༄༅།།བོད་ཀྱི་སྐད་ཡིག་རིག་གནས་སློབ་གླིང་གིས་རྒྱལ་ཡོངས་མི་རིགས་སློབ་ཆེན་གྱི་ཚད་མ་རིག་པའི་རྟགས་གསལ་འགྲན་ཚོགས་སྐབས་གཉིས་པའི་སྟ་གོན་ཏེ། ནུབ་བྱང་མི་རིགས་སློབ་ཆེན་གྱིས་ཚད་མ་རིག་པའི་རྟགས་གསལ་འགྲན་སྡུར་སྐབས་གཉིས་པ་སྤེལ་བ།
༼གསར་འགོད་པ། བཀྲ་ཤིས་ཚེ་ཐར། རྡོ་རྗེ་འཚོ།༽
སྤྱི་ལོ༢༠༡༧ལོའི་ཟླ༡༢པའི་ཚེས༡༩ཉིན། བོད་ཀྱི་སྐད་ཡིག་རིག་གནས་སློབ་གླིང་དང་ཚད་མ་རིག་པའི་སློབ་དཔྱོད་ཁང་།ཚད་མ་རིག་པའི་མཐུན་ཚོགས་བཅས་ཀྱིས་གཙོ་སྒྲུབ་བྱས་པའི་རྒྱལ་ཡོངས་མི་རིགས་སློབ་ཆེན་གྱི་ཚད་མ་རིག་པའི་རྟགས་གསལ་འགྲན་ཚོགས་སྐབས་གཉིས་པའི་སྟ་གོན་ཏེ། ནུབ་བྱང་མི་རིགས་སློབ་ཆེན་གྱི་ཚད་མ་རིག་པའི་རྟགས་གསལ་འགྲན་སྡུར་སྐབས་གཉིས་པ་སློབ་ཁུལ་གསར་བའི་བདེན་སྙེག་ཐོག་ཁང་གི༢༠༡རུ་སྤེལ་བ། སློབ་གླིང་གི་ཚད་མ་རིག་པའི་སློབ་དཔྱོད་ཁང་གི་ཀྲུའུ་རིན། དགེ་རྒན་ཆེན་མོ་ཆུ་སྐྱེས་དགེ་འདུན་བསམ་གཏན་དང་། ལོ་ཙཱ་སློབ་དཔྱོད་ཁང་་གི་ཀྲུའུ་རིན་དགེ་རྒན་ཆེན་མོ་གཞོན་པ་སྒྲོལ་མ་ཚེ་རིང་། དགེ་རྒན་མཆོག་ལྡན་ཚེ་རིང་། དགེ་རྒན་མ་ཎི་དོན་གྲུབ། དགེ་རྒན་སྟག་བྷེ། འབུམ་རམས་པ་སྟག་འབུམ་རྒྱལ་བཅས་དགེ་རྒན་དང་ཞིབ་འཇུག་སློབ་མ་མི༩ཡིས་འགྲན་སྡུར་གྱི་དཔྱད་འདེམས་པའི་འགན་བཞེས་ལ། སློབ་གླིང་སོ་སོའི་སློབ་མ༤༠༠ལ་ཉེ་བ་ཟུར་ཞུགས་བྱས་ཡོད།
ཐོག་མར་དགེ་རྒན་ཆེན་མོ་ཆུ་སྐྱེས་དགེ་འདུན་བསམ་གཏན་ལགས་ཀྱིས་རྟགས་གསལ་འགྲན་སྡུར་གྱི་བྱེད་སྒོ་སྤེལ་བའི་དོན་སྙིང་དང་དམིགས་ཡུལ། གོ་རིམ་དང་ཆ་རྐྱེན་སོགས་གསལ་བཤད་གནང་རྗེས་འགྲན་སྡུར་གྱི་འགོ་བརྩམས། ཐེངས་འདིའི་བྱེད་སྒོའི་འགྲན་སྡུར་རྣམ་པ་རིགས་གཉིས་སུ་ཕྱེ་ནས་སྤེལ་བ་སྟེ། གཅིག་ནི་ཚོ་ཆུང་བགར་ནས་ཐུན་མོང་གི་རྟགས་གསལ་འགྲན་སྡུར་བྱས་ལ། ཚོ་ཆུང་སོ་སོ་རྒོལ་བ་སྔ་ཕྱི་གཉིས་སུ་ལངས