སློབ་སྦྱོང་བྱེད་ཞོར་དང་དམངས་ཕན་སྒྲུབ་ཞོར་གྱི་གྲྭ་རྐྱང་ཞིག
ཤེས་རིག་ནོར་བུའི་གླིང་གི་མཐར་ཕྱིན་སློབ་མ་ཨ་རིག་སྐལ་བཟང་བཀྲ་ཤིས་ཀྱི་གནས་ཚུལ།
ད་ལོའི་སྤྱི་ཟླ་༢ཚེས་༢༩ཉིན། གངས་ལྗོངས་ཤེས་རིག་ནོར་བུའི་སློབ་གླིང་གི་མཐར་ཕྱིན་སློབ་མ་སྟེ་ཨ་རིག་དགོན་ཆེན་དགའ་ལྡན་ཆོས་འཕེལ་གླིང་གི་གྲྭ་བཙུན་སློབ་གཉེར་བ་སྐལ་བཟང་བཀྲ་ཤིས་ལགས་ཀྱིས་མ་ཡུམ་སློབ་གླིང་ནས་མཐར་ཕྱིན་རྗེས་མི་ལོ་བཅུ་གཉིས་རིང་ལ་གཙང་དགོན་དོན་འགྲུབ་རབ་བརྟན་གླིང་ནས་མཐའ་གཅིག་ཏུ་ཐོས་བསམ་སློབ་གཉེར་གནང་ནས་ཕར་ཕྱིན་རབ་འབྱམས་པའི་མཚན་རྟགས་བཞེས་ཏེ་ཕྱིར་རང་དགོན་དུ་ཕེབས་པ་དང་། སྡེ་བའི་སྡེ་དཔོན་གཙོ་བྱས་པའི་ཡུལ་མི་ཚོས་ཁོང་ལ་བསུ་མ་མཛད་པར་མ་ཟད།ཕྱི་ལོ་༢༠༢༠.༣.༥
དང་བོད་ཚེས༢.༡༢.ཉིན་གྱི་ཟླ་ཚེས་བཟང་བོ་ལ་ཨ་རིག་དགོན་ཆེན་གྱི་དགོན་བདག་བླ་མ་བྱ་བྲལ་རིན་པོ་ཆེ་དབུ་བཞུགས་ཐོག་གྲྭ་ཚང་ཡོངས་ཀྱིས་ཆོས་སྟོན་རྒྱ་ཆེར་བཤམས་ཏེ་ཁོང་ལ་བསུ་མ་བྱས། ད་དུང་དགོན་པའི་གྲྭ་ཚང་དང་དད་ལྡན་དམངས་ཚོགས་རྣམས་ལ་རྟེན་འབྲེལ་གྱིས་ཕར་ཕྱིན་ཀ་ར་གཏོར་བ་དང་དགོན་པ་གཞུང་གིས་གཟེངས་རྟགས་དཔའ་དར་འཐེན་པ་སོགས་ཆོ་ག་སྣ་ཚོགས་སྤེལ། དེར་མཐུད་ནས་གནང་བའི་གོ་སྐབས་ལ་བསྟུན་ཏེ་ཁོང་གིས་ནད་ཡམས་སྔོན་འགོག་ལ་དམིགས་ནས་ཡུལ་འདིའི་ལྷ་སྡེ་ཚང་མར་ནག་པོ་དགུ་སྦྱོར་དང་ལོ་གྱོན་མའི་རིལ་བུ་སྨན་སྦྱིན་གནང་བ་སོགས་མདོར་ན་ཡུལ་འདིའི་ཆོས་སྲིད་ལུགས་གཉིས་ ཀྱི་ཐད་ལ་བྱ་བ་སྒྲུབ་བཞིན་ཡོད་པར་མ་ཟད།
ད་དུང་མུ་མཐུད་དུ་སློབ་གཉེར་གྱི་ལས་ལ་བརྩོན་བཞིན་ཡོད།
ནད་ཡམས་སྔོན་འགོག་ཆེད་ནག་པོ་དགུ་སྦྱོར་དང་ལོ་གྱོན་མའི་རིལ་བུ་སྨན་སྦྱིན་གནང་བ།
གསར་འགོད་པ། ཨ་རིག་མཁས་བཟང་།
|