ་གཏིང་མཐའ་མི་མངོན་རྒྱ་མཚོའི་འཇིང་། །

བཙུན་པ་ཉེས་པས་མ་གོས་ས་ལེ་སྦྲམ། །

བཟང་པོ་པོ་འཆི་མེད་བདུད་རྩི་འཁྱིལ་འདྲ་བའི། །

དམ་པའི་ཚོགས་ཀྱིས་སྡེ་འདི་གང་གྱུར་ཅིག །

འཆད་པས་སྐལ་ལྡན་བློ་ཡི་སྒོ་བརྒྱ་འབྱེད། །

རྩོམ་པས་དཔྱོད་ལྡན་ཡིད་ལ་འགྱུར་བ་སྐྱེད། །

རྩོད་པས་རང་གཞན་ལོག་རྟོག་བྲག་རི་གཞོམ། །

དེ་ལྟའི་ཚོགས་ཀྱིས་གནས་འདི་གང་གྱུར་ཅིག །

དམིགས་མེད་སྙིང་རྗེ་ཆེན་པོ་ཞུ་བའི་མཚོ། །

ཁ་བའི་ཡུལ་དུ་ལྷག་པར་འཕྱུར་བ་ཅན། །

པད་དཀར་འཁྲི་ཤིང་ཕྱག་ན་གསོ་བ་དེའི། །

བཞེད་དགུའི་སྙིང་བོ་མྱུར་དུ་འགྲུབ་གྱུར་ཅིག །

བཅོམ་ལྡན་གཟི་བརྗིད་རྒྱལ་པོ་དགྱེས་པའི་འཛུམ། །

ལྷུགས་པར་གྲོལ་བ་མཆོག་གི་ཞབས་སྟེགས་ཁྲི། །

རྡོ་རྗེ་སྙིང་བོའི་ཁམས་སུ་ཡོངས་གྲུབ་ཅིང་། །

དགོངས་ཟབ་འབད་མེད་ཇི་བཞིན་ལྷུན་འགྲུབ་ཤོག །

བདག་ཀྱང་མ་འོངས་སྐྱེ་བའི་ཕྲེང་བ་རུ། །

ཡོན་ཏན་བདུན་གྱི་རྒྱན་དང་མི་འབྲལ་ཞིང་། །

མི་ཕམ་འཇམ་དབྱངས་ལྟ་བུས་རྗེས་བཟུང་སྟེ། །

རྒྱན་དྲུག་གཅིག་ཏུ་དྲིལ་བ་ལྟར་གྱུར་ཅིག །

མ་དག་མཐའ་ཡས་འཇིག་རྟེན་ཞིང་ཀུན་ཏུ། །

སྡུག་བསྔལ་གསུམ་གྱིས་རྒྱུན་མར་མནར་བའི་མ། །

ཇི་སྙེད་མཁའ་སྤྱོད་འོད་ལྔའི་གུར་ཁང་དུ། །

བདག་ཉིད་གཅིག་པུས་བདེ་བླག་འདྲེན་ནུས་ཤོག །

ཅེས་དགེ་ལྡན་བསྟན་པའི་ཆུ་མགོ་དཔལ་ལྡན་བྱ་ཁྱུང་ཐེག་ཆེན་ཡོན་ཏན་དར་རྒྱས་གླིང་ལ་རང་བཞིན་བརྗོད་པའི་ངག་གི་ལམ་ནས་ཆེད་དུ་བསྔགས་པའི་ཚིགས་སུ་བཅད་པ་ལི་ཤིའི་མེ་ཏོག་ཅེས་བྱ་བ་འདི་ནི། མཛའ་གཅུགས་དམ་པ་རིན་ཆེན་དོན་གྲུབ་ཀྱིས་ཡང་ནས་ཡང་དུ་བསྐུལ་པའི་ངོ་མ་ཆོག་པར། ཤར་གདོང་སྐྱེ་མིང་བ་བློ་བཟང་བཤད་སྒྲུབ་རྒྱ་མཚོས་སྤྱི་ལོ༡༩༨༩ ལོའི་སྤྱི་ཟླ༡ཚེས ༡༥ ལ་མཚོ་སྔོན་མི་རིགས་སློབ་གྲྭ་ཆེན་མོའི་རང་སྤྱིའི་ཉི་འོད་འཁྱིལ་བར་བྲིས་པ་དགེ། །།

ཡིག་གཏགས་པ་དང་འདོན་སྤྲོད་པ།  མཐེབ་ཐོགས་ཕྲུག