གངས་ལྗོངས་ཤེས་རིག་ནོར་བུའི་སློབ་གླིང་གི་ཐོན་མིའི་སློབ་ཚོགས་ཀྱི་སྒྲིག་ཡིག་
ལེགས་ཚོགས་སྒོ་བརྒྱ་འབྱེད་པའི་ལྡེ་མིག་ཅེས་བྱ་བ་བཞུགས་སོ།།
དང་བོ།
སློབ་ཚོགས་འདི་ནི་མ་ཡུམ་སློབ་གླིང་སྟེ་གངས་ལྗོངས་ཤེས་རིག་ནོར་བུའི་སློབ་གླིང་གི་དྲྭ་ཚིགས་དོ་དམ་དང་དཔལ་འབྱོར་འཚོལ་སྒྲུབ་བྱེད་པའི་མཐར་ཕྱིན་སློབ་མ་ཁོ་ནས་གྲུབ་པའི་སློབ་གྲྭ་རང་ངོས་ཀྱི་ཚོགས་པ་ཞིག་ཡིན་པས་ཚོགས་མི་གཞན་བསྡུ་ལེན་བྱ་མི་ཆོག
གཉིས་པ།
འཛིན་གྲྭ་སོ་སོས་འཐུས་མི་སུས་ཀྱང་སློབ་གྲྭ་དང་ཚོགས་པའི་མཚན་སྙན་ལ་གནོད་པའི་བྱ་བ་བསྒྲུབ་མི་རུང་། གལ་ཏེ་བྱ་བ་དེ་འདྲ་བྱུང་ཚེ་འཐུས་མི་བརྗེ་སྤོར་དང་ཡང་ན་ཚོགས་པའི་ནང་ནས་ཕྱིར་དབྱུང་གཏང་རྒྱུ།
གསུམ་པ།
འཐུས་མི་སོ་སོས་ནང་ཕན་ཚུན་ལ་མཐུན་པོ་དང་ནུས་ཤུགས་ཡོད་དགུས་ཚོགས་པ་ལ་རྒྱབ་སྐྱོར་གནང་བ་ལས། ཕན་ཚུན་དབྱེན་དཀྲུག་དང་ཕྲག་དོག་གིས་ཚོགས་པའི་ལས་གཞི་དང་མདུན་ལམ་ལ་གནོད་པའི་རིགས་བྱུང་ཚེ་ཐག་གཅོད་ནན་མོ་བྱ་རྒྱུ།
བཞི་བ།
འཛིན་གྲྭ་སོ་སོས་གདམ་ཐོན་བྱུང་བའི་འཐུས་མི་སུ་ཡིན་ཡང་ཁ་ཙམ་མ་ཡིན་པར་ཚོགས་པའི་འཕེལ་རྒྱས་ལ་འགན་ནན་མོ་ཁུར་རྒྱུ་དང་། གལ་སྲིད་འགན་མི་འཁུར་བ་དང་། ནུས་པ་མི་འདོན་པའམ་མི་ཐོན་པའི་རིགས་སོགས་བྱུང་ཚེ་ངེས་པར་དུ་འཐུས་མི་བརྗེ་སྤོར་གནང་རྒྱུ།
ལྔ་བ།
འཐུས་མི་རེ་རེ་ལ་ཚོགས་པའི་ཁ་ཕྱོགས་དང་གནས་བབ་ཐད་ལ་སོ་སོའི་ལྟ་ཚུལ་བརྗོད་པའི་ཁེ་དབང་ཡོད་ཀྱང་། རང་གི་སྐད་ཆ་ལ་འགན་མི་འཁུར་བ་དང་།ནམ་ཡང་བབ་ཅོལ་དུ་སྨྲ་བ།ཚོགས་པའི་མཐུན་སྒྲིལ་ལ་གནོད་པའི་སྐད་ཆ་བཤད་མཁན་སོགས་བྱུང་ཚེ་དུས་ལྟར་ཐག་གཅོད་གནང་རྒྱུ།
དྲུག་པ།
འཐུས་མི་སུ་ཡིན་ཡང་ཐོན་མིའི་སློབ་ཚོགས་ཀྱི་མིང་གཡར་ནས་སྒེར་གྱི་བྱ་བ་སྒྲུབ་མཁན་གྱི་རིགས་བྱུང་ཚེ་འཐུས་མི་ལས་ཕྱིར་དབྱུང་གཏང་བའམ་ཐག་གཅོད་ནན་མོ་བྱ་རྒྱུ།
བདུན་པ།
འཐུས་མི་ལྷན་ཚོགས་ནང་ཁུལ་གྱི་གྲོས་ཀ་དང་འཆར་གཞི་སོགས་ཕྱི་རོལ་དུ་བསྒྲག་ཆོག་པར་གཏན་འཁེལ་བ་ཞིག་ཡིན་ན་མ་གཏོགས་ཚོགས་མི་སུས་ཀྱང་གང་བྱུང་དུ་ཚོགས་པའི་ནང་གཏམ་ཕྱིར་སྒྲོག་དང་འདོན་སྤེལ་བྱེད་པ་གཏན་འགོག་བྱ་རྒྱུ།
