༄༅། ། རྗེ་བཙུན་འཇིགས་མེད་དཔལ་ལྡན་རྒྱ་མཚོའི་ཞལ་གདམས་བདུད་རྩི་རྒྱ་མཚོའི་ཐིགས་པ་ཞེས་བྱ་བ་བཞུགས་སོ།
།
སྦྱིན་བདག་གི་སྐོར།
རྒྱ་སྦྱིན་བདག་བཙལ་ན་གྲུབ་རྟགས་སྟོན་དགོས།
རྒྱ་མིས་སྐྱེ་བ་ཕྱི་མ་གང་དུ་སྐྱེ་རྒྱུ་རེད།
ང་དོན་ཞིག་ཡོད་པས་འགྲུབ་རྒྱུ་ཨེ་རེད་ཅེས་གསལ་བོར་མི་བཤད།
སྔ་མར་ཅི་བྱས་ད་ལྟའི་ལུས་ལ་ལྟོས། །ཕྱི་མར་གར་སྐྱེས་རང་གི་སེམས་ལ་དྲིས།
།ཞེས་གསུངས་པ་ལྟར་སྐྱེ་བ་གང་དུ་སྐྱེ་མིན་དེ་རང་ལ་ཐུག་ཡོད།
དེང་སང་གྲྭ་བ་ཚོས་སྦྱིན་བདག་བུད་མེད་དང་འགྲོགས་ནས་ཟ་ཁང་སོགས་སུ་སོང་ནས་ཁ་བརྡ་སོགས་སྣ་ཚོགས་བྱེད།
རིམ་བཞིན་བུད་མེད་ལ་འདྲིས་ནས་དམ་ཚིག་ཉམས་པའི་རྒྱུར་བྱེད།
དེ་མིན་ཡང་བུད་མེད་དང་འདུག་འགྲེང་གི་ལྟུང་བ་རྒྱུན་དུ་འབྱུང་།
རྒྱུ་ནོར་གྱི་སྐོར།
སྔོན་སྐྱེས་བུ་དམ་པ་དག་གིས་དངུལ་སྒོར་སྤྱོད་ཁང་ལ་འཇོག
རང་ཅག་གིས་སྔས་མགོར་བཞག་ནས་ཟྭ་རྒྱག
བསོད་ནམས་ཟེར་བའི་འདུ་འཛི་དེ་ཡང་ཆོས་ཀྱི་བར་ཆད་ཡིན་པས་སྤོངས།
།ཞེས་གསུངས་པ་ལྟར་བསོད་ནམས་ཡིན་ཟེར་ཚད་ལག་ཏུ་མི་ལེན།
མཉམ་མེད་ཇོ་བོ་ཆེན་པོ་གང་དུ་འདུ་འཛི་ཡོད་ན་འབྲོ་བར་བྱེད། རང་ཅག་གང་ན་འདུ་འཛི་ཡོད་པ་དེ་ལ་རྒྱུགས།
རང་ཅག་བསོད་ནམས་དང་འདུ་འཛི་སོགས་ཕྱིན་ཅི་ལོག་ལ་དགའ་བ་འདི་ཆོས་ཀྱི་བར་ཆད་ཡིན།
བྱེ་བྲག་སྨྲ་བས་འཕགས་པའི་རིགས་བཞི་འཇོག་པ་དབུ་མ་བས་འགོག་པ་ཡིན་མོད།
རང་ཅག་རྣམས་ལ་དེ་རྒྱུད་ལ་སྐྱེས་པ་ཤིན་ཏུ་གལ་ཆེ་བ་ཡིན།
དུང་ཙེ་མང་ན་སྲལ་རྒྱོ་རེད། ཁང་བ་བཟང་ན་སྲལ་རྒྱོ་རེད།
རྒྱས་རྒྱས་མང་ན་སྲལ་རྒྱོ་རེད།
དེ་དག་གིས་བཀའ་གདམས་པའི་དགེ་བའི་བཤེས་གཉེན་རྣམས་ལ་དགག་པ་བྱེད་པ་རེད།
ས་ཁང་རེ་ཡོད་ན་དེས་བཟང་མོད། ད་དེས་མི་ཆོག་གི
དེང་སང་རྒྱའི་མགྲོན་པོ་ལ་རེ་བཞིན་ཡོད་དེ། མགྲོན་པོ་མེད་ན་ད་ལོ་མགྲོན་པོ་མེད་པས་ཡོང་སྒོ་ཉུང་རྒྱུ་རེད་ཅེས་སེམས་ཁྲལ་བྱེད་མོད།
ཡོང་སྒོ་ཉུང་ན་ཉུང་སྐྱོན་མེད། རྒྱའི་མགྲོན་པོ་ལ་རེ་སྟེ།
