གངས་ལྗོངས་ཤེས་རིག་ནོར་བུའི་སློབ་གླིང་གི་2018ལོའི་སློབ་མ་གསར་བསྡུའི་གནས་ཚུལ།

     སྤྱི་ལོ་༢༠༡༨ལོའི་སྤྱི་ཟླ་༩ཚེས་༡ཉིན་ཁུར་གྱིས་དུད་པའི་གསེར་ལྡན་གྱི་ལོ་ལེགས་དང་སྟོན་དུས་ཀྱི་ཁ་ཆར་འདྲེས་མའི་ཀློང་ནས་གངས་ལྗོངས་ཤེས་རིག་ནོར་བུའི་སློབ་གླིང་གི་སྟོན་དུས་ཀྱི་སློབ་མགོ་གསར་དུ་ཚུགས་ཤིང་།  སློབ་མགོ་ཚུགས་པ་ནས་བཟུང་སློབ་གླིང་འདིའི་དགེ་སློབ་ལས་བཟོ་བ་ཡོངས་ཀྱིས་ཉིན་མཚན་མེད་པར་ད་ལོའི་སློབ་མ་གསར་བསྡུའི་ཐད་ལ་གྲྭ་སྒྲིག་གང་ལེགས་བྱས་པར་མ་ཟད།  ད་ལོར་སློབ་གླིང་འདིར་ཞུགས་འདོད་ཀྱི་འདུན་པ་སྙིང་ལ་ལྕི་བའི་བོད་མདོ་དབུས་ཁམས་གསུམ་ནས་སླེབས་པའི་གསར་ཞུགས་སློབ་མ་མང་ཙམ་བསྡུ་བའི་ཆེད་དུ་སློབ་མ་རྙིང་བ་བརྒྱ་དང་ལྔ་བཅུ་ལྷག་གིས་རང་རང་གི་ཉལ་ཁང་ཕུད་ནས་གུར་ནང་དུ་གནས་སྤོར་བྱས།

    ཚེས་༥ཉིན་ནས་བཟུང་སློབ་གླིང་འདིའི་སློབ་བསྡུའི་རྩ་དོན་བཞིན་རྒྱུ་ཐོབ་ངོ་གསུམ་གཏན་འགོག་བྱས་ཏེ་བདེན་པ་བདེན་དྲང་གིས་ད་ལོར་མིང་ཐོ་བཀོད་པའི་སློབ་མ་རྣམས་ཀྱི་མིང་ཐོ་སྤྱི་བསྡོམས་དང་གསར་ཞུགས་སློབ་མ་རྣམས་ལ་ཐེངས་འདིའི་རྒྱུགས་ཞུགས་ཀྱི་མིང་ཐོ་བཀོད་ཅིང་།  ད་ལོར་གསར་ཞུགས་སློབ་མ་༡༢༠༠ལྷག་གིས་སློབ་གླིང་འདིར་མིང་ཐོ་བཀོད་ཡོད་པ་དང་།   དེའི་ཁྲོད་ནས་སློབ་མ་༧༠༠ལྷག་དངོས་སུ་འབྱོར་ནས་ཐེངས་འདིའི་སློབ་བསྡུའི་རྒྱུགས་གཞི་ལ་ཞུགས་ཡོད།

     ཚེས་༨ཉིན་གསར་ཞུགས་སློབ་མ་དངོས་སུ་རྒྱུགས་ལེན་གྱི་ཉིན་མོ་ཡིན་ཞིང་།  ཉིན་འདིར་སློབ་གླིང་འདིའི་བྱེད་པོ་བཀའ་དྲིན་ཅན་རྭ་རྒྱ་འཇིགས་མེད་རྒྱལ་མཚན་མཆོག་གིས་རྒྱུགས་ཞུགས་སློབ་མ་དང་ཁྱིམ་བདག་སྟོང་ཕྲག་ལྷག་ལ་སློབ་གླིང་འདིའི་སློབ་གསོའི་ཁ་ཕྱོགས་དང་འབྲེལ་ནས་བོད་སྤྱི་ཚོགས་ཀྱི་འཕེལ་རྒྱས་ཀྱི་ལམ་སྟོན་གལ་ཆེན་གནང་བར་མ་ཟད།   སློབ་གླིང་འདི་ལོ་ངོ་ཉི་ཤུ་རྩ་བཞི་ལྷག་ལ་གནས་ཐུབ་པ་ནི་བོད་སྤྱི་ཚོགས་ཀྱི་བཀའ་དྲིན་ཡིན་པ་དང་། འབྱུང་འགྱུར་ད་དུང་མུ་མཐུད་དུ་གནས་ཐུབ་མིན་ནི་ང་ཚོ་ཐུན་མོང་གི་སྟོབས་ཤུགས་ལ་འབྲེལ་བ་ཡོད་པ་སོགས་ཞལ་གསུང་ཡིད་དུ་འཁེལ་བ་མང་དུ་གནང་།