་ཏེ་རྟགས་གསལ་འགྲན་སྡུར་བྱས་པ། གཉིས་ནི་མི་སྒེར་གྱི་རྟགས་གསལ་འགྲན་སྡུར་ཏེ། འགྲན་ཞུགས་པས་ཡུལ་དངོས་ནས་རྒྱན་བླངས་ནས་འགྲན་ཞུགས་ཀྱི་གོ་རིམ་གཏན་འཁེལ་བྱས་པ་དང་། གོ་རིམ་བཞིན་གཙོ་གཞི་གཙོར་བཟུང་ནས་རྟགས་གསལ་འགྲན་སྡུར་བྱས་པ། དུས་ཚོད་གཅིག་དང་ཕྱེད་ཀ་ལྷག་གི་འགྲན་སྡུར་བརྒྱུད།
ཐེངས་འདིའི་ཚད་མ་རིག་པའི་རྟགས་གསལ་འགྲན་སྡུར་ཁྲོད་ཐུན་མོང་གི་གཟེངས་རྟགས་ཨང་དང་པོ་དང་གཉིས་པ་ཚོ་ཚུང་དང་པོ་དང་གཉིས་པར་ཐོབ་ལ། མི་སྒེར་གྱི་གཟེངས་རྟགས་ཨང་དང་པོ་སློབ་གྲོགས་འབྲུག་ལྷ་རྩེ་བརྒྱད་ཀྱིས་བླངས་པ་དང་། ཨང་གཉིས་པ་སློབ་གྲོགས་བཙུན་ཐར་ཚེ་རིང་དང་ཆོས་མཚོ་རྒྱལ་གཉིས་ཀྱིས་བླངས། ཨང་གསུམ་པ་སློབ་གྲོགས་འཇིགས་བྱེད་སྐྱབས་དང་འཇམ་དབྱངས་དོན་གྲུབ། བསོད་ནམས་སྐྱིད་ཀྱིས་བླངས་པ། རྟིང་སྐུལ་གྱི་གཟེངས་རྟགས་སློབ་གྲོགས་བུན་ཁྲང་རྡོ་རྗེ་དང་ཁྲོ་རྒྱལ། ཀླུ་མོ་མཚོ། ཟླ་བ་དོན་གྲུབ་བཅས་ཀྱིས་བླངས། དེ་ནས་དགེ་རྒན་ཆེན་མོ་ཆུ་སྐྱེས་དགེ་འདུན་བསམ་གཏན་ལགས་ཀྱིས་ཐེངས་འདིའི་ཚད་མ་རིག་པའི་འགྲན་སྡུར་གྱི་བྱེད་སྒོར་མཇུག་སྡོམ་གནང་བ་དང་། དེ་རྗེས་དཔྱད་འདེམས་དགེ་རྒན་རྣམ་པས་འགྲན་སྡུར་ཁྲོད་གཟེངས་རྟགས་ཐོབ་པའི་ཐུན་མོང་དང་མི་སྒེར་ལ་བྱ་དགའ་གནང་བ་དང་ཆབས་གཅིག་བྱེད་སྒོ་ཡོངས་སུ་མཇུག་བསྡུས།
ཐེངས་འདིའི་ཚད་མ་རིག་པའི་འགྲན་སྡུར་གྱི་བྱེད་སྒོས། མི་འགྱངས་པར་ནུབ་བྱང་མི་རིགས་སློབ་གྲྭ་ཆེན་མོ་ནས་འཚོག་འཆར་ཡོད་པའི་རྒྱལ་ཡོངས་མི་རིགས་སློབ་ཆེན་གྱི་ཚད་མ་རིགས་པའི་རྟགས་གསལ་འགྲན་ཚོགས་སྐབས་གཉིས་པར་སྔོན་འགྲོའི་མཐུན་རྐྱེན་ལེགས་པོ་ཞིག་བསྐྲུན་ལ། སློབ་མའི་རིག་པ་སྦྱོང་བརྡར་དང་། མི་རིགས་རང་གི་ཐུན་མོང་མ་ཡིན་པའི་རིག་གནས་ཀྱི་ཁྱད་ཆོས་མ་ཉམས་གོང་སྤེལ་ལ་སྐུལ་འདེད་ཀྱི་ནུས་པ་ངེས་ཅན་ཐོན་ནོ།།
|