༈ རྨོངས་སེལ་མཐུན་ཚོགས་ཀྱིས་སྒྲུབ་བཞིན་པའི་ཟབ་སྦྱོང་འཛིན་གྲྭ་
འཚོགས་ཐེངས་བཅུ་གསུམ་པ་བདེ་ལེགས་ངང་མཇུག་གྲོལ་བ།
ང་ཚོ་རྨོངས་སེལ་མཐུན་ཚོགས་ཀྱི་བསམ་འདུན་ནི་དམངས་ཚོགས་ལ་ཁ་ཕྱོགས་ཤིང་ལག་ལེན་དམངས་ཚོགས་ལ་ཞུགས་པའི་གོ་རིམ་ཁྲོད་ནས་གྲུབ་འབྲས་ཀྱང་ལོ་རེ་བཞིན་གང་ལ་གང་འཚམ་ཞིག་འབྱུང་བཞིན་ཡོད་པ་ནི་ང་ཚོ་ཚང་མ་ཧ་ཅང་དགའ་འོས་པ་ཞིག་རེད།
ཉིས་སྟོང་དྲུག་ནས་འགོ་བརྩམས་ཏེ་ཀྱག་ཀྱོག་གི་ལམ་ག་མང་ཙམ་ཞིག་བརྒྱུད་ནས་ལམ་ལ་ཆས་ཤིང་གོམ་ཁ་མདུན་དུ་སྤོས་ཏེ་མཚམས་མ་བཞག་པ་ནི་ང་ཚོར་མཚོན་ན་གཟི་བརྗིད་དང་ཕ་ཡུལ་ལ་མཚོན་ན་བྱས་རྗེས་ཤིག་གི་དོད་དུ་བརྩིས་ཆོག་སྙམ།
དང་བླངས་མི་སྣ་འགའ་ཞིག་གིས་དཔལ་འབྱོར་དང་ཐབས་ལམ་སོགས་རང་སྟེང་ནས་བསྐྲུན་ཏེ་ཡུལ་གྱི་དམངས་ཚོགས་ལ་ཁ་ཕྱོགས་ནས་ཡིག་རྨོངས་སེལ་བའི་བྱ་བ་དམིགས་སུ་བཟུང་ཞིང་དམངས་ལ་ཕན་པའི་བྱ་བ་བསྒྲུབས་ནས་ལོ་ངོ་བཅུ་གསུམ་འགོར་སོང་།
བྱ་བ་འདི་འདྲ་སྒྲུབ་པ་ལ་ཕྱི་ནང་གཉིས་ཐད་ནས་བར་ཆད་མང་ཙམ་ཡོད་ཀྱང་བདེན་པ་བདེན་དྲང་གི་ལམ་ག་ཞིག་འགྲིམ་པའི་གྲུབ་འབྲས་ལ་བལྟས་ནས་བཤད་ན་ཧ་ཅང་ལེགས་པའི་ལམ་ཞིག་ཟིན་ཡོད་པས་དེ་ནི་རྨོངས་སེལ་མཐུན་ཚོགས་ཀྱི་སྤྱི་ཕན་རྣམ་དག་ཡིན་པ་མཚོན་བྱེད་དུ་ངོས་བཟུང་ན་ག་ལ་མི་ཆོག
ད་སྐབས་རང་སྡེ་བའི་དཔོན་པོ་དང་ལས་སྣེ་བ་རྣམས་ཀྱིས་རྒྱབ་སྐྱོར་དང་ཐུགས་སེམས་མཉམ་བསྐྱོད་ཡོད་པས་ང་ཚོ་རྨོངས་སེལ་མཐུན་ཚོགས་ལ་སྤོབས་སེམས་དང་རེ་བ་སྔར་ལས་ལྷག་པ་ཞིག་ཡོད་རྐྱེན་ང་ཚོས་མཉམ་དུ་བརྩོན་པ་གནོངས་དང་ཕ་ཡུལ་ལ་དཔལ་ཡོན་འཛུགས་བསྐྲུན་བྱ་ཞེས་པའི་ཆོད་སེམས་བསྟན་ཡོད།
༡༠༡༨ ༡ ༢༦ ཉིན་སོ་ལྟ་བས།
རྨོངས་སེལ་མཐུན་ཚོགས་ངོ་སྤྲོད་མདོར་བསྡུས།
ས་གནས།
ཀན་ལྷོ་ཁུལ་རྨ་ཆུ་རྫོང་དབལ་བན་ཡུལ་ཚོ།
གཙོ་སྒྲུབ་མི་སྣ།
གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་བརྒྱད་པའི་མཐར་ཕྱིན་སློབ་མ་སྔ་འགྱུར་བ་བློ་བཟང་དོན་གྲུབ། སྐབས་བཅོ་ལྔའི་མཐར་ཕྱིན་སློབ་མ་བློ་བཟང་རྣམ་རྒྱལ། སྐབས་བཅུ་དྲུག་པའི་མཐར་ཕྱིན་སློབ་མ་པདྨ་རྒྱ་མཚོ།
སྐབས་བཅུ་དགུ་བའི་མཐར་ཕྱིན་སློབ་མ་སྐལ་བཟང་བསོད་ནམས་དང་། ས་གནས་སློབ་ཆེན་པའི་སྡེ་ཁག་གི་མི་སྣ་བཅས་སོ། །
|