    ད་ལོར་རྒྱུགས་ར་བདུན་དུ་བགོས་ནས་གསར་ཞུགས་སློབ་མ་རྣམས་ལ་དངོས་སུ་ཡིག་རྒྱུགས་བླངས་ཤིང་།  དགེ་རྒན་དང་ལས་བཟོ་བ་ཡོངས་ཐེངས་འདིའི་རྒྱུགས་རྟོག་ཏུ་ཚན་ཁག་བྱས་ནས་བགོས་པ་དང་།   རྒྱུགས་ལེན་གྲུབ་རྗེས་ཁྱིམ་བདག་དང་གསར་ཞུགས་སློབ་མ་རྣམས་ལ་དུས་ཚོད་འགོར་འགྱངས་མི་བྱ་བའི་ཆེད་དུ་སློབ་གླིང་འདིའི་དགེ་སློབ་ལས་བཟོ་བ་ཡོངས་གཞུང་ལས་ཁང་དུ་འདུས་ནས་ཉིན་མཚན་མེད་པར་རྒྱུགས་ཤོག་ལ་བལྟས་ནས་སློབ་མ་རེ་རེའི་སྐར་གྲངས་སྤྱི་བསྡོམས་དང་རེའུ་མིག་ལ་འགོད་པ་སོགས་བྱས་ཤིང་།  ཚེས་༩ཉིན་སྔ་མོ་ནས་དངོས་སུ་རྒྱུགས་སྐར་ཁྱབ་བསྒྲགས་གནང་སྟེ་ཡིག་ཚད་ལོངས་པའི་སློབ་མ་བསྡུ་ལེན་དང་འཛིན་གྲྭ་བཀོད་བསྒྲིགས་སོགས་བྱས།

    ད་ལོར་གསར་ཞུགས་སློབ་མ་མང་བོ་ཞིག་སློབ་གླིང་གི་སློབ་བསྡུའི་ཚད་ཐིག་ཏུ་དངོས་སུ་ལོངས་ནའང་རྒྱབ་ཁབ་རིམ་པའི་སྲིད་ཇུས་ཀྱི་དབང་གིས་སློབ་ཞུགས་བྱེད་མ་ཐུབ་པ་དག་ལ་སློབ་གླིང་གི་དྲ་བའི་གསར་འགོད་པས་ཆེད་དུ་བཅར་འདྲི་བྱས་པར་མ་ཟད།  སློབ་དཔོན་རིན་པོ་ཆེ་འཇིགས་མེད་རྒྱལ་མཚན་མཆོག་སྐུ་དངོས་སུ་ཕེབས་ནས་གསལ་བཤད་དང་སེམས་གསོའི་ཞལ་ཏ་གནང་ཡོད།

    རྒྱུགས་ཞུགས་སློབ་མ་༧༠༠ལྷག་གི་ཁྲོད་ནས་སློབ་མ་༢༧༩སློབ་གླིང་འདིར་དངོས་སུ་ཞུགས་ཐུབ་པ་བྱུང་བ་བཅས་ད་ལོའི་ལོ་གཅིག་གི་སློབ་བསྡུའི་རིམ་པ་བདེ་བླག་ངང་མཇུག་གྲུབ་པར་བྱས་སོ།།

     ད་ལོར་སློབ་གླིང་འདིར་ཞུགས་འདོད་ཀྱི་འདུན་པ་སྙིང་ལ་ལྕི་བའི་བོད་མདོ་དབུས་ཁམས་གསུམ་ནས་སླེབས་པའི་གསར་ཞུགས་སློབ་མ་མང་ཙམ་བསྡུ་བའི་ཆེད་དུ་སློབ་མ་རྙིང་བ་བརྒྱ་དང་ལྔ་བཅུ་ལྷག་གིས་རང་རང་གི་ཉལ་ཁང་ཕུད་ནས་གུར་ནང་དུ་གནས་སྤོར།

གསར་ཞུགས་སློབ་མར་མིང་ཐོ་འགོད་ཀྱིན་པ།

     སློབ་དཔོན་ཆེན་མོ་འཇིགས་མེད་རྒྱལ་མཚན་མཆོག་གིས་རྒྱུགས་ཞུགས་སློབ་མ་དང་ཁྱིམ་བདག་སྟོང་ཕྲག་ལྷག་ལ་སློབ་གླིང་འདིའི་སློབ་གསོའི་ཁ་ཕྱོགས་དང་འབྲེལ་ནས་བོད་སྤྱི་ཚོགས་ཀྱི་འཕེལ་རྒྱས་ཀྱི་ལམ་སྟོན་གལ་ཆེན་གནང་བ།

རྒྱུགས་ར་དང་བོའི་ཡུལ་ངོས།

རྒྱུགས་ར་གཉིས་པའི་ཡུལ་ངོས།

རྒྱུགས་ར་གསུམ་པའི་ཡུལ་ངོས།

རྒྱུགས་ར་བཞི་བའི་ཡུལ་ངོས།

རྒྱུགས་ར་ལྔ་བའི་ཡུལ་ངོས།

རྒྱུགས་ར་དྲུག་པའི་ཡུལ་ངོས།

རྒྱུགས་ར་བདུན་པའི་ཡུལ་ངོས།

རྒྱུགས་འབྲས་ལ་ལྟ་བཞིན་པ།

རྒྱུགས་འབྲས་ཁྱབ་བསྒྲགས་བྱེད་བཞིན་པ།