ཡི་དམ་དང་ཆོས་སྐྱོང་གི་ཁྱད་པར།  

དོར་ཞི་རིན་པོ་ཆེ།  

   ༄༅། །དེང་སྐབས།   ལ་ལ་ཞིག་གིས་ཡི་དམ་ཞེས་པ་དང་ཆོས་སྐྱོང་ཞེས་པ་ཅི་ཞིག་ཡིན་པ་ཧ་གོ་ཡི་མི་འདུག  ཁ་ཅིག་ལ་རྡོ་རྗེ་འཇིགས་བྱེད་ཀྱང་ཆོས་སྐྱོང་ཡིན་སྣང་འཆར་བཞིན་ཡོད་ལ།   འགའ་ཞིག་ཆོས་སྐྱོང་ཡང་ཡི་དམ་དུ་བསྟེན་བཞིན་ཡོད།  དོན་དུ་དེ་གཉིས་མི་འདྲའོ། ། དཔེ་ཞིག་བཞག་ན།  ཡི་དམ་ནི་རྒྱལ་བོའམ་གོང་མ་ལྟ་བུ་དང་། ཆོས་སྐྱོང་ནི་དམག་དཔོན་དང་སྐུ་སྲུང་ལྟ་བུའོ། །དེའི་ཕྱིར་དེ་གཉིས་མི་འདྲའོ། །ང་ཚོས་ཆོས་སྐྱོང་བསྟེན་པ་ནི།  རང་ཉིད་ཀྱིས་ཆོས་སྒྲུབ་པའི་འགལ་རྐྱེན་བར་ཆད་ཐམས་ཅད་སེལ་ཏེ།  འདོད་པའི་དོན་མྱུར་བར་འགྲུབ་པའི་ཆེད་དུ་ཡིན། དེའི་ཕྱིར་ཆོས་སྐྱོང་ཞེས་བརྗོད་དོ། །

   ནང་བསྟན་ལྟར་ན།  ཆོས་སྐྱོང་མང་བོ་ཡོད་པ་ཡིན།  རྒྱ་བརྒྱུད་ནང་བསྟན་ལ་མཚོན་ནའང་།  མི་རྣམས་དགོན་པ་ཞིག་ལ་འཛུལ་དུས། མདུན་དུ་རྒྱལ་བ་བྱམས་པ་དང་རྒྱབ་ཏུ་ཆོས་སྐྱོང་བེ་ཏ་མཐོང་ཐུབ།  བེ་ཏ་ནི་ཆོས་སྐྱོང་སྟེ། ནག་པོ་ཆེན་པོའོ། །དེ་ཡང་ང་ཚོས་མ་ཧཱ་ཀ་ལ་ཞེས་འབོད་པ་དེ་ཡིན།  དེ་ནི་ཆོས་སྐྱོང་ཐམས་ཅད་ཀྱི་གཙོ་བོའོ། །རྒྱ་བརྒྱུད་ནང་བསྟན་དུ་དེ་ཡི་སྣང་ཚུལ་མི་འདྲ་ནའང་དོན་དུ་གཅིག་ཡིན། དེ་ལས་གཞན།  ཆོས་སྐྱོང་ལ་འཇིག་རྟེན་ལས་འདས་མ་འདས་གཉིས་ཡོད། འཇིག་རྟེན་ལས་འདས་པའི་ཆོས་སྐྱོང་རྣམས་ནི་ཡི་དམ་དང་སངས་རྒྱས་བྱང་སེམས་དག་གི་སྤྲུལ་བ་ཡིན་ལ། དེ་ལ་འཇིག་རྟེན་ལས་འདས་པའི་ཆོས་སྐྱོང་ཟེར།  དཔེར་ན།  མགོན་པོ་ཕྱག་དྲུག་པ་དང་དམ་ཅན་ཆོས་ཀྱི་རྒྱལ་བོ། དཔལ་ལྡན་ལྷ་མོ་ལྟ་བུའོ། །དེ་དག་སོ་སོར་འཕགས་པ་སྤྱན་རས་གཟིགས་དང་རྗེ་བཙུན་འཇམ་པའི་དབྱངས།  ལྷ་མོ་དབྱངས་ཅན་མ་རྣམས་ཀྱི་སྤྲུལ་བ་ཡིན།

