རྗེ་བློ་བཟང་བཤད་སྒྲུབ་རྒྱ་མཚོས་མཛད།

ཨོཾ་མ་ཎྀ་པདྨེ་ཧཱུཾཿ  

མགོན་པོ་སྤྱན་རས་གཟིགས་ལ་གསོལ་བ་འདེབས།། 


རྒྱལ་ཁམས་སེམས་ཅན་ཐམས་ཅད་བདེ་གྱུར་ཅིག ། 


མར་གྱུར་འགྲོ་བའི་དྲིན་ལན་གསབ་པའི་ཕྱིར།། 


ཚེ་རབས་ཀུན་ཏུ་ཕན་པའི་སྨོན་ལམ་འདེབས།།

 

སྐྱེ་བ་ཐོག་མ་མེད་པའི་དུས་ཤིག་ནས།། 


འཁོར་བའི་གནས་འདིར་རྒྱུན་ཆད་མེད་པར་འཁྱམས།།

 
ཕ་མར་མ་གྱུར་སེམས་ཅན་འགའ་ཡང་མེད།།

དེ་ཡི་དྲིན་ལན་ཆོས་ཀྱིས་འཁོར་བར་ཤོག །

ཟླ་དགུ་ཞག་བཅུའི་བར་དུ་ལུས་ལ་བཟུང་།། 


བཙས་ནས་ཉིན་མཚན་ཀུན་ཏུ་གཅེས་པར་བསྐྱངས།། 


དཔྲལ་བའི་མིག་དང་ཁོག་གི་སྙིང་བཞིན་བསམ།། 


དེ་ཡི་དྲིན་ལན་ཆོས་ཀྱིས་འཁོར་བར་ཤོག །

རྙེད་དཀའི་རྟེན་བཟང་དེ་འདྲ་ཐོབ་པའི་ཚེ།། 


ཡིད་བཞིན་ནོར་རྙེད་ལྟ་བུར་དགའ་སྤྲོ་སྐྱེས།། 


ཕན་པ་ཚད་མེད་དྲིན་གྱིས་ཇི་ལྟར་བསྐྱངས།། 


དེ་ཡི་དྲིན་ལན་ཆོས་ཀྱིས་འཁོར་བར་ཤོག །

བརྩེ་བའི་འཛུམ་གྱིས་བསུས་ཤིང་ནུ་ཞོས་གསོས།། 


གཉིད་དང་ལྟོ་བཅས་ཤ་ཡི་དྲོད་ལ་སྦྱར།།

 
སྣབས་ལུད་མི་གཙང་ཁ་དང་ལག་པས་ཕྱིས།། 


དེ་ཡི་དྲིན་ལན་ཆོས་ཀྱིས་འཁོར་བར་ཤོག ། 



རང་གིས་སྡིག་སྡུག་གཏམ་ངན་ཁྱད་བསད་ནས།། 


འབད་པས་བསགས་པའི་རྒྱུ་ནོར་མ་ལུས་པ།།

བུ་ལ་འཕྲོད་ཚེ་བསམ་པ་འགྲུབ་སྙམ་ཤར།། 


དེ་ཡི་ལན་ཆོས་ཀྱིས་འཁོར་བར་ཤོག ། 

བསྒྲུབ་པའི་ནོར་རྫས་རང་ལ་བཞག་ན་ཡང་།། 


སྡིག་པའི་རྣམ་སྨིན་ཕ་མ་དག་གིས་འཁུར།།

 
བུ་ཕྲུག་རྒྱགས་པས་བསམ་བློ་ག་ལ་ཐོངས།། 


དེ་ཡིས་དྲིན་ལན་ཆོས་ཀྱིས་འཁོར་བར་ཤོག། །

ལྷན་ཅིག་འཚོགས་ནས་གཏན་དུ་འདུག་རྩིས་བྱས།། 