བརྒྱད་པ།
འབྱུང་འགྱུར་གྱི་ལོ་ཟླའི་ནང་དུ་ཐོན་མིའི་སློབ་ཚོགས་ལ་དཀའ་ཁག་རབས་དང་རིམ་པ་འབྱུང་བ་ནི་སྨོས་མེད་ཡིན་པས། འཛིན་གྲྭ་སོ་སོའི་འཐུས་མི་རྣམས་དཔུང་བ་མཉམ་གཤིབ་དང་སྟོབས་ཤུགས་གཅིག་སྒྲིལ་གྱིས་དཀའ་ཁག་ཇི་འདྲ་བྱུང་ནའང་གདོང་ལེན་གནང་དགོས་པ་ལས།དཀའ་ཁག་ཆེ་བའི་སྐབས་སུ་ཕྱིར་བཀྱེད་པ་སོགས་སྐྱིད་སྡུག་མི་མཉམ་པའི་རིགས་བྱུང་ཚེ་རང་འགུལ་གྱིས་ཕྱིར་འབུད་དགོས།
དགུ་བ།
ལོ་རེར་འཐུས་མི་ལྷན་ཚོགས་ཐེངས་གཅིག་ནས་གཉིས་པར་འཚོགས་ཏེ་ཐོན་མིའི་སློབ་ཚོགས་ཀྱི་བྱ་བ་ཆེ་ཕྲ་མཐའ་དག་ལ་གྲོས་བསྡུར་དང་འཆར་གཞི་བཟོ་བ་དང་། སློབ་ཚོགས་ཀྱི་ལོ་རེའི་འགྲོ་གྲོན་གྱི་དངུལ་རྩིས་ཞིབ་གཤེར་གནང་རྒྱུ་མ་ཟད། ཚོགས་འདུའི་སྐབས་སུ་འཛིན་གྲྭ་གང་གི་འཐུས་མི་དུས་ལྟར་མ་འབྱོར་ཚེ་རྒྱུ་རྐྱེན་དམིགས་བསལ་བ་ཡིན་པ་མ་གཏོགས་ཐག་གཅོད་ནན་མོ་བྱ་རྒྱུ།
བཅུ་བ།
ཚོགས་པའི་བྱ་བ་ཆེ་ཆུང་ཀུན་གྲོས་བསྡུར་དང་ཐག་གཅོད་ཀྱི་སྐབས་སུ་རྣམ་པ་ཀུན་ཏུ་མང་གཙོའི་ལམ་ལུགས་ལྟར་འཐུས་མི་མང་གྲོས་ཀྱི་མོས་མཐུན་ངོས་ནས་ཐག་གཅོད་གནང་རྒྱུ་ལས་མི་སྒེར་བ་གཅིག་དང་གཉིས་ཀྱི་ཁ་དབང་ཙམ་དང་མོས་མཐུན་ཙམ་ལ་གཏན་ནས་ཡིད་འཇོག་བྱ་མི་ཆོག
བཅུ་གཅིག་པ།
འཐུས་མི་སུས་ཀྱང་རྒྱལ་ཁབ་ཀྱི་རྩ་ཁྲིམས་དང་མཐུན་པར་སློབ་ཚོགས་ཀྱི་བྱ་བ་བསྒྲུབ་པ་ལས། རྒྱལ་ཁབ་ཀྱི་ཆབ་སྲིད་ལ་འགལ་བའི་སྐད་ཆ་བཤད་པ་དང་། རྩོམ་འབྲི་བ། ལས་ཀ་སྒྲུབ་པ་སོགས་གཏན་འགོག་བྱ་རྒྱུ།
བཅུ་གཉིས་པ།
ཐོན་མིའི་སློབ་ཚོགས་ཀྱིས་མ་དངུལ་བསྡུ་བའི་བྱེད་སྒོ་ཞིག་ཡིན་ཚེ་ངེས་པར་རྒྱུན་ལས་ལས་འཛིན་གསུམ་གྱི་ཡན་འཛོམས་དགོས་པ་ལས་གཞན་ཚོགས་མི་རེ་རེ་ལ་མ་དངུལ་དངོས་སུ་བསྡུ་བའི་དབང་ཆ་མེད།
༢༠༡༤༡༠༡ཉིན་ཐོན་མིའི་སློབ་ཚོགས་ཀྱིས།
རྩོམ་སྒྲིག་འགན་འཁུར་བ། མགར་རྩེ་ཉི་ཟེར། བན་ཤུལ་འཇམ་དབྱངས། འབའ་སྣང་གྲོལ། ཨ་བུ་འབྲོང་།
|