བྱང་ཆུབ་སེམས་དཔའི་ནོར་བུའི་ཕྲེང་བ་ཞེས་བྱ་བ་བཞུགས་སོ།།

    ༄༅།། བྱང་ཆུབ་སེམས་དཔའི་ནོར་བུའི་ཕྲེང་བ་ཞེས་བྱ་བ་བཞུགས་སོ།།


༄༅།།རྒྱ་གར་སྐད་དུ། བོ་ངྷི་ས་ཏཱ་མ་ཎི་ཨ་བ་ལི། བོད་སྐད་དུ། བྱང་ཆུབ་སེམས་དཔའ་ནོར་བུའི་ཕྲེང་བ།།
ཐུགས་རྗེ་ཆེན་པོ་ལ་ཕྱག་འཚལ་ལོ།།
བླ་མ་རྣམས་ལ་ཕྱག་འཚལ་ལོ།།
དད་པའི་ལྷ་ལ་ཕྱག་འཚལ་ལོ།།
ཐེ་ཚོམ་ཐམས་ཅད་སྤང་བྱ་ཞིང་།།
བསྒྲུབ་ལ་ནན་ཏན་གཅེས་སུ་བྱ།།
གཉིད་རྨུགས་ལེ་ལོ་རབ་སྤང་ཞིང་།།
རྟག་ཏུ་བརྩོན་འགྲུས་འབད་པར་བྱ།།
དྲན་དང་ཤེས་བག་ཡོད་པས།།
དབང་བོའི་སྒོ་རྣམས་རྟག་ཏུ་བསྲུང་།།
ཉིན་མཚན་དུས་གསུམ་ཡང་དང་ཡང་།།
སེམས་ཀྱི་རྒྱུད་ལ་བརྟག་པར་བྱ།།
བདག་གི་ཉེས་པ་བསྒྲག་བྱ་ཞིང་།།
གཞན་གྱི་འཁྲུལ་བ་བཙལ་མི་བྱ།།
བདག་གི་ཡོན་ཏན་སྦ་བྱ་ཞིང་།།
གཞན་གྱི་ཡོན་ཏན་བསྒྲག་པར་བྱ།།
རྙེད་དང་བཀུར་སྟི་སྤང་བྱ་ཞིང་།།
ཁེངས་དྲེགས་རྟག་ཏུ་སྤང་བར་བྱ།།
འདོད་པ་ཆུང་ཞིང་ཆོག་ཤེས་དང་།།
བྱས་ལ་དྲིན་དུ་གཟོ་བར་བྱ།།
བྱམས་དང་སྙིང་རྗེ་བསྒོམ་བྱ་ཞིང་།།
བྱང་ཆུབ་སེམས་ནི་བརྟན་པར་བྱ།།
མི་དགེ་བཅུ་ནི་སྤང་བྱ་ཞིང་།།
རྟག་ཏུ་དད་པ་བརྟན་པར་བྱ།།
ཁྲོ་དང་ང་རྒྱལ་གཞོམ་བྱ་ཞིང་།།
དམན་པའི་སེམས་དང་ལྡན་པར་བྱ།།
ལོག་པའི་འཚོ་བ་སྤང་བྱ་ཞིང་།།
ཆོས་ཀྱི་འཚོ་བས་འཚོ་བར་བྱ།།
ཟང་ཟིང་ཐམས་ཅད་སྤང་བྱ་ཞིང་།།
འཕགས་པའི་ནོར་གྱིས་བརྒྱན་པར་བྱ།།
འདུ་འཛི་ཐམས་ཅད་སྤང་བྱ་ཞིང་།།
དགོན་པ་ལ་ནི་གནས་པར་བྱ།།
འཁྱལ་བའི་ཚིག་རྣམས་སྤང་བྱ་ཞིང་།།
རྟག་ཏུ་ངག་ནི་བསྡམ་པར་བྱ།།
བླ་མ་མཁན་པོ་མཐོང་བའི་ཚེ།།
གུས་པར་རིམ་གྲོ་བསྐྱེད་པར་བྱ།།
གང་ཟག་ཆོས་ཀྱི་མིག་ཅན་དང་།།
