ངེས་ཤེས་ཆིག་བརྒྱ་མ།
ལྡོང་ཡོན་ཏན་རྒྱ་མཚོ།
༥༡
ཉ་སྟོང་ཚེས་བརྒྱད་དང་ས་ག་ཟླ་བ། ཆོ་འཕྲུལ་སྨོན་ལམ་ཆེན་མོ་དང་དགའ་ལྡན་ལྔ་མཆོད་སོགས་སུ། དགོན་པར་ཕྱག་སྐོར་དང་མཆོད་མཇལ་བྱེད་མཁན་ཇེ་ཉུང་དུ་འགྲོ་བཞིན་ཡོད་མོད། ལྷ་སའི་བར་སྐོར་གྱིས་གཙོས་འཛུགས་སྐྲུན་ལེགས་པའི་དགོན་མཐའ་དག་ཏུ། ཉིན་རེ་བཞིན་གཉེན་སྟོན་གྲ་སྒྲིག་ལ་པར་ལེན་མཁན་གྱི་གཞོན་ནུ་ཕོ་མོ་མང་བོས་འཚང་ཁ་རྒྱག་གིན་འདུག འདི་ལྟ་བུ་ལ་དད་མོས་ཀྱི་འགྱུར་ལྡོག་གམ་ཉམས་རྒུད་ཟེར།
༥༢
བྱ་བ་རེ་འགའ་ལམ་ལྷོང་དང་ལེགས་གྲུབ་བྱུང་བ་ཙམ་གྱིས་ཁེངས་ཤིང་ངའོ་སྙམ་པའི་ང་རྒྱལ་བྱ་མི་རུང་སྟེ། སྟབས་ལེགས་སྟེས་དབང་དང་སྔོན་བསགས་བསོད་ནམས་ཀྱི་སྟོབས་ཟེར་བ་ཞིག་ཀྱང་ཡོད།
༥༣
དར་རྒུད་དང་འཕོ་འགྱུར་མང་བ་འཁོར་བའམ་འཇིག་རྟེན་གྱི་རང་གཤིས་ཡིན་པས། ཚད་ལས་བརྒལ་བའི་ཚོར་འདུ་དང་བྱ་སྤྱོད་སྤེལ་མི་ཉན། བཟང་ངན་གྱི་གནས་ཚུལ་གང་ཡིན་ནའང་སྔར་གྱི་རང་བབས་སུ་འཁོད་པའི་སྐབས་ཤིག་ཅིས་ཀྱང་ཡོད་ངེས།
༥༤
དབང་ཐང་ལ་དར་རྒུད་དང་དབང་ཤུགས་ལ་ཆེ་ཆུང་ཡོད་རུང་། ལས་འབྲས་ཀྱི་རྒྱ་མར་གཞལ་ཉིན། དབུལ་ཕྱུག་དང་དཔོན་གཡོག་ལ་ཁྱད་པར་མེད་པར་ཐམས་ཅད་འདྲ་མཉམ་ཡིན།
༥༥
གནས་ཚུལ་ཙག་ཙིག་ཅིག་གི་ཆེད་དུ་འཁོན་རྩོད་ཆེན་མོ་བརྒྱབ་ན་དོན་མེད། དེས་ཚེ་སྲོག་འཆོར་བའི་ཚད་ལ་མ་སླེབས་ཀྱང་། སེམས་ཁམས་ལ་འགྱུར་བ་ཐེབས་ཏེ་ཡུན་རིང་བོར་རང་ཉིད་མནར་གཅོད་ཀྱི་ཀློང་དུ་ཚུད་འགྲོ། དེ་བས། གུ་ཡངས་ཅུང་ཙམ་གནོངས་དང་ཕ་རོལ་བོས་ཀྱང་བསམ་ཤེས་བྱེད་འོང་།
༥༦
