ཁྲི་ཀའི་ཡུལ་གྱི་རྭ་རྒྱའི་སློབ་གྲོགས་ལྷན་འཛོམས། 

༢༠༢༣ལོའི་ཟླ ༡ཚེས་༡༥ཉིན་མདོ་སྨད་ཁྲི་ཀ་ས་ཁུལ་གྱི་རྭ་རྒྱའི་མཐར་ཕྱིན་སློབ་མ་རྣམས་གནས་གཅིག་ཏུ་འཛོམས་ནས་ལོ་སར་འདུ་འཛོམས་བྱས་པ་དང་། འདུ་འཛོམས་སྟེང་སློབ་གྲོགས་གསར་རྙིང༢༤འཛོམས། སློབ་གྲོགས་རྒན་པ་སྨན་པ་ཤེས་རབ་རྒྱ་མཚོ་ལགས་ཀྱིས་ང་ཚོ་ཕྱོགས་སོ་སོ་ནས་རྭ་རྒྱ་ཤེས་རིག་གླིང་དུ་འཛོམས་སྟེ་དཀའ་སྡུག་འདྲེས་མའི་འཚོ་བའི་ཁྲོད་སྙིང་རུས་ཆེན་པོས་སློབ་སྦྱོང་བྱས་པ་དང་། མཐར་རང་གི་ཐེག་ཚོད་ཀྱིས་བསླབ་འབྲས་རེ་ཁྱེར་ཏེ་སྤྱི་ཚོགས་ཀྱི་གང་སར་སོང་ཡང་། མཛའ་བརྩེ་ཁྱད་པར་བ་ཞིག་དང་དུས་ཚོད་དམིགས་གསལ་བ་ཞིག་གི་བར་གསེང་ནས་འདི་ལྟར་འཛོམས་པོ་བྱུང་ནས་སློབ་གྲོགས་གསར་རྙིང་ངོ་ཤེས་པར་སྤྲོ་བ་དང་། མདོར་ན་ང་ཚོ་ལ་དེ་རིང་གི་ཉི་མ་འདི་ལྟ་བུ་ཞིག་དང་མདུན་ལམ་འདི་ལྟ་བུ་ཞིག་ཡོད་པ་འདི་ཡང་དགེ་རྒན་རྣམས་ཀྱི་བཀའ་དྲིན་ལས་བྱུང་བ་ཡིན་ལ། སློབ་གྲོགས་རྣམས་ཀྱི་ཕྱི་ཐག་ལས་བྱུང་བའང་ཡིན། རྗེས་སོར་ཡང་མུ་མཐུད་ནས་འདི་ལྟར་འདུ་འཛོམས་བྱ་རྒྱུ་གལ་ཆེ་བར་བཤད། དེ་བཞིན་དུ་སློབ་གྲོགས་དཔལ་ལྡན་དང་པདྨ་ཡང་གསང་དང་དཀོན་མཆོག་སོགས་ཀྱིས་དེ་འབྲེལ་གྱི་སློབ་ཚོགས་མཐུན་སྒྲིལ་དང་ཁ་ཕྱོགས། རྒྱུད་འཛིན་བཅས་ཀྱི་ཐད་ནས་ཁ་བརྡ་བྱས། གཞན་སློབ་གྲོགས་པདྨ་ཡང་གསང་གིས་ནུབ་བྱང་མི་རིགས་སློབ་ཆེན་གྱི་འབུམ་རམས་པའི་བསླབ་འབྲས་ཕུལ་བྱུང་ཅན་བླངས་སྟེ་མཐར་ཕྱིན་པར་རྟེན་འབྲེལ་ཞུས་པ་དང་། མཇུག་ཏུ་སློབ་ཚོགས་ཀྱི་ཚོགས་གཙོ་ངག་རྒྱམ་ལགས་ཀྱིས་སློབ་ཚོགས་ཀྱི་གནས་ཚུལ་དང་འབྲེལ་ནས་ང་ཚོ་འདི་ལྟར་འཛོམས་དགོས་དོན་ཡང་རིག་གནས་ཤིག་དང་འབྲེལ་ཡོད་ལ། ང་ཚོ་འདི་ལྟར་འཛོམས་ཐུབ་པ་ཡང་དགེ་རྒན་རྣམས་ཀྱི་བཀའ་དྲིན་དང་སློབ་གྲོགས་ཚོའི་མཛའ་བརྩེ་དང་འབྲེལ་ཡོད་པའི་མཇུག་བསྡུས་སྐད་ཆ་བཤད་རྗེས་འདུ་འཛོམས་རྒྱལ་ཁའི་ངང་གྲོལ།