ལས་དང་པོ་བའི་སེམས་ཅན་ལ།།
སྟོན་པའི་འདུ་ཤེས་བསྐྱེད་པར་བྱ།།
སེམས་ཅན་ཐམས་ཅད་མཐོང་བའི་ཚེ།།
ཕ་མ་བུ་ཚའི་འདུ་ཤེས་བསྐྱེད།།
སྡིག་པའི་གྲོགས་པོ་སྤང་བྱ་ཞིང་།།
དགེ་བའི་བཤེས་གཉེན་བསྟེན་པར་བྱ།།
སྡང་དང་མི་བདེའི་སེམས་སྤང་ཞིང་།།
གང་དུ་བདེ་བར་འགྲོ་བར་བྱ།།
གང་ལའང་ཆགས་པ་སྤང་བྱ་ཞིང་།།
ཆགས་པ་མེད་པར་གནས་པར་བྱ།།
ཆགས་པས་བདེ་འགྲོའང་མི་ཐོབ་ཅིང་།།
ཐར་བའི་སྲོག་ཀྱང་གཅོད་པར་བྱེད།།
གང་དུ་བདེ་བའི་ཆོས་མཐོང་བ།།
དེར་ནི་རྟག་ཏུ་འབད་པར་བྱ།།
ཐོག་མར་བརྩམས་པ་གང་ཡིན་པ།།
དང་བོར་དེ་ཉིད་བསྒྲུབ་བྱ་སྟེ།།
དེ་ལྟ་ན་ནི་ཀུན་ལེགས་བྱས།།
གཞན་དུ་གཉིས་ཀ་འགྲུབ་མི་འགྱུར།།
རྟག་ཏུ་སྡིག་དང་དགའ་བྲལ་བས།།
གང་དུ་མཐོ་བའི་སེམས་བྱུང་ཚེ།།
དེ་ཚེ་ང་རྒྱལ་བཅག་བྱ་ཞིང་།།
བླ་མའི་གདམས་ངག་དྲན་པར་བྱ།།
ཞུམ་པའི་སེམས་ནི་བྱུང་བའི་ཚེ།།
སེམས་ཀྱི་གཟེངས་ནི་བསྟོད་པར་བྱ།།
གཉིས་ཀ་སྟོང་དང་ཉིད་དུ་བསྒོམ།།
གང་དུ་ཆགས་སྡང་ཡུལ་བྱུང་ཚེ།།
སྒྱུ་མ་སྤྲུལ་བ་བཞིན་དུ་ལྟ།།
མི་སྙན་ཚིག་རྣམས་ཐོས་པའི་ཚེ།།
བྲག་ཅ་བཞིན་དུ་བལྟ་བར་བྱ།།
ལུས་ལ་གནོད་པ་བྱུང་བའི་ཚེ།།
སྔོན་གྱི་ལས་སུ་བལྟ་བར་བྱ།།
བས་མཐའ་དགོན་པར་རབ་གནས་ཤིང་།།
རི་དྭགས་ཤི་བའི་རི་བཞིན་དུ།།
བདག་གིས་བདག་ཉིད་སྦ་བྱ་ཞིང་།།
ཆགས་པ་མེད་པར་གནས་པར་བྱ།།
རྟག་ཏུ་ཡི་དམ་བརྟན་བྱ་ཞིང་།།
ལེ་ལོ་སྙོམས་ལས་སེམས་བྱུང་ཚེ།།
དེ་ཚེ་བདག་ལ་རྔན་བགྲང་ཞིང་།།
བརྟུལ་ཞུགས་སྙིང་ནས་དྲན་པར་བྱ།།
གལ་ཏེ་གཞན་དག་མཐོང་བའི་ཚེ།།
ཞི་དེས་གསོང་བོར་སྨྲ་བ་དང་།།
ཁྲོ་གཉེར་ངོ་ཟུམ་སྤང་བྱ་ཞིང་།།
རྟག་ཏུ་འཛུམ་ཞིང་གནས་པར་བྱ།།
རྒྱུན་དུ་གཞན་དག་མཐོང་བའི་ཚེ།།