གཏིང་ཟབ་པའི་རིག་གཞུང་དང་རྒྱུན་རིང་བའི་གོམས་སྲོལ་བཟང་བོ་དག་ལ་ཅི་ཙམ་དགག་པ་བརྒྱབ་ཀྱང་མེད་པར་གཏོང་དཀའ་མོད། སྣང་ཚུལ་དེས་རང་ཉིད་ཁོར་ཡུག་ཅིག་དང་ཚོགས་སྡེ་དག་ལས་ལོགས་སུ་གྱེས་ཏེ་ཁེར་རྐྱང་དུ་འགྱུར་འགྲོ་བས། གསར་བའི་སྣང་བ་དང་ཅོལ་ཆུང་གི་གཤིས་ལུགས་ལ་དང་བོ་ནས་བདག་པོ་བྱེད་ཚུལ་ཤེས་དགོས།
༥༧
ཚོགས་སྡེ་ཞིག་ལ་མཚོན་ན། ཕྱོགས་དང་རིས་སུ་གཅོད་པར་དགའ་བའི་མི་དག་ལས་གནོད་ཚབ་ཆེ་བ་ཞིག་མེད་དེ། དེས་ཕྱིའི་སྟོབས་ཤུགས་དང་ནང་གི་མཐུན་སྒྲིལ་སོགས་སིལ་བུར་གཏོར་འགྲོ།
༥༨
གཡོ་སྒྱུས་བྱས་པའི་ལས་དག་ཀྱང་གནས་སྐབས་ལམ་འགྲོ་རྒྱུགས་པ་སོགས་ཡོད་སྲིད་མོད། ནམ་ཞིག་ཅིས་ཀྱང་ལྷང་ལ་འབུད་ངེས་ཏེ། དྲི་ངན་གྱིས་བཟུང་བའི་སྐྱག་ལུད་དག་ཐུམ་དུ་གཅུག་པའམ་ས་འོག་ཏུ་སྦས་པ་སོགས་གང་བྱས་ཀྱང་། ཡུན་མི་རིང་བར་རང་མཚང་ཕྱི་ལ་མངོན་འོང་།
༥༩
མི་ལ་ལྷན་སྐྱེས་སུ་ཡོད་པའི་རང་གཤིས་དེ་ཇི་འདྲ་ཞིག་ཡིན་ཡང་། སེམས་ཁམས་ཀྱི་ཆ་ལ་ལེགས་བཅོས་བྱས་ན་བཟང་ཕྱོགས་སུ་འཕེལ་ཐུབ་ཅེས་ཚན་རིག་པ་དག་གིས་ཀྱང་འདོད་ཀྱིན་ཡོད། དེ་ལྟར་ན། སྐྱོན་ཀུན་ཟད་དང་ཡོན་ཏན་ཀུན་རྫོགས་ཀྱི་དུས་ཤིག་ཀྱང་ཡོད་མི་ཆོག་ཅེས་གཟུར་གནས་དཔྱོད་ལྡན་སུ་ཞིག་གིས་སྨྲ་ཐུབ་ཨང་།
༦༠
འབྱོར་ཕྱུག་དང་དབང་ཐོབ། སྙན་གྲགས་དང་མཛེས་སྡུག་སོགས་ཡོད་ཚད་གཞན་ལ་གཤིབ་བསྡུར་གྱིས་བརྩོན་ལེན་བྱེད་པ་ནི་རང་སྡུག་རང་གིས་ཉོས་པ་ཙམ་ལས་མེད། ཐབས་ལམ་དེ་བསྐྱུར་ནས། ནམ་རྒྱུན་རང་ཉིད་ལ་བདོག་ཅིང་དབང་བ་དེས་ཡིད་ཚིམ་པར་བྱས་ན། ཁྱོད་ལ་སོས་དལ་བག་ཕེབས་ཀྱི་འཚོ་བ་དང་བདེ་སྐྱིད་ཅིག་ངང་གིས་ཐོབ་འོང་།
མུ་འགོད།
|