གློ་བུར་འཆི་བདག་འོངས་ནས་འཁྲིད་པའི་ཚེ།།

རྒྱུས་མེད་བར་དོའི་འཕྲང་ལ་གཅིག་པུར་སོང་།། 


དེ་ཡི་དྲིན་ལན་ཆོས་ཀྱིས་འཁོར་བར་ཤོག ། 

ཀྱེ་མ་ཀྱེ་ཧུད་ཕ་མ་དྲིན་མོ་ཆེ།། 


ད་ལྟ་འགྲོ་དྲུག་བར་དོའི་གནས་གང་ན།། 


མཐོ་དམན་སྐྱིད་སྡུག་ཇི་འདྲ་སུ་ཡིས་ཤེས།། 


དེ་ཡི་དྲིན་ལན་ཆོས་ཀྱིས་འཁོར་བར་ཤོག །

ཟས་ནོར་སྐལ་བ་རྗེས་སུ་སྐྱེལ་ལུགས་མེད།། 


དཀར་པོ་དགེ་བ་མ་གཏོགས་ར་མདའ་མེད།། 


སྐྱབས་གནས་བསླུ་མེད་བླ་མ་དཀོན་མཆོག་མཁྱེན།། 


དེ་ཡི་དྲིན་ལན་ཆོས་ཀྱིས་འཁོར་བར་ཤོག ། 

འདིར་འཚོགས་རྒན་གཞོན་སེར་སྐྱ་ཕོ་མོ་རྣམས།། 


དུས་རྒྱུན་ཕ་མའི་དགེ་རྩ་སྒྲུབ་ལ་རེམ། 


འདི་འདྲའི་ལ་ཡོག་རང་ལ་ཡོང་ངེས་ཡིན།། 


ཕ་མའི་དྲིན་ལན་ཆོས་ཀྱིས་འཁོར་བར་ཤོག ། 



དལ་བའི་རྟེན་བཟང་ལན་གཅིག་ཐོབ་དུས་འདིར།། 


མི་ཚེ་དོན་མེད་སྡིག་ལ་གཟད་གྱུར་ན།། 


མ་འོངས་གཤིན་རྗེའི་ཁྲིམས་རྭར་འཇིགས་པ་ཆེ།། 


ཚུལ་འདིར་ད་ནས་བསམ་བློ་གཏོང་རན་ཡིན།། 



ཐོག་མེད་དུས་ནས་བསགས་པའི་སྡིག་ལྟུང་ལ།། 


འགྱོད་སེམས་དྲག་པོས་གཤགས་སྦྱངས་མ་བྱས་ན།།                                        

དཀར་ནག་ལས་ཀྱི་འབྲས་བུ་འཆོར་བ་མེད།། 

རྒྱུ་ནོར་མི་རྟག་རྩ་ཁའི་ཟིལ་བ་འདྲ།། 


ཚེ་སྲོག་རླུང་ནང་མར་མེ་ཇི་བཞིན་གཡོ།། 


འདི་ཕྱི་ཀུན་ཏུ་ཕན་པ་དམ་པའི་ཆོས།། 


ལེ་ལོ་མེད་པར་མྱུར་ཏུ་བསྒྲུབ་ན་ལེགས།། 



དེང་སང་སྙིགས་མའི་མི་རྣམས་འགྱུར་ལྡོག་ཆེ།།

 
འགྲོགས་ཡུན་རིང་ན་ལྷག་པར་ཇེ་ངན་ཡིན།།

ངན་སེམས་འཆང་བ་བསོད་ནམས་ཟད་པའི་རྒྱུ།།

མི་ལ་ངན་སེམས་མ་འཛིན་སྙིང་གཏམ་ཡིན།།

 

