2023ལོའི་སྤྱི་ཟླ8ཚེས28ཉིན།  མཚོ་སྔོན་མི་རིགས་དཔེ་སྐྲུན་ཁང་གིས་པར་སྐྲུན་བྱས་པའི་པོད་བཅོ་བརྒྱད་ཅན་གྱི་《ལྡོང་ཡོན་ཏན་རྒྱ་མཚོའི་བརྩམས་ཆོས་ཕྱོགས་བསྒྲིགས》ཞེས་པའི་པར་སྐྲུན་འགྲེམ་སྤེལ་དང་དཔྱད་གླེང་ཚོགས་འདུ་ཟི་ལིང་གྲོང་ཁྱེར་སོ་ཧྥེ་ཐི་རྒྱལ་སྤྱིའི་གསོལ་མགྲོན་ཁང་དུ་གཟབ་རྒྱས་ངང་འཚོགས་ཤིང་།  མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ལྷན་དང་། མཚོ་སྔོན་དགེ་འོས་སློབ་ཆེན། གངས་ལྗོངས་ཤེས་རིག་ནོར་བུའི་སློབ་གླིང་། གངས་ལྗོངས་རྩྭ་ཐང་བུ་མོའི་སློབ་གྲྭ། མཚོ་སྔོན་མི་རིགས་སློབ་ཆེན། མཚོ་སྔོན་ཞིང་ཆེན་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས།  མཚོ་སྔོན་སྤྱི་ཚོགས་ཚན་རིག་ཁང་། མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་། གཙོས་དགེ་འོས་སློབ་གླིང་།  བོད་ལྗོངས་སློབ་གྲྭ་ཆེན་མོ། དགོན་སྡེ་སོ་སོའི་བླ་སྤྲུལ་དང་དགེ་བཤེས།  གཞན་སྤྱི་ཚོགས་སྟེང་གི་ལས་རིགས་སོ་སོའི་མི་སྣ་དང་། བོད་ཀྱི་རིག་གནས་ཞིབ་འཇུག་པ་དང་སློབ་གཉེར་བ་སོགས་སྐུ་མགྲོན་མང་བོ་ཚོགས་འདུར་ཞུགས།   ཀྲུང་གོ་བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་འཛིན་གཞོན་པ་ཟུར་པ་བློ་བཟང་ལྷུན་གྲུབ་རྡོ་རྗེ་དང་། མཚོ་སྔོན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཟླ་བ་ཚེ་རིང་རྣམ་གཉིས་ཀྱིས་པར་སྐྲུན་འགྲེམ་སྤེལ་དབུ་འབྱེད་བྱས་པ་མ་ཟད་ཤིས་ཚིག་ཕུལ་བ་དང་། མཚོ་སྔོན་མི་རིགས་དཔེ་སྐྲུན་ཁང་གི་ཧྲེ་ཀྲང་གཞོན་པ་བཀྲ་ཤིས་དོན་གྲུབ་ཀྱིས་བརྩམས་ཆོས་པར་སྐྲུན་གྱི་གསལ་བཤད་གནང་།    ཕྱོགས་སོ་སོ་ནས་ཕེབས་པའི་མཁས་དབང་མང་བོས་༼ལྡོང་ཡོན་ཏན་རྒྱ་མཚོའི་བརྩམས་ཆོས་ཕྱོགས་བསྒྲིགས༽དང་འབྲེལ་བའི་གསུང་བཤད་གནང་སྟེ་ཁོང་གི་མཛད་རྗེས་ཀྱི་ཟུར་མི་འདྲ་བ་མང་བོའི་ཕྱོགས་ནས་ཚད་མཐོའི་གདེང་འཇོག་གལ་ཆེན་གནང་བ་དང་།  གསར་འགྱུར་ཁང་སོ་སོས་ཁོང་ལ་བཅར་འདྲི་བྱས།