༢༠༡༧ལོའི་ཟླ༡༢ཚེས༨ཉིན་མགོ་ལོག་ཁུལ་རྨ་ཆེན་རྫོང་མི་རིགས་སློབ་འབྲིང་དང་བོ་རུ་བོད་ཡིག་བློ་རྒྱུགས་འགྲན་བསྡུར་གྱི་བྱ་འགུལ་སྤེལ་བ།

   དེང་སྐབས་མི་ཤེས་པ་མང་བོས་དེང་རབས་སློབ་ཁྲིད་ཁོ་ན་གཙུག་ཏུ་བཟུང་ནས་གནའ་བོའི་ཁྲིད་ཐབས་ལེགས་པ་མང་བོ་འཕོངས་ཕྱིས་ཀྱི་རྡོ་བཞིན་འདོར་བར་བྱེད་པ་ནི་མ་ཤེས་པ་སྟེ། སྤྱིར་དེང་རབས་སློབ་ཁྲིད་ཀྱང་དགོས་མོད། བོད་ཀྱི་སྐད་ཡིག་དང་གཞུང་ལུགས་སློབ་ཁྲིད་བྱེད་པ་ལ་དེང་རབས་སློབ་ཁྲིད་ཁོ་ནས་གཏན་ནས་བྱེད་ཐབས་མེད།  ལྷག་པར་བོད་ཀྱི་རིག་གཞུང་སློབ་གཉེར་བ་ཞིག་ལ་མཚོན་ན་བློ་འཛིན་རྒྱུ་ནི་ཧ་ཅང་གལ་ཆེ་བ་ཡིན། དཔེར་ན་རྗེ་ཙོང་ཁ་བས་གཞུང་ཆེན་བཅུ་བདུན་བློ་ཐོག་ནས་དཔེ་ཁྲིད་གནང་བ་དང་ཉིན་རེར་ཤོག་བུ་མདའ་ཚད་མ་བཅུ་བདུན་རེ་བློར་འཛིན་གནང་བ།  མཁས་པ་རེ་ཟུང་དང་ལྷན་དུ་ཉི་རྩེ་ས་ལ་མ་བརྒྱབ་པར་ཤོག་བུ་མདའ་ཚད་མ་མང་བོ་བློ་ལ་འཛིན་རེས་ཀྱི་འགྲན་སྡུར་བྱས་མྱོང་བ་སོགས་རྣམ་ཐར་ཁག་ཏུ་གསལ་བ་འདིས་ཀྱང་ང་ཚོར་སློབ་གསོ་གལ་ཆེན་ཞིག་བཏང་ཡོད།  མཁས་གྲུབ་དགེ་ལེགས་དཔལ་བཟང་དང་གཡག་སྡེ་པཎ་ཆེན་གཉིས་ཀྱིས་བཀའ་འགྱུར་བློ་ལ་འཛིན་རེས་ཀྱི་འགྲན་སྡུར་སྤེལ་བའི་ཚུལ་དང་།
    ཨ་རིག་དགེ་བཤེས་ཆེན་མོས་ང་ལ་སྤྲུལ་སྐུ་མེད། གལ་སྲིད་སྤྲུལ་སྐུ་དགོས་ན་ལམ་རིམ་སྔགས་རིམ་གཉིས་ཁྱི་གཏུམ་པོས་དེད་ཀྱང་ཁ་ནས་མི་ཆད་པ་ཞིག་ཡོད་ན་དེ་ངའི་སྤྲུལ་སྐུ་ཡིན་ཞེས་གསུངས་པ་སོགས་ལ་དཔག་ན་བློ་འཛིན་གྱི་གལ་ཆེན་རང་བཞིན་ང་ཚོས་ངེས་པར་ཤེས་དགོས།   རྡོ་སྦིས་དགེ་བཤེས་ཤེས་རབ་རྒྱ་མཚོས་ཉིན་རེར་ཤོག་བུ་སྣ་རིང་བཅོ་ལྔ་ལྷག་རེ་ཆག་མེད་དུ་ཐུགས་ལ་འཛིན་པར་མཛད་པ་སོགས་ནི་ཚོད་མེད་དུ་རིག་པ་ངོམ་པར་བྱས་པ་མ་ཡིན་པར་བོད་ཀྱི་རིག་གཞུང་གི་གལ་གནད་ཅིག་བློ་འཛིན་མ་བྱས་ན་མི་ཡོང་བས་ཡིན།

   ལོ་རིམ་གསུམ་པ་དང་བཞི་བའི་སྐོར་ལ། ཨང་དང་བོ་བཞི་གཅིག་བཀྲ་ཤིས་ཆོས་མཚོ། ཨང་གཉིས་པ་བཞི་གཅིག་བསོད་ནམས་སྟོབས། ཨང་གསུམ་པ་བཞི་གཅིག་དཔལ་འཛོམ་ལྷ་མོ། རྟིང་སྐུལ་བྱ་དགའ་ཐོབ་མཁན་བཞི་གཅིག་གཡང་སྒྲོན་ལྷ་མོ་བཅས་ལ་ཐོབ་བོ།།

   སློབ་བུ་དག་ལ་བྱ་དགའ་ཐོབ་པ་ནི་སློབ་མ་དག་གིས་འབད་བརྩོན་ལ་བལྟོས་པ་ཞིག་ཀྱང་ཡིན་མོད། དགེ་རྒན་དག་གིས་ལངས་སྔ་དགོང་འཕྱི་བྱས་པའི་གྲུབ་འབྲས་ཁོ་ན་ཡིན་སྟབས་དགེ་རྒན་སྒྲོལ་མ་མཚོ་དང་གསང་བ། རིག་པའི་ཡེ་ཤེས། མགོན་པོ་སྐྱབས། ཀརྨ་སྐྱབས་གཙང་རབ་བརྟན་བཅས་ལ་ཡང་གཟེངས་བསྟོད་བྱ་དགའ་བསྩལ།  མཇུག་མཐར་སློབ་གཙོ་རྒྱལ་ཕྲུག་ལགས་དང་གཙང་རབ་བརྟན་གྱི་གཏམ་བཤད་ཁྲོད་བཀྲ་ཤིས་པའི་ངང་མཇུག་རྫོགས།

བོད་ཡིག་བློ་རྒྱུགས་འགྲན་སྡུར་གྱི་བྱ་འགུལ་དངོས་སུ་སྤེལ་བ།

ཕུལ་བྱུང་སློབ་མར་བྱ་དགའ་གནང་བ།

སློབ་ཆུང་སློབ་མར་བྱ་དགའ་གནང་བ།

རྟིང་སྐུལ་བྱ་དགའ་ཐོབ་པའི་སློབ་མའི་མཉམ་པར།

བློར་འཛིན་སྣེ་ཁྲིད་དགེ་རྒན་རྣམ་པའི་མཉམ་པར།

བྱ་དགའ་ཐོབ་པའི་སློབ་མའི་མཉམ་པར།

གསར་འགྱུར་འབྲི་མཁན་ཚ་ནག་ཀུན་བཟང་།  གསར་འགྱུར་མཁོ་སྤྲོད་པ་སྦྲ་ནག་པ•མགོན་པོ་སྐྱབས།