སེར་སྣ་མེད་ཅིང་སྦྱིན་ལ་དགའ།།
ཕྲག་དོག་ཐམས་ཅད་སྤང་བར་བྱ།།
གཞན་གྱིས་སེམས་ནི་བསྲུང་བའི་ཕྱིར།།
རྩོད་པ་ཐམས་ཅད་སྤང་བྱ་ཞིང་།།
རྟག་ཏུ་བཟོད་དང་ལྡན་པར་བྱ།།
ངོ་དགའ་མེད་ཅིང་གསར་འགྲོགས་མེད།།
རྟག་ཏུ་ཚུགས་ནི་ཐུབ་པར་བྱ།།
གཞན་ལ་བརྙས་པ་སྤང་བྱ་ཞིང་།།
གུས་པའི་ཚུལ་གྱིས་གནས་པར་བྱ།།
གཞན་ལ་གདམས་ངག་བྱེད་པའི་ཚེ།།
སྙིང་རྗེ་ཕན་སེམས་ལྡན་པར་བྱ།།
ཆོས་ལ་སྐུར་བ་མི་འདེབས་ཤིང་།།
གང་མོས་དེ་ལ་འདུན་པ་དང་།།
ཆོས་སྤྱོད་རྣམ་བཅུའི་སྒོ་ནས་ནི།།
ཉིན་མཚན་ཕྱད་བར་འབད་པར་བྱ།།
དུས་གསུམ་དགེ་བ་ཅི་བསགས་པ།།
བླ་མེད་བྱང་ཆུབ་ཆེན་པོར་བསྔོ།།
བསོད་ནམས་སེམས་ཅན་རྣམས་ལ་བདར།།
རྟག་ཏུ་ཡན་ལག་བདུན་པ་ཡི།།
སྨོན་ལམ་ཆེན་པོ་གདབ་པར་བྱ།།
དེ་ལྟར་བྱས་ན་བསོད་ནམས་དང་།།
ཡེ་ཤེས་ཚོགས་གཉིས་རྫོགས་པར་འགྱུར།།
སྒྲིབ་པ་གཉིས་ཀྱང་ཟད་འགྱུར་ཏེ།།
མི་ལུས་ཐོབ་པ་དོན་ཡོད་པས།།
བླ་མེད་བྱང་ཆུབ་ཐོབ་པར་འགྱུར།།
དད་པའི་ནོར་དང་ཚུལ་ཁྲིམས་ནོར།།
གཏོང་བའི་ནོར་དང་ཐོས་པའི་ནོར།།
ཁྲེལ་ཡོད་ངོ་ཚ་ཤེས་པའི་ནོར།།
ཤེསབ་རབ་ཉིད་ཀྱི་ནོར་བདུན་ཏེ།།
ནོར་གྱི་དམ་པ་འདི་དག་ནི།།
མི་ཟད་པ་ཡི་ནོར་བདུན་ཏེ།།
མི་མ་ཡིན་ལ་བརྗོད་མི་བྱ།།
མང་བོའི་ནང་དུ་ངག་ལ་བརྟག  །
གཅིག་བུར་འདུག་ན་སེམས་ལ་བརྟག །
              རྒྱ་གར་གྱི་མཁན་པོ་དཔལ་ལྡན་མར་མེ་མཛད་བཟང་བོ་ཡེ་ཤེས་སྙིང་བོས་མཛད་པ།  བྱང་ཆུབ་སེམས་དཔའི་ནོར་བུའི་ཕྲེང་བ་རྫོགས་སོ།། །།

<<བསླབ་བྱ་གཅེས་བསྡུས།>>ཞེས་པ་ལས་གསར་འགོད་པ་སེར་སྐོར་འཇམ་ཚེས་ཡི་གེར་འགོད།

རྩོམ་སྒྲིག་པ།:   བན་ཤུལ་འཇམ་དབྱངས། སྤེལ་དུས:   2018-08-18 ལྟ་ཀློག (5529)