མཚོ་སྔོན་ནང་བསྟན་སློབ་གྲྭ་ཆེན་མོའི་མཐར་ཕྱིན་འཛིན་གྲྭའི་གྲྭ་སྐོར་དམ་བཅའ།

      མཚོ་སྔོན་ནང་བསྟན་སློབ་གྲྭའི་ཉིས་སྟོང་ཉི་ཤུ་ཐམ་པ་ལོར་མཐར་ཕྱིན་པའི་འཛིན་གྲྭ་སོ་སོའི་མཐའ་ཕྱིན་གྲྭ་སྐོར་དམ་བཅའ་ནི་མདོ་སྨད་བསྟན་པའི་འབྱུང་གནས་དྷི་ཚ་བཀྲ་ཤིས་ཆོས་སྡིངས་དང་བིས་མདོ་དགོན་ཆེན་འབའ་སེང་ཁྲི་དགོན་ཆེན་གསུམ་ནས་ཧོར་ཟླ་9 ཚེས་21་ཉིན་ནས་ཚེས་23 བར་ཉིན་གསུམ་ལ་གྲྭ་སྐོར་དམ་བཅའ་བཞག

      གྲྭ་སྐོར་དམ་བཅའ་འདི་ནི་མཚོ་སྔོན་ནང་བསྟན་སློབ་གྲྭའི་ཡོངས་འཛིན་ཁྲི་སངས་རྒྱས་རྒྱ་མཚོ་སོགས་འཛིན་གྲྭ་སོ་སོའི་དགེ་རྒན་རྣམས་པས་སྣེ་ཁྲིད་ནས་མདོ་སྨད་ཀྱི་དགོན་ཆེན་ཁག་ཏུ་གྲྭ་སྐོར་དམ་བཅའ་གནང་བ་ཞིག་ཡིན།

      དྷི་ཚ་དགོན་དུ་བཀའ་བཅུའི་ཡོངས་འཛིན་ཆེན་མོ་ཨ་ལགས་ཨོའུ་རྒྱ་ཚང་གིས་སྣེ་ཁྲིད་པའི་བཀའ་བཞི་འཛིན་གྲྭ་ལ་དྷི་ཚ་དགོན་གྱི་རྡོ་རམས་པ་ཨ་ཁུ་ལུང་རིགས།    སེང་གཞུང་འཇིགས་མེད།  གསེར་ལག་དགེ་ཚོགས་སོགས་གྲྭ་ཚང་འདུས་པ་བཞི་བརྒྱ་ལྷག་བཞུགས་པའི་དབུས་སུ་འཛིན་གྲྭ་སོ་སོས་མཛོད་འདུལ་བ་དབུ་མ་སོགས་གཞུང་ཆེན་ཁག་ནས་རྟགས་གསལ་བཏང་།

    བིས་མདོ་དགོན་ཆེན་དུ་ཡོངས་འཛིན་ཁྲི་སངས་རྒྱས་རྒྱ་མཚོས་སྣེ་ཁྲིད་པའི་ཕར་ཚད་འཛིན་གྲྭ་ལ་བིས་དགོན་གྱི་ཡོན་ཏན་གོང་འཕེལ་སོགས་དགེ་བཤེས་ཆེ་ཁག་གིས་ཕར་ཕྱིན་དང་བློ་རྟགས་སོགས་ནས་རྟགས་གསལ་མང་བོ་བཏང་།

    འབའ་སེང་ཁྲི་དགོན་དུ་ཡོངས་འཛིན་བྱ་མདོ་རབ་རྒྱས་ཀྱིས་སྣེ་ཁྲིད་པའི་བློ་སྦྱོང་འཛིན་གྲྭ་ལ་འབའ་སེང་ཁྲི་དགོན་གྱི་མཁན་པོ་བསྟན་འཛིན་རྣམ་རྒྱལ་དང་བསྟན་འཛིན་ནོར་བུ་ལ་སོགས་པས་དབུ་མ་དང་ཕར་ཕྱིན་མཛོད་འདུལ་བ་བཅས་གཞུང་ཆེན་ཁག་གི་དྲི་བ་མང་བོ་བཏང་།

བཀའ་བཞི་འཛིན་གྲྭ།

ཕར་ཚད་འཛིན་གྲྭ།

བློ་སྦྱོང་འཛིན་གྲྭ།

གསར་འགོད་པ།   རྨ་ལྷོ་བཀྲ་ཤིས་རྒྱ་མཚོ།