སློབ་གྲོགས་ལྷན་འཛོམས་ལས་བྱུང་བའི་འཆར་སྣང་།

——བཛྲ་ཚུལ་ཁྲིམས་རྒྱ་མཚོས།

ལས་དང་སྨོན་ལམ་བཙན་པོའི་མཐུ་སྟོབས་ཀྱིས།།

འུ་ཅག་བླ་མ་གཅིག་གི་སློབ་མར་བསྡུས།།

བཀྲ་ཤིས་གཡས་སུ་འཁྱིལ་བའི་ཆོས་ཀྱི་སྡེར།།

ཆོས་སྤྱོད་ལྷན་ཅིག་བྱས་པའི་བྱུང་བའང་དྲན།།

འོན་ཀྱང་རང་རང་སོ་སོའི་བྱ་བཞག་གིས།།

གྱེས་ནས་མ་ཐུག་ལོ་ངོ་ཉེར་བརྒྱད་འདས།།

དེ་རིང་མདོ་སྨད་ས་ཡི་ཐིག་ལེ་སྟེ།།

གཙོས་ནས་སླར་ཡང་ལྷན་འཛོམས་བྱུང་འདི་སྐྱིད།།

སྔོན་གྱི་བྱུང་བ་སླར་ཡང་གླེང་ན་སྐྱིད།།

གཞོན་པའི་དུས་ཀྱི་སྣང་བ་བཤད་ན་སྐྱིད།།

སྣ་ཚོགས་རྩེད་མོའི་གར་དེ་དྲན་ན་སྐྱིད།།

སྐྱིད་སྡུག་གང་ཡོད་མ་སྐུང་བཤད་ན་སྐྱིད།།

འོན་ཀྱང་མི་རྟག་ཆོས་ཉིད་ཡ་ང་བས།།

གྲོགས་འགའ་གཏན་དུ་བྲལ་བས་སེམས་པ་སྐྱོ།།

ལ་ལ་རྒྱང་རིང་ཡུལ་ན་རང་རང་གི།

ལས་ལ་བྲེལ་བས་མ་མཇལ་ཞེ་རེ་སྐྱོ།།

སྤྲོ་དགའ་ཟླ་ཤེལ་ཞུན་མའི་ཕུང་བོའི་ངོགས།།

སྐྱོ་སྣང་ར་རིས་སྦགས་འདི་འཁོར་བའི་གཤིས།།

གཤིས་འདི་བསྒྱུར་ན་དམ་ཆོས་ཉི་མའི་འོད།།

སྙིང་ལ་བསྐྱིལ་དགོས་གནད་དེ་སེམས་ལ་བབས།།

གསར་འགྱུར་མཁོ་སྤྲོད་པ།  སེང་དཀར།