   དེར་བརྟེན།  ཡི་དམ་གང་ཞིག་གིས་ཆོས་སྐྱོང་གི་ཚུལ་བཟུང་བ་ཡིན་ན། དེ་ལ་ཆོས་སྐྱོང་ལྟར་གསོལ་མཆོད་བྱ་དགོས།  མ་ཧཱ་ཀ་ལ་སོགས་འཇིག་རྟེན་ལས་འདས་པའི་ཆོས་སྐྱོང་ཕལ་ཆེར་སངས་རྒྱས་དངོས་ཡིན།  རྩ་བའི་ཆ་ནས་མ་ཧཱ་ཀ་ལ་འཕགས་པ་སྤྱན་རས་གཟིགས་ཀྱིས་སྤྲུལ་ཞིང་།  སྤྱན་རས་གཟིགས་ནི་སངས་རྒྱས་སོ། །དེ་བཞིན་དམ་ཅན་ཆོས་རྒྱལ་དང་དཔལ་ལྡན་ལྷ་མོ་གཉིས་ཀྱང་སོ་སོར་རྗེ་བཙུན་འཇམ་པའི་དབྱངས་དང་དབྱངས་ཅན་མས་སྤྲུལ་ཞིང་། འཇམ་པའི་དབྱངས་དང་དབྱངས་ཅན་མ་གཉིས་ཀྱང་སངས་རྒྱས་དང་ཡི་དམ་མོ། །འོན་ཀྱང་གང་གིས་སྤྲུལ་བའི་དཔལ་ལྡན་ལྷ་མོ་སོགས་ནི་སྤྲུལ་བ་སྟེ། རྣམ་པ་སྟོན་ཚུལ་མི་འདྲའོ། །

   གནས་ཆུང་ནི།  བོད་སྲིད་གཞུང་དང་རྒྱལ་བ་རིན་པོ་ཆེའི་ཆོས་སྐྱོང་ཡིན། དགེ་ལུགས་པས་དེ་དག་མཆོག་གསུམ་དུ་བསྡུས་ནས་མཆོད་སྲོལ་མེད་པར། འཇིག་རྟེན་པའི་ལྷ་རྣམས་ཇི་བཞིན་མཆོད་ཅིང་།  འདོད་དོན་བསྒྲུབ་ཕྱིར་མཆོད་ཙ་ན་སྡོངས་གྲོགས་ཀྱང་བླ་མེད་མཛད་པ་རེད། རྒྱའི་བཀོན་ལོ་ཡེ་ལྟ་བུའང་འདིའི་རིགས་སུ་གཏོགས་པ་ཡིན་པས།  འཇིག་རྟེན་པའི་ལྷ་ལྟར་མཆོད་བཀུར་བྱེད་དགོས་པ་རེད།   སྔར་གོང་མའི་དབུ་བླའམ་ཧོ་ཐོག་ཐུ་སོགས་བླ་མ་རྣམས་པེ་ཅིང་དུ་ཕེབས་དུས། ཚང་མས་བཀོན་ལོ་ཡེ་མཆོད་འདུག  དེ་དག་འཇིག་རྟེན་པའི་སྲུང་མའི་ཚུལ་དུ་མཆོད་ན་མི་འགྲིག་པ་ཅང་ཡོད་པ་མ་རེད།

—ཉི་མའི་གྲོང་ནས།

བརྩེ་སེམས་ཞེས་པའི་འཕྲིན་སྟེགས་ལས་བཤུས།