སློབ་གླིང་དབྱིན་སྐད་འགྲན་སྡུར།
2019/4/8
སློབ་བུ་རྣམས་ཀྱི་དབྱིན་ཡིག་གི་ཆུ་ཚད་ཇེ་མཐོ་དང་སྦྱོང་འདུན་ཆེ་རུ་གཏོང་ཆེད། སྤྱི་ཟླ་༤བའི་ཚེ་༨ཉིན་ལོ་རེའི་འཆར་ཅན་ལྟར་གངས་ལྗོངས་ཤེས་རིག་ནོར་བུའི་སློབ་གླིང་གི་དབྱིན་སྐད་ངག་རྩལ་འགྲན་སྡུར་སྐབས་དྲུག་པ་གླིང་སྨད་ཀྱི་ཚོགས་ཁང་ནས་གཟབ་རྒྱས་ངང་སྤེལ།
བྱ་འགུལ་སྟེང་རང་སློབ་གྲྭའི་འབྲིང་རིམ་གཉིས་དང་། ཆེད་ལས་མཐོ་འབྲིང་རིམ་པའི་འཛིན་གྲྭ་སོ་སོ་ཞུགས་པ་མ་ཟད། གངས་ལྗོངས་རྩྭ་ཐང་བུ་མོའི་སློབ་གྲྭའི་སློབ་མ་དགུ་ཡང་འགྲན་སྡུར་ལ་ཞུགས། འགྲན་སྡུར་གྱི་རྣམ་གྲངས་ལ། ༼༡༽དབྱིན་སྐད་གཏམ་བཤད། ༼༢༽གར་ཆུང་། ༼༣༽དབྱིན་གླུ་རྐྱང་ལེན། ༼༤༽དབྱིན་གླུ་མཉམ་ལེན་བཅས་ཡོད་ལ། འཛིན་གྲྭ་རེ་ལ་གཏམ་བཤད་པ་གཅིག་རེ་དང་རྐྱང་ལེན་གཅིག གར་ཆུང་དང་མཉམ་ལེན་བཅས་ཀྱི་གོ་སྐབས་སྤྲད།
དེ་ཡང་ཁུལ་ལས་རིགས་ལག་རྩལ་སློབ་དབྱིན་ཡིག་དགེ་རྒན་འཇིགས་མེད་དཔལ་ལྡན་དང་། མགོ་ལོག་རྟ་བྲག་དྭ་ཕྲུག་སློབ་གྲྭའི་དབྱིན་ཡིག་དགེ་རྒན་རྡོ་རྗེ་གྲོལ་མ། རྟ་བོ་བཅའ་སྡོད་སློབ་ཆུང་གཉིས་པའི་དབྱིན་ཡིག་དགེ་རྒན་གངས་དཔལ་རྣམ་རྒྱལ་བཅས་དཔྱད་འདེམས་པར་གདན་འདྲེན་ཞུས།
དཔྱད་འདེམས་དགེ་རྒན་རྣམ་པས་སྐར་གྲངས་གནང་བ་ལྟར་སྤྱི་སྡོམ་བྱས་མཐར། གཏམ་བཤད་འགྲན་སྡུར་ཁྲོད་མཐར་ཕྱིན་གཉིས་པའི་སློབ་གྲོགས་རིན་ཆེན་ནོར་བུ་ལ་ཨང་དང་བོའི་བྱ་དགའ་དང་། རྩྭ་ཐང་བུ་མོའི་སློབ་གྲྭའི་སློབ་མ་དབྱངས་ཅན་སྒྲོལ་མ་ལ་ཨང་གཉིས་པའི་བྱ་དགའ་ཐོབ།
དེ་ནས་རྐྱང་གཞས་འགྲན་སྡུར་ཁྲོད་མཐོ་གཉིས་དང་བོའི་སློབ་གྲོགས་སྐལ་བཟང་སྐྱབས་ལ་ཨང་དང་བོའི་བྱ་དགའ་དང་། རྩྭ་ཐང་བུ་མོའི་སློབ་གྲྭའི་སློབ་མ་ཚེ་རིང་སྒྲོལ་མར་ཨང་གཉིས་པའི་བྱ་དགའ་ཐོབ།
གར་ཆུང་འགྲན་སྡུར་ཁྲོད་མཐོ་གཅིག་དང་བོའི་སློབ་མ་མགོན་པོ་རྡོ་རྗེ་སོགས་ལ་ཨང་དང་བོའི་བྱ་དགའ་དང་། མཐར་ཕྱིན་གཉིས་པའི་གདུགས་དཀར་སྐྱབས་སོགས་ལ་ཨང་གཉིས་པའི་བྱ་དགའ་ཐོབ།
དབྱིན་གླུ་མཉམ་ལེན་འགྲན་སྡུར་ཁྲོད་མཐོ་གཅིག་དང་བོའི་སློབ་གྲོགས་བཀྲ་ཤིས་ཉི་མ་སོགས་ལ་ཨང་དང་བོའི་བྱ་དགའ་དང་། མཐར་ཕྱིན་དང་བོའི་སློབ་གྲོགས་བཀྲ་ཤིས་དོན་གྲུབ་སོགས་ལ་ཨང་གཉིས་པའི་བྱ་དགའ་ཐོབ་།
དེ་ནས་བྱ་འགུལ་སྤྱིའི་ཆ་སྙོམས་སྐར་གྲངས་སྤྱི་སྡོམ་ཁྲོད་མཐོ་གཉིས་དང་བོའི་འགྲན་ཞུགས་པར་ཨང་དང་བོའི་བྱ་དགའ་ཐོབ་པ་བཅས་རྒྱལ་ཁ་ཐོབ་བུ་སློབ་བུ་རྣམས་ལ་བྱ་དགའི་བདག་རྐྱེན་མི་དམན་པ་གནང་།
མཇུག་ཏུ་ཐེངས་འདིའི་བྱ་འགུལ་ལ་རྒྱབ་སྐྱོར་གནང་མཁན་གྱི་དགེ་རྒན་བསམ་འཕེལ་རྡོ་རྗེ་སོགས་དང་དཔྱད་འདེམས་དགེ་རྒན་རྣམས་ལ་བཀའ་དྲིན་མཚོན་བྱེད་རེ་ཕུལ་ཏེ་བྱ་འགུལ་བདེ་ལེགས་ངང་མཇུག་བསྡུས་སོ།།
གསར་འགོད་པ། ཨ་མཆོག་མགོན་པོ་སྐྱབས།
|