དེ་དག་གི་སྒོར་མོ་མཁོ་མོད་མི་མི་མཁོ། དེ་འདྲ་བྱེད་མི་རུང་།
སྔོན་ཤོག་བུ་ཉོས་ནས་སོང་ནས་དཔར་དགོས།
ཤིང་དཔར་གྱི་གླ་དོང་ཙེ་འགའ་སྟེར་དགོས། པོད་གཅིག་དཔར་ན་ཇ་ལྡུག་དགོས།
ད་ལྟ་རང་གིས་དཔར་ནས་བཙོང་སྟེ་མགོ་ནས་ལེན་པ་ཡིན།
ད་ལྟ་རང་ཅག་གིས་འདུ་ཁང་བཙོང་། སྐུ་འདྲ་བཙོང་།
གསུང་བཙོང་བ་སོགས་གང་ཡིན་ཡིན་བཙོང་མོད་འདང་བརྒྱག་རྒྱུ་ཤིན་ཏུ་མང་།
ཅ་ལག་མང་བོ་མེད་ན་ལེགས།
ཅ་ལག་མང་ན་སྡོད་མི་ཚུགས། དགེ་བཤེས་གླང་རི་ཐང་བས་རང་གི་ཅ་ནེའི་ནང་དུ་མཆོད་པ་བཤམས་པ་ཡིན།
སྔོན་ཆད་དགེ་བཤེས་ཡིན་ན་སྐུ་གཤེགས་དུས་རྒྱུ་ནོར་མང་བོ་ཡོད་ན་ངོ་ཚ་ཡིན།
ད་ལྟ་དགེ་བཤེས་དག་སྐུ་གཤེགས་དུས་རྒྱུ་ནོར་མེད་ཅིང་ཚོགས་སུ་འགྱེད་རྒྱ་ཆེན་པོ་མ་འགྱེད་ན་ངོ་ཚ་ཡིན་པས་ཕྱིན་ཅི་ལོག་ཏུ་སོང་།
སྔོན་ཆད་ཀྱི་དགེ་བཤེས་དག་ལ་ཅི་ཡང་མེད་མོད་ད་ལྟའི་དགེ་བཤེས་དག་ལ་རླངས་འཁོར་སོགས་མི་འཛོམས་པ་མེད།
དེང་སང་དོང་ཙེ་མང་བོ་སྟེར་མཁན་ལ་ངར་བ་ཞིག་རེད་ཟེར། འདོད་ཡོན་རྒྱས་ན་བཟང་ན་ཐང་མོད།
དེ་ལས་འདུལ་བའི་ཕྱག་ལེན་གསུང་མཁན་ཞིག་ཡིན་ན་ལེགས། སྐུ་ཡོན་ཅན་ལ་ཕྱག་འཚལ་དགོས་པ་ལས།
ཨ་ལགས་ཚོ་ལ་ཕྱག་འཚལ་དོན་མེད་དེ།
ཧོར་ཚང་དགེ་བཤེས་ཀྱིས་མགོ་སྐམ་པོ་དང་ལག་པ་རློན་པ་གཉིས་ཐུག་པ་ལ་དགོས་པ་མེད་གསུངས་པ་བཞིན་ནོ།
།
ད་ལྟ་དགོན་པ་འདིའི་གཞོན་པ་དག་གིས་སྒོར་མོ་གསོག་གིན་མེད་པ་འདྲ་སྟེ།
དེ་ནི་ཤིན་ཏུ་ལེགས། ཡིན་ཡང་ལོ་ཡར་སོན་ན་གསོག་ན་ཐང་།
དགེ་བཤེས་ཡིན་ཟེར་བ་དག་ཀྱང་རྒྱ་ནག་ལ་སོང་ནས་རྒྱུ་ནོར་གསོག་པ་ཡིད་ཆད་སྤྱད་ཡིན།
རྒྱ་གར་ན་ལྷ་རམས་པ་འགའ་རེས་སྐྱ་སར་བབས་ནས་རྒྱུ་ནོར་གསོག་པ་ཡོད་དེ་ཡིད་ཕམ་མོ། །
ཨ་ཁུ་ཚོས་སྤྲང་བོས་ཟ་ཟ་བྱས་ན་ལེགས་ཏེ།
ཆོས་ཕུགས་སྤྲང་ལ་གཏོད་པ་ཞེས་གསུངས་པ་བཞིན་ཨ་ཁུ་ཚོ་སྤྲང་བོ་ཡིན་ན་ལེགས། །
རྩོམ་ཁུངས། ཤེས་རབ་གཡང་དཔེ་མཛོད་ཁང་གི་འཕྲིན་སྟེགས།
|