དམ་ཆོས་ཟབ་མོ་ཚུལ་བཞིན་སྒྲུབ་འདོད་ན།།

 
དཀོན་མཆོག་གསུམ་དངོས་མཚན་ལྡན་བླ་མ་ལ།། 


དད་གུས་བརྟན་པོ་འགྱུར་བ་མེད་པ་དགོས།། 
འདི་ནི་མེད་མི་རུང་ངོ་ཤེས་ལྡན་རྣམས།། 



ལུས་ཀྱིས་ཕྱག་མཆོད་སྐོར་བ་སྨྱུང་གནས་དང་།།

ངག་གིས་གཟུངས་སྔགས་ཡིག་དྲུག་བཟླས་བརྗོད་དང་།།                                                               

ཡིད་ཀྱིས་བླ་མ་ལྷ་ལ་གསོལ་འདེབས་རྣམས།། 


ལུས་ངག་ཡིད་གསུམ་དགེ་ལ་སྦྱོར་ཚུལ་ཡིན།། 



བླ་མ་དགེ་འདུན་སྡེ་ལ་བསྙེན་བཀུར་དང་།། 


རྟེན་གསུམ་བཞེངས་དང་ཚེ་ཐར་སྲོག་བླུ་སོགས།། 


དགེ་རྩ་གང་བསྒྲུབ་ཕ་མའི་དོན་ཡིན་པས།། 


ཕ་མ་སེམས་ཅན་སངས་རྒྱས་ཐོབ་ཕྱིར་བསྔོས།། 



རྒྱལ་བའི་གསུང་རབ་མགུར་དུ་བཞེངས་པ་ལ།། 


ཚིག་དོན་ལེགས་པར་ཉན་པའི་མི་ཡོད་དམ།། 


གཏན་གྱི་བདེ་སྐྱིད་སྒྲུབ་ཚུལ་བཞག་པ་ལ།། 


ཇི་བཞིན་ལག་ཏུ་ལེན་པའི་མི་ཡོད་དམ།། 

ཐར་བར་འདྲེན་བྱེད་ཐུགས་རྗེའི་ལྕགས་ཀྱུ་ལ།། 


དད་པའི་ཨ་ལོང་ཅན་གྱི་མི་ཡོད་དམ།། 


ཕ་མའི་དྲིན་ལན་ཚུལ་བཞིན་འཇལ་བ་ལ།། 


དཀའ་སྤྱད་སྙིང་རུས་ཆེ་བའི་མི་ཡོད་དམ།། 



དེ་སྐད་དུ་ཡང་ཕྱོགས་མེད་རྒྱལ་ཁམས་པའི།། 


དད་པ་ཅན་གྱི་སེར་སྐྱ་ཕོ་མོ་རྣམས།། 


དམ་པའི་ཆོས་ལ་ཡང་དག་བསྐུལ་བའི་ཕྱིར།། 


དབེན་པའི་རི་ཁྲོད་ཅིག་ནས་སྨྲས་པ་ཡིན།། 



འོད་དཔག་མེད་དང་སྤྱན་རས་གཟིགས་མགོན་མཁྱེན།།                                                                  

ངན་སོང་འཁོར་བའི་སྐྱེས་སྒོ་གཅད་དུ་གསོལ།།                                                                    

དམིགས་ཡུལ་ཉམས་ཐག་འགྲོ་ལ་ཐུགས་རྗེས་གཟིགས།།                                                              

མཐོ་རིས་ཐར་བའི་ལམ་སྣ་དྲངས་དུ་གསོལ།། 
  
   ཅེས་ཕ་མའི་དྲིན་གཟོ་དང་འབྲེལ་བའི་མགུར་དབྱངས་ཐར་འདོད་སྙིང་གི་བདུད་རྩི་ཞེས་བྱ་བ་འདི་ནི། རྒྱལ་ཁམས་མྱུལ་བའི་ལྡོམ་བུ་བ། ཀོའུ་བ་སྤྲུལ་མིང་བ༧བློ་བཟང་བཤད་སྒྲུབ་རྒྱ་མཚོས་དམ་པ་གོང་མའི་གསུང་ལ།  རྗེས་བཟློས་ཀྱི་ཚུལ་དུ་ཅུང་ཟད་རྒྱས་བསྡུས་རན་པ་ཞིག་སྦྱར་བ་འདི་རྣ་བས་ཐོས་ཚད་ཐམས་ཅད་ཀྱི་ངན་སོང་གི་སྐྱེས་སྒོ་ཁེགས་པར་ཤོག་ཅིག  །

རྩོམ་ཡིག་ཕབ་བཤུ་བ། སྐབས་བཅུ་དྲུག་པའི་མཐར་ཕྱིན་སློབ་མ་རྒྱ་འདུ་སངས་རྒྱས།

རྩོམ་སྒྲིག་འགན་འཁུར་བ།  ཁཱ་ཤེས་རབ་རྒྱ་མཚོ།  མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།